Atene so Azo Ahunda

Jéhovah ate mbele na Abraham na Our wala na Harân?

A wara kozo tondo ti mbele so Jéhovah ate na Abraham na Genèse 12:1-3 (NW), so atene: “Jéhovah ato nda ti tene na Abram: ‘Londo na kodoro ti mo, nga na popo ti songo ti mo, nga na da ti babâ ti mo, ti gue na kodoro so fade mbi yeke fa na mo; na fade mbi sala si mo ga mbeni kota mara . . . nga fade biani na lege ti mo asewa kue ti sese ahiri deba nzoni na ndo ala mveni.’”a Jéhovah alingbi biani la ni ti te mbele so na Abraham na ngoi so lo yeke na Our, na lo kiri lo fa ni na ngoi so Abraham ayeke na Harân.

Na kozo siècle, Étienne asala tene ti yanga so Jéhovah amu na Abraham ti gue na Canaan. Na salango tene na Sanhédrin, lo tene: “Nzapa ti gloire asi na kotara ti e Abraham, tongana lo yeke na sese ti Mésopotamie kozoni si lo duti na kodoro ti Caran [“Harân,” NW] Lo tene na lo, Zia sese ti mo na asongo ti mo, mo gue na sese so fade Mbi fa na mo.” (Kusala 7:2, 3, e si e sû gere ni nde.) Abraham ayeke la ni zo ti Our, na tongana ti so Étienne afa, a yeke na ndo so si ti fani oko ni lo mä yanga so a mu na lo ti gue na Canaan. (Genèse 15:7; Néhémie 9:7) Étienne asala tene ti mbele so Nzapa ate na Abraham pepe, me na Genèse 12:1-3, mbele so ague oko na yanga so a mu na lo ti gue na Canaan. Tongaso, a yeke na lege ni ti mä na bê so Jéhovah ate la ni mbele ni na Abraham na Our.

Ye oko, dikongo tondo ti Genèse nzoni amu lege ti ba so Jéhovah akiri afa tene ti mbele ti lo na Abraham na Harân, legeoko tongana ti so lo sala tene ni fani mingi nga lo fa anzene nzene ye so andu ni na angoi nde nde na Canaan. (Genèse 15:5; 17:1-5; 18:18; 22:16-18) Na lege ti Genèse 11:31, 32, babâ ti Abraham, Térah, azia Our ti gue na Canaan, na Abraham, Sara, na Lot ague legeoko na lo. Ala si na Harân, na ala ngbâ na ndo so juska na kuâ ti Térah. Abraham aduti na Harân aninga teti lo wara ngoi ti bungbi amosoro mingi. (Genèse 12:5) Nga, na mbeni ngoi, Nahor, ita ti Abraham ti koli, ague nga kâ.

Na pekoni so lo sala tene ti kuâ ti Térah, Bible afa tene ti yanga so Jéhovah amu na Abraham na a tene na pekoni: “Tongaso, Abram ague legeoko tongana ti so Jéhovah atene na lo.” (Genèse 12:4, NW) Tongaso, Genèse 11:31-12:4 amu akpengba nda ti tene ti yeda so a yeke la ni na peko ti kuâ ti Térah si Jéhovah amu atene so a wara na Genèse 12:1-3. Tongana a yeke tongaso, Abraham azia Harân na lo gue na kodoro so Jéhovah afa ni ti sala ye alingbi na mbeni yanga so lo wara tâ na ngoi ni, nga na ti so lo mä na Our angu mingi kozoni.

Na lege ti Genèse 12:1 (NW), Jéhovah amu yanga so na Abraham: “Londo na kodoro ti mo, nga na popo ti songo ti mo, nga na da ti babâ ti mo.” Na mbeni ngoi, “kodoro” ti Abraham ayeke Our, na “da” ti babâ ti lo ayeke na ndo so. Ye oko, babâ ti Abraham ague na azo ti da ti lo na Harân, na Abraham ato nda ti hiri ndo so kodoro ti lo. Na peko ti angu mingi na Canaan, Abraham atokua wakua ti lo na ‘sese ti lo na asongo ti lo’ ti gi mbeni wali teti Isaac, wakua ni ague na “kodoro ti Nahor” (so ayeke na Harân, wala na mbeni ndo ndulu na ni). (Genèse 24:4, 10) Kâ, wakua ni awara Rébecca na popo ti asewa ti Abraham, so ayeke na yâ ti kota sewa ti Nahor.​—Genèse 22:20-24; 24:15, 24, 29; 27:42, 43.

Na yâ tene ti lo na Sanhédrin, Étienne atene na ndo Abraham: “Tongana babâ ti lo akui awe, Nzapa alungula Abraham kâ, na Lo to lo na sese so i yeke duti dä fadeso.” (Kusala 7:4) Tene so aye ti fa so Jéhovah asala lisoro la ni na Abraham na Harân. A yeke na lege ni ti mä na bê so na ngoi ni so, Jéhovah akiri afa tene ti mbele ti lo na Abraham tongana ti so a sala tene ni na Genèse 12:1-3, teti so mbele ni ato nda ti sala kusala na ngoi so Abraham ague na Canaan. Tongaso, bingo bê na ndo aye so kue asi amu lege ti tene na nda ni so Jéhovah alingbi peut-être biani ti te mbele ti lo na Abraham na Our, na ti kiri ti fa tene ni na Harân.

[Kete Tene na Gbe Ni]