Deba Nzoni ti Jéhovah Aga na E Mosoro

“Deba nzoni ti Jéhovah, ba ye so aga na mosoro, na lo zia vundu dä oko pepe.”​—APROVERBE 10:22, NW.

1, 2. Ngbanga ti nyen tâ ngia ague legeoko pepe na mosoro ti mitele?

TOMBANGO peko ti akungba ayeke fa lege na fini ti azo kutu mingi laso. Me aye ti mitele asala si ala wara tâ ngia? Mbeni mbeti-sango (The Australian Women’s Weekly) atene: “Mbi lingbi pepe ti dabe mbi na mbeni ngoi tongaso so mawa asala azo mingi ngbanga ti dutingo ti ala.” Na lo tene nga: “A yeke mbeni tene so ague nde na ye so a fa na azo. A tene na e so Australie ayeke na yâ nzoni dutingo na lege ti konomi, na so fini ti azo aduti nzoni mingi ahon ti kozoni. . . . Atä so kue, azo mingi mingi ti mara ni aku ye ti ga nzoni pepe. Nga, akoli legeoko na awali aba so mbeni ye amanke na yâ fini ti ala, me ala lingbi pepe ti fa tâ ye ni so atia ala.” A yeke na lege ni si Mbeti ti Nzapa atene so tâ ngia na fini aga pepe na lege ti mosoro so e yeke na ni.​—Zo-ti-fa-tene 5:9 (5:10, NW); Luc 12:15.

² Bible afa so tâ ngia ti kota ahon aga na lege ti deba nzoni ti Nzapa. Na lege so, aProverbe 10:22 (NW) atene: “Deba nzoni ti Jéhovah, ba ye so aga na mosoro, na lo zia vundu dä oko pepe.” Fani mingi, pasi aga na lege ti gingo na kota nzala ni mosoro ti mitele. A yeke na lege ni si bazengele Paul amu gbotongo mê so: “Ala so aleke na bê ti ala ti ga wamosoro atï na yâ handa, na yâ son, nga na yâ ti asioni nzala mingi ti buba, so abi azo na yâ ti futingo nga na yâ ye so afuti. Ndoye ti nginza ayeke gunda ti asioye nde nde kue, nga na gingo ti wara ndoye so, ambeni zo ahon yongoro na mabe na akpo tele ti ala mveni kue na pasi mingi.”​—1 Timothée 6:9, 10, NW.

3. Ngbanga ti nyen awakua ti Nzapa ayeke wara atara?

³ Na mbage, adeba nzoni so aga na vundu pepe aga ye ti azo kue so “angbâ lakue ti mä tene ti Jéhovah.” (Deutéronome 28:2, NW) Ye oko, ambeni zo alingbi peut-être ti hunda: ‘Tongana vundu ayeke pepe na yâ deba nzoni ti Jéhovah, ngbanga ti nyen awakua ti Nzapa mingi ayeke ba pasi?’ Bible afa so Nzapa azia lege si atara asi na e, me ti tâ tene ni, ala londo na Satan, na sese ti lo ti sioni, nga na dutingo ti e mveni ti mbilimbili-kue pepe. (Genèse 6:5; Deutéronome 32:4, 5; Jean 15:19; Jacques 1:14, 15) Jéhovah ayeke lingu ti “matabisi kue ti nzoni na matabisi kue so alingbi kue.” (Jacques 1:17) Ni la, adeba nzoni so lo mu ayeke ga na vundu lâ oko pepe. Tongaso, zia e ba ambeni na popo ti amatabisi so a lingbi kue ti Nzapa.

Tene ti Nzapa: Mbeni Matabisi so A Lingbi Haka Ngele ni Pepe

4. Deba nzoni na matabisi wa so a lingbi haka ngele ni pepe azo ti Jéhovah awara na “lâ ti nda ni” so?

⁴ Na ndo “lâ ti nda ni,” prophétie ti Daniel atene: “Fade . . . ndara awu mingi.” Ye oko, a zia katikati na nda ti ye so na lege ti tene so: “Fade . . . oko ti azo ti sioni ahinga nda ti ye ni pepe; me ala so ayeke na ndara, fade ala hinga nda ti ye ni.” (Daniel 12:4, 10) Mo ba ye so! A fa peko ti Tene ti Nzapa, mbilimbili aprophétie, na mbeni ndara ti Nzapa so a sala si azo ti sioni alingbi pepe ti gbu tâ nda ni, atä so azo ti Jéhovah alingbi ti sala ni. Molenge ti Nzapa asambela: “Mbi mu singila na Mo, O Babâ, Seigneur ti yayu na ti sese, teti Mo honde ye so na awandara na azo ti mayele, na Mo fa nda ni na akete molenge.” (Luc 10:21) So tâ deba nzoni si a yeke ti wara matabisi so a lingbi haka ngele ni pepe ti Tene ti Nzapa so a sû na mbeti, Bible, na ti duti na popo ti ala so Jéhovah amu na ala ngangu ti ba nda ti ye na lege ti yingo!​—1 aCorinthien 1:21, 27, 28; 2:14, 15.

5. Ndara ayeke nyen, na tongana nyen e lingbi ti wara ni?

⁵ E yeke wara ngangu ti ba nda ti ye oko pepe tongana e yeke pepe na “ndara so alondo na nduzu.” (Jacques 3:17, NW) Ndara ayeke kode ti salango kusala na hingango ye nga na gbungo nda ti ye ti leke akpale, ti kpe wala ti hon ndo ti aye ti sioni, ti si na anda ti ye, wala ti mu nzoni wango. Tongana nyen e yeke wara ndara so alondo na Nzapa? A-Proverbe 2:6 (NW) atene: “Jéhovah mveni ayeke mu ndara; hingango ye nga na bango nda ti ye asigigi na yanga ti lo.” Biani, Jéhovah ayeke hiri ande deba nzoni na ndo e na lege ti ndara tongana e ngbâ ti sambela ti wara ni, legeoko tongana ti so lo mu la ni na Gbia Salomon “bê ti ndara na bê ti hinga ye.” (1 aGbia 3:11, 12; Jacques 1:5-8) Ti wara ndara, a lingbi e ngbâ nga lakue ti mä tene ti Jéhovah na mandango nga na salango ye lakue alingbi na Tene ti lo.

6. Ngbanga ti nyen a yeke duti lege ti ndara ti bata andia na akpengba-ndia ti Nzapa na yâ fini ti e?

⁶ A yeke wara akpengba tapande ti ndara so alondo na Nzapa na yâ andia na akpengba-ndia ti Bible. Ye so ayeke ga na ye ti nzoni na e na yâ alege nde nde: na lege ti mitele, ti bibe, ti atene ti bê, na ti yingo. A yeke na lege ni si wasungo psaume ahe na bia: “Ndia ti Jéhovah ayeke mbilimbili-kue, a kiri ngangu na âme. Dango bê ti Jéhovah ayeke ye ti zia bê na ni, a mu ndara na lo so ahinga ye pepe. Ayanga so Jéhovah amu ayeke mbilimbili, a zia ngia na bê; komandema ti Jéhovah ayeke na sioni oko pepe, a sala si lê aza. Kpengo mbito ti Jéhovah ayeke na sioni oko pepe, a ngbâ teti lakue lakue. Afango ngbanga ti Jéhovah ayeke tâ tene; ala fa na gigi so ala yeke biani mbilimbili. A lingbi nzala ti tene so asala zo ahon nzala ti lor, même ahon lor mingi ti nzoni.”​—Psaume 19:7-10, NW (19:8-11, Bible ti Sango); 119:72.

7. Ye nyen ayeke ga na peko ti bingo bê oko pepe na andia ti mbilimbili ti Nzapa?

⁷ Na mbeni mbage nde, ala so abi bê oko pepe na andia ti mbilimbili ti Nzapa ayeke wara pepe tâ ngia na liberté so ala yeke gi. Atä fadeso wala na mbeni lâ, ala yeke ba so Nzapa ayeke pepe zo so alingbi a he lo, teti fade zo ayeke ko gi ye so lo lu. (aGalate 6:7) Azo kutu mingi so abi bê oko pepe na akpengba-ndia ti Bible ayeke ko amara ti asioni lengo tongana mungo ngo so zo aye pepe, akobela ti sioni mingi, wala dutingo ngba ti asalango ye so ayeke buba ngangu ti zo. Tongana ala gbian na bê kue pepe salango ye ti ala na yâ fini, na nda ni fade lege ti ala ayeke gue na ala na kui nga peut-être na futingo so alondo na Nzapa.​—Matthieu 7:13, 14.

8. Ngbanga ti nyen azo so andoye Tene ti Nzapa ayeke na ngia?

⁸ Ye oko, fade adeba nzoni ayeke ga ye ti ala so andoye Tene ti Nzapa na abata ni laso nga na kekereke. Ala yeke na anda ti tene ti ba so ndia ti Nzapa amu na ala tâ liberté, ala yeke biani na tâ ngia, na ala yeke ku na bê kue ngoi so a yeke zi ala na gbe ti siokpari na aye ti pekoni so aga na kuâ. (aRomain 8:20, 21; Jacques 1:25) Beku so ayeke tâ ye ngbanga ti so a luti na ndo matabisi ti ndoye ti kota ahon ti Nzapa na mbage ti azo, so ayeke sadaka ti kota ngele ti Molenge ti lo ngengele oko, Jésus Christ. (Matthieu 20:28; Jean 3:16; aRomain 6:23) Mara ti matabisi so ti kota ahon afa biani tâ kota ti ndoye ti Nzapa teti azo, na a mu tâ beku so adeba nzoni so nda ni ayeke dä pepe, ayeke ku ala kue so angbâ lakue ti mä tene ti Jéhovah.​—aRomain 8:32.

E Kiri Singila teti Matabisi ti Yingo ti Nzoni-kue

9, 10. Tongana nyen e yeke wara ye ti nzoni na lege ti matabisi ti Jéhovah ti yingo ti nzoni-kue? Fa mbeni tapande.

⁹ Mbeni matabisi nde ti ndoye ti Nzapa so a lingbi e kiri singila ndali ni ayeke yingo ti lo ti nzoni-kue. Na lâ ti Pentecôte ti ngu 33 N.E., bazengele Pierre awa azo mingi mingi so aga na Jérusalem: “I gbian bê ti i, i azo oko oko kue, i kamata batême na iri ti Jésus Christ, tongaso Nzapa alingbi pardonné siokpari ti i; na fade i wara matabisi ti Yingo Vulu [“yingo ti nzoni-kue,” NW].” (Kusala 2:38) Laso, Jéhovah amu yingo ti nzoni-kue na awakua ti lo so amu tele ti ala na Nzapa, so ayeke sambela ti wara yingo ni, na so aye ti sala ye so bê ti lo aye. (Luc 11:9-13) Giriri, ngangu so ti kota ahon kue na yâ ndagigi, yingo ti nzoni-kue ti Nzapa, wala ngangu so Lo yeke sala na kusala, amu ngangu na akoli nga na awali ti mabe, so na popo ni a wara nga akozo Chrétien. (Zacharie 4:6; Kusala 4:31) Lo lingbi ti sala tongaso nga teti e, atä so e yeke tingbi peut-être na akota kangango lege wala akpale ti ngangu teti e yeke azo ti Jéhovah.​—Joël 2:28, 29.

¹⁰ Ba tapande ti Laurel, so awara kobela ti polio na so aduti na fini na yâ mbeni fufu ti wen teti angu 37.a Atä aye ti ngangu mingi so asi na lo, lo sala na Nzapa na wâ juska na kuâ ti lo. Tongana ngoi ayeke hon, gbâ ti deba nzoni so alondo na Jéhovah aga ye ti Laurel. Na tapande, lo wara lege ti mu maboko na azo 17 ti wara tâ hingango ye ti tâ tene ti Bible, atä so lo yeke ngbâ na yâ masini ti lo ni bï na lâ! Ye so asi na lo adabe e na atene ti bazengele Paul: “Tongana mbi woko, a yeke na ngoi so si mbi wara ngangu.” (2 aCorinthien 12:10, NW) Biani, alengo kue ti nzoni so e lingbi ti wara na fango nzo tene aga pepe na lege ti akode wala ngangu ti e mveni, me na lege ti mungo maboko ti Nzapa na lege ti yingo ti nzoni-kue, so lo mu na ala so angbâ lakue ti mä tene ti lo.​—Esaïe 40:29-31.

11. Alengo wa yingo ti Nzapa ayeke lë na yâ ala so ayü “fini zo ti yâ ni”?

¹¹ Tongana e mä tene ti Nzapa na bê kue, yingo ti lo ti nzoni-kue ayeke lë na yâ e alengo ti ndoye, tâ ngia, siriri, be-nze-pepe, nzobe, bê ti sala nzoye, mabe, tâ be-ti-molenge, na ngangu ti kanga nzala ti tele. (aGalate 5:22, 23) “Lengo ti yingo” so ayeke mbeni mbage ti “fini zo ti yâ ni”, so aChrétien ayeke yü na place ti asalango ye kue so akpa ti asioni nyama ti ngonda so peut-être ala yeke na ni giriri. (aEphésien 4:20-24; Esaïe 11:6-9) Na popo ni, mbeni lengo ti kota ahon ayeke ndoye, ‘kamba so alingbi kue so asala si e ga oko.’​—aColossien 3:14.

Ndoye ti A-Chrétien: Mbeni Matabisi ti Yekia Ni

12. Tongana nyen Tabitha na ambeni Chrétien ti kozo siècle afa ndoye ti ala?

¹² Ndoye ti aChrétien ayeke mbeni matabisi nde ti deba nzoni so alondo na Jéhovah, mbeni ye so a yeke na lege ni ti yekia ni. A luti na ndo ti kpengba-ndia, me konongo ti yengo tele ni asala si songo ti awamabe akpengba mingi ahon même asongo ti mitele. (Jean 15:12, 13; 1 Pierre 1:22) Na tapande, bi bê na Tabitha, mbeni nzoni wali Chrétien ti kozo siècle. “Wali so asi na nzo kusala, na lo mu matabisi na azo,” mbilimbili na mbage ti awomua na yâ ti kongregation. (Kusala 9:36) Awali so ayeke peut-être na asewa ti mitele, me Tabitha aye la ni ti sala ye so lo lingbi sala ti mu maboko na ala na ti kpengba ala. (1 Jean 3:18) So tâ pendere tapande si Tabitha azia! Ndoye ti aita apusu Prisca na Aquila ti sala na Paul si “a ngbâ kete, ala wara kui.” Ndoye apusu nga Épaphras, Luc, Onésiphore, na ambeni zo nde ti mu maboko na bazengele ni na ngoi so a kanga lo na Rome. (aRomain 16:3, 4; 2 Timothée 1:16; 4:11; Philémon 23, 24) Biani, laso aChrétien tongaso ‘ayeke na ndoye na popo ti ala mveni,’ mbeni matabisi ti deba nzoni so alondo na Nzapa na so amu lege ti hinga ala tongana atâ disciple ti Jésus.​—Jean 13:34, 35.

13. Tongana nyen e lingbi ti fa so e yekia mingi songo ti e ti Chrétien?

¹³ Mo yekia ndoye so a fa na gigi na yâ ti kongregation ti aChrétien? Mo yeke kiri singila teti songo ti e ti aita ti yingo, so amu ndo ti sese kue? Aye so kue nga ayeke amatabisi ti deba nzoni ti Nzapa na ti mungo mosoro, na so alondo na yayu. Tongana nyen e lingbi ti fa so e ba ala na ngele ngangu? Na salango na Nzapa kusala ti nzoni-kue, na mungo mbage na abungbi ti aChrétien, nga na fango na gigi ndoye na ambeni lengo nde ti yingo ti Nzapa.​—aPhilippien 1:9; aHébreu 10:24, 25.

“Amatabisi ti Azo”

14. Ye nyen a hunda na mbage ti mbeni Chrétien tongana a ye ti tisa lo ti sala kusala tongana ancien wala serviteur ti mungo maboko?

¹⁴ Akoli Chrétien so ayeke na nzala ti sala na afon ala na yâ vorongo tongana a-ancien wala aserviteur ti mungo maboko ayeke zia na gbele ala mbeni pendere ye ti si dä. (1 Timothée 3:1, 8) Ti lingbi na amatabisi so, a hunda na mbeni ita-koli ti duti mbeni zo so ayekia aye ti yingo, so ahinga tene ti Mbeti ti Nzapa mingi na so ayeke na wâ na yâ kusala ti fango tene. (Kusala 18:24; 1 Timothée 4:15; 2 Timothée 4:5) A lingbi lo fa na gigi be-kota-pepe, tâ be-ti-molenge, nga be-nze-pepe, teti so adeba nzoni ti Nzapa ayeke ga pepe ye ti azo ti fandara, ti bê kota, na ti gingo kota ndo. (aProverbe 11:2; aHébreu 6:15; 3 Jean 9, 10) Tongana lo sala mariage awe, a yeke ti lo ti duti mokonzi ti sewa so asala ye na lege ti ndoye, so alingbi ti fa lege nzoni na azo ti da ti lo kue. (1 Timothée 3:4, 5, 12) Ngbanga ti so lo ba na nene ni mingi amosoro ti yingo, mara ti koli tongaso ayeke wara ande deba nzoni ti Jéhovah.​—Matthieu 6:19-21.

15, 16. Azo wa afa tele ti ala tongana “amatabisi ti azo”? Mu ambeni tapande.

¹⁵ Tongana ala so ayeke sala kusala tongana ancien na yâ ti kongregation asala ngangu ti duti awafango nzo tene, aberger, na awafango ye, ala yeke mu na e anda ti tene ti ba na kota ngele mingi mara ti “amatabisi ti azo” tongaso. (aEphésien 4:8, 11) Azo so awara ye ti nzoni na lege ti kusala ti ala ti ndoye ayeke fa na gigi lakue peut-être pepe bê ti kiri singila ti ala, me Jéhovah ayeke ba ye kue so a-ancien be-ta-zo so ayeke sala. Lo yeke glisa pepe ndoye so ala fa teti iri ti lo na salango kusala teti azo ti lo.​—1 Timothée 5:17; aHébreu 6:10.

¹⁶ Ba tapande ti mbeni ancien so ayeke sala kusala ngangu, na so ague ti sala vizite na mbeni maseka wali Chrétien so ayeke ndulu ti wara mbeni opération ti leke mbeni kobela na yâ mongoli ti lo. Mbeni wali so ayeke kamarade ti sewa ni atene: “Lo yeke sala ye la ni na nzobe mingi, lo mu maboko mingi, lo bi bê na e mingi. Lo hunda ti sambela Jéhovah na e. Tongana lo yeke sambela, babâ ni [so ayeke pepe mbeni Témoin ti Jéhovah] atï na toto, na ngu-le asigigi na lê ti azo kue so ayeke na yâ kubu ti da-nganga ni. So tâ fä ti nzobe si awara na yâ sambela ti ancien so, na so tâ ndoye teti Jéhovah ti to lo tâ na mara ti ngoi so!” Mbeni wali Témoin nde so ayeke na kobela atene na ndo a-ancien so aga na vizite na lo: “Na ngoi so ala ga ndulu na gbogbo ti mbi na yâ kubu ti Réanimation ni, mbi hinga so atä ye kue so ayeke si ande na pekoni, mbi lingbi ti gbu ngangu na gbele ni. Mbi wara ngangu na mbi duti na siriri.” Mbeni zo alingbi ande ti vo mara ti bingo bê ti ndoye tongaso? Oko pepe! A yeke mbeni matabisi so alondo na Nzapa, so ayeke wara na lege ti kongregation ti aChrétien.​—Esaïe 32:1, 2.

Matabisi ti Fango Tene

17, 18. (a) Matabisi ti kusala wa Jéhovah azia na gbele azo ti lo kue? (b) Mungo maboko wa Nzapa amu ti tene e sala kusala ti e ti fango tene nzoni?

¹⁷ Mbeni matabisi oko pepe so amu na mbeni zo alingbi ti duti kota ahon matabisi ti salango na Jéhovah, Lo ti Nduzu Ahon Kue. (Esaïe 43:10; 2 aCorinthien 4:7; 1 Pierre 2:9) Ye oko, matabisi ti mungo mbage na kusala ti fango tene na gbele azo ayeke teti azo kue, apendere na ambakoro, akoli wala awali, so ayeke tâ na nzala ti sala na Nzapa. Mo yeke sala kusala na matabisi ti ngele ngangu so? Ambeni alingbi ti ke ti fa tene ngbanga ti so ala ba tele ti ala so ala lingbi pepe, me dabe mo so Jéhovah ayeke mu yingo ti lo ti nzoni-kue na ala so asala na lo, na yingo so ayeke mu na e ye kue so alingbi ti tia e.​—Jérémie 1:6-8; 20:11.

¹⁸ Jéhovah amu kusala ti fango tene ti Royaume na awakua ti lo so ayeke na tâ be-ti-molenge, me pepe na azo so ayeke na bibe ti sala baba na ti zia bê gi na ndo akode ti ala mveni. (1 aCorinthien 1:20, 26-29) Azo so ayeke na be-kota-pepe, nga na tâ be-ti-molenge ahinga akatikati ti ala, na ala hinga ala yeke na bezoin ti mungo maboko ti Nzapa tongana ala bi tele ti ala na yâ kusala ti fango tene. Ala yekia nga mungo maboko na lege ti yingo so Nzapa ayeke mu na lege ti “wabatango ye ti nzoni.”​—Luc 12:42-44; aProverbe 22:4.

Dutingo ti Sewa so Ayeke na Ngia: Mbeni Pendere Matabisi

19. Aye wa aga na ye ti nzoni na yâ batango amolenge?

¹⁹ Mariage na dutingo ti sewa so ayeke na ngia ayeke amatabisi so alondo na Nzapa. (Ruth 1:9; aEphésien 3:14, 15) Amolenge nga ayeke pendere “ye ti héritier so L’Eternel [“Jéhovah,” NW] amu na zo,” ala ga na ngia na ababâ na mama so ayôro nzoni alengo ti Nzapa na yâ ala. (Psaume 127:3) Tongana mo yeke mbeni babâ wala mama, ngbâ lakue ti mä tene ti Jéhovah na fango lege na amolenge ti mo alingbi na Tene ti lo. Ala so asala tongaso ahinga biani na bê so ala yeke wara mungo maboko na gbâ ti deba nzoni so alondo na Jéhovah.​—aProverbe 3:5, 6; 22:6; aEphésien 6:1-4.

20. Ye nyen alingbi peut-être ti mu maboko na ababâ na mama so amolenge ti ala avi peko ti ala na tâ vorongo?

²⁰ Atä angangu kue so ambeni babâ na mama so akpe mbito ti Nzapa asala na bê kue ti bata amolenge ti ala, peut-être ambeni na popo ti amolenge ni ayeke soro ti zia lege ti tâ vorongo tongana ala kono awe. (Genèse 26:34, 35) Ye so alingbi ti futi bê ti ababâ na mama. (aProverbe 17:21, 25) Ye oko, ahon ti zia ti duti na beku kue, a lingbi ti mu maboko na ala ti dabe na tapande ti Jésus ti molenge so abuba ye ti lo kue. Atä so molenge so azia da ni, na amu mbeni sioni lege, na pekoni lo kiri na da ti babâ ti lo so ayamba lo na ngia nga na ndoye. (Luc 15:11-32) Atä ye kue so alingbi peut-être ti si, ababâ na mama Chrétien alingbi ti hinga so Jéhovah agbu nda ti ye so asi na ala, lo bi bê na ala na ndoye, na lo yeke mu maboko na ala lakue.​—Psaume 145:14.

21. A lingbi e mä tene ti zo wa, na ngbanga ti nyen?

²¹ Tongaso, zia e oko oko kue e gi ti ba ye so ayeke biani kota mingi na yâ fini ti e. E yeke gi na kota nzala ni ti wara gbâ ti mosoro na lege ti mitele, so alingbi ti mu vundu na e nga na asewa ti e? Wala e yeke tomba peko ti ‘amatabisi ti nzoni na amatabisi so alingbi kue’ so alondo na “Babâ ti lumière”? (Jacques 1:17) Satan, “babâ ti mvene,” aye si e sala kusala ngangu ti wara mosoro ti mitele na e glisa tâ ngia nga na fini ti e. (Jean 8:44; Luc 12:15) Ye oko, Jéhovah abi bê na ndo e biani, na lo ye gi nzoni ti e. (Esaïe 48:17, 18) Ni la, zia e ngbâ lakue ti mä tene ti Babâ ti e ti yayu so ayeke na ndoye, na zia e ‘wara kota ngia’ lakue na yâ lo. (Psaume 37:4) Tongana e tambela na lege so, fade amatabisi ti Jéhovah so alingbi pepe ti haka ngele ni, nga gbâ ti deba nzoni so lo mu ayeke ga ande na e mosoro so a wara kete vundu dä oko pepe.

[Kete Tene na Gbe Ni]

Mo Dabe Mo?

• A lingbi ti wara tâ ngia ti kota ahon na ndo wa?

• Ambeni matabisi so Jéhovah amu na azo ti lo ayeke so wa?

• Ngbanga ti nyen kusala ti fango tene ayeke mbeni matabisi?

• Ye nyen ababâ na mama alingbi ti sala ti wara deba nzoni ti Nzapa tongana ala yeke bata amolenge ti ala?

[Foto na lembeti 16]

Mo yeke fa bê ti kiri singila teti matabisi ti Nzapa so ayeke Tene ti lo so a sû na mbeti?

[Foto na lembeti 17]

Atä aye ti ngangu so asi na lo, Laurel Nisbet asala na Nzapa na wâ

[Afoto na lembeti 18]

Legeoko na Tabitha, a hinga nzoni mingi aChrétien ti ngoi ti laso teti akusala ti ala ti ndoye

[Foto na lembeti 19]

A-ancien so ayeke Chrétien ayeke bi bê na lege ti ndoye na afon ala wamabe