Fade mo yeke bata be-biani ti mo?

ANDEKE oke akui biri? Zo oko ahinga pëpe, na peut-être gbâ ti azo abi bê na ni pëpe teti andeke ni ayeke mingi. Ye oko, Jéhovah ayeke bi bê na ala. Na salango tënë ti andeke so zo alingbi ti bâ tongana aye senge, Jésus atene na adisciple ti lo: “Tongana Nzapa Babâ ti ala ayeda pëpe, mbeni ndeke oko alingbi ti tï na sese pëpe.” Lo tene na ndo ni: “A yeke nzoni ala sala mbito pëpe, ngbanga ti so ala hon akete ndeke so mingi!”​—Matthieu 10:29, 31, Buku ti Nzapa, Fini Mbuki.

Na pekoni, adisciple awara lege ti bâ nzoni ahon tongana nyen Jéhovah abâ ala na kota ngele mingi. Bazengele Jean so ayeke mbeni oko ti ala asû na mbeti: “Ndoye ti Nzapa asi na e giriri na lege so: Nzapa ato Molenge ti Lo ngengele oko na sese so, si e lingbi wara fini na lege ti Lo.” (1 Jean 4:9). Jéhovah amû gi pëpe sandaga ti kota ngele so, me nga lo dë bê ti awakua ti lo oko oko na tënë so: “Fade Mbi zia ti sala na mo pëpe, na Mbi zia mo lâ oko pëpe.”​—aHébreu 13:5.

A yeke polele so ndoye ti Jéhovah teti azo ti lo alingbi ti yengi lâ oko pëpe. Ye oko, hundango tënë so alondo: ‘Songo ti e na Jéhovah ayeke tâ ngangu mingi na asala si e lingbi lâ oko pëpe ti zia lo?’

Atara ti Satan ti futi be-biani ti e

Na ngoi so Jéhovah agboto lê ti Satan giriri na ndo be-biani ti Job, Satan akiri tënë: “Job akpe mbito ti Nzapa senge senge?” (Job 1:9). Lo ye ti tene so azo alingbi ti bata be-biani ti ala na mbage ti Nzapa gi tongana ala lingbi wara mbeni faïda na pekoni. Tongana tënë so ayeke tâ tënë biani, a ye ti tene so Chrétien oko alingbi pëpe ti bata be-biani ti lo tongana ye so a mû na lo ahon faïda so lo lingbi ti wara na peko ti be-biani ti lo.

Na yâ ye so asi na Job, Satan atene kozoni so fade Job ayeke ngbâ be-biani pëpe na Nzapa tongana a lungula aye ti mosoro ti lo so lo ndoye mingi (Job 1:10, 11). Me na pekoni, tongana tënë ti zonga so aga gi tënë ti wataka, Satan atene: “Fade zo amû ye ti lo kue ti bata fini ti lo.” (Job 2:4). Atâa so tënë ti Satan so alingbi ti duti tâ ye teti ambeni zo, Job ake ti bele be-biani ti lo. Tondo ti giriri ni afa so Job abata lani be-biani ti lo (Job 27:5; 42:10-17). Mo yeke na mara ti be-biani tongaso? Wala mo yeke zia ande si Satan afuti be-biani ti mo? Tara ti gbu li na ndo mo mveni na ngoi so e yeke bâ ambeni tâ tënë so abâ Chrétien oko oko.

Bazengele Paul amä na bê so be-biani ti Chrétien alingbi ti duti tâ ngangu mingi. Lo sû na mbeti: “Mbi hinga biani, fade kui, wala fini, . . . wala ye ti fadeso, wala ye so ayeke ga, . . . wala mbeni ye nde so A créé awe, alingbi kangbi e pëpe na ndoye ti Nzapa so ayeke na yâ Christ Jésus Seigneur ti e.” (aRomain 8:38, 39). E lingbi ti duti na mara ti oko bibe so tongana ndoye ti e teti Jéhovah ayeke ngangu. Mara ti ndoye tongaso ayeke mbeni kamba so ye oko ti futi ni ayeke dä pëpe, atâa kui.

Tongana e yeke na mara ti songo tongaso na mbage ti Nzapa, fade e yeke hunda lâ oko pëpe tënë so: ‘Fade mbi yeke ngbâ ti sala na Jéhovah na yâ angu so ayeke ga?’ Mara ti kite tongaso aye ti fa so be-biani ti e na Nzapa aluti na ndo aye so alingbi ti si na e na yâ fini ti e. Aye so angoro e ayeke na ngangu oko pëpe na ndo tâ be-biani. Nde na so, tâ be-biani aluti na ndo mara ti zo ti yâ ni wa e yeke (2 aCorinthien 4:16-18). Tongana e ndoye Jéhovah na bê ti e kue, fade e yeke zia vundu na bê ti lo lâ oko pëpe.​—Matthieu 22:37; 1 aCorinthien 13:8.

Ye oko, a lingbi e dabe e so Satan ayeke gi lakue ti futi be-biani ti e. Lo lingbi ti tara e ti tene e tï na yâ anzara ti mitele, ti tï na gbele angangu so amba ti e ayeke sala na ndo e, wala ti zia si ambeni ye ti ngangu nde apusu e ti zia lege ti tâ tënë. Na yâ tiri so Satan ayeke sala na e, sese so ake Nzapa ayeke tâ na mbage ti lo, na dutingo ti e mbilimbili-kue pëpe alingbi ti mû lege na lo hio ti futi be-biani ti e (aRomain 7:19, 20; 1 Jean 2:16). Ye oko, alege mingi azi na e ti hon na ngangu na yâ tiri so, na mbeni oko lege ni ti nzoni ahon ayeke so e hinga aye so Satan aleke ti sala.​—2 aCorinthien 2:11.

Aye wa Satan aleke ti sala? Na yâ mbeti ti lo na aEphésien, Paul ahiri ni “aye so Zabolo ayeke sala ti handa na azo”.a (aEphésien 6:11, Buku ti Nzapa, Fini Mbuki). Satan azia na ndo lege ti e aye ti handa na azo, so nda ni ayeke ti futi be-biani ti e. Me e yeke na ngia ngbanga ti so e lingbi ti hinga aye ti handa so, teti a sû na yâ Mbeti ti Nzapa akode ti salango ye ti Diable ti mû lege na e ti hinga ni. Atara so Satan aleke ti buba na be-biani ti Jésus nga na ti Job afa tapande ti ambeni lege so lo yeke sala na kusala ti futi be-biani ti e ti Chrétien.

A lingbi lani pëpe ti futi be-biani ti Jésus

Na tongo nda ti kusala ti fango tënë ti Jésus, Satan aduti na kamene pëpe ti tara Molenge ti Nzapa na hundango na lo ti changé tênë si aga mapa. So tâ ye ti mayele! Jésus ate ye pëpe teti alango 40, na kite ayeke pëpe so nzara asala lo (Luc 4:2, 3). Satan ahunda na Jésus ti kaï nzara ti lo ti tengo kobe fade fade, me na mbeni lege so ague nde na ye so bê ti Jéhovah aye. Legeoko nga laso, atënë ti sabango ti sese awa azo ti gi ti kaï hio nzara ti ala nde nde, atâa ala hinga nzoni wala pëpe aye so ayeke si na pekoni. Tokua ni ayeke so: ‘Mo kpa ti wara ni fadeso’, wala ‘Sala gi ni!’

Tongana Jésus agi fade ti kaï nzara ti lo ti tengo kobe sân ti bi bê na ndo aye so alingbi ti si na pekoni, ka Satan ayeke wara lege ti pusu lo ti bele be-biani ti lo. Jésus abâ aye ni na lê ti yingo, na lo kiri tënë na kuru go: “Mbeti ti Nzapa atene, Fade zo angbâ na fini gi na lege ti mapa pëpe”.​—Luc 4:4; Matthieu 4:4.

Satan asala kusala fadeso na mbeni kode nde ti handango zo. Na gbiango yâ ti Tënë ti Nzapa so Jésus ayeke sala kusala na ni, Diable awa Jésus ti londo na li ti temple na ti huru ti tï na sese. Satan atene: ‘Fade mbeni ange ayeke sö mo’. Jésus aye pëpe ti hunda na Babâ ti lo ti sö lo na lege ti kpene gi ti gboto lê na ndo lo mveni. Jésus akiri tënë: “A lingbi mo handa Seigneur Nzapa ti mo pëpe.”​—Matthieu 4:5-7; Luc 4:9-12.

Ndangba kode so Satan asala na kusala ayeke polele mingi ahon. Lo tara ti mä tele na Jésus ti mû na lo sese kue na gloire ni tongana Jésus akuku gi fani oko ni ti voro lo. A yeke peut-être ye kue so Satan alingbi fade ti mû. Me Jésus alingbi biani ti kuku ti voro tâ kota wato ti Babâ ti lo? A yeke ngangu! Jésus akiri tënë: “A lingbi mo sambela Seigneur Nzapa ti mo, na mo sala gi na Lo oko.”​—Matthieu 4:8-11; Luc 4:5-8.

Tongana atara ti lo ota so kue atï na ngu awe, Satan ‘azia Lo juska mbeni lâ.’ (Luc 4:13). So ti fa so Satan ayeke gi lakue mbeni ngoi ti tara be-biani ti Jésus. Mbeni ngoi so alingbi na lo asi angu use na ndambo na pekoni, tongana Jésus ayeke leke adisciple ti lo teti kui ti lo so aga ndulu. Bazengele Pierre atene: “Nzapa aye so pëpe, Seigneur; fade ye so aga na Mo lâ oko pëpe.”​—Matthieu 16:21, 22.

Pierre amû wango so na nzoni bê, me a yeke na lege ni pëpe. Fade wango ni ayeke nzere na Jésus teti so a londo na mbeni disciple ti lo? Jésus abâ fade fade so atënë so afa na gigi abibe ti Satan me pëpe ti Jéhovah. Christ akiri tënë na ngangu: “Mo zia lege ti Mbi, Satan; mo yeke tongana son na lege ti Mbi, teti mo bi bê ti mo na ye ti Nzapa pëpe, me na ye ti azo.”​—Matthieu 16:23.

Teti so ndoye so Jésus ayeke na ni teti Jéhovah angbâ lakue, Satan awara lege pëpe ti futi be-biani ti lo. Na yâ aye so kue Diable alingbi ti mû, atâa tara ni ayeke ngangu tongana nyen, ye oko alingbi pëpe ti woko be-biani ti Jésus na mbage ti Babâ ti lo ti yayu. Fade e yeke duti na mara ti oko bibe tongaso tongana aye asala si a duti ngangu teti e ti bata be-biani ti e? Tapande ti Job ayeke mû ande maboko na e ti hinga nzoni atara wa alingbi ti si na e.

Be-biani na gbele aye ti ngangu

Tongana ti so Job abâ, aye ti ngangu alingbi ti si na ndo e na ngoi kue. Job ayeke lani na wali; lo yeke na ngia nga na amolenge bale-oko, na lo bata si fini ti lo angoro na tele ti akusala ti yingo (Job 1:5). Me a to nda ti dë gaba na ndo be-biani ti lo na yangbo ti Nzapa na yayu, na Satan aleke ti sala kusala na alege kue ti futi be-biani ti lo; Job ahinga ye oko dä pëpe.

Gi na yâ kete ngoi, Job agirisa aye ti mosoro ti lo ti mitele kue (Job 1:14-17). Ye oko, be-biani ti Job aluti na gbele tara ni teti so lo zia bê lâ oko pëpe na ndo nginza. Tongana lo yeke dabe lo na ngoi so lo de na mosoro mingi, Job atene: “Tongana beku ti mbi ayeke na ndo lor, . . . tongana mbi yeke na ngia teti mosoro ti mbi ayeke mingi, . . . so ayeke ye ti sioni nga, . . . teti na lege so, mbi ke Nzapa so ayeke na nduzu.”​—Job 31:24, 25, 28.

Laso, zo alingbi nga ti girisa aye ti lo kue gi na lango oko. A yeke ye so asi na mbeni zo ti dengo buze so ayeke Témoin ti Jéhovah; a nzi tâ kota nginza ti lo na a zia lo gi senge tongaso. Lo tene na bê kue: “A ngbâ kete bê ti mbi aluti. Biani, mbi pensé tongana fade songo ti mbi na Nzapa ayeke dä pëpe, ka fini ti mbi ahunzi lani. Ye oko, ye so asi na mbi azi lê ti mbi ti bâ so aye ti yingo ayeke lani na kozo ndo pëpe na yâ fini ti mbi. Nzerengo tele ti mbi ti wara nginza mingi atara ti kango ndo ti tanga ti ye kue.” Ti londo na ngoi ni so, Témoin so akiri na ngoi so lo mû na kusala ti dengo buze ti lo na peko ngangu, na lo yeke mû lakue kusala ti pionnier auxiliaire nze oko oko ti mû angbonga 50 wala ahon so na yâ kusala ti fango tënë. Ye oko, ambeni kpale nde alingbi ti futi bê ti zo mingi ahon amosoro so zo agirisa.

Na ngoi so Job ade ti gbu li kue pëpe na ndo tokua so a ga na ni na lo ti amosoro ti lo so lo girisa kue, lo mä so amolenge ti lo bale-oko kue akui. Me lo kiri lo tene: “Sala tënë nzoni na iri ti L’Eternel!” (Job 1:18-21). Fade e yeke bata lakue be-biani ti e tongana kui amû fade fade azo mingi na yâ sewa ti e? Francisco, mbeni surveillant Chrétien na Espagne, agirisa na yâ kuâ amolenge ti lo use na yâ mbeni ngangu ndao ti lege. Me lo wara dengo bê na gango ndulu mingi ahon na Jéhovah na yâ sambela, nga na konongo yâ ti kusala ti lo ti fango tënë.

Même na peko ti kota kpale ti girisango amolenge ti lo na yâ kuâ, angangu tara ti Job ahunzi ge pëpe. Satan apika lo na mbeni sioni kobela so asala si lo hu pono ngangu. A yeke na ngoi ni so si wali ti Job amû na lo mbeni wango so ayeke sioni. Lo tene na Job: “Mo zonga Nzapa, mo kui.” Job ayeda pëpe na wango ti lo, na lo sala “siokpari na yanga ti lo pëpe.” (Job 2:9, 10). Be-biani ti lo aluti, pëpe na ndo maboko so sewa ti lo amû na lo, mê na ndo songo ti lo na Jéhovah.

Flora, so koli ti lo na kozo molenge ti lo ti koli azia tâ tënë a sala angu bale-oko na ndo ni awe, awara oko vundu so Job ayeke lani na ni. Lo tene: “Tongana mbeni ye asi fade fade, a sala si songo ti mo na azo ti sewa ti mo akangbi, a lingbi ti duti tâ ye ti kota vundu biani. Me mbi hinga so mbi lingbi pëpe ti wara tâ ngia na gigi ti bungbi ti Jéhovah. Ni la, mbi luti ngangu na mbi zia Jéhovah na kozo ndo na ngoi so mbi sala ngangu ti duti lakue mbeni nzoni wali na nzoni mama ti amolenge. Mbi ngbâ lakue ti sambela, na Jéhovah akpengba mbi. Mbi wara ngia mingi teti atâa so koli ti mbi asala lakue ngangu na mbi, mbi manda ti zia bê kue na Jéhovah.”

Ye so Satan asala na kusala na pekoni ti futi be-biani ti Job ayeke afon lo ota (Job 2:11-13). Tara ti bâ kota vundu so Job awara tongana afon lo so ato nda ti kasa lo. Tongana lo yeda fade na atënë ti ala, ka lo yeke girisa ziango bê ti lo na Jéhovah Nzapa. Awango ti ala ayeke ti nze zo, na a lingbi fade ti buba kpengba-be nga be-biani ti Job, na tongaso Satan alingbi fade ti hon lo na ngangu.

Nde na so, Job atene na ngangu: “Fade mbi zia mbilimbili ti mbi pëpe juska mbi kui.” (Job 27:5). Lo tene pëpe: ‘Fade mbi mû lege pëpe na ala ti lungula mbilimbili ti mbi!’ Job ahinga so gi lo nga na ndoye ti lo teti Jéhovah si ayeke sala ngangu na ndo be-biani ti lo.

Ngbele kode ti mayele ti gbu na afini zo

Satan angbâ lakue ti sala kusala na asioni wango nga na atënë ti buba, so alondo na akamarade nga na afon e na yâ vorongo. Tongana ye so asala si e nze alondo na yâ kongregation, a lingbi ti woko e hio ahon salango ngangu so alondo na gigi ti kongregation. Mbeni ancien so ayeke sala bira giriri tongana turugu atara ti haka bira so lo sala kozoni, na pono so lo hu na pekoni teti atënë na asalango ye so a mû na gbungo li pëpe, so alondo na ambeni ita ti lo Chrétien. Na ndo atënë na asalango ye so, lo tene: “A yeke ye ti ngangu ahon so mbi wara na yâ fini ti mbi.”

Na mbeni mbage nde, salango ye na lege ni pëpe ti ambeni fon e na yâ tâ tënë alingbi ti so bê ti e ngangu, a sala si e ke ti sala tënë na ala wala même ti zia lege ti abungbi. E lingbi ti bâ so kota ye ni ahon ayeke ti tene e gi ti dë bê ti e kozoni. Me so tâ ye ti vundu ti duti na mara ti bango ndo tongaso na ti zia si salango ye wala tënë ti ambeni zo nde awoko tâ mosoro ti e ti ngele ngangu, so ti tene songo ti e na Jéhovah! Tongana e zia si ye tongaso asi na e, e yeke tï ande na yâ mbeni gbanda so Satan ayeke sala na kusala ngbele ye giriri.

A yeke na lege ni teti e ti ku ti tene azo na yâ kongregation abata akpengba-ndia nzoni ahon. Me tongana e ku ye mingi ahon na mbage ti afon e na yâ vorongo so ayeke mbilimbili-kue pëpe, kite ayeke pëpe so bê ti e ayeke nze. Nde na so, Jéhovah ayeke sala ye na lege ni na yâ ye so lo ku na mbage ti awakua ti lo. Tongana e mû tapande ti lo, fade e yeke duti ndulu ti kanga bê tongana ala sala ye so ayeke mbilimbili-kue pëpe (aEphésien 4:2, 32). Bazengele Paul amû wango so: “Tongana ngonzo agbu i, i bata si i sala siokpari pëpe; i zia lâ akui na i na ngonzo na bê ti i pëpe, na i zia ndo na zabolo pëpe.”​—aEphésien 4:26, 27.

Tongana ti so Bible afa ni polele, Satan ayeke sala kusala na akode ti mayele nde nde ti gi lege kue ti futi be-biani ti e tongana Chrétien. Ambeni kode so lo sala na kusala alingbi ti nzere na nzara ti mitele ti zo, na ambeni nde alingbi ti sala sana na zo. Na lege ti lisoro so e sala, mo lingbi ti bâ ngbanga ti nyen a lingbi mo leke tele ti mo lakue. Tongana ndoye teti Nzapa aluti ngangu na yâ bê ti mo, leke ti fa na gigi so Diable ayeke wamvene, na zia ngia na bê ti Jéhovah (aProverbe 27:11; Jean 8:44). Dabe mo so a lingbi lâ oko pëpe ti futi tâ be-biani ti atâ Chrétien, atâa atara so e lingbi ti wara.

[Kete Tene na Gbe Ni]