Mo Dabe Mo na Ni?

Mo yekia mingi dikongo a-article ti Tour ti Ba Ndo so asigigi a ninga pepe? Tongaso, ba wala mo lingbi ti kiri tene na ahundango tene so ge:

• Cour Constitutionnelle Fédérale ti Zamani amu maboko na yâ hongo na ngangu wa na lege ti ndia so andu lege ti vorongo?

Da-ngbanga so akinda sioni mbela so mbeni da-ngbanga nde amu na ndo aTémoin ti Jéhovah na yengo dä na ala tongana mbeni bungbi so ndia ayeda na ni na gbele azo. Mbela ti hongo na ngangu ni atene so na yâ ti akatikati so a zia teti liberté ti lege ti vorongo, mbeni zo alingbi ti ‘sala ye alingbi gi na atene ti mabe ti lo’ ahon aye so Letäa ahunda.​—15/8, lembeti 8.

• Teti ngoi oke Job ahu pono?

Buku ti Job afa pepe so lo hu pono teti angu mingi. Pono so Job ahu nga na lekengo tene ni alingbi peut-être la ni ti si gi na yâ ti anze kete, wala a si même ngu oko pepe.​—15/8, lembeti 31.

• Ngbanga ti nyen e lingbi ti tene biani so Zabolo ayeke ye mingi ahon gi tene ti atoro?

Jésus Christ ahinga so Zabolo ayeke dä biani. A yeke giriri mbeni tâ zo, pepe mbeni ye ti sioni na yâ Jésus mveni, si atara lo. (Matthieu 4:1-11; Jean 8:44; 14:30)​—1/9, alembeti 5-6.

• A-Proverbe 10:15 atene: “Mosoro ti zo ti mosoro ayeke kodoro ti lo ti ngangu; ye so afuti awanzinga ayeke nzinga ti ala.” Tongana nyen tene so aga tâ tene?

Amosoro alingbi ti bata zo na gbele ambeni ye nde nde so alingbi ti si fade fade na yâ fini ti lo, legeoko tongana mbeni gbata so gbagba ti ngangu angoro ni amu kamême mbeni nzoni dutingo na ala so alango na yâ ni. Nde na so, nzinga alingbi ti duti ye ti futi tongana aye so zo aku pepe asi na agbian dutingo ti lo.​—15/9, lembeti 24.

• Tongana nyen azo ato nda ti “di iri ti L’Eternel [“Jéhovah,” NW]” na ngoi ti Énosh? (Genèse 4:26)

A sala kusala na iri ti Nzapa ngbele ye giriri na tongo nda ti mbaï ti azo; tongaso, dingo iri ti Jéhovah so ato nda ni na ngoi ti Énosh ayeke la ni pepe dingo iri ti Jéhovah na lege ti mabe. Peut-être azo amu iri ti Jéhovah na lege ti zonga ti zia na ndo ala mveni wala na ndo ambeni zo so ala tene na lege ti ala fade ala ga ndulu na Nzapa na yâ vorongo.​—15/9, lembeti 29.

• Tongana ti so a sala kusala na ni na yâ Bible, tene “wango-tene ti fa lege” aye ti tene nyen?

Tene ni andu pepe mbeni mara ti salango sioni wala salango sana. (aProverbe 4:13; 22:15) Tene ti Grec so a sû pekoni na “wango-tene ti fa lege” andu kozoni kue lege ti wa zo, ti fa ye na zo, ti se zo na a ndu nga, ngoi na ngoi, sengo ndo ti ngangu me na lege ti ndoye. Mbeni kota lege so ababâ na mama alingbi ti manda tapande ti Jéhovah dä ayeke ti sala ngangu ti tene lisoro angbâ ti tambela na popo ti ala na amolenge ti ala. (aHébreu 12:7-10)​—1/10, alembeti 8, 10.

• Tongana nyen atâ Chrétien laso afa so ala mu mbage ti komandema ti Nzapa?

Na ngoi so ala yeke gbu koko ti Royaume ti Nzapa, aTémoin ti Jéhovah ayeke bi tele ti ala pepe na yâ aye ti poroso wala ala yeke londo pepe ti ke na ngangu ayanga-ti-komande ti sese, atä na yâ akodoro so a kanga lege na aTémoin dä. (Tite 3:1) Ala mu mbage ti ala na ambeni kusala so asala nzoni legeoko tongana ti so Jésus na akozo disciple ti lo asala giriri na ala sala ngangu kue ti mu maboko na azo ti yeda na anzoni kpengba-ndia so ayeke na yâ Bible, so andu aye tongana salango ye na lege ni, tambela so sioni ayeke dä pepe, nga na kpengba-ndia na ndo salango kusala ngangu.​—15/10, lembeti 6.

• Tongana nyen angu so amu fini ayeke sua na Andes?

A-Témoin ti Jéhovah ti ndo so ayeke sala ngangu ti ga na atâ tene ti Bible na azo, même na ayanga ti kodoro ni use kue, Quechua na Aymara. A-Témoin ni asala même vizite na azo so alango na azoa so ayeke na ndo ti Lac Titicaca, nga azoa “so ayeke tambela na ndo ti ngu” so a leke ni na apepe so ayeke maï na yâ angu ti lac so.​—15/10, alembeti 8-10.

• Ye nyen Nzapa amu ti fa lege na e so alingbi ti haka ni na mbeni ordinateur so afa lege na alapara ti yongo azo ti ngoi ti e?

Nzapa amu na azo ngangu ti fa lege na salango ye ti ala, mbeni bibe ti nzoni salango ye. Ye so ayeke yingo-ti-hinga so e wara tongana ye ti héritier. (aRomain 2:14, 15)​—1/11, alembeti 3-4.

• Ngbanga ti nyen kui ti Jésus ayeke na ngele ngangu?

Tongana Adam, zo ti mbilimbili, asala siokpari, lo glisa fini ti lo na ti ahale ti lo. (aRomain 5:12) Tongana zo so ayeke mbilimbili-kue, Jésus amu fini ti lo ti zo na sadaka, na lege so lo mu kota ngele so azi lege na abe-ta-zo ti wara fini ti lakue lakue.​—15/11, alembeti 5-6.

• A-Scythe so a sala tene ti ala na aColossien 3:11 ayeke giriri azo wa?

A-Scythe ayeke la ni mbeni mara so ayeke tambela na ndo nde nde ti abenyama ti Eurasie, so ala komande ni a to nda ni na ngu 700 ti si na ngu 300 K.N.E. Ala yeke la ni angangu wakpengo na mbarata nga awalombe. Peut-être aColossien 3:11 asala tene, pepe ti mbeni mara, me ti sioni ti salango ye ti kirikiri ti azo.​—15/11, alembeti 24-25.

• Ngbanga ti nyen e lingbi ti tene so Ndia ti Lor ayeke mbeni fango ye so a lingbi e bi bê ti e dä lakue?

A wara kota kpengba-ndia so na yâ Judaïsme, Bouddhisme, senda-ndara ti aGrec, nga na yâ Confucianisme. Ye oko, ye so Jésus afa na yâ Fango ye ti lo na ndo ti Hoto ahunda ti londo ti sala mbeni ye ti nzoni, na a ndu fini ti azo na ndo kue nga na ngoi kue. (Matthieu 7:12)​—1/12, lembeti 3.