Atene so Azo Ahunda
Teti so Jéhovah ayeke ndulu ti mu pardon na siokpari na lege ti ngele ti sadaka ti Christ, ngbanga ti nyen a yeke kota ye teti aChrétien ti fa siokpari ti ala na gigi na a-ancien na yâ kongregation?
Tongana ti so a lingbi ti ba ni na yâ ye so asi na David nga na Bath-sheba, Jéhovah amu pardon na siokpari ti David ngbanga ti tâ gbiango bê ti lo, atä so siokpari ni ayeke kota mingi. Tongana prophète Nathân aga ndulu na lo, David afa siokpari ti lo na gigi polele: “Mbi sala sioye so ake L’Eternel.”—2 Samuel 12:13.
Ye oko, Jéhovah ayeda pepe gi na fango siokpari so mbeni wasiokpari afa na gigi na bê kue, na lo mu gi pepe pardon na zo ni, me na lege ti ndoye, lo leke nga aye ti mu maboko na zo so aglisa lege ti gue na li ni ti wara sava na lege ti yingo. Na yâ tapande ti David, mungo maboko ni aga na lege ti prophète Nathân. Laso, na yâ kongregation ti aChrétien, a yeke wara akoli so ayeke biazo na lege ti yingo, a-ancien. Disciple Jacques atene: “Mbeni zo na popo ti i ayeke na kobela [na lege ti yingo]? A lingbi lo hiri a-ancien ti kongregation, na a lingbi ala sambela na tele ti lo, ala sa mafuta na ndo lo na iri ti Seigneur, na fade sambela ti mabe asö zo ti kobela so, na fade Seigneur ayä lo; na tongana lo sala siokpari awe, fade A pardonné siokpari ti lo.”—Jacques 5:14, 15.
A-ancien so ayeke na kode alingbi ti sala ye mingi ti kaï vundu ti bê so wasiokpari ni awara teti siokpari ti lo. Ala sala ngangu kue ti mu tapande ti Jéhovah na yâ salango ye ti ala na mbage ti wasiokpari ni. Ala ye lâ oko pepe ti sala ye na ngangu, atä tongana a hunda ti mu sengo ndo ti ngangu. Nde na so, na lege ti nzobe, ala bi lê na ndo aye so zo ni ayeke na bezoin ni fade fade. Na be-nze-pepe, ala yeke tara ti kiri ti leke bango ndo ti zo so aglisa lege, na salango kusala na Tene ti Nzapa. (aGalate 6:1) Atä tongana mbeni zo afa na gigi lo mveni pepe siokpari ti lo, gango ti a-ancien ndulu na lo alingbi peut-être ti pusu lo ti gbian bê, tongana David na ngoi so Nathan aga ndulu na lo. Tongaso, mungo maboko ti a-ancien ayeke mu lege na lo so aglisa lege ti kpe sioni ti kiri ti tï na yâ siokpari ni mbeni, nga na kota kpale ti ga zo so bê ti lo akpengba na yâ salango siokpari.—aHébreu 10:26-31.
A yeke biani ngangu teti mbeni zo ti fa na gigi na ambeni zo nde siokpari so amu kamela na lo, na ti gi ti wara pardon. A hunda ti duti na ngangu ti bibe. Ye oko, gbu li kete na ndo ye so alingbi ti si tongana mbeni zo asala tongaso pepe. Mbeni koli so afa pepe na a-ancien ti kongregation kota siokpari ti lo atene: “Mbi wara vundu na yâ bê ti mbi so aye ti hon pepe. Mbi kono angangu ti mbi na yâ kusala ti fango tene, me vundu teti siokpari ni angbâ lakue.” Lo ba ti lo la ni so gi fango na Nzapa siokpari ni na yâ sambela alingbi awe, me biani, a yeke tongaso pepe, teti lo wara a-oko bibe so gbia David awara la ni. (Psaume 51:10, 13 [Psaume 51:8, 11, NW]) So tâ ye ti nzoni mingi ahon ti yeda na mungo maboko ti ndoye so Jéhovah amu na lege ti a-ancien!