Lege so Dutingo Womua Asala Ye na ndo Awali Use

SANDRA ayeke mbeni womua so ayeke na Australie. Na ngoi so koli ti lo akui a sala angu awe, gi fade fade, ye ni ayengi Sandra ngangu. “Ye ni ahon ndo ti mbi ti hinga so mbi glisa, na mbeni lege so mbi ku pepe, koli ti mbi nga kota kamarade ti mbi. Laso, mbi lingbi ti dabe ti mbi biani pepe tongana nyen mbi londo la ni na da ti kaïngo kobela mbi kiri na kodoro wala ye so mbi sala na tanga ti lango ni so. Na yâ ti ambeni yenga so aga na pekoni, mbito ti mbi aga ye so aso na yâ tele ti mbi lakue.”

Sandra ayeke na mbeni kamarade so aga mbakoro awe, Elaine, so aglisa nga koli ti lo asala angu omene awe. Elaine aduti na tele ti koli ti lo, David, teti anze omene kozoni si lo kui na kobela ti cancer. Vundu ti lo ayeke la ni mingi si a ninga pepe na peko ti kuâ ti koli ti lo, lo ga waziba teti mbeni kete ngoi. Ngu use na pekoni, lo tï na gbele azo kue. Wanganga ti lo awara ye oko pepe so afa so lo yeke na kobela ti mitele. Ye oko, lo ba so Elaine afa pepe vundu ti lo na gigi, tongaso lo wa lo ti gue na kodoro na ti sala kue ti toto. Elaine atene: “A hunda na mbi ngoi mingi ti hon ndo ti vundu ti mbi,” na lo kiri lo tene so tongana lo yeke gi lo oko, “Fani mingi mbi lï na yâ chambre na mbi yôro li ti mbi na yâ ti abongo ti David.”

Biani, salango ye na gbele kui ti mbeni zo so e ndoye lo mingi ayeke nde nde, teti dutingo womua andu biani ye mingi ahon gi ti duti na fini na koli pepe. Na tapande, Sandra, teti mbeni ngoi, aba so lo yeke tongana ti kozoni pepe. Legeoko tongana ambeni wali mingi so aga womua ade ti ninga pepe, lo kue lo ba so lo woko, lo yeke na siriri pepe. Sandra adabe ti lo: “Teti so koli ti mbi si ayeke mu ka la ni andangba desizion, gi hio tongaso, mbi yeke gi mbi oko ti mu adesizion so. Mbi lango nzoni pepe. Mbi nze. A yeke la ni ngangu ti hinga mbilimbili ye so a lingbi mbi sala.”

Na ndo sese kue, e yeke wara lâ oko oko mara ti atapande tongana ti Sandra na Elaine. Kobela, andao, abira, zingo mbeni mara ti zia mbeni nde na place ni, nga na salango ngangu kue ayeke kono wungo ti awomua.a Mingi ti awali so ayeke hu pono na yâ bê ti ala, na hingango pepe ye so a lingbi ala sala. Ye nyen akamarade na asongo alingbi ti sala ti mu maboko na ala ti luti na gbele dutingo womua? Article ti peko amu ambeni wango so alingbi ti mu maboko.

[Kete Tene na Gbe Ni]