A-Da ti Royaume kapa ti lekengo ni ague na li ni
1 Na ngu 1983, na ngoi ti aKota Bungbi ti District “Unis grâce au Royaume” na États-Unis, a tene lani so a yeke zia na sese mbeni nginza so a bata nde ti leke afini Da ti Royaume, wala ti kiri ti leke nzoni ahon ambeni so ayeke dä kozoni na États-Unis nga na Canada. Na ngoi ni so, e hinga lani pëpe adeba nzoni so alingbi ti ga na lege ti akete tongo nda ni tongaso. E komanse biani ti bâ mingi ahon ngangu ti tënë so Psaume 92:5 atene na lege ni: “Mo, L’Eternel, Mo mû ngia na mbi na lege ti kusala ti Mo. Fade mbi sala bia na ngia teti kusala ti tïtî Mo.”
2 Laso e yeke na kota ngia teti aye so a yeke sala. Na ngoi ti e, mbeni kapa so a sala na loro, ti lekengo aDa ti Royaume na ndo sese kue ayeke tambela. Na alege nde nde, e kue e yeke na matabisi ti mû mbage na kusala so. E yeke sala ni na mungo nginza kete wala kota ti mû maboko ti leke ando ti vorongo mingi ahon na ndo sese kue. Aita mingi amû nga agbakuru, ngoi, aye so ala hinga ti sala, nga na akode ti ala kue ti sala na kusala senge senge na yâ ti apialo tongaso. Tongana aye so kue a leke atambela nzoni, a yeke ngbanga ti fango lege ti Jéhovah, mungo maboko ti lo, nga na akota deba nzoni so lo yeke hiri na ndo angangu so e bungbi oko ti sala.—Ps. 127:1.
3 Afiliale mingi amû tapande ti ye so a leke kozoni teti akongregation na États-Unis. Na yâ ti aDa ti Royaume na yâ ti akodoro mingi, a yeke wara mbeni sanduku so awafango tënë ayeke zia na yâ ni Nginza teti aDa ti Royaume. Na États-Unis, Kusala ti Royaume ti nze ti mars 1997 afa tënë ti mbeni ye so a kiri aleke na yâ programme ni. A tene: “Ngbele ye na ngu 1983, ngoi so Société a zia na sese Nginza teti aDa ti Royaume, aita amû nginza na lege ti nzobe. A yeke na lege so si a lingbi ti mû bon na akongregation ti leke na Da ti Royaume. Na yâ ti kodoro so, a yeke akongregation 2 700 si awara aye ti nzoni na lege ti aye so. Tongana ye so ayeke fade dä pëpe, ka akongregation mingi alingbi pëpe ti leke afini Da ti Royaume wala ti kiri ti leke mbage ti ambeni so abuba. Kota bezoin ayeke dä fadeso ti sala kusala na ambeni mbage ti nginza so aita amû ti sala bon na akongregation na yâ ti akodoro so kpale ti nginza ayeke dä. Société, nga na akongregation so awara mungo maboko so ayeke bâ na nene ni dutingo ndulu ti i lakue ti mû maboko na ye so a leke.”
4 Tokua so ayeke tongana mbeni tisango ndo ti mû mbage na kapa ti lekengo aDa ti Royaume so ayeke gue na li ni na loro. Atâa so a yeke ngbâ ande lakue ti mû bon ti lekengo na Da ti Royaume na yâ kodoro so, a yeke sala ande nga kusala na ambeni mbage ti Nginza teti aDa ti Royaume ni ti mû maboko na aita ti e ti ambeni kodoro nde so ye amanke ala. Mbeni article na yâ ti Kusala ti Royaume ti nze ti février 1998, atene: “Ti wara Ada ti Royaume ayeke kota ye mingi na ndo ti sese kue. Na yâ ti ndangba ngu ti kusala, a leke afini kongregation 3 288, so kota mbage ni ayeke na Afrika, na Bê Amerika, na Amerika ti Mbongo, na Asie nga na Poto ti Tö.”
5 Ye nyen asi na pekoni ngbele ye na ngoi ni so? Annuaire ti ngu 2001 afa pekoni: “Na lege ti ye so a leke, a hunzi ti sala aDa ti Royaume 453 na yâ akodoro 30, na a ngbâ ti leke ambeni 727. A yeke gboto lê mingi fadeso na ndo ti lekengo aDa ti Royaume so kue akpa gi tele na lege ti aplan so alingbi na kodoro oko oko, na salango kusala na agbakuru nga na akode ti lekengo da na yâ kodoro ni. Na Kenya, a yeke sala kusala na akota tênë ti lekengo na da; na Togo, fani mingi a yeke sala kusala na abrique; na Cameroun a yeke bâ nga ada mingi na brique ti zagro so na pekoni a akpaka ciment na ndo ni. Na lege so, aita ti akodoro ni alingbi ti wara hio akode so amû lege na ala ti sala kota kua na yâ pialo so na yâ kodoro ti ala.
6 A yeke biani na yâ ti akodoro ti Afrika si a lingbi ti bâ polele adeba nzoni ti Jéhovah na ndo programme so. Tongana mo yeke bâ foto ti aDa ti Royaume so a leke awe, tara ti pensé na ye so mara ti lekengo ada tongaso asala na ndo kusala ti aTémoin ti Jéhovah! Ye so ayeke tâ tënë na yâ ti aye ota: beoko ti songo ti e ti aita na ndo sese kue, ye so ayeke sala na ndo so ala yeke dä, nga guengo na li ni ti wungo ti azo na abungbi ti kongregation. Atâa so supplément so agboto lê na ndo aDa ti Royaume so aleke na Afrika, ambeni numéro ti Kusala ti Royaume ti peko ayeke gboto lê ande na ndo lege so kapa ti lekengo aDa ti Royaume so ayeke gue na li ni na yâ ti ambeni mbage nde ti sese.
[Afoto na lembeti 3]
RÉPUBLIQUE CENTRAFRICAINE
Bimbo, Bangui
Bégoua, Bangui
[Foto na lembeti 4]
Ukonga, Tanzanie
[Foto na lembeti 4]
Accra, Ghana
[Foto na lembeti 4]
Salala, Libéria
[Foto na lembeti 4]
Karoi, Zimbabwe
[Afoto na lembeti 4, 5]
Allada, Bénin: ngbele Da ti Royaume
Allada, Bénin: fini Da ti Royaume
[Foto na lembeti 5]
Kpeme, Togo
[Foto na lembeti 5]
Sokodé, Togo
[Afoto na lembeti 4, 5]
Fidjrosse, Bénin
[Foto na lembeti 6]
Lyenga, Zambie: ngbele Da ti Royaume
[Foto na lembeti 6]
Lyenga, Zambie: fini Da ti Royaume
[Foto na lembeti 6]
Kinshasa, Congo
[Foto na lembeti 6]
Musambira, Rwanda