Adeba Nzoni so Nzo Tënë Aga na Ni
“Jéhovah asa ye na ndo mbi ti tene nzo tënë na azo ti be-ti-molenge. Lo to mbi ti sala si bê ti azo so afâ awe aga nzoni, . . . ti lungula vundu ti azo kue so atoto na vundu.”—ISAÏE 61:1,2, NW.
NA MBENI lâ ti Sabbat na tongo nda ti kusala ti lo, Jésus ayeke na yâ ti mbeni synagogue na Nazareth. Na lege ti tondo ni, “[a] mû na Lo mbeti ti prophète Esaïe. Lo lungula mbeti ni, na Lo wara ndo so mbeti ni atene, Yingo ti Seigneur [“Jéhovah,” NW] ayeke na ndo Mbi, teti Lo sa mafuta na li ti Mbi ti fa Tene-nzoni.” Jésus adiko ambeni tënë na ndo ni na yâ mbage ti prophétie so. Na pekoni, lo kiri lo duti, na lo tene: “Laso, tënë so ti Mbeti ti Nzapa aga tâ tënë na mê ti i awe.”—Luc 4:16-21.
2 Na lege so, Jésus afa tele ti lo mveni tongana wafango nzo tënë so prophétie ni asala tënë ti lo, zo ti fango peko ti nzo tënë, na zo ti lungula vundu ti azo. (Matthieu 4:23) So nzo tënë si Jésus ayeke na ni ti tene! Lo tene na ala so amä lo: “Mbi yeke lumière ti sese. Zo so amû peko ti mbi fade lo tambela lâ oko pëpe na yâ bingo, me fade lo yeke na lumière ti fini.” (Jean 8:12, NW) Lo tene nga: “Tongana i duti na yâ tënë ti Mbi, i yeke adisciple ti Mbi biani, na fade i hinga tâ tënë, na fade tâ tënë azi i.” (Jean 8:31, 32, NW) Biani, Jésus ayeke na “tënë so amû fini ti lakue lakue.” (Jean 6:68, 69) Biani, lumière, fini, na liberté ayeke adeba nzoni so a lingbi a bâ ni na ngele ngangu!
3 Na peko ti Pentecôte ti ngu 33 N.E., adisciple angbâ ti sala kusala ti fango nzo tënë so Jésus asala. Ala fa “nzo tënë ti royaume so” na azo ti Israël nga na azo ti amara. (Matthieu 24:14, NW; Kusala 15:7; aRomain 1:16) Ala so ayeda na ni awara lege ti hinga Jéhovah Nzapa. A zi ala na gbe ti ngbâa ti lege ti vorongo, na ala ga mbage ti mbeni fini mara na lege ti yingo, “Israël ti Nzapa,” so azo ni ayeke na beku ti komande teti lakue lakue na yayu na tele ti Seigneur ti ala, Jésus Christ. (aGalate 5:1; 6:16; aEphésien 3:5-7; aColossien 1:4, 5; Apocalypse 22:5) Biani, aye so ayeke adeba nzoni ti ngele ngangu!
Fango Nzo Tënë Laso
4 Laso, aChrétien so a sa yingo na ndo ti ala, so “azo mingi so asi singo” ti “ambeni ngasangbaga” ayeke mû maboko na ala, angbâ lakue ti sala kusala so a mû giriri na Jésus na so prophétie asala tënë ni. (Apocalypse 7:9; Jean 10:16) Ye so asi na pekoni ayeke so a yeke fa nzo tënë mingi ahon ti kozoni. Na yâ akodoro na territoire 235, aTémoin ti Jéhovah ayeke gue “ti tene nzo tënë na azo ti be-ti-molenge . . . ti sala si bê ti azo so afâ awe aga nzoni, ti fa tënë ti liberté na azo so a gue na ala na ngbâa nga kota lungulango lê ti azo ti kanga; ti fa tënë ti ngu ti grâce ti L’Eternel [“Jéhovah,” NW], na lâ ti futango kula ti Nzapa ti e; ti lungula vundu ti azo kue so atoto na vundu.” (Isaïe 61:1, 2, NW) Tongaso, kusala ti fango nzo tënë ti aChrétien angbâ lakue ti ga na adeba nzoni na azo mingi, nga na tâ dengo bê na “azo so ahu pono.”—2 aCorinthien 1:3, 4.
5 A yeke tâ tënë so a-église ti Chrétienté ayeke maï ambeni lege nde nde ti fango nzo tënë. A-église mingi ayeke tokua amissionnaire ti ala ti sala si azo aga adisciple na yâ ambeni kodoro nde. Na tapande, mbeni mbeti-sango (The Orthodox Christian Mission Center Magazine) afa tondo ti kusala so amissionnaire ti Église Orthodoxe asala na Madagascar, na mbongo ti Afrika, na Tanzanie, nga na Zimbabwe. Ye oko, na yâ Église Orthodoxe, legeoko nga na ambeni église nde ti Chrétienté, mingi ti azo ni ayeke mû mbage oko pëpe na kusala so. Nde na ala, aTémoin ti Jéhovah kue so amû tele ti ala na Nzapa awe ayeke sala ngangu ti mû mbage ti ala kue na kusala ti fango nzo tënë. Ala bâ so fango nzo tënë ayeke mbeni fä ti tâ dutingo ti mabe ti ala. Paul atene: “Zo amä na bê ti lo ti ga mbilimbili; na lo sala tënë ni na gigi na yanga ti lo ti wara salut.” Biani, mabe so ayeke pusu zo pëpe ti sala kusala akui awe.—aRomain 10:10; Jacques 2:17.
Nzo Tënë so Aga na Adeba Nzoni ti Lakue Lakue
6 A-Témoin ti Jéhovah ayeke fa nzo tënë so ayeke nzoni ahon atanga ni kue. Ala zi Bible ti ala na ala fa na azo so aye ti mä tënë, so Jésus amû fini ti lo na sadaka ti mû na azo lege ti ga ndulu na Nzapa, ti wara pardon ti asiokpari, na ti duti na beku ti fini ti lakue lakue. (Jean 3:16; 2 aCorinthien 5:18, 19) Ala fa so a leke gere ti Royaume ti Nzapa na nduzu awe na gbe ti komandema ti Gbia so a sa yingo na ndo ti lo, Jésus Christ, nga na yâ ngoi kete fade Royaume ni ayeke lungula sioye na ndo sese na ayeke bâ lege ti kiri ti leke Paradis. (Apocalypse 11:15; 21:3, 4) Na yâ gango tâ tënë ti prophétie ti Isaïe, ala fa nga na azo so angoro ala so ngoi ti fadeso ayeke ‘ngu ti grâce ti Jéhovah’ tongana azo angbâ lakue ti yeda na nzo tënë. Na nga, ala yeke gboto mê so na yâ ngoi kete fade “lâ ti futango kula ti Nzapa ti e” ayeke ga tongana Jéhovah ayeke futi ande azo ti sioni so agbian pëpe.—Psaume 37:9-11.
7 Na yâ mbeni sese so akota kpale na aye ti ngangu ahon ndo ni, a yeke gi oko nzo tënë so aga na aye ti nzoni teti lakue lakue. Ala so ayeda na ni aga mbage ti mbeni songo ti aita Chrétien so abungbi beoko na ndo sese kue, na so azia pëpe lege na akangbi na lege ti mara, ti kete mara, wala ti konomi ti kangbi popo ti ala. Ala ‘yü ndoye, teti a yeke kamba so alingbi kue so asala si ala ga oko.’ (aColossien 3:14; Jean 15:12) A yeke ye so a bâ na ngu so ahon na yâ mbeni kodoro ti Afrika. Na mbeni ndapelele, atoto ti angombe azingo azo ti kota gbata ni. A yeke tara ti sala mbeni coup d’état. Tongana aye ni ato nda ti ga tënë ti mara, a kasa mbeni sewa ti Témoin teti so lo bata afon lo Témoin ti mbeni kete mara nde. Sewa ni akiri tënë: “A yeke gi aTémoin ti Jéhovah si ayeke na yâ da ti e.” Ti ala, akangbi ti kete mara ayeke kota ye pëpe; kota ye ni ayeke ndoye ti Chrétien, ti lungula vundu ti ala so ayeke na bezoin ni. Mbeni songo ti sewa ni so ayeke Témoin pëpe atene: “Azo ti alege ti vorongo kue ayeke kä afon ala na yâ vorongo. Gi aTémoin ti Jéhovah oko si asala tongaso pëpe.” Oko mara ti aye tongaso, so tondo ni alondo na akodoro so bira asungba dä na popo ti azo ni, afa so aTémoin ti Jéhovah ‘andoye biani sewa ti aita kue.’—1 Pierre 2:17.
Nzo Tënë Asala si Azo Agbian
8 Nzo tënë ague oko na ye so Paul ahiri ni “fini ti laso, na . . . fini so ayeke ga.” (1 Timothée 4:8, NW) A mû pëpe gi mbeni beku so ayeke pendere na so ayeke tâ ye biani teti gigi ti kekereke, me nga a sala si “fini ti laso” aga nzoni ahon. A yeke fa lege na aTémoin ti Jéhovah oko oko na lege ti Tënë ti Nzapa, Bible, ti sala si fini ti ala alingbi na ye so bê ti Nzapa aye. (Psaume 119:101) Asalango ye ti ala ayeke ga fini tongana ala yeke lë mara ti alengo tongana mbilimbili na be-biani.—aEphésien 4:24.
9 Bi bê na tapande ti Franco. Lo yeke lani na kpale ti ngonzo. Tongana mbeni ye anzere na lo pëpe, lo sungba na kota ngonzo na lo fâ yâ ti aye. Wali ti lo amanda Bible na aTémoin ti Jéhovah, na yeke yeke, tapande ti ala amû maboko na Franco ti bâ so a lingbi lo gbian. Lo manda Bible na ala; na nda ni, lo lingbi ti fa na gigi alengo ti yingo ti nzoni-kue so ayeke siriri na ngangu ti kanga nzala ti tele. (aGalate 5:22, 23) Lo yeke lani mbeni oko ti azo 492 so awara batême na Belgique na yâ ngu ti kusala ti 2001. Bâ nga tapande ti Alejandro. Maseka koli so aga ngbâa ti mbangi na mbeni lege so a sala si lo to nda ti bata fini ti lo na lege ti aye so a tuku na ndo ti asaleté, na lo yeke ro aye kue so lo bâ angbâ nzoni ti kä ni ti vo na mbangi. Tongana lo wara ngu 22, aTémoin ti Jéhovah atisa Alejandro ti manda Bible, na lo yeda. Lo diko Bible lâ na lâ, na lo gue na abungbi ti aChrétien. Lo leke fini ti lo hio si a ga nzoni, a sala si même nze omene pëpe na pekoni, lo wara lege ti mû mbage ti lo na kusala ti fango nzo tënë, na lo yeke oko ti awafango tënë 10 115 so asala tongaso na ngu so ahon na Panama.
Nzo Tënë: Mbeni Deba Nzoni teti Azo ti Be-ti-molenge
10 Isaïe afa so fade a yeke fa nzo tënë na azo ti be-ti-molenge. A yeke azo wa? A yeke azo so a sala tënë ti ala na yâ mbeti ti Kusala tongana ala so “bê ti ala alingbi na ye so a hunda teti fini ti lakue lakue.” (Kusala 13:48, NW) Ala yeke azo ti be-ti-molenge so alondo na popo ti azo nde nde, na so azi bê ti ala ti yeda na tokua ti tâ tënë. Ala manda so salango ye so bê ti Nzapa aye ayeke ga na adeba nzoni so ayeke mingi ahon ye kue so sese ayeke mû. (1 Jean 2:15-17) Ye oko, tongana nyen aTémoin ti Jéhovah ayeke ndu bê ti azo na yâ kusala ti ala ti fango nzo tënë?
11 Biani, bâ tapande ti bazengele Paul so atokua mbeti na azo ti Corinthe: “Na mbi, aita, tongana mbi ga na i giriri, mbi fa na i tënë ti témoin ti Nzapa na lege ti nzo yanga wala ti ndara pëpe. Teti mbi leke na bê ti mbi ti hinga mbeni ye nde pëpe na popo ti i, gi Jésus Christ, lo so a fâ lo na ndo keke ti pasi.” (1 aCorinthien 2:1, 2, NW) Paul atara lani pëpe ti sala kusala na mandango ye ti lo ti pika bê ti azo so ayeke mä lo. Lo fa mbeni ye nde pëpe gi aye so Nzapa afa ni, aye so laso a sû na yâ ti Bible. Bâ nga wango so Paul amû na Timothée, fon lo na yâ fango nzo tënë: “Fa tënë ni, ngbâ dä.” (2 Timothée 4:2, NW) A lingbi Timothée afa “tënë ni,” so ti tene tokua ti Nzapa. Paul asû nga tënë so na Timothée: “Mo gi lege ngangu ti mû tele ti mo na Nzapa tongana zo so alingbi na lê ti Lo, zo so ahinga kusala ni si kamela asala lo pëpe, zo so afa nda ti tene-biani na lege ni.”—2 Timothée 2:15.
12 A-Témoin ti Jéhovah ayeke sala ye alingbi na tapande ti Paul nga na atënë ti lo na Timothée. Ala hinga ngangu so Tënë ti Nzapa ayeke na ni, na ala sala kusala nzoni na ni tongana ala yeke gi ti fa na azo so ayeke ndulu na ala atënë ti beku na ti lungulango vundu na bê. (Psaume 119:52; 2 Timothée 3:16, 17; aHébreu 4:12) Tâ tënë, ala yeke sala kusala nzoni na ambeti ti Bible na mbeni lege so azo so asala nzala ti tënë ni alingbi ti wara hingango ye ti Bible mingi ahon na ngoi so alingbi na ala. Me ala yeke gi lakue ti fa na azo atënë ti Mbeti ti Nzapa. Ala hinga so Tënë ti Nzapa so a sû na gbe ti yingo ayeke sala kusala nzoni na ndo bê ti azo ti be-ti-molenge. Nga, salango kusala na ni tongaso ayeke kpengba nga mabe ti ala mveni.
“Lungula Vundu ti Azo Kue so Atoto na Vundu”
13 Ngu 2001 ayeke na akota kpale ti lo, na ye ti pekoni ayeke so azo mingi ayeke na bezoin ti tene a lungula vundu ti ala. A bâ mbeni kpengba tapande ni na nze ti septembre so ahon na États-Unis, tongana a-terroriste abuba ndokua ti World Trade Center na New York, nga na Pentagone so ayeke ndulu na Washington, D.C. So tâ ye ti yengingo bê ti zo si aye so aduti lani teti kodoro ni kue! Na gbele mara ti aye so asi tongaso, aTémoin ti Jéhovah asala ngangu kue ti sala kusala ti ala ti “lungula vundu ti azo kue so atoto na vundu.” Ambeni tapande ayeke fa ande tongana nyen ala yeke sala ni.
14 Mbeni ita-wali Témoin so ayeke wakua ti ngoi kue aga ndulu na mbeni wali so ayeke na tele ti lege, na lo hunda na lo tongana nyen lo bâ ti lo aye ti ngangu so a-terroriste asala na yâ angoi so ahon ade ti ninga mingi pëpe. Wali ni ato nda ti toto. Lo tene so vundu agbu bê ti lo mingi, na lo yeke hunda tele ti lo ye so lo lingbi kamême ti sala ti mû maboko. Témoin ni atene na lo so Nzapa abi bê mingi na ndo ti e kue, na lo diko na lo Esaïe 61:1, 2. Wali ni abâ so atënë so a sû na gbe ti yingo ayeke tâ na lege ni, teti lo tene so zo oko oko kue ayeke toto na vundu. Lo yeda ti mû mbeni tract, na lo hunda na ita-wali Témoin ni ti kiri ti bâ lo na da ti lo.
15 A-Témoin use so ayeke sala kusala ti fango nzo tënë atingbi na mbeni koli so angbâ ti sala kusala na gbe ti da ti lo. Ala mû ngoi ti fa na lo atënë so alungula vundu na bê, so alondo na yâ Mbeti ti Nzapa teti kota kpale so a si a de ti ninga pëpe na World Trade Center. Tongana lo yeda, ala diko na lo 2 aCorinthien 1:3-7, so na yâ ni a wara atënë so: “Tënë so alungula vundu . . . awu mingi na lege ti Christ.” Koli ni akiri singila teti so azo so ayeke ndulu na lo na so ayeke aTémoin ayeke kangbi na ambeni zo mbeni ye so alungula vundu, na lo tene: “Zia Nzapa ahiri deba nzoni na ndo nzo kusala so i yeke sala.”
16 Mbeni Témoin so ayeke kiri ti bâ ambeni zo so asala nzala ti tënë ni atingbi na molenge-koli ti mbeni wali so asala kozoni awe nzala ti tënë ni na lo fa so lo yeke gi bê ti lo na ndo lege so azo so ayeke ndulu na lo ayeke sala ye na peko ti kota kpale so asi ade ti ninga pëpe. Bê ti koli ni adö so Témoin ni ayeke mû ngoi ti lo ti sala vizite na azo na ti bâ tongana nyen ala yeke. Lo tene so lo yeke sala lani kusala tâ gi ndulu na ndokua ti World Trade Center tongana ye ti ngangu ni asi, na lo bâ tambelango ti aye ni kue. Tongana lo hunda ngbanga ti nyen Nzapa azia lege na pasi, Témoin ni adiko na lo aversê ti Bible tongana Psaume 37:39, so atene: “Salut ti azo ti mbilimbili ayeke ti L’Eternel [“Jéhovah,” NW]; Lo yeke Gbada Ti Bira ti ala na lâ ti vundu.” Koli ni ahunda na nzobe tënë na ndo seni ti Témoin ni na sewa ti lo, lo tisa lo ti kiri ti ga, na lo fa bê ti kiri singila kue teti vizite ni so.
17 Mbeni oko ti azo saki mingi so aTémoin ti Jéhovah alungula vundu ti ala, na yâ alango so aga na peko ti aye ti ngangu so a-terroriste asala, ayeke mbeni wali so aTémoin atingbi na lo na ngoi so ala yeke sala vizite na azo so ayeke ndulu na ala. Lo yeke lani na kota vundu mingi na peko ti ye so asi, na lo dengi mê nzoni tongana ala diko na lo Psaume 72:12-14: “Teti fade Lo sö zo so ye atia lo mingi tongana lo toto na Lo, na Lo sö zo ti vundu so ayeke na zo oko pëpe ti sala na lo. Fade Lo sala be-nzoni na wanzinga na zo so ye atia lo mingi, na Lo sö âme ti ala so ye atia ala mingi. Fade lo ton âme ti ala na yâ ye ti ngangu na sioye; na mênë ti ala ayeke ye ti ngele ngangu na lê ti Lo.” So tâ kpengba tënë! Wali ni ahunda na aTémoin ni ti kiri ti diko aversê ni, na lo tisa ala ti lï na yâ da ti lo ti sala lisoro mbeni. Na hunzingo ti lisoro ni, a to nda ti mbeni mandango Bible na lo.
18 Mbeni Témoin ni oko asala kusala na mbeni da ti tengo kobe na ndo so azo mingi mingi ayeke dä, me so azo ni asala nzala ti nzo tënë ti Royaume mingi pëpe. Na peko ti aye ti ngangu so a-terroriste asala, a bâ so bê ti azo ni awoko ngangu. Na vendredi na lakui na peko ti ye ti ngangu ni, wali so ayeke patron ti ndo ti tengo kobe ni atisa zo oko oko ti sigigi na ti gbu a-bougie na maboko, na mungo mbeni ngoi ti gbungo li ti dabe na azo so awara kuâ na yâ ye ti ngangu so. Teti lo yekia atënë ti bê ti ala, Témoin ni asigigi na lo duti kpö na tele ti lege. Wali ni so ayeke patron ni ahinga so lo yeke mbeni wakua Témoin ti Jéhovah, na tongaso na peko ti mbeni ngoi ti gbungo li, lo hunda na lo ti sambela Nzapa teti zo oko oko. Témoin ni ayeda. Na yâ sambela ti lo, lo sala tënë ti toto ti vundu ni so ayeke kota mingi, me lo tene so beku ayeke dä teti azo so ayeke toto. Lo sala tënë ti ngoi so mara ti aye ti sioni tongaso ayeke si ande mbeni pëpe, na lo tene so azo kue alingbi ti ga ndulu mingi ahon na Nzapa so alungula vundu, na lege ti tâ hingango ye so alondo na Bible. Na pekoni so lo tene “amen,” wali ni nga na azo 60 na ndo ni so ayeke na gigi ti da ti tengo kobe ni aga ndulu na Témoin ni, akiri singila na lo, na agbu lo teti ala bâ so sambela ni ayeke mbeni mara ti nzoni sambela so ala mä lâ oko pëpe.
Mbeni Deba Nzoni Teti Azo
19 Na yâ ngoi ti laso mbilimbili, azo so alango na ando so aTémoin ti Jéhovah ayeke sala kusala dä na wâ awara ye ti nzoni na lege ti ala, tongana ti so azo mingi abâ. Biani, mbeni bungbi ti azo so ayeke maï siriri, salango ye na lege ni, na asalango ye so ayeke na sioni pëpe alingbi gi ti duti mbeni ngangu teti ye ti nzoni. Na yâ mbeni kodoro ti Asie Centrale, aTémoin atingbi na mbeni kota zo so ayeke na retraite awe na so asala kua lani na yâ mbeni ndokua so abâ lege ti nzoni duti ti azo. Lo tene so lani a hunda na lo ti gi nda ti tënë na ndo abungbi ti alege ti vorongo nde nde. Tongana lo to nda ti gi nda ti tënë na ndo aTémoin ti Jéhovah, bê ti lo adö na ndo salango ye ti ala na lege ni nga na nzoni tambela ti ala. Bê ti lo apika ti bâ so ala yeke na kpengba mabe, na so afango ye ti ala aluti gi na ndo Mbeti ti Nzapa. Koli so ayeda ti manda Bible.
20 Na lege ti akete tapande so a fa na yâ ti article so, nde na ambeni tapande saki mingi so a lingbi nga ti sala tënë ni, a bâ polele so aTémoin ti Jéhovah asala kusala ngangu mingi na yâ ngu ti kusala 2001.a Ala sala tënë na azo kutu mingi, ala lungula vundu ti azo mingi, na kusala ti ala ti fango nzo tënë aga na adeba nzoni. A yeke azo 263 431 si amû tele ti ala na Nzapa na lege ti batême. Na ndo sese kue, wungo ti awafango nzo tënë ague na li ni, azo 1.7 na ndo azo 100. Nga, wungo ti azo 15 374 986 so aga na matanga ti Dango Bê na Kui ti Jésus afa so kusala mingi angbâ ti sala. (1 aCorinthien 11:23-26) Zia e ngbâ lakue ti gi azo ti be-ti-molenge so ayeda na nzo tënë. Nga, atâa ngoi oke so ngu ti grâce ti Jéhovah ayeke ninga, zia e ngbâ lakue ti lungula vundu na ‘bê ti azo so bê ti ala afâ awe.’ So tâ kota matabisi si e yeke na ni! Kite ayeke pëpe so e yeke yeda na atënë so ti Isaïe: “Fade Mbi duti na ngia mingi na yâ L’Eternel [“Jéhovah,” NW], âme ti Mbi ayeke na ngia na yâ Nzapa ti Mbi.” (Esaïe 61:10) Zia Nzapa angbâ lakue ti sala kusala na e na ngoi so lo yeke sala si atënë ti prophétie so aga tâ tënë: “Fade Seigneur L’Eternel [“Jéhovah,” NW] asala si mbilimbili na tënë ti sepelango asigigi na gbele amara kue.”—Esaïe 61:11.
[Kete Tene na Gbe Ni]
a Molongo ti akodoro so a fa na alembeti 19 ti si na 22 amû tondo ti kusala ti aTémoin ti Jéhovah na yâ ngu ti kusala 2001.
Mo Dabe Mo na Ni?
• Tongana nyen nzo tënë so Jésus afa lani aga na adeba nzoni na azo ti be-ti-molenge?
• Adeba nzoni wa aga na ndo azo so ayeda na kusala ti fango nzo tënë so adisciple ti Jésus ti kozo siècle asala?
• Tongana nyen nzo tënë aga na adeba nzoni na azo so ayeda ti mä tënë laso?
• Tongana nyen e bâ matabisi ti e ti duti awafango nzo tënë?
[Ahundango Tene ti Manda na Ye]
1, 2. (a) Jésus afa tele ti lo lani tongana zo wa, na tongana nyen? (b) Adeba nzoni wa nzo tënë so Jésus afa aga na ni?
3. Nzo tënë wa adisciple ti Jésus afa lani?
4. Na yâ lege wa a yeke sala kusala ti fango nzo tënë laso?
5. Na ndo tënë ti fango nzo tënë, tongana nyen aTémoin ti Jéhovah ayeke nde na a-église ti Chrétienté?
6. Nzo tënë wa a yeke fa laso?
7. Tapande wa afa na gigi beoko ti aTémoin ti Jéhovah, na ngbanga ti nyen ala yeke na mara ti beoko so?
8, 9. (a) Agbiango ye wa ala so ayeda na nzo tënë asala? (b) Atapande wa afa na gigi ngangu ti nzo tënë?
10. Azo wa ayeda na nzo tënë, na tongana nyen bango ndo ti ala agbian?
11. Na bango ndo ti Paul, tongana nyen a lingbi a fa nzo tënë?
12. Tongana nyen aTémoin ti Jéhovah laso ayeke sala ye alingbi na tapande nga na atënë ti Paul?
13. Na yâ ngu 2001, aye wa so asi azi lege na mbeni kota bezoin ti lungula vundu ti ala so atoto na vundu?
14, 15. Tongana nyen aTémoin awara lege ti sala kusala na Mbeti ti Nzapa nzoni ti lungula vundu ti azo so ayeke toto na vundu na yâ atapande use so asi nde nde?
16, 17. Atapande use wa afa na gigi ngangu ti Bible ti mû maboko na azo so akota kpale asala si ala duti na yâ kota mawa na kota vundu?
18. Tongana nyen mbeni Témoin amû maboko na azo so ayeke ndulu na lo tongana a tisa lo ti sambela teti ala?
19. Tapande wa afa so ambeni zo ayeda so alege ti tambela ti aTémoin ti Jéhovah ayeke na nduzu mingi?
20. (a) Ye nyen kusala so aTémoin ti Jéhovah amû tondo ni na ngu so ahon afa? (b) Ye nyen afa so kusala mingi angbâ ti sala, na tongana nyen e yeke bâ matabisi ti e ti fango nzo tënë?
[Tableau na lembeti 19-22]
TONDO TI ATÉMOIN TI JÉHOVAH TI NDO SESE KUE TETI NGU TI KUSALA 2001
(Ti ba tene ni mbilimbili, ba buku ni)
[Afoto na lembeti 15]
A-Témoin ti Jéhovah ayeke dabe ti ala lakue na kungba ti ala ti fa nzo tënë
[Afoto na lembeti 17]
Ala so ayeda na nzo tënë aga mbage ti mbeni songo ti aita so asala beoko na ndo sese kue