Lutingo na Gbele “Mbeni Kï na yâ Mitele”

“Nzobe ti mbi so zo alingbi na ni pëpe alingbi na mo.”​—2 ACORINTHIEN 12:9 NW.

“AZO kue so aye ti tambela na lege ti batango tënë ti Nzapa na yâ Christ Jésus, fade ala hu pono ti ye ti ngangu.” (2 Timothée 3:12) Ngbanga ti nyen? Ngbanga ti so Satan atene so zo asala na Nzapa gi teti anda ti ye so ayeke ti kion, na lo yeke na kota nzala ti fa ni na gigi. Mbeni lâ Jésus agboto mê ti abazengele ti lo be-ta-zo: “Satan ahunda ti kamata i kue, si lo lingbi yengere i tongana blé.” (Luc 22:31) Jésus ahinga lani nzoni so Nzapa azia lege na Satan ti tara e na lege ti akpale so amû vundu mingi. Biani, a ye ti tene pëpe so akpale kue so e wara na yâ fini alondo gi na Satan na ayingo sioni ti lo. (Zo-ti-fa-tene 9:11) Me Satan ayeke na kota nzala ti sala kusala na ye kue so ayeke na ngangu ti lo ti buba be-biani ti e.

² Bible atene na e so a lingbi e gi bê ti e ahon ndo ni pëpe teti atara ti e. Atâa ye wa asi na e, a yeke pëpe ye ti ndima nga pëpe ye so e ku pëpe. (1 Pierre 4:12) Biani, “pono tongaso ayeke sala aita ti [e] kue so ayeke na sese so.” (1 Pierre 5:9) Laso, Satan ayeke sala ngangu mingi na ndo wakua oko oko ti Nzapa. Zabolo ayeke na kota ngia ti bâ so gbâ ti akpale so ayeke tongana akî asala sana na e. Ti si dä, lo sala kusala na bungbi ti aye ti lo na mbeni lege so asala si peut-être a zia na ndo ni ‘akî na yâ mitele ti e’ wala a kono yâ ni. (2 aCorinthien 12:7, NW) Ye oko, a lingbi bira so Satan aga na ni na ndo e abuba be-biani ti e pëpe. Legeoko tongana ti so Jéhovah ayeke ‘leke ande lege’ teti e ti gbu ngangu na gbele tara, fade lo yeke sala oko tongaso tongana e wara akpale so ayeke tongana akî na yâ mitele ti e.​—1 aCorinthien 10:13.

Lege ti Luti na Gbele Mbeni Kî

³ Bazengele Paul atoto na Nzapa ti lungula kî so ayeke na yâ mitele ti lo. “Mbi hunda Seigneur lege ota ti lungula ye so.” Kiringo tënë wa Jéhovah amû na sambela so Paul asala na bê kue? “Nzobe ti mbi so zo alingbi na ni pëpe alingbi na mo; teti a yeke sala si ngangu ti mbi aga mbilimbili-kue na yâ ye so ngangu ayeke dä pëpe.” (2 aCorinthien 12:8, 9, NW) Zia e gi nda ti kiringo tënë so na e bâ tongana nyen a lingbi ti mû maboko na e ti luti na gbele akpale kue so ayeke tongana kî so aso e.

⁴ Bâ so Nzapa awa Paul ti yekia nzobe ti Lo so zo alingbi na ni pëpe, so Lo fa ni na lo na gigi awe na lege ti Christ. Biani, Paul awara kota deba nzoni na yâ aye mingi. Na ndoye Jéhovah amû na lo matabisi ti ga disciple ti Jésus, atâa so giriri lo duti mbeni kota wato ti adisciple ti Jésus. (Kusala 7:58; 8:3; 9:1-4) Na pekoni Jéhovah, na lege ti nzobe, amû na Paul gbâ ti akungba na amatabisi ti kusala so adö bê. Ye so e lingbi ti manda dä ayeke polele. Atâa na yâ angoi so ayeke ngangu mingi ahon, e ngbâ lakue ti wara adeba nzoni mingi so a lingbi e kiri singila ndali ni. A lingbi e zia lâ oko pëpe si atara asala si e glisa gbâ ti nzoye so Jéhovah afa na mbage ti e.​—Psaume 31:20 (31:19, NW).

⁵ Nzobe ti Jéhovah so zo alingbi na ni pëpe alingbi na yâ mbeni lege nde. Ngangu ti Nzapa alingbi kue ti mû maboko na e na yâ atara ti e. (aEphésien 3:20) Jéhovah afa na Paul so ngangu ti Lo “aga mbilimbili-kue na yâ ye so ngangu ayeke dä pëpe.” Tongana nyen? Na ndoye Nzapa amû na Paul ngangu kue so a lingbi lo wara ti luti na gbele tara ti lo. Na mbage, gbungo ngangu ti Paul nga bê so lo zia na Jéhovah na yâ ye kue afa na aChrétien kue so ngangu ti Nzapa ayeke hon na ngangu na yâ koli so awoko nga ayeke wasiokpari. Fadeso, bâ ye so hongo na ngangu ni ayeke sala na ndo Zabolo, so atene azo asala na Nzapa gi tongana aye kue atambela nzoni na yâ fini ti ala nga tongana kpale ayeke dä pëpe. Be-biani ti Paul ayeke tongana mbeni ye so apika ngbangba ti wamvene so!

⁶ Bâ so Paul aduti giriri mbeni ngbele zo ti Satan so atiri na Nzapa, mbeni wasalango ngangu na aChrétien na mbito oko pëpe, mbeni Farizien so asala ye na kota wâ so, biani, ayeke lani na mosoro mingi teti so a dü lo na yâ mbeni sewa ti azo ti mosoro. Me fadeso Paul ayeke sala na Jéhovah nga na Christ tongana “kete na popo ti abazengele kue.” (1 aCorinthien 15:9) Ndali ti aye so, lo yeda na tâ be-ti-molenge ti duti na gbe ti ngangu ti komande ti wabatango bungbi ti aChrétien ti kozo siècle. Nga lo yeke gbu ngangu na be-biani, atâa kî so ayeke na yâ mitele ti lo. Ye so aso bê ti Satan mingi ahon ayeke so, atara so asi na yâ fini ti Paul akiri pëpe na wâ ti lo na peko. Paul aglisa lâ oko pëpe beku so lo yeke na ni ti duti na yâ Royaume ti Christ na yayu. (2 Timothée 2:12; 4:18) Mbeni kî oko pëpe, atâa a so mingi, alingbi ti kiri na wâ ti lo na peko. Zia si, legeoko tongaso, wâ ti e angbâ ti duti na ngangu! Na mungo maboko na e na yâ atara ti e, Jéhovah ayekia e na matabisi so ayeke nde ti fa so Satan ayeke wamvene.​—aProverbe 27:11.

Aye So Jéhovah Aleke Ayeke Kota Ye

⁷ Laso, Jéhovah amû ngangu na aChrétien be-ta-zo na lege ti yingo ti lo ti nzoni-kue, Tënë ti lo, nga na songo ti aita Chrétien. Legeoko tongana bazengele Paul, e lingbi ti zia akungba ti e na ndo Jéhovah na yâ sambela. (Psaume 55:23 [55:22, NW]) Atâa so Nzapa alingbi pëpe ti lungula atara ti e, lo lingbi ti mû na e ndara ti luti na gbele ni, même na gbele ala so ayeke ngangu ti yô ni. Jéhovah alingbi nga ti mû na e ngangu ti bibe, na mungo na e “ngangu so ahon ti senge ni,” ti mû maboko na e ti gbu ngangu.​—2 aCorinthien 4:7, NW.

⁸ Tongana nyen e yeke wara mara ti mungo maboko tongaso? A lingbi e manda Tënë ti Nzapa na bê kue, teti na yâ ni e yeke wara ande atënë ti lo so adë bê biani. (Psaume 94:19) E diko na yâ ti Bible atënë ti awakua ti Nzapa so andu bê, so ala tene na ngoi so ala toto ti wara mungo maboko ti Nzapa. A lingbi e gbu li ti e na ndo akiringo tënë ti Jéhovah, so mingi ni a yeke na atënë so adë bê. Fade mandango Mbeti ti Nzapa ayeke kpengba e si “ngangu so ahon ti senge ni alingbi duti ti Nzapa me ti e mveni pëpe.” Legeoko tongana ti so a lingbi e te kobe ti mitele lâ oko oko ti maï na ti wara ngangu ti tele, a lingbi e manda tënë ti Nzapa lakue. E yeke sala ni? Tongana e sala ni, e yeke bâ ande na pekoni so warango “ngangu so ahon ti senge ni” amû maboko na e ti gbu ngangu na gbele akî kue na lege ti fä so alingbi ti sala ngangu na e fadeso.

⁹ A-ancien so akpe mbito ti Nzapa alingbi ti ‘duti tongana mbeni ndo ti honde tele dä teti pupu’ ti ye ti vundu, mbeni “ndo ti kpe dä teti ngu so apika na pupu” ti akpale. A-ancien, so aye ti lingbi na fango ye so a sû na gbe ti yingo, ahunda na Jéhovah na be-ti-molenge nga na bê kue ti mû na ala “yanga so ahinga ti sala tënë” si ala lingbi hinga tongana nyen ti kiri tënë nzoni na ala so ahu pono. Atënë ti a-ancien alingbi ti duti tongana mbeni ngu-nduzu so atï kete kete na so adë bibe ti e na angoi ti ngangu na yâ fini. Na salango tënë ti “lungula vundu ti ala so bê ti ala anze,” a-ancien amû biani maboko na aita ti ala ti koli na ti wali na lege ti yingo, so peut-être bê ti ala anze wala ayeke na kota vundu ndali ti mbeni kî na yâ mitele ti ala.​—Esaïe 32:2; 50:4, NW; 1 aThessalonicien 5:14.

¹⁰ Awakua kue ti Jéhovah ayeke mbage ti sewa ti aChrétien so aduti beoko. Biani, e yeke “amembre ti mbeni,” na “a lingbi e ndoye tele ti e na popo ti e.” (aRomain 12:5; 1 Jean 4:11) E yô kungba so tongana nyen? Na lege ti tënë ti 1 Pierre 3:8, e sala ni na ‘salango be-nzoni na popo ti e, na ndoyengo tele ti e tongana aita, na dutingo na be-ti-ndoye’ na mbage ti ala so ayeke aita ti e na yâ mabe. Âdu ti ala so ayeke luti na gbele mbeni mbilimbili kî so aso na yâ mitele, atâa a yeke amaseka wala ambakoro, e kue e lingbi ti bi bê ti e mbilimbili na ala. Tongana nyen?

¹¹ A lingbi e sala kue ti tene pono ti ala andu bê ti e. Tongana bê ti e amü, adë dengo, wala e bi bê na ala pëpe, e lingbi na mbana pëpe ti sala si pono ti ala akiri aga ngangu mingi ahon. Hingango akpale ti ala ayeke pusu e ti sala hange na ye so e tene, lege so e yeke sala na tënë ni, nga lege so e yeke sala na ye. Bango ye ti e na nzoni lê nga lege so e kpengba na ala alingbi ti mû maboko na ala ti bâ tongana kete ye ambeni ti akota vundu so akî kue so aga na ni na ndo ala. Na lege so e lingbi ti fa so e yeke ye ti mungo maboko so akpengba ala.​—aColossien 4:11.

Lege So Ambeni Aluti Nzoni na Gbele Ni

¹² Na ngoi so e ga ndulu na lâ ti nda ni so, “aye ti vundu” ayeke gue na li ni lâ na lâ. (Matthieu 24:8, NW) Ni la, a lingbi ti tene so akpale asi na azo kue na ndo ti sese, mbilimbili na awakua be-ta-zo ti Jéhovah, so ayeke gi ti sala ye so bê ti lo aye. Bâ na tapande mbeni Chrétien so ayeke sala lani kusala ti ngoi kue. Awanganga abâ so lo yeke na kobela ti cancer na a lingbi a suru lo ti zi ambage ti tele ti lo so aleke ngu ti yanga nga ngu so ase tele ayeke na yâ ni. Tongana lo na koli ti lo amä so lo yeke na kobela so, fade fade ala sala na Jéhovah mbeni yongoro sambela na bê kue. Lo tene na pekoni so mbeni siriri so ayeke ye ti dongo bê aga na ndo ala. Ye oko, lo gbu ngangu na yâ angoi ti nzoni na ti sioni, mbilimbili tongana lo luti na gbele asioni ye so aga na peko ti kode ti kaïngo kobela ti lo.

¹³ Ti hon ndo ti ye so asi na lo, ita-wali so atara ti manda ye mingi ahon na ndo cancer. Lo hunda wango na awanganga ti lo. Na yâ ti Tour ti Ba Ndo na Réveillez-vous!, nga na yâ ambeti ti aChrétien so andu tënë ni, lo wara ambaï ti fini so afa tongana nyen ambeni zo aluti na gbele kobela ti ala na lege ti bibe. Lo diko nga ambeni versê ti Bible so andu ni, so afa ngangu ti Jéhovah ti mû maboko na azo ti lo na ngoi ti akpale, nga na ambeni sango nde so amû maboko na lo.

¹⁴ Mbeni article so asala tënë na ndo lutingo na gbele bê so anze afa peko ti atënë ti ndara so: “Zo so akangbi tele ti lo na mbeni zo, lo gi ye so bê ti lo aye.” (aProverbe 18:1) Tongaso, article ni amû wango so: “Kpe ti duti gi mo oko.”a Ita-wali ni atene: “Aita mingi atene na mbi so ala yeke sambela teti mbi; ambeni apika singa na mbi. A-ancien use apika singa lakue ti hinga ye na ndo seni ti mbi. Mbi wara akongö nga na gbâ ti a-carte. Ambeni ayeke tö même kobe na mbi. Nga, mingi ti ala ayeda ti gue na mbi na ando ti kaïngo kobela ti mbi.”

¹⁵ Mbeni ngbele wakua ti Jéhovah na Nouveau-Mexique, États-Unis ti Amerika, ayeke lani na yâ mbeni oko ti akutukutu use so asala ndao. Lo wara sioni na go nga na ndogo ti lo, na a sala si kobela ti gbenga (arthrite) so lo luti na gbele ni a sala angu 25 awe akiri aga kota. Ita-wali so atene: “A yeke ngangu na mbi mingi ti zia li ti mbi na nduzu na ti yô akungba so ane kilo use. Me sambela so mbi sala na bê kue na Jéhovah nga na a-article ti Tour ti Ba Ndo so e manda awe amû maboko na mbi mingi. Mbeni article ni asala tënë na ndo Mika 6:8, so afa so ti tambela na tâ be-ti-molenge na Nzapa aye ti tene ti hinga akatikati ti e. Ye so amû maboko na mbi ti hinga so atâa dutingo ti mbi ayeke tongana nyen, a lingbi bê ti mbi anze pëpe, même tongana ngbonga so mbi sala na yâ fango tënë ayeke pëpe tongana ti so mbi ye. Kota ye ni ayeke salango na lo na bê so ayeke na sioni oko pëpe.”

¹⁶ Lo tene nga: “A-ancien ayeke gonda mbi lakue teti angangu so mbi sala ti ga na abungbi na ti sigigi na fango tënë. Apendere ayeke balao mbi na sungo ngbangba ti mbi. Awakua so ayeke apionnier ayeke sala ye na mbi na be-nze-pepe na, fani mingi, ala leke yâ ti akapa ti ala na lango so mbi lingbi pëpe ti sigigi na fango tënë. Tongana ndowa wala dê asala mingi, ala mû mbi na nzobe ti gue na avizite ti ala wala ala tisa mbi ti gue na amandango Bible ti ala. Na teti so mbi lingbi pëpe ti yô mbeni bozo ti ambeti, ambeni wafango tënë ni azia ambeti ti mbi na yâ bozo ti ala tongana e gue na fango tënë.”

¹⁷ Bâ tongana nyen a-ancien na afon ala wamabe ti kongregation ni amû maboko na aita-wali use so ti luti na gbele akobela ti ala so ayeke tongana akî. Ala mû maboko ti nzobe, so asala ye ti nzoni, ti mû aye so atia azo na lege ti yingo, ti mitele, na ti bibe. Ye so apusu mo pëpe ti mû maboko na ambeni ita-koli na aita-wali so ayeke na yâ akpale? Amaseka, i lingbi nga ti duti ye ti mungo maboko na ala so ayeke na yâ kongregation ti i, so ayeke tiri na akî na yâ mitele ti ala.​—aProverbe 20:29.

¹⁸ Tour ti Ba Ndo na Réveillez-vous! asigigi na gbâ ti ambaï ti fini nga na aye so asi na aTémoin so aluti, na angbâ lakue ti luti, na gbele akpale na yâ fini. Tongana mo yeke diko lakue a-article tongaso, mo yeke bâ so mingi ti aita ti mo ti koli na ti wali na lege ti yingo na ndo sese kue agbu ngangu na gbele akpale ti konomi, ti glisango mbeni zo so ala ndoye lo mingi na yâ aye ti ngangu ti ndagigi, na ti asioni dutingo so bira aga na ni. Ambeni ayeke na ambeni kobela so awoko ala. Mingi ti ala alingbi pëpe ti sala ambeni kete ye na yâ fini so azo so ayeke na nzoni seni abâ ni tongana senge ye. Kobela ti ala atara ala ngangu mingi, mbilimbili tongana ala lingbi pëpe ti mû mbage ti ala na yâ akusala ti aChrétien tongana ti so ala ye. Biani, ala kiri singila mingi ndali ti maboko so aita ti ala ti koli na ti wali, amaseka na ambakoro, ayeke mû na ala!

Gbungo Ngangu Aga na Kota Ngia

¹⁹ Paul ayeke lani na ngia ti bâ tongana nyen Nzapa akpengba lo. Lo tene: “Mbi yeke na ngia mingi ti pika kate ti mbi ahon teti wokongo ti mbi, si ngangu ti Christ alingbi ngbâ na ndo mbi tongana mbeni tente. Ni la si mbi wara ngia na yâ awokongo, na yâ azonga, na yâ aye so atia zo, na yâ asalango ngangu na zo nga na akpale, teti Christ. Teti tongana mbi woko, a yeke na ngoi so si mbi wara ngangu.” (2 aCorinthien 12:9, 10, NW) Ndali ti ye so asi na lo mveni, Paul alingbi ti tene na bê kue: “Mbi tene pëpe ye atia mbi; teti mbi hinga lege ti duti nzoni na yâ ye kue so asala mbi. Mbi hinga lege ti duti na nzinga, na mbi hinga lege ti duti na yâ ye mingi nga. Na yâ ye kue, mbi hinga lege ti duti na nzala na ti duti na kobe, ti duti na nzinga na ti wara ye. Mbi lingbi sala ye kue na yâ Lo so asala si mbi wara ngangu.”​—aPhilippien 4:11-13.

²⁰ Tongaso, tongana e gbu ngangu na yâ akî kue na lege ti fä na yâ mitele ti e, e lingbi ti duti na kota ngia ti fa na zo oko oko so ngangu ti Jéhovah aga mbilimbili-kue na yâ wokongo ti e. Paul asû na mbeti: “Bê ti e anze pëpe . . . Zo-ti-ya-ni akiri awara fini lâ na lâ. Teti kete pono ti e ti fadeso asala si e wara gloire ti lakue lakue mingi ahon. Teti lê ti e angbâ . . . na ye so lê abâ pëpe; teti ye so lê . . . abâ pëpe ayeke ye ti lakue lakue.”​—2 aCorinthien 4:16-18.

²¹ Mingi ti azo ti Jéhovah laso ayeke na beku ti duti na yâ Paradis na ndo sese na ti wara adeba nzoni so lo zê. Laso e lingbi ti bâ mara ti adeba nzoni tongaso tongana “ye so lê abâ pëpe.” Ye oko, ngoi ni ayeke pusu ndulu hio so e yeke bâ ande adeba nzoni so na lê ti e mveni, biani, na e yeke wara ni teti lakue lakue. Mbeni oko ti adeba nzoni tongaso ayeke ande dengo bê ti duti na fini lâ oko pëpe na akpale so ayeke tongana akî! Fade Molenge ti Nzapa ‘ayeke futi kusala ti zabolo’ na ayeke “futi lo so ayeke na ngangu ti mû kui, so atene, zabolo.”​—1 Jean 3:8; aHébreu 2:14.

²² Tongaso, atâa kî wa na yâ mitele ti e ayeke sala pasi na e laso, zia e ngbâ lakue ti luti na gbele ni. Legeoko tongana Paul, e yeke wara ande ngangu ti sala ni na lege ti Jéhovah, so amû gbâ ti ngangu na e. Tongana e yeke duti na yâ Paradis na ndo sese, e yeke hiri ande deba nzoni na ndo Jéhovah Nzapa ti e lâ na lâ teti apendere ye so lo sala teti e.​—Psaume 103:2.

[Kete Tene na Gbe Ni]

Mo Yeke Kiri Tënë Tongana Nyen?

• Ngbanga ti nyen na tongana nyen Zabolo atara ti buba be-biani ti atâ Chrétien?

• Tongana nyen ngangu ti Jéhovah “aga mbilimbili-kue na yâ ye so ngangu ayeke dä pëpe”?

• Tongana nyen a-ancien na ambeni ita alingbi ti kpengba ala so awara akpale?

[Ahundango Tene ti Manda na Ye]

1, 2. (a) Ngbanga ti nyen a lingbi e gi bê ti e ahon ndo ni pëpe teti atara na akpale so e wara? (b) Ngbanga ti nyen e lingbi ti duti na beku tongana akpale asi na e?

3. Jéhovah akiri tënë tongana nyen tongana Paul ahunda na lo ti lungula kî so ayeke na yâ mitele ti lo?

4. Na lege wa Paul awara nzoni na lege ti nzobe ti Jéhovah so lo lingbi na ni pëpe?

5, 6. (a) Tongana nyen Jéhovah afa na Paul so ngangu ti Lo “aga mbilimbili-kue na yâ ye so ngangu ayeke dä pëpe”? (b) Tongana nyen tapande ti Paul afa so Satan ayeke wamvene?

7, 8. (a) Na lege ti aye wa Jéhovah ayeke mû ngangu na awakua ti lo laso? (b) Ngbanga ti nyen dikongo Bible nga na mandango ni lâ na lâ ayeke kota ye mingi ti luti na gbele mbeni kî na yâ mitele ti e?

9. Tongana nyen a-ancien alingbi ti mû maboko na ala so ayeke luti na gbele akpale?

10, 11. Tongana nyen awakua ti Nzapa alingbi ti mû maboko na ambeni zo so ayeke na gbele angangu tara?

12-14. (a) Mbeni Chrétien asala nyen ti luti na gbele kpale so kobela ti cancer aga na ni? (b) Aita-koli na aita-wali ti yingo ti Chrétien so asala nyen ti mû maboko na ti kpengba lo?

15-17. (a) Tongana nyen mbeni Chrétien aluti na gbele akpale so aga na peko ti andao ti lege? (b) Maboko wa aita ti kongregation amû?

18. Tënë wa so akpengba zo e lingbi ti wara na yâ ambaï ti fini so asigigi na yâ Tour ti Ba Ndo na Réveillez-vous!?

19. Ngbanga ti nyen Paul alingbi lani ti duti na ngia atâa akpale na awokongo ti lo so ayeke tongana akî?

20, 21. (a) Ngbanga ti nyen e lingbi ti duti na ngia tongana e gbu li na ndo “ye so lê abâ pëpe”? (b) Ambeni “ye so lê abâ pëpe” so mo ye ti bâ ni na yâ Paradis na ndo sese ayeke so wa?

22. Beku wa a lingbi e duti na ni nga a lingbi e leke na bê ti e ti sala nyen?

[Foto na lembeti 18]

Fani ota Paul asambela ti tene Nzapa alungula kî so ayeke na yâ mitele ti lo