Atënë so azo ahunda

Tongana mbeni zo afâ tele ti lo, a lingbi ti hunda na mbeni Chrétien ti mû diskur na ndo kuâ ti lo?

A yeke ti Chrétien oko oko ti bâ wala yingo-ti-hinga ti lo amû lege na lo ti mû diskur na ndo kuâ ti mbeni zo so peut-être afâ tele ti lo na bê kue. Tongana a yeke ti mû mbeni desizion, a lingbi lo gbu li na ndo ahundango tënë so: Tongana nyen Jéhovah ayeke bâ mbeni zo so afâ tele ti lo? Zo ni aleke biani na bê ti lo ti fâ tele ti lo? Ye nyen apusu lo ti fâ tele ti lo? A yeke mbeni kobela ti li wala kota kpale ti bibe si apusu lo ti sala ye tongaso? Na yâ ndo ni so, tongana nyen a yeke bâ azo so afâ tele ti ala?

Teti so e yeke aChrétien, e ye mingi ti hinga tongana nyen Jéhovah ayeke bâ azo so afâ tele ti ala. Na bango ndo ti Jéhovah, fini ti zo ayeke na ngele ngangu mingi, na a yeke nzoni-kue (Genèse 9:5; Psaume 36:10). Tongana mbeni zo aleke na bê ti fâ tele ti lo, a yeke mbeni salango ye so anzere oko pëpe na lê ti Nzapa (Exode 20:13; 1 Jean 3:15). Ye so aye ti tene so a lingbi pëpe ti mû diskur na ndo kuâ ti mbeni zo so afâ tele ti lo?

Bâ tapande ti Gbia Saül ti Israël. Lo bâ so lo yeke ngbâ ande na fini pëpe na yâ ndangba bira so lo yeke sala na azo ti Philistie. Tongaso, a hon ti zia si awato ti lo agbu lo na asala sana na lo, “Saül agbu épée ti lo, na lo tï na yanga ti épée ni.” Tongana aturugu ti Philistie awara kuâ ti lo, ala kanga ni na tele ti gbagba ti Beth-San. Azo ti Jabès ti Galaad amä tënë ti ye so aPhilistin asala, na tongaso ala mû kuâ ti Saül na ala zö ni. Na pekoni, ala mû abio ti lo ala lu ni. Ala zia même kobe teti lango mbasambala, tongana ti so azo ti Israël ayeke sala ka lakue tongana mbeni zo akui (1 Samuel 31:4, 8-13; Genèse 50:10). Tongana David, so Jéhovah asa yingo na ndo ti lo, amä tënë ti ye so azo ti Jabès ti Galaad asala, lo tene: “Tënë nzoni ti L’Eternel aga na ndo i, teti i sala nzobe na seigneur ti i Saül, na i lu kuâ ti lo. Tongaso L’Eternel asala si nzobe na tene-biani aga na ndo i.” (2 Samuel 2:5, 6). Bible atene pëpe so a fâ ngbanga ti sioni na ndo salango ye ti azo ti Jabès ti Galaad so, na bango ni, akpa salango place ti kuâ ti Gbia Saül. Tara ti haka tapande so na ti ala so a ke ti lu ala teti so ala sala ye ti sioni (Jérémie 25:32, 33). Na gbungo li na ndo tondo ti Bible so andu Saul, mbeni Chrétien alingbi ti bâ wala lege ayeke dä ti mû diskur ande na ndo kuâ ti mbeni zo so afâ tele ti lo.

Peut-être Chrétien so ayeke mû diskur ni abâ ti lo gi nda ti salango adiskur ti kuâ. Nde na azo so amä na bê so âme akui pëpe, aTémoin ti Jéhovah ayeke sala pëpe diskur ti kuâ na bibe ti mû lege na yingo ti kuâ ni ti hon na mbeni ndo. Kota nda ti mungo diskur ni ayeke pëpe ti tene kuâ ni awara ye ti nzoni dä, me ti dë bê ti ala so agirisa sewa ti ala na yâ kui, nga ti fa tënë na ala kue so aga, si ala hinga ye nyen ayeke si tongana zo akui (Zo-ti-fa-tene 9:5, 10; 2 aCorinthien 1:3-5). Mbeni kota nda ti tënë nde ti mû diskur ti kuâ ayeke ti mû maboko na ala so kue aga, ti gbu li na ndo fini ti zo so ayeke ninga mingi pëpe (Zo-ti-fa-tene 7:2). Tongana a mû diskur ti kuâ ni na ndo zo so afâ tele ti lo, fade a yeke sala si angbongboro tënë so kue asigigi polele?

Biani, ambeni zo alingbi peut-être ti tene so zo ni afâ tele ti lo na mbana, na hingango so lo sala siokpari na mbage ti Jéhovah. Ye oko, azo so ayeke biani lakue na anda ti tënë so alingbi, ti duti na mara ti bibe tongaso? Peut-être a yeke mbeni ye si apusu lo ti londo hio ti sala ye tongaso. Ambeni zo ayeke dä so atara ti fâ tele ti ala, me na pekoni, vundu asala ala, na ala zia lege ni. Zo so afâ tele ti lo alingbi pëpe ti gbian bê ti lo tongaso na peko ti kui ti lo.

Mbeni kota ye so a lingbi nga ti bâ ndo dä ayeke akobela ti li na akota kpale ti bibe so apusu azo mingi ti fâ tele ti ala. Biani, a lingbi ti bâ ala tongana azo so afâ tele ti ala mê ala sala ni na bê ti ala mveni pëpe. Na lege ti ambeni tondo so a sala, tongana a mû azo 100 so afâ tele ti ala, 90 na popo ti ala ayeke na mbeni kobela ti li, mbeni kpale ti bibe wala anyon ngangu yorö ahon ndo ni. Fade Jéhovah ayeke pardonné azo tongaso so afâ tele ti ala? E lingbi pëpe ti hinga wala zo ni asala mbeni siokpari so Jéhovah alingbi pëpe ti pardonné. Tongana mbeni Chrétien ayeke gi ti bâ wala lo lingbi ti mû diskur na ndo kuâ ti zo tongaso, peut-être lo lingbi ti gi ti hinga ye na ndo aye so angoro lani fini ti zo ni so, nga akpale ti seni kue so lo wara.

Mbeni ye nde ayeke nga dä ti bi lê na ndo ni: Tongana nyen si azo ti ndo ni ayeke bâ azo so afâ tele ti ala? A yeke mbeni ye so a-ancien alingbi ti gi bê ti ala dä, teti ye so agbu bê ti ala ayeke bango ndo wa azo alingbi ti wara na ndo ti kongregation ti aTémoin ti Jéhovah tongana a sala ni biani. Peut-être ndali ti bango ndo so azo mingi ayeke na ni na ndo azo so ayeke fâ tele ti ala na ndo ni, nga mbilimbili na ndo ye so asi biani, a-ancien alingbi ti tene so a yeke mû ande diskur pëpe na place ti kuâ ni wala na Da ti Royaume.

Ye oko, tongana a hunda na mbeni Chrétien ti mû li ni na ngoi ti lungo kuâ, so ambeni zo nde aleke ni, peut-être lo mveni lo bâ so lo lingbi ti sala ni. Tongana lo yeda ti sala tongaso, a lingbi lo sala hange ti tene pëpe so fade a yeke zingo biani kuâ ni na popo ti awakinda. Beku kue so kuâ ni alingbi ti duti na ni ayeke na maboko ti Jéhovah, na a yeke na zo oko pëpe ti tene so zo ni ayeke zingo wala pëpe na popo ti awakinda. Chrétien so amû diskur ni alingbi ti luti mingi gi na ndo atâ tënë so Bible afa na ndo kui, na lo yeke gi ti dë bê ti ala so agirisa sewa ti ala ni na yâ kui.