Fade Zo Wa Akangbi E na Ndoye ti Nzapa?

“E yeke na ndoye, teti Lo ndoye e kozoni.”​—1 JEAN 4:19.

1, 2. (a) Ngbanga ti nyen ti hinga so a ndoye e ayeke kota ye teti e? (b) E yeke na bezoin mbilimbili ti ndoye ti zo wa?

TI HINGA so a ndoye mo ayeke kota ye na lê ti mo tongana nyen? Ngbele ye na ngoi so ala de kete molenge ti si na gango biazo, ndoye asala si azo amaï nzoni. Mo ba awe mbeni foroto so mama ti lo amu lo na yâ maboko ti lo na asala ngia na lo na ndoye? Fani mingi, atä ye so ayeke tambela na tele ti lo, na ngoi so foroto ni ayeke ba yâ ti lê ti mama ti lo so ayeke na ngia, lo duti nzoni nga na siriri na yâ maboko ti mama so andoye lo. Wala mo dabe mo na dutingo ti mo na lâ ti pendere tongana ngoi na ngoi aye atambela kirikiri? (1 aThessalonicien 2:7) Na ambeni ngoi, peut-être mo hinga pepe ye so mo ye wala même tene ti bê ti mo, ye oko ba tongana nyen a yeke kota ye ti hinga so babâ na mama ti mo andoye mo! Ti hinga so mo lingbi ti pusu ndulu na ala ti fa akpale ti mo kue wala ti hunda tene na ala amu maboko na mo pepe? Biani, na yâ fini ti e kue, mbeni oko ti akota ye so e yeke na bezoin ni ayeke ti tene a ndoye e. Mara ti ndoye tongaso afa na e so e ne.

² Ndoye so babâ na mama ayeke na ni lakue na mbage ti molenge ti ala asala biani ye mingi na ndo nzoni maïngo nga na salango ye ti lo na lege ni. Ye oko, ti hinga na bê kue so Jéhovah, Babâ ti e ti yayu, andoye e ayeke kota ye mingi ahon teti nzoni duti ti e na lege ti yingo nga na ti bibe. Ambeni wadikongo périodique so alingbi peut-être ti duti la ni pepe na ababâ na mama so aba biani lege ti ala. Tongana a yeke tongaso teti mo, zia bê ti mo anze pepe. Atä so ndoye ti babâ na mama ayeke dä pepe wala alingbi pepe, ndoye ti Nzapa so ayeke be-biani akanga ndo ni.

3. Tongana nyen Jéhovah adë bê ti azo ti lo na lege ti ndoye so lo yeke na ni teti ala?

³ Na lege ti prophète ti lo Isaïe, Jéhovah afa so mbeni mama alingbi ti “glisa” molenge ti lo so angbâ ti nyon me, me Nzapa ayeke glisa azo ti Lo lâ oko pepe. (Esaïe 49:15) Legeoko nga, David atene na bê kue: “Tongana babâ na mama ti mbi azia mbi, fade L’Eternel akamata mbi.” (Psaume 27:10) Ba tongana nyen tene so adë bê! Atä adutingo ti mo ayeke tongana nyen, tongana mo wara mbeni songo na Jéhovah Nzapa so aluti na ndo mungo tele ti mo na lo, a lingbi mo dabe mo lakue so ndoye so lo yeke na ni teti mo ayeke kota ahon ti so mbeni zo alingbi ti duti na ni!

Mo Ngbâ na yâ Ndoye ti Nzapa

4. Tongana nyen aChrétien ti kozo siècle aga ti hinga so Nzapa andoye ala?

⁴ Lawa si mo to nda ni ti fani oko ni ti hinga ye na ndo ndoye ti Jéhovah? Peut-être, ye so asi na mo ayeke legeoko na ti aChrétien ti kozo siècle. Na yâ mbeti so Paul asû na azo ti Rome, chapitre oku ni afa na mbeni lege so ayeke pendere tongana nyen awasiokpari, so kozoni ala duti yongoro na Nzapa, aga ti hinga ndoye ti Jéhovah. Na versê 5 (NW), e diko: “A sa ndoye ti Nzapa na yâ bê ti e na lege ti yingo ti nzoni-kue so amu na e.” Na versê 8, Paul atene na ndo ni: “Nzapa afa na e ndoye ti Lo, teti tongana e de awasiokpari, Christ akui teti e.”

5. Tongana nyen mo ga ti gbu nda ti kota ni ti ndoye ti Nzapa?

⁵ Na oko lege so, na ngoi so a fa na mo tâ tene ti Tene ti Nzapa na mo to nda ti fa na gigi mabe, yingo ti nzoni-kue ti Jéhovah ato nda ti sala kusala na yâ bê ti mo. Na lege so, mo ga ti gbu nda ti kota ni ti ye so Jéhovah asala na tokuango Molenge ti Lo so Lo ndoye lo mingi ti kui teti mo. Tongaso, Jéhovah amu maboko na mo ti hinga tongana nyen lo ndoye biani azo. Na ngoi so mo ga ti hinga so Jéhovah azi lege ti diko azo mbilimbili na beku ti duti na fini so ayeke na nda ni pepe, atä a dü mo tongana mbeni zo ti siokpari so aduti yongoro na lo, a ndu bê ti mo pepe? Bê ti mo apusu mo ti ndoye Jéhovah pepe?​—aRomain 5:10.

6. Ngbanga ti nyen e lingbi ti ba so ngoi na ngoi e yo kete na Jéhovah?

⁶ Teti so ndoye ti Babâ ti mo ti yayu agboto mo na mbage ti lo na teti so mo leke fini ti mo ti nzere na lo, mo mu fini ti mo kue na Nzapa. Fadeso mo lë songo ti siriri na Nzapa. Ye oko, mo ba so ngoi na ngoi mo yo kete na Jéhovah? Ye so alingbi ti si na e oko oko kue. Me dabe mo lakue so Nzapa agbian pepe. Ndoye ti lo ayeke legeoko tongana lâ so aduti lakue na ndo ti lo, na so azia lâ oko pepe ti tokua na sese agere ti lumière ti lo so amu wâ. (Malachie 3:6; Jacques 1:17) Nde na so, e lingbi ti gbian, même teti kete ngoi. Na ngoi so sese ayeke ngoro na tele ti lo, bingo ayeke mu mbeni mbage ti sese ni. Legeoko nga, tongana e vi peko ti e na Nzapa, même kete, e lingbi ti ba so songo ti e na lo adë. Ye nyen e lingbi ti sala ti leke ye so?

7. Tongana nyen hundango tele ti e mveni alingbi ti mu maboko na e ti ngbâ na yâ ndoye ti Nzapa?

⁷ Tongana e ba so mbeni ye akangbi e na ndoye ti Nzapa, a lingbi e hunda tele ti e: ‘Mbi ba ndoye ti Nzapa tongana mbeni kete ye? Mbi yeke vi peko ti mbi yeke yeke na Nzapa ti ndoye so ayeke na fini, na fango na alege nde nde mbeni wokongo ti mabe? Mbi bi bê ti mbi na “aye ti mitele,” ahon “aye ti yingo”?’ (aRomain 8:5-8; aHébreu 3:12) Tongana e kangbi tele ti e na Jéhovah, e lingbi ti sala ambeni ye ti leke ni, ti kiri ti lë mbeni kpengba songo ti wâ na lo. Jacques awa e na ngangu: “I ga ndulu na Nzapa, na fade Lo ga ndulu na i.” (Jacques 4:8) Ba na nene ni atene ti Jude: “I so mbi ndoye i mingi, i kpengba na ndo mabe ti i ti nzoni ahon kue, i sambela na yâ Yingo Vulu [yingo ti nzoni-kue, NW], i bata tele ti i na yâ ndoye ti Nzapa.”​—Jude 20, 21.

Dutingo ti Aye so Agbian Asala Ye Oko Pepe na ndo Ndoye ti Nzapa

8. Agbiango ye wa alingbi ti si fade fade na yâ fini ti e?

⁸ Na yâ bungbi ti aye so, aye mingi ayeke gbian na yâ fini ti e. Gbia Salomon aba so “ngoi na ye so zo aku pepe asi na [e] kue.” (Zo-ti-fa-tene 9:11, NW) Fade fade, fini ti e alingbi ti gbian kue. Na mbeni lango e yeke na nzoni seni, na ndade ni tele ti e alingbi ti so mingi. Mbeni lâ e tene a yeke tomba e lâ oko pepe na kua ti nginza ti e, na ndade ni e glisa ni. Gi tongaso, kui alingbi ti fâ mbeni zo so e ndoye lo mingi. Na mbeni kodoro, aChrétien alingbi ti duti na siriri teti mbeni ngoi, nga na pekoni, fade fade mbeni sioni salango ngangu asungba. Peut-être a bi tene ti mvene na li ti e, na ngbanga ni, a sala ye ti kirikiri na e. Tâ tene, fini aluti lakue pepe nzoni wala yongoro pepe na ye ti sioni.​—Jacques 4:13-15.

9. Ngbanga ti nyen a yeke duti nzoni ti ba mbeni mbage ti chapitre 8 ti buku ti aRomain?

⁹ Tongana aye so amu vundu asi na e, e lingbi ti tene na bê ti e so Nzapa azia e, même na bingo bê so ndoye ti lo akiri na peko. Teti so mara ti aye tongaso alingbi ti si na e kue, a lingbi e ba nzoni tene ti bazengele Paul so adë bê mingi so awara na aRomain chapitre 8. Lo sala la ni atene so na aChrétien so a sa yingo na ndo ti ala. Ye oko, ti biani atene ni andu nga ambeni ngasangbaga, so a diko ala azo ti mbilimbili tongana akamarade ti Nzapa, legeoko tongana ahiri Abraham tongaso na ngoi so aga kozoni na aChrétien.​—aRomain 4:20-22; Jacques 2:21-23.

10, 11. (a) Atene wa ngoi na ngoi awato abi na li ti azo ti Nzapa? (b) Ngbanga ti nyen mara ti atene tongaso ayeke kota ye pepe teti aChrétien?

¹⁰ Diko aRomain 8:31-34. Paul ahunda: “Tongana Nzapa ayeke na e, zo nyen alingbi ke e?” Tâ tene, Satan na sioni sese ti lo ake e. Awato alingbi ti bi tene ti mvene na li ti e, même na yâ ada-ngbanga ti kodoro ti e. A klame ambeni babâ na mama so ayeke aChrétien so ala ke amolenge ti ala teti so ala mu lege na ala pepe ti yeda na akode ti kaïngo kobela so ague nde na ndia ti Nzapa wala ala mu lege na ala pepe ti mu tele ti ala na amatanga ti a-apaïen. (Kusala 15:28, 29; 2 aCorinthien 6:14-16) A bi nga tene ti mvene na li ti ambeni Chrétien be-ta-zo na tenengo so ala yeke gi ti kinda ngorogbia teti so ala yeke fâ pepe amba ti ala zo na yâ bira wala ala yeke yôro tele ti ala pepe na yâ poroso. (Jean 17:16) Ambeni wato akangbi na yâ asango amvene ti buba na iri ti zo, même ala bi tene ti wataka na ndo aTémoin ti Jéhovah na tenengo so ala yeke mbeni sioni secte.

¹¹ Me glisa pepe so na ngoi ti abazengele, a tene: “E hinga azo ayeke ke tene ti secte so na ndo kue.” (Kusala 28:22) Atene ti mvene so a bi na li ti e ayeke biani kota ye teti e? A yeke Nzapa si adiko atâ Chrétien azo ti mbilimbili, na lutingo na ndo ti mabe ti ala na yâ sadaka ti Christ. Ngbanga ti nyen Jéhovah ayeke zia ti ndoye awavorongo lo na peko ti so lo mu na ala matabisi ti kota ahon so lo lingbi ti mu: tâ Molenge ti Lo so Lo ndoye lo mingi? (1 Jean 4:10) Teti a yä Christ fadeso na popo ti awakinda na a zia lo na koti ti Nzapa, lo yeke gbu koko ngangu teti aChrétien. Zo wa alingbi ti ke na lege ni gbungo koko ti Christ teti adisciple ti lo wala ti sala si fango ngbanga ti Nzapa so aba abe-ta-zo ti lo tongana azo so alingbi kue agbian? Zo oko pepe!​—Esaïe 50:8, 9; aHébreu 4:15, 16.

12, 13. (a) Aye wala adutingo wa alingbi pepe ti kangbi e na ndoye ti Nzapa? (b) Ye nyen Zabolo azia na gbele lo ti wara na salango si aye aduti ngangu na e? (c) Ngbanga ti nyen aChrétien ahon ye kue na ngangu?

¹² Diko aRomain 8:35-37. Nde na e, mbeni zo wala mbeni ye ayeke dä so alingbi ti kangbi e na ndoye ti Jéhovah na ti Molenge ti lo, Christ Jésus? Satan alingbi ti sala kusala na azo ti lo so ayeke na ndo ti sese ti ga na akpale mingi na aChrétien. Na yâ ti siècle so ahon, a sala asioni ye ti ngangu na mingi ti aita ti e ti koli na ti wali na yâ ti akodoro nde nde. Na ambeni ndo laso, aita ti e awara lâ na lâ akpale ti nginza. Nzala asala ambeni wala ala wara pepe abongo so alingbi. Ye nyen Zabolo ayeke gi na salango si dutingo ti aye aga ngangu? Biani mbeni oko ti aye so lo leke ti sala ayeke ti kanga lege na tâ vorongo ti Jéhovah. Satan aye ti sala si e mä na bê so ndoye ti Nzapa adë awe. Ye oko, a yeke tongaso?

¹³ Legeoko tongana Paul, so afa peko ti Psaume 44:23 (44:22, NW) a lingbi e manda Tene ti Nzapa so a sû na mbeti. E hinga so a yeke ndali ti iri ti Nzapa si aye so ayeke si na e, “angasangbaga” ti lo. A ndu salango si iri ti Nzapa aga nzoni-kue nga fango na gigi mbilimbili ti kota yanga-ti-komande ti lo. A yeke ndali ti akota ye tongaso si Nzapa azia lege na atara ti si, pepe ngbanga ti so lo ndoye e mbeni pepe. Atä dutingo so amu vundu a yeke tongana nyen, e hinga biani so ndoye so Nzapa ayeke na ni teti azo ti lo, so andu e oko oko kue, agbian pepe. Pono kue so e hu, so a ba atene a hon ndo ti e, ayeke duti biani mbeni hongo na ngangu na nda ni tongana e bata be-biani ti e. Ndoye ti Nzapa so a lingbi ti hon lâ oko pepe akpengba na amu ngangu na e.

14. Ngbanga ti nyen Paul amä biani na bê so Nzapa ayeke ngbâ lakue ti ndoye aChrétien atä akpale so ala lingbi ti wara?

¹⁴ Diko aRomain 8:38, 39. Ye nyen aga na Paul ti hinga biani na bê so mbeni ye oko pepe alingbi ti kangbi aChrétien na ndoye ti Nzapa? Kite ayeke pepe so aye so asi na Paul na ngoi so lo yeke fa tene akiri amu ngangu na mango na bê ti lo kue so akpale alingbi pepe ti sala ngangu na ndo ti ndoye so Nzapa ayeke na ni teti e. (2 aCorinthien 11:23-27; aPhilippien 4:13) Nga, Paul ahinga ye so Jéhovah aleke na bê ti lo giriri kozoni teti lakue lakue ti sala nga aye so Lo sala giriri na mbage ti azo ti Lo. Kui alingbi ti hon na ngangu ndoye ti Nzapa teti azo ti lo so asala na lo na be-biani? Oko pepe! Abe-ta-zo so akui ayeke na yâ ngangu ti dango bê so ayeke mbilimbili-kue ti Nzapa, na fade lo yeke zingo ala na popo ti awakinda na ngoi so lo diko.​—Luc 20:37, 38; 1 aCorinthien 15:22-26.

15, 16. Fa ambeni ye so alingbi ti kanga lege lâ oko pepe na ndoye so Nzapa ayeke na ni teti awakua ti lo be-ta-zo.

¹⁵ Atä kpale wa fini alingbi ti ga na ni laso: mbeni ndao so asala si tele ti zo wala bibe ti lo anze, mbeni kobela so ague gi na kui, wala mbeni kpale ti konomi, ye oko pepe alingbi ti futi ndoye so Nzapa ayeke na ni teti azo ti lo. Angangu ange, tongana ange so ake yanga so aga Satan, alingbi pepe ti kanga lege na Jéhovah ti ngbâ ti ndoye awakua ti lo so amu tele ti ala kue na lo. (Job 2:3) Angorogbia alingbi ti kanga lege, ti bi na da ti kanga, na ti sala sioni na awakua ti Nzapa na a lingbi ti ba ala tongana “persona non grata,” so ti tene azo so a ye tene ti ala pepe. (1 aCorinthien 4:13) Akengo ndo senge senge tongaso ti amara alingbi ti pusu azo ti londo ti ke e, me a sala ngangu pepe na ndo ti Kota Gbia ti ndagigi ti zia e.

¹⁶ Tongana aChrétien, a lingbi e sala pepe mbito so mbeni oko ti aye so Paul ahiri ni “ye ti fadeso,” aye so asi, nga na dutingo ti aye, na yâ bungbi ti aye ti fadeso, wala “ye so ayeke ga” ande alingbi ti fâ yâ ti dutingo ti Nzapa ndulu mingi na azo ti lo. Atä so angangu ti sese nga na ayingo sioni asala bira na e, ndoye so ayeke be-biani ti Nzapa ayeke dä ti mu maboko na e. Tongana ti so Paul agboto lê dä, “yongo ni na nduzu, wala yongo ni na gbe ti sese” alingbi pepe ti kanga lege na ndoye ti Nzapa. Biani, ye oko pepe so alingbi ti sala si bê ti e anze, wala ye oko pepe so aye ti sala kota ngangu na ndo e, alingbi ti kangbi e na ndoye ti Nzapa; nga mbeni créature oko pepe alingbi ti buba yâ ti songo so Wasalango ye alë na awakua ti lo be-ta-zo. Ndoye ti Nzapa ahon lâ oko pepe; a yeke teti lakue lakue.​—1 aCorinthien 13:8.

Yekia Nzobe ti Nzapa Teti Lakue Lakue

17. (a) Ngbanga ti nyen dutingo na ndoye ti Nzapa ayeke “nzoni ahon fini”? (b) Tongana nyen e fa na gigi so e yekia mingi nzobe ti Nzapa?

¹⁷ Ndoye ti Nzapa ayeke kota ye na lê ti mo tongana nyen? Mo yeke na mara ti bibe tongana ti David? Lo so asû: “Teti nzobe ti Mo ayeke nzoni ahon fini, fade yanga ti mbi amu gloire na Mo. Tongaso fade mbi sala tene nzoni na Mo na lâ ti fini ti mbi kue; fade mbi yä maboko ti mbi na iri ti Mo.” (Psaume 63:4, 5 [63:3, 4, NW]) Biani, mbeni ye so fini na yâ sese so alingbi ti mu, so ayeke nzoni ahon ndoye so Nzapa afa na mbage ti mo nga dutingo na mbeni kpengba songo ti kamarade na lo ayeke dä? Na tapande, gingo ti wara mbeni kusala so aga na faïda mingi ayeke nzoni ahon dutingo na siriri ti bibe nga na ngia so aga na lege ti mbeni kpengba songo na Nzapa? (Luc 12:15) Ambeni Chrétien aluti na gbele sorongo ti ke Jéhovah wala ti kui. Ye so asi na mingi ti aTémoin ti Jéhovah na yâ akando ti sana ti aNazi na ngoi ti Use Bira so Amu Sese Kue. Atä ambeni oko oko ti ala akiri na peko, aita Chrétien ti e mingi asoro ti ngbâ na yâ ndoye ti Nzapa, na dutingo ndulu ti kui tongana a hunda tongaso. Ala so angbâ be-ta-zo na yâ ndoye ti lo ayeke na beku ti wara na maboko ti Nzapa mbeni kekereke teti lakue lakue, mbeni ye so sese alingbi ti mu na e pepe. (Marc 8:34-36) Me a ndu ye mingi ahon fini ti lakue lakue.

18. Ngbanga ti nyen e sala nzala mingi ti fini ti lakue lakue?

¹⁸ Atä so lege ayeke dä pepe ti duti na fini teti lakue lakue nde na Jéhovah, tara ti ba na li tongana nyen fini so aninga mingi alingbi ti duti ande tongana Wasalango e ayeke dä pepe. A yeke duti gi tongaso, tâ nda ni ayeke duti dä pepe. Jéhovah amu na azo ti lo mbeni kusala ti sala na lâ ti nda ni so, kusala so anzere na bê. Tongaso e lingbi ti zia bê ti e so tongana Jéhovah, Lo ti Kota Ahon so asala si aye so lo leke ti sala aga tâ tene, amu fini ti lakue lakue, fade fini so ayeke si singo na aye ti pendere so agbu bê so a lingbi e manda na e sala. (Zo-ti-fa-tene 3:11) Atä aye kue so e lingbi ti manda na yâ angu saki mingi so ayeke ga, e yeke gbu lâ oko pepe nda ti ‘kota ti mosoro na ndara na hingango ye ti Nzapa.’​—aRomain 11:33.

Babâ Andoye Mo

19. Kozoni ti zia ala, tene ti dengo bê wa Jésus amu na adisciple ti lo?

¹⁹ Na lango 14 ti Nisan ti ngu 33 N.E., na ndangba lakui ti lo na abazengele ti lo 11 so ayeke be-ta-zo, Jésus atene aye mingi ti mu na ala ngangu teti ye so ayeke ku ala. Ala kue angbâ ndulu na Jésus na yâ akpale ti lo, na ala mveni aba ndoye so lo yeke na ni teti ala. (Luc 22:28, 30; Jean 1:16; 13:1) Na pekoni Jésus adë bê ti ala: “Babâ mveni andoye i.” (Jean 16:27) Ba tongana nyen atene so amu maboko na adisciple ni ti ba nzobe so Babâ ti ala ti yayu ayeke na ni teti ala!

20. Ye nyen mo leke na bê ti mo ti sala, na mo lingbi ti zia bê ti mo na ndo nyen?

²⁰ Azo mingi so ayeke na fini fadeso asala na Jéhovah na dutingo be-ta-zo teti angu mingi. Na kite oko pepe, kozoni si aye ti fadeso ahunzi, e yeke wara gbâ ti atara. Zia lâ oko pepe si atara wala akpale so asala si mo dë kite na ndoye ti be-biani so Nzapa ayeke na ni teti mo. A yeke duti ande ngangu ti gboto lê ahon ndo ni na ndo tene so: Jéhovah andoye mo. (Jacques 5:11) Zia zo oko oko kue na popo ti e angbâ ti sala mbage ti lo, na batango lakue akomandema ti Nzapa. (Jean 15:8-10) Zia e mu alege kue ti sepela iri ti lo. A lingbi e kpengba lekengo na bê ti e ti ngbâ ti duti ndulu na Jéhovah na yâ sambela nga na yâ mandango Tene ti lo. Atä ye so kekereke alingbi ti ga na ni, tongana e yeke sala ngangu ti e kue ti nzere na Jéhovah, e yeke ngbâ na siriri, na ziango bê kue na ndo ndoye ti lo so ahon lâ oko pepe.​—2 Pierre 3:14.

Mo Yeke Kiri Tene Tongana Nyen?

• Ti ngbâ ti luti nzoni na lege ti yingo na ti bibe, a lingbi e wara mbilimbili ndoye ti zo wa?

• Aye wa alingbi lâ oko pepe ti sala si Jéhovah azia ti ndoye awakua ti lo?

• Ngbanga ti nyen warango ndoye ti Jéhovah ayeke “nzoni ahon fini”?

[Afoto na lembeti 13]

Tongana e ba so mbeni ye akangbi e na ndoye ti Nzapa, e lingbi ti sala ye ti leke ni

[Foto na lembeti 15]

Paul ahinga ngbanga ti nyen a sala ngangu na lo