Atâ Chrétien Kue Ayeke Awafango Nzo Tënë

“Sala bia na Jéhovah, hiri deba nzoni na ndo iri ti lo. Lâ na lâ fa nzo tënë ti salut so aga na lege ti lo.”​—PSAUME 96:2, NW.

NA YÂ mbeni sese so akpale ayeke si dä lâ na lâ, a yeke tâ ye ti dengo bê ti hinga so, tongana ti so Bible afa, bira, kengo ndia, nzala, na sioni komandema ayeke ndulu ti hunzi. (Psaume 46:10 [46:9, NW]; 72:3, 7, 8, 12, 16) Biani, ye so ayeke pëpe nzo tënë so a lingbi zo oko oko kue amä ni? A-Témoin ti Jéhovah abi bê tongaso. A hinga ala na ndo kue tongana azo so ayeke fa “nzo tënë ti mbeni ye ti nzoni ahon.” (Isaïe 52:7, NW) Tâ tënë, aTémoin ti Jéhovah mingi ahu pono na gbele salango ngangu teti lekengo na bê ti ala ti ngbâ lakue ti fa nzo tënë. Me ye so agbu bê ti ala ayeke nzoni ti azo. Nga, so pendere tondo ti salango kusala na wâ na ti gbungo ngangu si aTémoin ti Jéhovah azia na peko ti ala!

² Wâ ti aTémoin ti Jéhovah laso ague legeoko na ti aChrétien ti kozo siècle. Na ndo ala, mbeni mbeti-sango ti Église catholique ti Rome (L’Osservatore Romano) atene tâ na lege ni: “Akozo Chrétien, gi na ngoi so ala yeke wara batême, abâ so a yeke kungba ti ala ti kangbi tënë ti Évangile. Na lege ti salango tënë na yanga, angbâa ayeke fa tënë ti Évangile.” Ngbanga ti nyen aTémoin ti Jéhovah, legeoko na akozo Chrétien so, ayeke na wâ tongaso? Kozoni kue, ngbanga ti so nzo tënë so ala yeke fa ayeke ti Jéhovah Nzapa mveni. Nde na so, a lingbi ti wara mbeni nda ti tënë so apusu ala ti duti na wâ tongaso? Fango tënë ti ala ayeke kiringo tënë na atënë so ti wasungo psaume: “Sala bia na Jéhovah, hiri deba nzoni na ndo iri ti lo. Lâ na lâ, fa nzo tënë ti salut so aga na lege ti lo.”​—Psaume 96:2, NW.

³ Atënë ti wasungo psaume adabe ti e na use nda ti tënë so afa nda ti salango kusala ti aTémoin ti Jéhovah na wâ. Tokua ti ala ayeke tokua ti salut. Ambeni zo ayeke sala akusala so andu kaïngo kobela, dutingo ti azo, konomi nga na ambeni ye nde, ti sala si fini ti afon ala aga nzoni ahon, na mara ti angangu tongaso alingbi na gonda. Me ye kue so mbeni zo alingbi ti sala teti amba ti lo ayeke na akatikati, tongana a haka ni na “salut so a ga na lege ti [Nzapa].” Na lege ti Jésus Christ, fade Jéhovah ayeke zi azo ti tâ be-ti-molenge na gbe ti siokpari, kobela, na kui. Azo so ayeke wara aye ti nzoni dä ayeke ngbâ ande na fini teti lakue lakue! (Jean 3:16, 36; Apocalypse 21:3, 4) Laso, salut ayeke na popo ti ‘aye ti kpene’ so aChrétien ayeke fa tongana ala yeke sala ye alingbi na atënë so: “Fa tënë ti gloire ti Lo [Nzapa] na popo ti amara, na ye ti kpene ti Lo na popo ti azo kue, teti L’Eternel ayeke kota, na a lingbi azo asepela Lo mingi. A lingbi azo akpe mbito ti Lo ahon anzapa kue.”​—Psaume 96:3, 4.

Tapande ti Maître Ni

⁴ A-Témoin ti Jéhovah ayeke na wâ teti mbeni ota nda ti tënë. Ala mû tapande ti Jésus Christ. (1 Pierre 2:21) Koli so ti mbilimbili-kue ayeda na bê kue na kungba “ti tene nzo tënë na azo ti be-ti-molenge.” (Esaïe 61:1, NW; Luc 4:17-21) Na lege so, lo ga mbeni wafango nzo tënë, mbeni zo so atene peko ti nzo tënë. Lo tambela na yâ Galilée na Judée kue, “na lo fa nzo tënë ti royaume.” (Matthieu 4:23, NW) Nga, teti lo hinga so azo mingi ayeke yeda ande na nzo tënë so, lo tene na adisciple ti lo: “Le-kobe ti yaka ayeke mingi biani, me azo ti kusala ayeke mingi pëpe. Tongaso i sambela Mveni ti le-kobe ni si Lo to azo ti kusala ti fâ le-kobe ti Lo.”​—Matthieu 9:37, 38.

⁵ Ti sala ye alingbi na sambela ti lo mveni, Jésus aleke ambeni zo ti ga awafango nzo tënë. Na pekoni, lo tokua abazengele ti lo ti gue, na lo tene na ala: “Tongana i yeke gue, i fa tënë, i tene, Royaume ti yayu ayeke ndulu.” A lingbi fade ti duti nzoni ahon pëpe teti ala ti zia na sese aprogramme ti sala si akpale ti ngoi ti ala akiri na peko kete? Wala a lingbi ala bi tele ti ala na yâ aye ti poroso ti tara ti kanga lege na petengo goro so ayeke gue gi na li ni guengo na ngoi so? Oko pëpe. Nde na so, Jésus afa lege ti salango ye so a lingbi awafango nzo tënë kue so ayeke Chrétien amû pekoni, tongana lo tene na adisciple ti lo: “Tongana i yeke gue, i fa tënë.”​—Matthieu 10:5-7.

⁶ Na pekoni, Jésus atokua mbeni bungbi ti adisciple nde ti fa tënë so: “Royaume ti Nzapa aga ndulu.” Tongana ala kiri na kodoro ti mû tondo ti anzoni ye so ala wara na peko ti tambela ti ala ti fango nzo tënë, Jésus awara kota ngia. Lo sambela: “Mbi mû singila na Mo, O Babâ, Seigneur ti yayu na ti sese, teti Mo honde ye so na awandara na azo ti mayele, na Mo fa nda ni na akete molenge. Biani, Babâ, teti so ayeke nzoni na lê ti Mo.” (Luc 10:1, 8, 9, 21) Tongana a haka ala na amokonzi ti lege ti vorongo ti mara ni so awara fango ye na yâ akota da-mbeti, adisciple ti Jésus ayeke gi tongana akete molenge, teti ala yeke lani angbele zo ti gingo susu so awara ye na lege ti maboko ti ala mveni, awadengo yaka, na ambeni zo tongaso. Me a leke adisciple ni ti fa nzo tënë so ahon atanga ni kue.

⁷ Na peko ti guengo ti Jésus na yayu, adisciple ti lo angbâ lakue ti kangbi nzo tënë ti salut. (Kusala 2:21, 38-40) Ala fa tënë lani na azo wa kozoni? Ala gue lani na mbage ti amara so ahinga Nzapa pëpe? Oko pëpe, teti kozo yaka ti ala ayeke lani azo ti Israël so ahinga Jéhovah teti angu so ahon 1 500 awe. Ala yeke lani na droit ti fa tënë na yâ mbeni kodoro so a yeke voro Jéhovah dä awe? Biani. Jésus atene lani na ala: “Fade i ga atémoin ti Mbi na Jérusalem, na Judée kue, na Samarie, na juska na nda ti sese kue.” (Kusala 1:8) Azo ti Israël ayeke lani na bezoin ti mä nzo tënë mingi legeoko tongana mbeni mara nde.

⁸ Legeoko nga, aTémoin ti Jéhovah laso ayeke fa tënë na ndo sese kue. Ala yeke sala kusala maboko na maboko na ange so Jean abâ, so “ayeke na nzo tënë ti lakue lakue ti fa tongana nzo-sango na azo so alango na ndo sese, na amara kue, akete mara kue, ayanga kue, na azo nde nde kue.” (Apocalypse 14:6, NW) Na ngu 2001, ala yeke sala lani kusala na yâ akodoro na aterritoire 235, so andu nga ando so a bâ ni tongana akodoro ti aChrétien. A yeke na lege ni pëpe ti tene aTémoin ti Jéhovah afa tënë na ando so Chrétienté azia gere ti aÉglise ti lo dä awe? Ambeni zo atene so a yeke na lege ni pëpe, na ala lingbi peut-être même ti bâ mara ti fango tënë tongaso tongana “mbeni lege ti nzi angasangbaga.” Ye oko, aTémoin ti Jéhovah adabe ti ala na abibe so Jésus ayeke na ni lani teti aJuif so ayeke na be-ti-molenge ti ngoi ti lo. Atâa so ala yeke lani na mbeni bungbi ti aprêtre awe, Jésus agbanzi tele ti lo pëpe ti fa na ala nzo tënë. “Lo bâ azo mingi so mawa ti ala agbu lo, ngbanga ti so ye mingi atia ala na ala kangbi kirikiri tongana angasangbaga so ayeke na berger pëpe.” (Matthieu 9:36, NW) Tongana aTémoin ti Jéhovah atingbi na azo ti be-ti-molenge so ahinga tënë pëpe na ndo Jéhovah na Royaume ti lo, a lingbi ala ke ti fa nzo tënë na mara ti azo tongaso ngbanga ti so mbeni lege ti vorongo atene so azo ni ayeke na gbe ti ngangu ti lo awe? Na mungo tapande ti abazengele ti Jésus, e yeke tene so kiringo tënë ni ayeke wataka. A lingbi a fa nzo tënë “na amara kue,” na glisango mbeni oko pëpe.​—Marc 13:10.

Akozo Chrétien Kue Afa Nzo Tënë

⁹ Zo wa na kozo siècle amû mbage na kusala ti fango nzo tënë? Atënë ni afa so aChrétien ni kue ayeke lani awafango nzo tënë. Wasungo mbeti W. S. Williams atene: “Kota fä so a hinga ni nzoni ayeke so aChrétien kue na yâ Église ti giriri . . . afa lani Évangile.” Na ndo tënë ti aye so asi na lâ ti Pentecôte ti ngu 33 N.E., Bible atene: “Ala kue asi na [“yingo ti nzoni-kue,” NW], na ala to nda ti sala tënë na mbeni yanga nde nde, tongana Yingo amû ngangu na ala ti sala tënë.” Na pekoni, a to nda ti wara na popo ti awafango nzo tënë so akoli na awali, apendere na ambakoro, angbâa na azo so ayeke na liberté. (Kusala 1:14; 2:1, 4, 17, 18; Joël 2:28, 29; aGalate 3:28) Tongana salango ngangu na ndo aChrétien apusu ala mingi ti kpe gbata ti Jérusalem, ‘ala so akangbi kirikiri ague na ndo nde nde ti fa nzo tënë ti tënë ni.’ (Kusala 8:4) A yeke lani ala so kue ‘akangbi kirikiri na ndo nde nde’ si afa nzo tënë, me pëpe gi mbeni kete wungo ti azo so a soro.

¹⁰ Ye so aga tâ tënë polele biani na yâ ti angu so ahon kozoni. Jésus amû prophétie so: “Fade a fa nzo tënë ti royaume so na sese kue so azo ayeke dä, tongana tënë ti témoin na amara kue; na pekoni, fade nda ni aga.” (Matthieu 24:14, NW) Na yâ gango tâ tënë ti prophétie so na kozo siècle, a fa lani nzo tënë na ndo kue kozoni si aturugu ti Rome afuti bungbi ti aye ti vorongo na ti poroso ti aJuif. (aColossien 1:23) Na ndo ni, adisciple kue ti Jésus asala ye alingbi na komandema ti lo so: “I gue, i sala si azo na popo ti amara kue aga adisciple, i batize ala na iri ti Babâ na ti Molenge na ti yingo ti nzoni-kue, i fa na ala ti bata ye kue so mbi komande na i.” (Matthieu 28:19, 20, NW) Akozo Chrétien awa gi pëpe azo ti be-ti-molenge ti mä na bê na Jésus, nga na pekoni ti zia si azo ni mveni apika li ti ala ti sala na Nzapa tongana ti so bê ti ala aye, tongana ti so ambeni wafango tënë ti Église ti laso ayeke sala. Nde na so, ala fa na azo ni ti ga adisciple ti Jésus, ala bungbi ala na yâ ti akongregation, na ala fa lege na ala ti tene ala lingbi nga na pekoni ti fa nzo tënë na ti sala adisciple. (Kusala 14:21-23) A-Témoin ti Jéhovah laso ayeke mû tapande so.

¹¹ Ambeni Témoin ti Jéhovah, na mungo tapande ti Paul, Barnabas, na ambeni Chrétien nde ti kozo siècle, ayeda ti gue tongana amissionnaire na yâ ti akodoro wande. Kusala ti ala aga na tâ ye ti nzoni biani, teti so ala bi tele ti ala pëpe na yâ aye ti poroso, wala na ambeni lege nde, ala hon nde pëpe na kungba ti fa nzo tënë. Ala sala gi ye alingbi na komandema ti Jésus: “Tongana i yeke gue, i fa tënë.” Ye oko, mingi ti aTémoin ti Jéhovah ayeke pëpe amissionnaire na akodoro wande. Mingi na popo ti ala ayeke gi kobe ti yanga na salango kua ti nginza, na ambeni nde angbâ na da-mbeti. Ambeni ayeke na amolenge. Me aTémoin kue ayeke kangbi na ambeni zo nde nzo tënë so ala manda. Apendere na ambakoro, akoli na awali, ala kue ayeda na ngia na tënë ti Bible so: “Fa tënë ni, ngbâ dä, na ngoi ti nzoni, na ngoi ti sioni.” (2 Timothée 4:2, NW) Legeoko na adisciple ti kozo siècle so asala kusala kozo na ala, ala “zia pëpe ti fa nda ti tënë, na ti fa Tene-nzoni ti Jésus, Lo so ayeke Christ.” (Kusala 5:42) Ala yeke fa nzo tënë ti kota ahon kue na azo.

Salango Prosélyte Wala Fango Nzo Tënë?

¹² Yanga ti Grec asala kusala na mbupa prose’lytos so aye ti fa na mbeni “zo so a ga na lo ti gbian lege ti vorongo ti lo.” A yeke na lege ti tënë so si mbupa ti yanga ti Franzi “prosélytisme” abâ gigi, so na gunda ni aye ti tene “gango na azo ti gbian lege ti vorongo ti ala.” Laso, ambeni zo atene so salango a-prosélyte ayeke sioni. Même mbeni mbeti so Conseil mondial des Église asigigi na ni asala tënë ti “siokpari ti salango a-prosélyte.” Ngbanga ti nyen? Mbeni mbeti-sango (Catholic World Report) atene: “Na lege ti demango tele ti Église Orthodoxe, demango so ala zia lege ni pëpe, a to nda ti bâ fadeso ‘salango prosélyte’ tongana mbeni gbungo zo na ngangu ti ga disciple.”

¹³ Salango prosélyte ayeke sioni? A lingbi ti duti sioni. Jésus atene so kusala ti ascribe na aFarizien ti salango a-prosélyte ayeke sioni teti azo so ala ga na ala ti gbian lege ti vorongo ti ala. (Matthieu 23:15) Tâ tënë, “gbungo zo na ngangu ti ga disciple” ayeke na lege ni pëpe. Na tapande, na lege ti wasungo mbaï Josèphe, tongana Jean Hyrcan, so ayeke mbeni Maccabée, ahon na ngangu azo ti Idumée, lo “zia lege na ala ti ngbâ na yâ kodoro ti ala na ngoi kue so ala yeda ti tene a fâ ala na nganza, na ti duti ndulu ti bata andia ti aJuif.” Tongana azo ti Idumée aye ti duti na gbe ti komandema ti aJuif, a lingbi ala sala ye alingbi na lege ti vorongo ti aJuif. Awasungo mbaï atene na e so na siècle miombe ti N.E., Charlemagne ahon na ngangu a-Saxon ti mbage ti banga ti Poto so ayeke apaïen, na lo gbu ala na ngangu, na mbeni lege so ayeke sioni mingi, ti gbian lege ti vorongo ti ala.a Ye oko, lege so a-Saxon wala azo ti Idumée agbian lege ti vorongo ti ala alondo biani na bê? Na tapande, fade a tene so Gbia Hérode zo ti Idumée abata lani biani Ndia ti Moïse so a sû na gbe ti yingo ti Nzapa, lo so atara lani ti fâ Jésus na ngoi so lo de molenge?​—Matthieu 2:1-18.

¹⁴ A yeke gbu nga laso azo na ngangu ti gbian lege ti vorongo ti ala? Na mbeni lege, a yeke tongaso. A tene so tongana ambeni missionnaire ti Chrétienté ayeke na beku so fade ambeni zo ayeke gbian lege ti vorongo ti ala, ala yeke mû lege na azo ni ti gue ti manda mbeti na yongoro ndo. Wala, tongana lo kpe kodoro ti lo, na tongana lo yeke na kota nzala, ambeni missionnaire ni alingbi ti hunda na lo ti duti na ti mä yongoro diskur na ndo tënë ti mabe kozoni si lo wara mbeni kete kobe ti te. Na lege ti mbeni tënë so mbeni Kota Bungbi ti akota-bua ti lege ti vorongo ti a-Orthodoxe asigigi na ni na ngu 1992, “a yeke sala a-prosélyte ngoi na ngoi na lege ti ambeti so a sû ti handa zo, nga ngoi na ngoi na alege nde nde ti salango ngangu.”

¹⁵ Gbungo azo na ngangu ti gbian lege ti vorongo ti ala ayeke sioni. Biani, aTémoin ti Jéhovah ayeke sala ye tongaso pëpe.b Tongaso, ala yeke sala azo ti ga a-prosélyte pëpe na lege so azo na ngoi ti laso ayeke bâ na tënë ni. Nde na so, legeoko na aChrétien ti kozo siècle, ala yeke fa nzo tënë na zo oko oko kue. A yeke tisa zo so ayeda na ni na bê ti lo mveni ti gi ti wara hingango ye mingi ahon na lege ti mandango Bible. Mara ti azo tongaso ayeke manda ti zia mabe ti ala na ndo Nzapa nga na ndo aye so lo leke ti sala, mbeni mabe so aluti ngangu na ndo tâ hingango ye ti Bible. Ye ti pekoni ayeke so ala yeke di iri ti Nzapa, Jéhovah, ti wara salut. (aRomain 10:13, 14, 17) Wala ala yeke yeda na nzo tënë ni wala pëpe, a yeke na ala mveni ti soro. A yeke gbu zo na ngangu pëpe. Tongana fade a yeke tongaso, ka nda ti gango na zo ti gbian lege ti vorongo ti lo ayeke duti dä oko pëpe. Ti tene Nzapa ayeda na vorongo, a lingbi vorongo ni alondo na bê.​—Deutéronome 6:4, 5; 10:12.

Fango Nzo Tënë na Ngoi ti Laso

¹⁶ Na ngoi ti laso, aTémoin ti Jéhovah ayeke fa nzo tënë ti Royaume na yâ kota gango tâ tënë ti Matthieu 24:14. Mbeni kpengba gbakuru na yâ kusala ti ala ti fango nzo tënë ayeke périodique Tour ti Ba Ndo.c Na ngu 1879, ngoi so akozo Tour ti Ba Ndo abâ gigi, wungo ti mbeti ni so a pete asi ndulu na 6 000 na yanga ti kodoro oko. Na ngu 2001, angu 122 na pekoni, wungo ni kue asi 23 042 000 na ayanga ti kodoro 141. Legeoko na guengo na li ni so, kusala ti fango nzo tënë ti aTémoin ti Jéhovah amaï nga mingi. Tara ti haka angbonga saki mingi pëpe so a mû ngu na ngu na yâ kusala ti fango nzo tënë na siècle 19, na angbonga 1 169 082 225 so a mû na yâ kusala ti fango tënë na yâ ngu 2001. Bi bê na amandango Bible 4 921 702 so a sala senge senge na azo nze oko oko. Bâ tongana nyen a sala biani mbeni kota wungo ti nzo kusala! Na a yeke wungo ti awafango tënë ti Royaume 6 117 666 si na wâ asala ni.

¹⁷ Wasungo psaume atene: “Anzapa kue ti amara ayeke ayanda senge, me L’Eternel [“Jéhovah,” NW] asala ayayu.” (Psaume 96:5) Na yâ ti sese ti laso so asala nzala ti ye ti yingo mbeni pëpe, tënë ti kodoro, abendere ti kodoro, akota zo, aye ti mitele, na même mosoro mveni aga aye so azo ayeke voro. (Matthieu 6:24; aEphésien 5:5; aColossien 3:5) Mohandas K. Gandhi atene mbeni lâ: “Mbi tene ti mbi so . . . azo ti Poto ayeke laso gi aChrétien ti yanga. Ti tâ tënë ni, Poto ayeke voro Mammon [mosoro].” Tënë ni ayeke so, a lingbi azo na ndo kue amä nzo tënë. Zo kue ayeke na bezoin ti hinga ye na ndo Jéhovah nga na aye so lo leke ti sala, atâa yanga ti kodoro ti lo, mara ti lo, wala dutingo ti lo na popo ti azo ayeke tongana nyen. E ye si azo kue ayeda na atënë so ti wasungo psaume: “I mû na Jéhovah gloire na ngangu. I mû na Jéhovah gloire so alingbi na iri ti lo”! (Psaume 96:7, 8, NW) A-Témoin ti Jéhovah amû maboko na ambeni zo ti manda ye na ndo Jéhovah, ti tene ala lingbi mû na lo gloire na lege ni. Na ala so ayeda na ni ayeke wara aye ti nzoni mingi. Aye ti nzoni wa ala yeke wara? Fade a yeke bâ ni na yâ article ti peko.

[Akete Tene na Gbe Ni]

Mo Lingbi ti Fa Nda Ni?

• Ngbanga ti nyen aTémoin ti Jéhovah ayeke awafango nzo tënë na wâ?

• Ngbanga ti nyen aTémoin ti Jéhovah ayeke fa tënë même na ando so Chrétienté azia a-église dä?

• Ngbanga ti nyen aTémoin ti Jéhovah ayeke sala a-prosélyte pëpe tongana ti so azo abâ na atënë ni na ngoi ti laso?

• Tongana nyen kusala ti fango nzo tënë ti aTémoin ti Jéhovah ague na li ni na ngoi ti laso?

[Ahundango Tene ti Manda na Ye]

1. Nzo tënë wa azo ayeke na bezoin ti mä, na tongana nyen aTémoin ti Jéhovah amû nzoni tapande na kangbingo mara ti nzo tënë tongaso?

2. Mbeni nda ti tënë oko so ngbanga ni aTémoin ti Jéhovah ayeke na wâ ayeke so wa?

3. (a) Use nda ti tënë so a fa nda ti wâ so aTémoin ti Jéhovah ayeke na ni na yâ kusala ti ala ayeke so wa? (b) “Salut so aga na lege ti [Nzapa]” andu aye wa?

4-6. (a) Teti ota nda ti tënë wa aTémoin ti Jéhovah ayeke na wâ? (b) Tongana nyen Jésus afa lani wâ ti lo na yâ kusala ti fango nzo tënë?

7. Na peko ti guengo ti Jésus na yayu, adisciple ti lo afa nzo tënë kozoni kue na azo wa?

8. Tongana nyen aTémoin ti Jéhovah laso ayeke mû tapande ti adisciple ti Jésus ti kozo siècle?

9. Na kozo siècle, zo wa na yâ kongregation ti aChrétien ayeke mû mbage na kusala ti fango tënë?

10. Tokua wa so ayeke na ambage use a fa ni lani kozoni si a futi bungbi ti aye ti aJuif?

11. Azo wa laso ayeke mû mbage na fango nzo tënë ti kota ahon kue na azo?

12. Salango prosélyte aye ti tene nyen, na a to nda ti bâ ni tongana nyen?

13. Ambeni tapande ti gbungo azo na ngangu ti gbian lege ti vorongo ti ala ayeke so wa?

14. Tongana nyen ambeni missionnaire ti Chrétienté asala ngangu na ndo azo ti pusu ala ti gbian lege ti vorongo ti ala?

15. A-Témoin ti Jéhovah ayeke sala a-prosélyte tongana ti so azo ayeke bâ na atënë ni na ngoi ti laso? Fa nda ni.

16. Na lege wa kusala ti fango nzo tënë ti aTémoin ti Jéhovah ague na li ni na ngoi ti laso?

17. (a) Amara ti anzapa wa ti wataka azo ayeke voro laso? (b) Atâa yanga ti kodoro ti lo, mara ti lo, wala dutingo ti lo na popo ti azo ayeke tongana nyen, ye nyen zo oko oko ayeke na bezoin ti hinga?

[Foto na lembeti 9]

Jésus ayeke lani mbeni wafango nzo tënë so ayeke na wâ, na lo fa lege na ambeni zo ti sala oko kusala ni

[Foto na lembeti 10]

Azo kue na yâ kongregation ti kozo siècle amû mbage lani na yâ kusala ti fango nzo tënë

[Foto na lembeti 11]

Ti gbu azo na ngangu ti gbian lege ti vorongo ti ala ayeke na lege ni pëpe