Mo Yeke na Mbeni Yingo so Alingbi ti Kui Pepe?

BAZENGELE Paul asû na mbeti: “Ambeti kue alondo na yanga ti Nzapa, na a yeke nzoni ti fa nda ti ye, ti zingo na azo, ti leke ye na lege ni, na ti mu wango tene na azo na yâ ye so ayeke na lege ni.” (2 Timothée 3:16, NW) Biani, Bible ayeke mbeni buku ti tâ tene so alondo na tâ Nzapa, Jéhovah.​—Psaume 83:19 (Psaume 83:18, NW).

Teti so Jéhovah ayeke Wasalango ye kue nga na azo, lo hinga nzoni mingi ye wa ayeke si na e tongana e kui. (aHébreu 3:4; Apocalypse 4:11) Nga, na yâ Tene ti lo, Bible, so asû na gbe ti yingo, lo mu atâ kiringo tene so alingbi na ndo ye so asi na peko ti kuâ.

Yingo Ayeke Nyen?

Na yâ Bible, atene so a kiri pekoni na “yingo” aye ti tene mbilimbili “mbö.” Me ye so andu ye mingi ahon gi tene ti hungo pupu. Na tapande, wasungo Bible Jacques atene: “Tele so ayeke na mbö pepe akui.” (Jacques 2:26, NW) Tongaso, yingo ayeke ye so amu fini na tele ti zo.

Ngangu so amu fini alingbi pepe ti duti gi mbö wala pupu so zo ahu, so ayeke hon na yâ afufu. Ngbanga ti nyen? Ngbanga ti so tongana zo akaï ti hu pupu, fini angbâ na yâ ase-tele ti lo teti mbeni kete ngoi, “teti apenze-ngbonga mingi,” tongana ti so mbeni kota bakari (The World Book Encyclopedia) atene. Teti ye so, angangu so ayeke sala ti kiri na zo ni na fini alingbi ti lë lengo. Me na ngoi so tanga ti ngangu ti fini asigigi kue awe na yâ ase-tele ti zo ni, angangu kue so alingbi ti sala ti kiri zo ni na fini ayeke duti gi ye senge. Mbö kue, wala pupu so a hu, so ayeke na sese alingbi pepe ti zingo même se-tele oko. Tongaso, yingo ayeke ngangu ti fini so zo alingbi ti ba pepe, ngangu so amu wâ na fini, so abata na fini ase-tele nga na zo. A yeke bata ngangu ti fini so na lege ti hungo pupu.​—Job 34:14, 15.

Yingo so ayeke sala kusala gi na yâ tele ti azo? Bible amu maboko na e ti wara nzoni kiringo tene na tene so. Gbia ti ndara Salomon ayeda so azo na anyama kue ‘ayeke na mbö oko,’ na lo hunda tene so: “Zo nyen ahinga tongana yingo ti zo ague na nduzu, wala tongana yingo ti nyama azu na sese?” (Zo-ti-fa-tene 3:19-21) Tongaso, a fa so anyama nga na azo ayeke na mbeni yingo. Ye so alingbi ti duti tongana nyen?

A lingbi ti haka yingo, wala ngangu ti fini, na wâ ti dada so amu ngangu na mbeni masini. Wâ ti dada ni, so lê aba pepe, alingbi ti sala akua nde nde alingbi na mara ti masini so lo mu ngangu na ni. Na tapande, a lingbi ti leke mbeni four ti mu ndowa, mbeni ordinateur ti sala kusala na asango kue so a yôro na yâ ni, na mbeni televizion ti fa alimon na go. Ye oko, wâ ti dada ni ayeke kpa pepe masini so lo mu ngangu na ni. Lo yeke ngbâ gi senge ngangu. Legeoko nga, ngangu ti fini ayeke mu pepe asalango ye ti azo wala anyama so lo yeke sala kusala na yâ ti ala. Lo yeke na salango ye wala na ngangu ti gbungo nda ti ye oko pepe. Azo nga na anyama ayeke na “mbö [“yingo,” NW] oko.” (Zo-ti-fa-tene 3:19) Tongaso, tongana mbeni zo akui, yingo ti lo angbâ pepe ti duti na fini na mbeni ndo nde tongana mbeni zo ti yingo.

Tongaso, ye nyen asi na akinda? Na ye nyen asi na yingo tongana mbeni zo akui?

“Fade Mo Kiri na Pupu-sese”

Tongana kozo koli Adam ake na mbana ti yeda na komandema ti Nzapa, Jéhovah atene na lo: “Fade mo te kobe na lege ti sô ti lê ti mo juska mo kiri na sese, teti A kamata mo na sese; na fade mo kiri na pupu-sese, teti mo yeke pupu-sese.” (Genèse 3:19) Adam ayeke la ni na ndo wa kozoni si Jéhovah aleke lo na pupu-sese? Biani, lo yeke la ni na mbeni ndo pepe! Ti tene ni ndulu, lo yeke la ni na fini pepe. Tongaso, na ngoi so Jéhovah Nzapa atene so fade Adam ayeke “kiri na pupu-sese,” lo ye ti tene so fade Adam ayeke kui na lo yeke kiri ti ga a-atome na sese. Fade Adam ayeke gue pepe na mbeni ndo ti yingo. Na lâ ti kui ti lo, fade lo yeke kiri ti duti na fini oko pepe. Ngbanga so lo wara ayeke kui, so ti tene dutingo na fini pepe, me a yeke pepe guengo na lo na mbeni ndo nde.​—aRomain 6:23.

Ti ambeni zo nde so akui awe ayeke tongana nyen? A fa polele ye so asi na akinda na Zo-ti-fa-tene 9:5, 10; na ndo so e diko: ‘Akinda ahinga ye oko pepe . . . Kusala, ye ti bibe, hingango ye, na ndara, ayeke na ndo-ti-awakinda pepe.’ Tongaso, kui ayeke dutingo ti zo so ayeke na fini pepe. Wasungo psaume asû na mbeti so tongana mbeni zo akui, “yingo ti lo asigigi, lo kiri na sese ti lo, na lâ ni so abibe ti lo akui.”​—Psaume 146:4.

A yeke polele, akinda ayeke na fini oko pepe. Ala lingbi ti hinga ye oko pepe. Ala lingbi pepe ti ba mo, ti mä mo, wala ti sala tene na mo. Ala lingbi pepe ti mu maboko na mo nga pepe ti sala sioni na mo. A lingbi biani mo sala mbito pepe ti akinda. Me tongana nyen yingo “asigigi” na yâ mbeni zo na ngoi ti kuâ ti lo?

Yingo ni “Akiri na Nzapa”

Bible atene so tongana mbeni zo akui, “yingo ni akiri na Nzapa, Lo so amu lo.” (Zo-ti-fa-tene 12:9 [Zo-ti-fa-tene 12:7, NW]) So aye ti tene mbeni yingo ayeke hon biani na yâ ti pupu ti si na gbele Nzapa? Oko pepe! Lege so Bible ayeke sala kusala na tene “akiri” ahunda pepe tâ londongo na mbeni ndo ti gue na mbeni ndo nde. Na tapande, a tene na azo ti Israël so aduti be-ta-zo pepe: “I kiri na Mbi, na fade Mbi kiri na i, L’Eternel [“Jéhovah,” NW] ti Sabaoth atene.” (Malachie 3:7) ‘Kiringo’ ti Israël na Jéhovah aye ti tene gbiango lege ti zia mbeni sioni lege na ti kiri ti sala ye alingbi na lege ti mbilimbili ti Nzapa. Nga, ‘kiringo’ ti Jéhovah na mbage ti Israël aye ti tene kiringo ti ba ndo na nzobe na mbage ti azo ti lo mbeni. Na yâ ti atapande use so, tene ti ‘kiringo’ ni andu bango ndo, pepe tâ londongo ni na mbeni ndo ti gue na mbeni ndo nde.

Legeoko nga, na peko ti kui, tongana yingo ni “akiri” na Nzapa, a yeke ba ye oko pepe so alondo na sese ge ti gue na mbeni ndo nde na yayu. Tongana ngangu so asigigi na yâ mbeni zo ti hon, gi Nzapa oko alingbi ti kiri ti mu ni na lo. Tongaso, yingo ni “akiri na Nzapa” na lege so beku ti wara ande fini teti zo so ayeke fadeso gi na tïtî Nzapa.

Na tapande, ba ye so Mbeti ti Nzapa atene na ndo kuâ ti Jésus Christ. Wasungo évangile Luc atene: “Jésus atene na kongo, Babâ, Mbi zia yingo ti Mbi na tïtî Mo. Na tongana lo sala tene so awe, lo to yingo ti Lo.” (Luc 23:46) Tongana yingo ti Jésus asigigi na yâ lo, lo gue la ni biani pepe na yayu. A zingo pepe Jésus na popo ti awakinda kozo na lango ota, na a yeke alango 40 na pekoni si lo ma na yayu. (Kusala 1:3, 9) Ye oko, na ngoi ti kuâ ti lo, Jésus azia yingo ti lo na bê kue na tïtî Babâ ti lo, na ziango bê ti lo kue na yâ ngangu ti Jéhovah ti kiri lo na fini.

Biani, Nzapa alingbi ti kiri na mbeni zo na fini. (Psaume 104:30) Ye so azi lege na mbeni pendere beku!

Mbeni Tâ Beku

Bible atene: “L’heure ayeke ga so azo kue so ayeke na dukua [ti dango bê, NW], fade ala mä yanga ti Lo [Jésus], na ala sigigi.” (Jean 5:28) Biani, Jésus Christ amu zendo so ala kue so Jéhovah ayeke dabe ti lo na ala ayeke londo ande na popo ti akinda, wala ayeke kiri na fini. Na popo ti ala, biani, fade a yeke wara ala so aduti giriri na fini na lege ti mbilimbili tongana awakua ti Jéhovah. Me ambeni zo kutu mingi akui kozoni si ala fa na gigi wala ala yeke yeda na andia ti mbilimbili ti Nzapa. Wala ala hinga giriri pepe aye so Jéhovah ahunda, wala ala wara ngoi pepe ti gbian aye so ahunda. Azo tongaso nga ayeke na yâ mongoli ti Nzapa na fade a yeke zingo ande ala, teti Bible atene: “Bê ti mbi ayeke ku ye na lege ti Nzapa, ye so ala mveni ayeke ku nga, mbi ku londongo ti awakinda kue, azo ti mbilimbili, na azo ti kirikiri.”​—Kusala 24:15.

Laso, sese asi singo na kengo tele na tiri, salango ngangu na tukungo mênë, bubango aye ti ndagigi na kobela. Tongana a lingbi ti tene a kiri na akinda na fini na ndo ti mbeni sese tongaso, biani ngia kue so ayeke ga na pekoni ayeke duti ande gi teti kete ngoi. Me Wasalango ye amu zendo so na yâ ngoi kete, fade lo yeke futi bungbi ti aye ti sese ti laso so ayeke na gbe ti komandema ti Satan Diable. (aProverbe 2:21, 22; Daniel 2:44; 1 Jean 5:19) Tongaso, mbeni bungbi ti azo ti mbilimbili, mbeni “sese ti fini,” ayeke duti ande tâ mbeni pendere ye.​—2 Pierre 3:13.

Na ngoi ni so, “fade mbeni wakodoro oko atene pepe: ‘Tele ti mbi aso.’” (Isaïe 33:24, NW) Même fade a yeke lungula vundu ti kui, teti fade Nzapa ‘ambô ngule kue na lê ti ala, na fade kui ayeke mbeni pepe, fade mua wala wuluwulu wala pasi ayeke mbeni pepe. Angbele ye ahon awe.’ (Apocalypse 21:4, NW) So tâ beku si ye so ayeke teti ala so ayeke na yâ ‘adukua ti dango bê’!

Tongana Jéhovah alungula ande sioni na ndo sese, fade lo futi pepe zo ti mbilimbili legeoko na zo ti sioni. (Psaume 37:10, 11; 145:20) Biani, fade ‘azo mingi so asi singo ti akete mara kue, ti azo nde nde kue, na ti ayanga nde nde kue’ ayeke sö kuâ na ngoi ti “kota ye ti vundu” so ayeke futi ande sioni sese ti laso. (Apocalypse 7:9-14, NW) Tongaso, ambeni zo mingi so asi singo ayeke duti ande dä ti yamba akinda so ayeke kiri na fini.

Mo yeke na nzala ti kiri ti ba azo so mo ndoye ala? Mo ye ti duti lakue lakue na fini na yâ paradis na ndo sese? Tongaso, a lingbi mo wara tâ hingango ye na ndo ye so bê ti Nzapa aye na aye so lo leke na bê ti lo ti sala. (Jean 17:3) Jéhovah aye si “mara ti azo nde nde kue alingbi sö kuâ na awara tâ hingango ye ti tâ tene.”​—1 Timothée 2:3, 4, NW.

[Foto na lembeti 4]

“Fade mo kiri na pupu-sese, teti mo yeke pupu-sese”

[Foto na lembeti 5]

A lingbi ti haka yingo na wâ ti dada

[Foto na lembeti 7]

Fade londongo ti awakinda ayeke ga na ngia so aninga