“I ga ndulu na Nzapa, na fade Lo ga ndulu na i”
Ândö nga laso: Lo wara lani ngangu ti gbian ye
SANDRA, mbeni wali na Mexique, afa tele ti lo tongana mbeni zo so sewa ti lo ayeke bâ ka lo na sioni lê. Lâ ti pendere ti lo abuba teti so sewa ti lo ake lo na afa ndoye na mbage ti lo pëpe. Lo tene: “Na lâ ti pendere ti mbi, mbi bâ pasi teti ye oko anzere na mbi pëpe na mbi yeke na kite na ndo fini ti mbi nga na ndo gigi.”
Atâa so lo yeke na kota da-mbeti, Sandra ato nda ti nyon lani vin so babâ ti lo ayeke zia ni na da. Tongana ngoi ayeke hon, lo to nda ti vo ngbenda ti sämba ti lo mveni na lo ga ngbâa ti sämba. Lo tene: “Mbeni ye oko pëpe apusu mbi ti duti na fini.” Teti so ye ahon ndo ti lo, lo bi tele ti lo na yâ nyongo mbangi. Lo tene: “Oko ye so alingbi ti mû maboko na mbi ti girisa akpale ti mbi, ayeke lani aye so mbi zia ni na yâ bozo ti mbi: mbeni ngbenda ti sämba, ayorö wala mbeni kete mbangi.”
Na peko ti so Sandra ahunzi lani mandango mbeti ti lo na ndo lege ti kaïngo kobela, lo tï tâ na yâ nyongo sämba ni mveni. Lo tara ândö ti fâ tele ti lo. Ye oko, lo kui pëpe.
Sandra agi gbä na yâ alege ti vorongo nde nde, mungo maboko na lege ti yingo nga na lege ti atënë ti bibe. Teti so lo yeke na beku pëpe na lo hinga ye so lo lingbi ti sala pëpe, fani mingi, lo dekongo na Nzapa: “Mo yeke na ndo wa? Ngbanga ti nyen mo mû maboko na mbi pëpe?” Na ngoi so lo bâ so lo yeke ye oko pëpe, mbeni oko ti aTémoin ti Jéhovah asala lisoro na lo. Ye so azi lege na mbeni mandango Bible. Tongana Sandra amanda lani so “[Jéhovah] ayeke ndulu na azo so bê ti ala afâ awe”, ye so agbu bê ti lo mingi.—Psaume 34:19.
Ita-wali so afa ye na Sandra amû maboko na lo ti bâ so Jéhovah Nzapa ahinga so e yeke azo so e woko ngbanga ti siokpari nga na dutingo mbilimbili-kue pëpe so Adam azia na e. Sandra abâ so Nzapa ahinga so e lingbi pëpe ti sala kusala na akpengba-ndia ti lo kue tâ na lege ni (Psaume 51:7; aRomain 3:23; 5:12, 18). Lo yeke na ngia ti hinga so Jéhovah abi lê ti lo gi pëpe na ndo awokongo ti e, na lo yeke ku pëpe na mbage ti e ti sala ye so e yeke na ngangu pëpe ti sala ni. Wasungo psaume ahunda tënë: “O L’Eternel, tongana mo bata tënë ti sioye, O Seigneur, ka zo nyen alingbi ti ngbâ?”—Psaume 130:3.
Mbeni kpengba tâ tënë ti Bible so azia wâ na bê ti Sandra ayeke lani sandaga ti kota ngele ti Jésus Christ. Na lege ti sandaga ni, Jéhovah, na be-nzoni, amû na azo so amä yanga mbeni ndo so alingbi, atâa dutingo mbilimbili-kue pëpe ti ala (1 Jean 2:2; 4:9, 10). Biani, e lingbi ti “wara pardon ti kengo-ndia ti e” na tongaso ti mû maboko na e ti hon ndo ti abibe ti bango tele ti e tongana ye senge.—aEphésien 1:7.
Sandra amanda lani akpengba ye na lege ti tapande ti bazengele Paul. Paul abâ ândö na nene ni mingi nzobe ti Nzapa so, na lege ti grâce ti lo, apardone agirisango lege ti lo ti giriri nga amû maboko na lo na yâ ngangu bira ti lo ti hon ndo ti awokongo ti lo so ayeke kiri fani mingi (aRomain 7:15-25; 1 aCorinthien 15:9, 10). Paul agbian salango ye ti lo, lo ‘pika tele ti lo, na lo sala si a ga ngbâa ti lo’ si lo lingbi ti ngbâ na ndo lege so Nzapa ayeda na ni (1 aCorinthien 9:27). Lo zia lege pëpe na abibe ti lo ti siokpari ti sala lo tongana ngbâa.
Awokongo ti Sandra asala lani pasi na lo, me lo ngbâ lakue ti tiri na ala. Lo sambela na bê ti lo kue ti wara mungo maboko ti Jéhovah ti hon ndo ti awokongo ti lo na ti gi be-nzoni ti lo (Psaume 55:23; Jacques 4:8). Na hingango so Nzapa abi bê ti lo mveni na ndo lo, Sandra alingbi ti gbian salango ye ti lo. Lo tene: “Mbi yeke na ngia ti mû ngoi ti mbi kue ti manda Bible na ambeni zo.” Sandra awara matabisi ti mû maboko na yaya ti lo ti wali na ngambe ti lo ti wali ti ga ti hinga Jéhovah. Tongana lo ‘yeke sala ye ti nzoni’, lo mû nga akode ti lo so lo yeke na ni na ndo kaïngo kobela ti sala kusala na ni senge senge na ngoi ti akota bungbi ti aTémoin ti Jéhovah.—aGalate 6:10.
Ka ti dutingo ngbâa ti aye so Sandra asala ni lani ayeke tongana nyen? Lo tene na ngia: “Li ti mbi asala kusala fadeso nzoni. Mbi yeke nyon sämba, wala manga wala mbangi mbeni pëpe. Mbi yeke na nzara ni pëpe. Mbi wara ye so mbi yeke gi ândö.”
[Kete tënë na lembeti 9]
“Mbi wara ye so mbi yeke gi ândö”
[Tënë na lembeti 9]
Akpengba-ndia ti Bible so ayeke sala kusala ▸
A yeke wara ge ambeni kpengba-ndia ti Bible so amû maboko na gbâ ti azo ti zia lege ti dutingo ngbâa ti aye so ayeke sioni:
‘E sukula asioni so kue ayeke na tele ti e nga na bê ti e; na lege ti kpengo mbito ti Nzapa, e gi lege ti mû tele ti e kue na lo.’ (2 aCorinthien 7:1, Fini Mbuki, 2001). Nzapa ayeke hiri deba nzoni na ndo ala so asukula asioni so ayeke na tele ti ala, na akpe ti sala aye ti sioni.
“Kpengo mbito ti [Jéhovah] ayeke ti ke sioye.” (aProverbe 8:13). Kota kpengo mbito ti Nzapa ayeke mû maboko na mbeni zo ti zia lege ti asioni salango ye ti lo so andu nga nyongo mbangi. Na ndo ti so lo yeke nzere na lê ti Jéhovah, a yeke bata zo ni so agbian salango ye ti lo na gbe ti akobela so azia mbito na bê.
‘A lingbi ala mä yanga ti azo ti komandema na ti azo so ayeke na li ti kodoro.’ (Tite 3:1, FM 01). Na ambeni kodoro mingi, ti nyon ambangi wala gi ti wara ni na tele ti mo ayeke dorongo mbeni ndia. Atâ Chrétien ayeke mû wala ayeke nyon pëpe ambangi so ndia ake ni.