Mbaï ti fini

Mbeni kete mbeti so achangé fini ti mbi

TËNË TI IRENE HOCHSTENBACH

Na ngoi so mbi yeke lani na ngu 16, mbi gue legeoko na ababâ na mama ti mbi na mbeni bungbi ti Nzapa na Eindhoven, mbeni gbata ti Brabant, na Pays-Bas. A yeke lani na lakui ti mbeni mardi ti ngu 1972. Mbi yeke gi bê ti mbi mingi na ndo mbi mveni, na mbi ye fade ti duti na mbeni ndo nde. Na pekoni, ambeni maseka-wali use ayôro na mbi mbeni kete mbeti so atënë: “Irene, e ye ti mû maboko na mo na bê kue.” Mbi hinga lani pëpe na lege wa kete mbeti so ayeke changé ande fini ti mbi. Me kozoni si mbi fa ye so asi na pekoni, zia mbi fa na i tënë kete na ndo ti mbi.

A DÜ mbi na zoa ti Belitung, na Indonésie. Mbi dabe mbi na ambeni totongo ti aye so mbi mä na ndo zoa so: totongo ti akeke ti mburu so pupu ayeke yengi ala, pendere totongo ti mbeni bale so ayeke sua ndulu na ndo ti e, dengo kongo ti amolenge so ayeke sala ngia na tele ti da ti e, nga na totongo ti mozoko so amû yâ ti da ti e. Na ngu 1960, tongana mbi wara ngu osio, sewa ti e azia Indonésie na ague na Pays-Bas. E sala yongoro voyage so na bateau, na totongo ti ye so mbi dabe mbi mbilimbili na ni ayeke ti mbeni ye ti ngia so mbi ye ni mingi na so mbi sala voyage na ni: a yeke mbeni kete poupée ti koli so ayeke pika ngo. Tongana mbi wara ngu mbasambala, mbeni kobela asala si mê ti mbi akanga, na ti londo na ngoi ni so, mbi lingbi oko pëpe ti mä toto ti aye so angoro mbi. Mbi lingbi gi ti dabe mbi na atotongo ti aye so mbi mä ni kozo.

Mbi kono tongana zo so mê ti lo akanga

Teti so ababâ na mama ti mbi abi bê mingi na ndo mbi na lege ti ndoye, na tongo nda ni, mbi bâ kue pëpe akpale ti peko ti dutingo zo so mê ti lo akanga. Tongana mbi de molenge, mbi pensé so même ngbongboro ye so a zia na mê ti mbi ti zi lege na mbi ti mä ndo ayeke gi mbeni ye ti ngia tongaso, me a mû maboko na mbi mingi pëpe. Ti sala lisoro na mbi, amolenge ti vaka ti mbi ayeke mû craie na ayeke kpaka na sese atënë ti ala ni, na mbi yeke kiri tënë na ala na yanga, atâa so mbi lingbi pëpe ti mä go ti mbi mveni.

Tongana mbi yeke kono, mbi to nda ti bâ so mbi yeke nde na azo so ayeke na tele ti mbi. Mbi to nda ti bâ nga so ambeni zo ayeke he mbi teti mê ti mbi so akanga, na ambeni nde ayeke kpe ti sala kamarade na mbi. Mbi to nda ti bâ tele ti mbi tongana zo so ayeke gi lo oko na so ayeke na kamarade pëpe. Mbi to nda ti bâ kpale ti dutingo zo so mê ti lo akanga, na tongana mbi yeke kono, mbito so mbi yeke na ni teti azo so ayeke mä ndo nzoni ato nda ti kono nga.

Ti mû lege na mbi ti sala ekole ti awambongi, ababâ na mama ti mbi asala si sewa ni kue azia kete kodoro so ayeke na Limburg, na ague na gbata ti Eindhoven. Kâ, babâ ti mbi agi mbeni kua, na ngambe ti mbi ti koli nga na ayaya ti mbi ti wali ague na mbeni fini ekole. Mbi kiri singila mingi teti agbiango ye kue so ala sala teti mbi. Na ekole, a fa na mbi ti leke toto ti go ti mbi si alingbi na ni, nga tongana nyen ti sigigi na atënë na yanga ti mbi polele. Nga, atâa so awafango ye ni asala kusala pëpe na yanga ti azo so mê ti ala akanga, akamarade ti mbi ti ekole afa ni na mbi.

Mbi bâ tele ti mbi gi mbi oko

Tongana mbi yeke kono, ababâ na mama ti mbi asala ngangu kue ti sala lisoro na mbi, me aye mingi ayeke lani dä so mbi mä yâ ni pëpe. Na tapande, mbi hinga lani pëpe so ababâ na mama ti mbi ayeke manda Bible na aTémoin ti Jéhovah. Me mbi dabe mbi so na mbeni lâ, sewa ti e ague na mbeni place so azo mingi ayeke duti na ndo angende. Ala kue ayeke bâ ndo na devant; na mbeni ngoi, ala yeke pika maboko; nga ngoi na ngoi ala yeke londo; ye oko, ti hinga ngbanga ti nyen azo so ayeke sala aye so kue, mbi hinga pëpe. Ngoi mingi na pekoni, mbi mä so mbi yeke lani na mbeni kota bungbi ti aTémoin ti Jéhovah. Ababâ na mama ti mbi ayeke gue nga na mbi ka lakue na mbeni kete da na yâ gbata ti Eindhoven. A nzere lani na mbi mingi ti duti na ndo so teti azo ni kue ayeke na nzobe, na ti bâ ni, sewa ti mbi ayeke na ngia mingi; ye oko, ti hinga ngbanga ti nyen e yeke gue kâ lakue, mbi hinga pëpe. Fadeso, mbi hinga so kete da so ayeke lani mbeni Da ti Royaume ti aTémoin ti Jéhovah.

Mawa ni ayeke so, zo oko ayeke dä pëpe na abungbi so ti mû peko ti atënë ti programme ni na mbi. Fadeso, mbi bâ so ala so aga lani aye ti mû maboko na mbi; ye oko, ala hinga pëpe tongana nyen ti sala ni teti mê ti mbi akanga. Na abungbi ni, mbi bâ tele ti mbi so a zia mbi gi mbi oko, na mbi yeke tene na bê ti mbi: ‘Mbi ye ti mbi ti duti na ekole ahon ti duti ge.’ Me gi na ngoi so abibe so ayeke ga na yâ li ti mbi, amaseka-wali use asû mbeni mbeti na ndo mbeni kete kugbe na ala yôro ni na mbi. A yeke kete mbeti so si mbi sala tënë ni na tongo nda ti article so. Mbi hinga lani pëpe so kete mbeti so ayeke duti tongo nda ti mbeni songo ti ngele ngangu so ayeke sala si mbi yeke bâ tele ti mbi gi mbi oko mbeni pëpe.

Mbi to nda ti lë pendere songo na ambeni kamarade

Colette na Hermine so atokua kete mbeti so na mbi ayeke lani na ngu 20 na ndo ni. Na pekoni, mbi mä so ala ga ti sala kusala ti pionnier permanent wala kusala ti ngoi kue na yâ ti kongregation ti aTémoin ti Jéhovah so mbi yeke gue dä. Atâa so Colette na Hermine ahinga biani pëpe yanga ti ala so mê ti ala akanga, mbi sala ngangu ti gbu nda ti atënë so ala yeke tene na bango yanga ti ala na ngoi so ala yeke sala tënë na mbi; na lege so, e sala lisoro na popo ti e nzoni.

Tele ti ababâ na mama ti mbi anzere mingi tongana Colette na Hermine ahunda na ala ti manda Bible na mbi; ye oko, amaseka-wali so asala mingi ahon so. Ala tara ngangu ti fa na mbi peko ti atënë so a yeke tene na abungbi na Da ti Royaume, nga ti mû lege na mbi ti sala kamarade na ambeni zo nde ti kongregation ni. Mbi na ala e yeke haka peko ti atënë so a yeke sala na kusala na yâ fango tënë, na ala mû nga maboko na mbi ti leke adevoir ti mbi na Ekole ti Kusala ti aChrétien. Bâ kete, fadeso mbi yeke même na mbito oko pëpe ti sala devoir na gbele azo so amä ndo nzoni!

Na ndo ni, Colette na Hermine asala si mbi bâ so mbi lingbi ti zia bê na ala. Ala yeke lani na be-nze-pepe na ala yeke mä mbi. Atâa so fani mingi, e yeke he ngia teti agirisango lege ti mbi, ala he mbi na ngia lâ oko pëpe; nga ala sala kamene oko pëpe teti so mbi yeke na tele ti ala. Ala tara ti hinga nzoni abibe ti mbi, na ala sala ye na mbi tongana zo so ayeke legeoko na ala. Amaseka-wali ti nzobe so amû na mbi mbeni pendere matabisi biani: a yeke ndoye ti ala nga na songo ti ala.

Me ye ti kota ahon ni ayeke so Colette na Hermine afa na mbi so a lingbi mbi gi ti hinga Nzapa ti e, Jéhovah, tongana mbeni kamarade so a lingbi ti zia bê kue na lo. Ala fa na mbi so Jéhovah abâ lani mbi na dutingo ni na Da ti Royaume, na lo hinga nzoni mingi ye so dutingo zo so mê ti lo akanga aye ti tene teti mbi. Mbi kiri tâ singila mingi teti ndoye so e kue e yeke na ni teti Jéhovah, asala si e ota kue e bungbi oko tongana akamarade! Lege so Jéhovah abata na mbi andu bê ti mbi mingi, na ndali ti ndoye ti mbi teti lo, mbi mû tele ti mbi na lo na lege ti batême na nze ti juillet ngu 1975.

Mbi mû peko ti mbeni ndeko so agbu bê ti mbi

Na yâ angu so aga na pekoni, mbi wara lege ti hinga aita Chrétien mingi mingi ti koli na ti wali. Mbeni ita-koli oko agbu bê ti mbi mingi, na mbi na lo e sala mariage na ngu 1980. Kete na pekoni, mbi to nda ti kusala ti pionnier, na ti si na ngu 1994, a tokua mbi na koli ti mbi Harry tongana apionnier spécial na yâ territoire ti yanga ti Néerlandais ti ala so mê ti ala akanga. Ngu oko na pekoni, mbi tingbi na mbeni ngangu kungba: a yeke ti gue na tele ti koli ti mbi so alingbi ti mä ndo nzoni, tongana lo yeke sala vizite na akongregation tongana use surveillant ti circonscription.

Zia mbi fa tongana nyen mbi yeke sala ni. Tongana e sala vizite na mbeni kongregation ti fani oko ni, mbi gi hio ti ga ndulu na aita ti koli na ti wali mingi tongana lege ayeke dä, na ti fa tele ti mbi na ala. Mbi tene na ala so mê ti mbi akanga, na mbi hunda na ala ti bâ lê ti mbi na ngoi so ala yeke sala tënë yeke. Mbi tara nga ti kiri tënë hio na ngoi ti abungbi ti kongregation. Nga, mbi hunda wala mbeni zo ayeke ndulu ti fa peko ti atënë na mbi na ngoi ti abungbi nga na ti fango tënë ti yenga ni.

Kode ti salango ye so atambela nzoni mingi na a sala si ngoi na ngoi aita ti mbi ti koli na ti wali agirisa so mê ti mbi akanga, na ye so azi lege na ambeni ye ti si so amû ngia na zo. Na tapande, ala tene na mbi so tongana ala bâ mbi na tambelango ni na yâ gbata, ala pika klaxon ti kutukutu ni ngangu ti bala mbi, me biani, a sala ye oko pëpe na ndo mbi. Na ambeni ngoi, mbi yeke girisa so mbi yeke na akatikati, tongana ti so a si na ngoi so mbi tara ti tene yeke na mê ti koli ti mbi mbeni tënë so abâ gi mbi na lo. Tongana mbi bâ so fade fade lê ti lo achangé, mbi bâ so tënë so mbi pensé mbi tene ni yeke na mê ti lo ayeke fade yeke pëpe, me na kota go.

Amolenge amû maboko na mbi na ambeni ngoi so mbi ku tele ti mbi na ni pëpe. Na yâ mbeni kongregation so e yeke sala vizite dä ti fani oko ni, mbeni molenge-koli ti ngu gumbaya abâ so ambeni zo na yâ Da ti Royaume ni ayeke kpe kete ti sala tënë na mbi; tongaso, lo mû desizion ti sala mbeni ye. Lo tambela juska na tele ti mbi, lo gboto mbi na maboko, lo gue na mbi na bê ti Da ti Royaume ni, na lo tene na kota go na azo: “Mbi lingbi ti fa na ala Irene? Lo yeke mä ndo pëpe.” Ala so ayeke dä aga ndulu na mbi na afa tele ti ala.

Tongana mbi yeke gue na tele ti koli ti mbi na yâ kusala ti circonscription, wungo ti akamarade ti mbi angbâ lakue ti kono. Fini ti mbi ayeke nde mingi laso tongana a haka ni na angu so ahon, so mbi bâ tele ti mbi so a ke mbi na a zia mbi gi mbi oko! Ti londo na bï so Colette na Hermine ayôro na mbi kete mbeti so, mbi bâ ngangu ti dutingo na songo na akamarade, na mbi tingbi na azo so agbu bê ti mbi ngangu. Ahon aye so kue, mbi wara lege ti hinga Jéhovah, Ndeko so ayeke kota ahon atanga ni kue (aRomain 8:38, 39). Kete mbeti so achangé fini ti mbi biani!

[Foto na lembeti 24]

Mbi yeke dabe mbi na toto ti ye ti ngia so agbu bê ti mbi lani mingi

[Afoto na lembeti 25]

Na fango tënë nga na tele ti koli ti mbi, Harry