“I ga na mbi, . . . na fade mbi mû na i lege ti hu tele”
Kota guengo na li ni ti awakua ahunda ti leke hio afini Da ti Royaume
JÉSUS atene: “I ga na mbi, . . . na fade mbi mû na i lege ti hu tele.” (Matthieu 11:28). Tisango ndo so ti Mokonzi ti kongregation ti aChrétien ayeke ye so amû wâ na bê (aEphésien 5:23). Tongana e bâ atënë so nzoni, e lingbi gi ti yekia mbeni kpengba lingu ti hungo tele so: bungbingo oko na aita ti e ti koli na ti wali na lege ti yingo na ngoi ti abungbi. Kite ayeke pëpe so e yeda na tënë so wasungo psaume ahe na bia: “Bâ, a yeke nzoni na a nzere mingi, tongana aita aduti na beoko!”—Psaume 133:1.
Biani, ala so ayeke bungbi legeoko na e na ngoi ti abungbi ti vorongo so ayeke atâ fon e, na dutingo ti aye ni na lege ti yingo asala si zo abâ tele ti lo nzoni nga na ngia. Tongaso, a yeke tâ na lege ni si mbeni Chrétien so ade maseka atene: “Mbi gue na ekole na lango ni kue, na ye so asi kâ asala si mbi nze. Me abungbi akpa mbeni kete gbako ti ngu na yando, mbeni ndo so ayeke dë bê ti mbi ti leke mbi teti lango ti peko so mbi yeke gue na ekole.” Mbeni maseka-wali ti Nigéria atene: “Mbi bâ so dutingo ndulu na ambeni zo so andoye Jéhovah amû maboko na mbi ti ngbâ lakue ndulu na Lo.”
Da ti Royaume ti aTémoin ti Jéhovah ayeke sala kpengba kusala na lege so a yeke tongana mbeni place so a leke teti tâ vorongo na yâ avaka nde nde. Mingi ni, a yeke sala abungbi na yâ Da ti Royaume ni fani use wala ahon so yenga oko oko, na a yeke wa awamandango Bible ti ga dä hio, si ala wara hungo tele na ndo so.—aHébreu 10:24, 25.
Mbeni ye so a lingbi a sala ni hio
Ye oko, a lingbi e hinga so a yeke pëpe aTémoin ti Jéhovah kue si ayeke sala bungbi na yâ mbeni pendere Da ti Royaume. Kota guengo na li ni ti awakua ti Royaume na ndo lê sese kue asala si mbeni bezoin abâ gigi: bezoin ti warango afini Da ti Royaume saki mingi, mbilimbili na yâ akodoro so ague na li ni mingi pëpe na lege ti konomi.—Esaïe 54:2; 60:22.
Ti mû ambeni tapande: giriri, na kota gbata ti République Démocratique ti Congo, a wara gi aDa ti Royaume 10 teti akongregation so wungo ni asi 290. Kodoro so ayeke lani na kota bezoin ti wara fade fade afini Da ti Royaume mingi. Na Angola, mingi ti akongregation ayeke sala bungbi na gigi ngbanga ti so aDa ti Royaume ayeke mingi pëpe. A yeke bezoin so a bâ ni nga na yâ ambeni kodoro nde mingi.
Tongaso, ti londo na ngu 1999, a sala ngangu ti mû maboko na ambeni kodoro so ayeke na mosoro mingi pëpe ti wara afini Da ti Royaume. Ti bâ lege ti apialo ti lekengo afini Da ti Royaume na akodoro so, ambeni Témoin so ayeke na kode mingi na yâ kusala so ayeda na bê ti ala kue ti mû mbage ti ala dä. Tongana a bungbi angangu so aTémoin so asala, na nzoni bibe ti salango kua ti aita ti ndo ni, aye so aga na pekoni akpengba zo ngangu. A-Témoin ti ndo ni nga ayeke wara nzoni na peko ti fango lege so ala wara. Aye so kue ayeke mû maboko ti leke aDa ti Royaume so alingbi na bezoin ti akodoro ti ala oko oko.
Na lege so, a leke ti mû maboko alingbi na ni na alege ti lekengo aDa ti Royaume so asala kusala na akode nga na agbakuru ti ndo ni. Ye so aita agi ayeke gi pëpe ti leke aDa ti Royaume alingbi na kota bezoin so ayeke dä, me nga ti maï mbeni programme ti batango aDa ti Royaume so alingbi na aye so asi na ndo nde nde.—2 aCorinthien 8:14, 15.
Aguengo na li so amû wâ na bê
Tongana a sala ngangu ti leke ando teti vorongo so, ye nyen aga na pekoni? Na tongo nda ti ngu 2001, mbeni tondo so alondo na Malawi atene: “Kusala so a sala na yâ ti kodoro so apika bê biani. Na yâ ti anze use so ayeke ga, fade e yeke hunzi ti sala ambeni Da ti Royaume na ndo ni.” (Afoto 1 na 2). Na Togo, na yâ ti anze so ahon a ninga pëpe, aita so abi tele ti sala kusala so awara lege ti leke ambeni Da ti Royaume (foto 3). Nzoni kua so aita ti be-nzoni so ayeke sala amû nga maboko ti wara aDa ti Royaume so alingbi na ni na Mexique, Brésil, nga na ambeni kodoro nde.
Akongregation mingi abâ so tongana a leke mbeni Da ti Royaume, azo ti ndo ni ayeke bâ so aTémoin ti Jéhovah ayeke duti ge biani. A bâ so kozoni ambeni zo mingi ake ti bungbi na aTémoin; me na ngoi so a leke mbeni place ti vorongo Nzapa so alingbi, ala to nda ni fadeso ti ga na abungbi. Kongregation ti Nafisi na Malawi atene: “Fadeso, e yeke na mbeni Da ti Royaume so alingbi, na ye so ayeke mbeni nzoni tënë ti témoin. Tongaso, a yeke ngangu oko pëpe ti to nda ti mandango Bible na azo.”
Kozoni, a yeke he azo ti Kongregation ti Krake ti Bénin, ngbanga ti so ngbele Da ti Royaume ti ala ayeke pendere oko pëpe tongana a haka ni na ambeni église (foto 4). Fadeso, kongregation ni ayeke na mbeni fini Da ti Royaume so a yeke sala kusala na ni teti tâ vorongo na lege ti fandara pëpe, me na mbeni lege so alingbi na ni (foto 5). Wungo ti awafango tënë ti kongregation ni ayeke lani 34, na a yeke azo ndulu na 73 si ayeke ga na abungbi ti dimanche; me na lango ti zingo yanga ti fini Da ti Royaume ni, a yeke azo 651 si aga. Mingi ti ala ayeke azo ti gbata ni so bê ti ala adö ti bâ aTémoin ti Jéhovah na lekengo mbeni da gi na yâ kete ngoi. Tongana filiale ti Zimbabwe adabe lo na aye so asi lani, lo sû na mbeti: “Mingi ni, gi na yâ nze so a leke na mbeni fini Da ti Royaume dä, wungo ti azo so aga na abungbi ayeke gue na li ni fani use.”—Afoto 6 na 7.
Kite ayeke pëpe so afini Da ti Royaume mingi so a leke ni amû lege ti wara ando teti hungo tele na lege ti yingo teti aChrétien so amû tele na Nzapa awe, nga teti azo so asala nzala ti tënë ni. Tongana lo bâ so kongregation ti lo ato nda ti sala kusala na fini Da ti Royaume, mbeni Témoin na Ukraine atene: “E yeke na ngia mingi. E bâ na lê ti e mveni tongana nyen Jéhovah amû maboko na azo ti lo.”
[Encadré/Afoto na lembeti 10, 11]
A yekia a-offrande so a mû na bê kue
Bê ti aTémoin ti Jéhovah adö ti bâ aye ti kpene so a yeke sala ti wara hio afini Da ti Royaume so ala yeke na bezoin ni na ndo sese kue. Wungo ti awavorongo Jéhovah angbâ lakue ti gue na li ni na yâ ambeni kodoro mingi. Ye so ahunda ti tene a leke gbâ ti afini Da ti Royaume. Fä ni ayeke so, na yâ ngu ti kusala 2001 afini kongregation 32 ayeke bâ gigi yenga oko oko! Afini kongregation so ayeke na bezoin ti wara ando so ala lingbi ti bungbi dä ti voro Nzapa.
Mbeni hundango tënë alingbi ti bâ gigi: ‘Mbilimbili na yâ akodoro so aita ayeke na mosoro mingi pëpe, e yeke sala tongana nyen ti wara nginza teti lekengo na afini Da ti Royaume so?’ Kiringo tënë na hundango tënë so ahunda ti bâ ye use: mungo maboko ti Nzapa, nga bibe ti ambeni zo ti mû ye na bê kue.
Ti sala alingbi na zendo ti lo, Jéhovah ayeke tuku yingo vulu na ndo awakua ti lo, na tongaso lo yeke mû lege na ala ‘ti sala nzoni, ti wu na nzo kusala, ti mû ye mingi na azo na ti kangbi ye na azo’. (1 Timothée 6:18). Yingo ti Nzapa ayeke pusu aTémoin ti Jéhovah ti mû maboko mingi na kusala ti fango tënë ti Royaume: ti mu ngoi, ngangu, nga na mosoro ti ala teti akusala so a hunda na aChrétien ti sala.
Bibe ti mungo ye na bê kue apusu aTémoin nga na ambeni zo nde ti mû nginza ti sala na kusala teti guengo na li ni ti awakua nga teti kusala ti lekengo afini da teti kusala ti Royaume. A-offrande so ala yeke mû ayeke gi pëpe ti kanga ndo ti anginza so kongregation ti ndo ni afuta, me a yeke nga ti mû maboko na kusala ti lekengo aDa teti kusala ti Royaume na ndo sese kue.
Na yâ akongregation oko oko, a yeke wara aboîte so a sû mbeti na tele ni: “Offrande teti kusala na ndo sese kue—Matthieu 24:14.” Azo alingbi ti zia na yâ ni a-offrande ti bê ti ala (2 aGbia 12:9). A yekia mingi a-offrande kue so a mû, atâa a yeke kete wala kota (Marc 12:42-44). A yeke sala kusala na anginza so na yâ alege nde nde alingbi na bezoin so ayeke dä, so andu nga bezoin ti warango afini Da ti Royaume. A yeke sala kusala pëpe na anginza so ti payé na ambeni wayinda, teti aTémoin ti Jéhovah ayeke pëpe na ambeni zo tongaso so a yeke payé ala teti kusala ti ala.
A yeke tâ tënë so a-offrande so amü teti kusala na ndo sese kue asala nzoni? Biani, a yeke sala nzoni kusala mingi. Libéria ayeke mbeni kodoro so abuba na bira, na filiale ni asû na tondo so mingi ti aTémoin ti kodoro ni ayeke na kuâ ti nginza pëpe, nga ala yeke na angangu kpale ti nginza. Tongana nyen aTémoin ti Jéhovah ti kodoro ni alingbi ti wara ando so alingbi na vorongo? Filiale ni atene: “Fade a yeke sala kusala na amatabisi so aita ti ambeni kodoro amû na bê kue ti mû maboko na kusala ni. A yeke mbeni ye so a leke tâ na lege ti ndara nga na ti ndoye.”
Aita ti ndo ni amû mbage ti ala dä nga, atâa so ala yeke pëpe na mosoro mingi wala akungba so a hunda teti kusala ni. Kodoro ti Sierra Leone na Afrika, amû tondo so: “A yeke aita ti ndo ni si ayeke mû maboko, na ala yeke na ngia ti mû ngangu ti ala nga na nginza kue so ala lingbi ti mû, teti lekengo aDa ti Royaume.”
Na nda ni, ngangu so a yeke mû ti leke na aDa ti Royaume so amû gonda na Jéhovah. Aita ti Libéria atene na ngia na bê: “Anzoni Da ti Royaume so a yeke leke teti vorongo na yâ kodoro ni ayeke fa na azo so tâ lege ti vorongo ayeke ngbâ ge lakue, na fade a yeke mû gloire na kota iri ti Nzapa ti e.”