Mo Dabe Mo na Ni?

Mo yekia mingi dikongo a-article ti Tour ti Ba Ndo so asigigi a ninga pepe? Tongaso, ba wala mo lingbi ti kiri tene na ahundango tene so ge:

• Ngbanga ti nyen même laso a lingbi a ba na nene ni mingi ahundango tene so ayeke na Job chapitre 38?

Atä awasendaye ti ngoi ti e alingbi pepe ti gbu mbilimbili nda ti mingi ti apendere kusala so Nzapa agboto lê na ndo ni. Aye so andu lege so gravitation (ngangu ti gbotongo ye so mbeni ye ayeke sala na ndo mbeni nde) ayeke bata sese na ndo so lo ngoro dä, ye so lumière ayeke mbilimbili, ngbanga ti nyen alê ti neige ayeke lakue nde nde, tongana nyen alê ti ngu-nduzu aba gigi, na tongana nyen ngangu asala ye na ndo angu-nduzu so apika na bekpa, nyekpa nga na pupu.​—wSG01 1/5, alembeti 8-16.

• Atapande wa ti Bible alingbi ti mu maboko na e ti hon ndo ti asioni bibe?

Asaph, Baruk, na Naomi awara ambeni ngoi ti bê so anze wala ti asioni bibe nde, na ye so a sû pekoni na yâ ti Mbeti ti Nzapa so afa lutingo ti ala nzoni na gbele mara ti aye tongaso alingbi ti mu maboko na e.​—wF01 15/4, alembeti 22-24.

• Ambeni nzoni lege ti mu maboko na aChrétien so ayeke awomua ayeke so wa?

Akamarade alingbi ti hunda na nzobe nga polele ti mu maboko. Azo ti sewa wala ambeni zo nde alingbi peut-être ti mu maboko na lege ti nginza wala ti mitele, na ndo so ye atia biani awomua ni. Afon lo Chrétien alingbi nga ti sala ye na mungo maboko ti songo so ayeke na ndoye, na mungo ye nga na dengo bê na lege ti yingo.​—wSG01 1/5, alembeti 5-7.

• Ngbanga ti nyen a yeke kota ye ti sala mariage “gi na yâ Seigneur,” tongana ti so 1 aCorinthien 7:39 awa ni?

Fani mingi amariage so a sala na azo so amä na bê pepe aga na ye ti sioni mingi. Nga, ti sala ye alingbi na wango ti Nzapa so ayeke tene ti dutingo be-ta-zo na Jéhovah Nzapa. Tongana e sala ye alingbi na Tene ti Nzapa, bê ti e ayeke fâ ngbanga na li ti e pepe. (1 Jean 3:21, 22)​—wSG01 1/6, alembeti 15-17.

• Teti so a yeke gi Jéhovah oko si alingbi ti mu pardon na asiokpari ti e, ngbanga ti nyen aChrétien afa na gigi akota siokpari na a-ancien na yâ ti kongregation?

Biani, a yeke mungo pardon ti Jéhovah teti akota siokpari si a lingbi mbeni Chrétien agi ni. (2 Samuel 12:13) Me legeoko tongana ti so prophète Nathan amu maboko na David, ambakoro biazo na yâ ti kongregation alingbi ti mu maboko na awasiokpari so agbian bê ti ala. Ti gue na mbage ti a-ancien ague legeoko na fango lege so a mu na Jacques 5:14, 15.​—wSG01 1/6, lembeti 31.

• Ye nyen afa so a lingbi e ba lege ti anyindu na awomua so ye atia ala?

Mbaï ti giriri afa so bango lege ti azo tongaso ayeke lege ti hinga na tâ vorongo na popo ti aHébreu ti giriri nga na ti aChrétien ti kozo siècle. (Exode 22:22, 23; aGalate 2:9, 10; Jacques 1:27) Bazengele Paul ayôro na yâ Mbeti ti Nzapa awango-tene so ayeke polele teti aChrétien ti mu aye so atia na awomua. (1 Timothée 5:3-16)​—wSG01 15/6, alembeti 9-11.

• Kelele ti fini so ayeke na ngia na so nda ni ayeke dä ayeke nyen?

A lingbi e lë na e bata mbeni kpengba songo na Jéhovah, Babâ ti e ti yayu. Mandango Bible ayeke mbeni kota ye ti mu maboko tongana e ye ti sala tongaso.​—wF01 1/7, alembeti 4-5.

• Zo oko oko ayeke na mbeni yingo so alingbi ti kui pepe so angbâ na fini na peko ti kuâ?

Atä so ambeni zo amä na bê so mbeni yingo, pepe mbeni âme, alingbi ti kui pepe, Bible afa pepe bibe so. A fa so tongana mbeni zo akui, lo kiri na pupu-sese na lo yeke na fini mbeni pepe. Me Nzapa ayeke na ngangu ti kiri lo na fini, tongaso beku kue ti kiri ti wara fini, na lege ti londongo ti awakinda, ayeke na maboko ti Nzapa. (Zo-ti-fa-tene 12:7 [12:9, Bible ti Sango])​—wSG01 15/7, alembeti 3-6.

• Daniel ayeke la ni na ndo wa na ngoi so a tara aHébreu ota na popo-hoto ti Dura?

Bible asala tene na ndo ni pepe. Peut-être a hunda pepe na Daniel ti duti na ndo so ndali ti kota kamba ti lo, wala peut-être lo hon na mbeni ndo nde ti sala mbeni kusala. Me e lingbi ti hinga na bê ti e biani so lo zia pepe lege ti dutingo be-ta-zo ti lo na Jéhovah.​—wSG01 1/8, lembeti 31.