Atënë so azo ahunda
Abel ahinga lani so a lingbi zo amû mbeni nyama na sandaga si Nzapa ayeda na lo?
Bible asala tënë gi ndulu na ndo asandaga so Caïn na Abel amû. E diko na Genèse 4:3-5: “Ndani lâ mingi, tënë asi tongaso, Caïn aga na offrande ti le-kobe ti yaka na L’Eternel. Na Abel nga aga na ambeni ti akozo ti kundu ti lo, na mafuta ti ala. L’Eternel abâ Abel na offrande ti lo nzoni. Me Lo bâ Caïn na offrande ti lo nzoni pëpe.”
Bible afa pëpe so, kozo si ye so asi, Jéhovah amû ambilimbili tënë na ndo asandaga wala na ndo mara ti asandaga wa ayeke nzere na lo. Tongaso, a lingbi ti tene so, a yeke na bê ti ala mveni si Caïn na Abel amû asandaga ti ala. A kanga lege na ala ti lï na yâ ngbele ndo ti ababâ na mama ti ala: Paradis. Ala komanse ti hinga aye so aga na peko ti siokpari; na ala yeke yongoro na Nzapa. Na yâ dutingo ti ala ti siokpari so asala zo mawa, ala hinga lani biani so a lingbi ala bi lê na mbage ti Nzapa ti tene lo mû maboko na ala. Mungo mbeni matabisi na Nzapa ayeke lani peut-être mbeni ye so ala sala na bê ti ala mveni ti wara nzobe ti lo.
Ye so asi na nda ni ayeke so, Nzapa ayeda na sandaga ti Abel, me lo ke ti Caïn. Ngbanga ti nyen? A yeke lani ngbanga ti so Abel amû aye so ayeke na lege ni, me pëpe Caïn? E lingbi ti hinga na bê kue pëpe so mara ti asandaga so ala mû ni, asala ye oko pëpe na ndo tënë ni, teti so a fa na ala pëpe ye wa a yeda na ni, nga ye wa a ke ni. Ye oko, a lingbi ti tene so a yeda na mara ti asandaga ni use kue. Na yâ Ndia so Jéhovah amû na pekoni na mara ti Israël, a yeda pëpe gi na asandaga ti nyama wala ambage ti nyama, me nga na le-kobe so ayôro, gbâ ti orge, fuku ti nzoni, gâteau wala mapa, nga na vin (Lévitique 6:12-16; 7:11-13; 23:10-13). A bâ so a yeke pëpe gi aye so Caïn na Abel amû na sandaga si apusu Nzapa ti yeda na mbeni, nga ti ke mbeni.—Bâ Esaïe 1:11; Amos 5:22.
Angu saki mingi na pekoni, bazengele Paul atene: “Na lege ti mabe Abel amû na Nzapa sacrifice ti nzoni ahon sacrifice ti Caïn; na lege ti ye so lo wara tënë ti témoin so atene, lo yeke mbilimbili, teti Nzapa asala tënë ti témoin tënë ti matabisi ti lo”. (aHébreu 11:4). Tongaso, a yeke ndali ti mabe si Nzapa ayeda na Abel tongana zo ti mbilimbili. Me mabe na yâ nyen? Mabe na yâ zendo ti Jéhovah ti mû Hale ni, so ayeke ‘mboko li ti ngbo’ na ayeke kiri na siriri, nga dutingo mbilimbili-kue so azo ayeke na ni ândö. Na lege ti tënë so a tene a yeke ‘mboko ndagere ti’ Hale ni, Abel atene peut-être na bê ti lo so a lingbi a mû mbeni sandaga, so a sa mênë dä (Genèse 3:15). Me ti tâ tënë ni, a yeke mabe so Abel afa na gigi si asala si ‘sandaga ti lo ayeke nzoni ahon sandaga ti Caïn’.
Legeoko nga, a ke Caïn, pëpe ndali ti so lo mû mbeni sioni mara ti sandaga, me ndali ti so lo yeke na mabe pëpe, tongana ti so akusala ti lo afa na gigi. Jéhovah atene polele na Caïn: “Tongana mo sala nzoni, fade agbian lê ti mo na ngia pëpe?” (Genèse 4:7). A yeke pëpe ngbanga ti so sandaga ti Caïn anzere na lo pëpe si Nzapa ake lo. Ti tâ tënë ni, Nzapa ake Caïn lani “teti kusala ti lo mveni ayeke sioni”: mbanda, kengo zo, nga na nda ni fango zo.—1 Jean 3:12.