Mo mä na bê biani na nzo tënë?

‘Royaume ti Nzapa ayeke ndulu. I changé bê ti i, i mä na bê na nzo tënë.’​—MARC 1:15.

E YEKE na ngu 30 N.E. Jésus Christ ato nda ti sala kota kusala ti lo na Galilée. Lo yeke fa lani “nzo tënë ti Nzapa”. Nga tënë so lo tene lani andu bê ti azo ti Galilée mingi. Lo tene: ‘Lâ asi awe, na royaume ti Nzapa ayeke ndulu. I changé bê ti i, i mä na bê na nzo tënë.’​—Marc 1:14, 15.

² “Lâ asi awe” ti tene Jésus ato nda ti kusala ti lo, nga ti tene azo asala mbeni ye ti nzere na lê ti Nzapa (Luc 12:54-56). “Royaume ti Nzapa ayeke ndulu” ngbanga ti so Jésus ayeke na ngoi ni kâ Gbia so a soro lo. Fango tënë ti lo apusu azo ti nzoni bê ti changé bê ti ala. Me ala ‘mä lani na bê na nzo tënë’ tongana nyen? Na ti e a yeke tongana nyen?

³ Legeoko tongana Jésus, bazengele Pierre ahunda azo na ngangu ti changé bê ti ala. Tongana lo yeke sala lani tënë na aJuif na Jérusalem na Pentecôte ti ngu 33 N.E., Pierre atene: “I changé bê ti i, i azo oko oko kue, i kamata batême na iri ti Jésus Christ, tongaso Nzapa alingbi pardone siokpari ti i; na fade i wara matabisi ti Yingo Vulu.” Azo saki mingi achangé bê ti ala, ala wara batême, na ala ga azo ti Jésus (Kusala 2:38, 41; 4:4). Na ngu 36 N.E., azo ti amara nde, so achangé bê ti ala, ala nga kue awara batême na ala ga azo ti Jésus (Kusala 10:1-48). Laso, mabe na yâ nzo tënë ayeke pusu azo saki mingi ti ke siokpari ti ala, ti mû tele ti ala na Nzapa, na ti wara batême. Ala yeda na nzo tënë so amû salut nga ala mä na bê na sandaga ti kota ngele ti Jésus. Ala yeke sala nga ye ti mbilimbili na ala mû mbage ti Royaume ti Nzapa.

⁴ Me, mabe ni ayeke nyen? Bazengele Paul asû na mbeti: “Mabe ayeke ye so asala si e hinga biani fade e wara ye so e yeke ku, a yeke ye so afa na e ye so e bâ pëpe ayeke tâ ye.” (aHébreu 11:1). Ndali ti mabe ti e, ye kue so Nzapa azê na yâ Tënë ti lo, e bâ ni tongana mbeni ye so asi awe. A yeke tongana mbeni mbeti so afa atene mbeni da ayeke ti e mveni. Mabe ayeke nga “ye so afa na e” aye so lê ti e abâ pëpe si e hinga ala yeke tâ ye. Hingango ndo ti e nga bê ti e so asi na singila apusu e ti yeda biani so mara ti aye tongaso ayeke tâ ye, atâa so e bâ ala pëpe.​—2 aCorinthien 5:7; aEphésien 1:18.

A lingbi e duti na mabe!

⁵ Ye so a dü e na ni ayeke nzara ti aye ti yingo, me a dü e na mabe pëpe. Biani, “mabe ayeke na azo kue pëpe.” (2 aThessalonicien 3:2). Ye oko, ti tene Chrétien awara aye so Nzapa azê ni, a lingbi lo duti na mabe (aHébreu 6:12). So lo hunzi ti fa peko ti gbâ ti tapande ti azo ti mabe awe, Paul asû na mbeti, lo tene: “Teti atémoin mingi mingi tongaso angoro e, a lingbi e nga, e zia kungba kue na siokpari so aye ti kanga e, a lingbi e bangbi lege so ayeke na gbele e na bê so azia pëpe, lê ti e angbâ na Jésus, Walombe ti mabe ti e na Zo ti sala si mabe ni alingbi kue”. (aHébreu 12:1, 2). “Siokpari so aye ti kanga e” so ayeke nyen? A yeke dutingo na mabe pëpe, wala même girisango mabe so zo ayeke na ni kozo. Tongaso, ti bata mbeni kpengba mabe, a lingbi “lê ti e angbâ na Jésus” na e sala ye so lo sala. A lingbi e ke nga ye ti pitan, e tiri na akusala ti mitele, e kpe nzara ti warango akungba mingi, e mä pëpe atënë ti ndara ti sese so, nga na atënë ti akotara so ague nde na ye so Mbeti ti Nzapa afa (aGalate 5:19-21; aColossien 2:8; 1 Timothée 6:9, 10; Jude 3, 4). Na ndo ni nga, a lingbi e yeda so Nzapa ayeke na e, na so wango so lo mû na yâ Tënë ti lo ayeke sala ye ti nzoni biani.

⁶ E yeke wara mabe na lege ti ngangu ti tele ti e mveni pëpe. Mabe ayeke mbeni oko ti lengo ti yingo vulu wala ngangu ti Nzapa ti sala na ye (aGalate 5:22, 23). Tongaso, ti tene mabe ti e akpengba, a lingbi e sala nyen? Jésus atene: “Tongana i so i yeke sioni, i hinga lege ti mû matabisi ti nzoni na amolenge ti i, fade Babâ ti i na yayu aye mingi ahon pëpe ti mû Yingo Vulu na ala so ahunda Lo?” (Luc 11:13). Ni la, zia e sambela ti wara yingo vulu ni, ngbanga ti so a lingbi ti lë na yâ e mabe so ayeke mû ande maboko na e ti sala ye so bê ti Nzapa aye, même na gbe ti akota kpale.​—aEphésien 3:20.

⁷ Tongana e sambela ti tene mabe ti e akono, a yeke na lege ni. Ândö, tongana Jésus aye ti tomba mbeni yingo sioni na yâ mbeni molenge ti koli, babâ ti molenge ni atoto na lo, lo tene: “Mbi mä na bê! Sala na mbi na ndo so mabe ti mbi ayeke pëpe!” (Marc 9:24). Adisciple ti Jésus atene: “Mo sala si mabe ti e aga kota.” (Luc 17:5). Tongaso, zia e sambela ti wara mabe, na hingango biani so Nzapa ayeke mä mara ti asambela tongaso.​—1 Jean 5:14.

Mango na bê na Tënë ti Nzapa ayeke kota ye

⁸ Ngoi kete kozoni si lo mû fini ti lo na sandaga, Jésus atene na azo ti lo: “I zia bê ti i agi i pëpe; i mä na bê na Nzapa, i mä na bê na Mbi nga.” (Jean 14:1). E aChrétien, e mä na bê na Nzapa nga na Molenge ti lo. Ka ti Tënë ti Nzapa a yeke tongana nyen? Tongana e manda ni na e sala ye alingbi na ni na hingango biani so, wango so ayeke na yâ ni ayeke nzoni mingi ndali ti e, a lingbi ti sala ye ti nzoni mingi na yâ fini ti e.​—aHébreu 4:12.

⁹ Gigi ti e tongana azo so ayeke mbilimbili-kue pëpe asi singo na awusuwusu. Ye oko, mango na bê na Tënë ti Nzapa alingbi ti mû biani maboko na e (Job 14:1). E mû tapande ti mbeni ngangu so ahon ndo ti e. Tënë ti Nzapa amû na e wango so: “Tongana mbeni zo na popo ti i amanke ndara, a lingbi lo hunda Nzapa, Lo so amû ye na azo kue senge senge, Lo zingo na ala pëpe, na fade Lo mû na lo. Me a lingbi lo hunda na mabe, na kite pëpe; teti lo so adë kite ayeke legeoko tongana mapo ti kota ngu ti ingo so pupu aya, na a yengi kirikiri. A lingbi zo tongaso atene na bê ti lo pëpe, fade lo wara mbeni ye na tïtî Seigneur; lo yeke zo ti bê use, na lo yeke kirikiri na lege ti lo kue.”​—Jacques 1:5-8.

¹⁰ Tongana mabe atia e, na e sambela Jéhovah Nzapa ti wara ni, Jéhovah ayeke suku ande na e pëpe ndali ni. Nde na so, lo yeke mû ande maboko na e ti bâ tara ni na lege ni. Afon e awamabe alingbi peut-être ti gboto lê ti e na ndo ti ambeni versê ti Bible so alingbi ti mû maboko na e, wala a lingbi ti duti tongaso na ndembe so e yeke manda Mbeti ti Nzapa. Yingo vulu ti Jéhovah alingbi nga ti fa lege na e na mbeni mayele nde. Tongana e “hunda na mabe, na kite pëpe”, Babâ ti e ti yayu ayeke mû ande na e ndara ti luti na gbele atara ni. Tongana e yeke tongana mapo ti kota ngu ti ingo so pupu aya, na a yengi ni, e lingbi ti ku pëpe ti wara ye na tïtî Nzapa. Senge pëpe, ngbanga ti so tongana e sala tongaso, a yeke fa so e yeke azo ti bê use na sambela so e sala aluti nzoni pëpe. Ye so andu nga mango na bê na Nzapa. Ni la, a lingbi e mä na bê ngangu na Tënë ti Nzapa nga na fango lege ti lo. Zia e bâ ambeni tapande so afa tongana nyen Tënë ti Nzapa ayeke mû maboko na e, na ayeke fa na e ye so a yeke nzoni e sala.

Mabe nga na kobe ti tengo ni

¹¹ E yeke sala tongana nyen tongana e yeke na nzoni kobe wala da ti lango pëpe? Mango na bê na Tënë ti Nzapa ayeke sala si e hinga biani so Jéhovah ayeke mû ande na e aye so atia e lâ oko oko, nga so na yâ fini sese, lo yeke mû gbâ ti aye ti nzoni na ala so kue aye lo (Psaume 72:16; Luc 11:2, 3). Lege so Jéhovah amû kobe na prophète ti lo Elie na ngoi so kota nzara aya, tongana e gbu li ti e na ndo ni, a lingbi ti sala si bê ti e awara ngangu. Na lege ti ye ti kpene, Nzapa asala si farini nga na mafuta ti mbeni wali angbâ lakue, na tongaso a bata wali ni, molenge ti lo, nga na Elie na fini (1 aGbia 17:2-16). Jéhovah amû nga lani kobe tongaso na prophète ti lo Jérémie na ngoi so Babylone ase kando na tele ti Jérusalem (Jérémie 37:21). Atâa so Jérémie na Elie awara lani gi mbeni kete ye ti tengo ni, Jéhovah abata ala. Lo yeke sala nga oko tongaso na azo so amä na bê na lo laso.​—Matthieu 6:11, 25-34.

¹² Tongana e mä na bê na akpengba-ndia ti Bible na e sala ye alingbi na ni, a yeke sala si e ga zo ti mosoro pëpe, me a yeke mû maboko na e ti wara mbeni ye ti tengo ni lakue. Zia e mû mbeni tapande: Bible awa e ti sala kua na lege ni, nzoni, nga ngangu (aProverbe 22:29; Zo-ti-fa-tene 5:17, 18; 2 aCorinthien 8:21). Zo so asala kua ti lo nzoni awara nzo iri na lê ti azo. A yeke nzoni e bâ lâ oko pëpe tongana senge ye nzo iri so. Même na ando so a yeke ngangu ti wara nzoni kua, azo so ayeke sala kua ti ala na lege ni, ala hinga kua ti ala, na ala sala ni na wâ, ala yeke duti nzoni ahon ambeni zo. Atâa so mara ti awakua tongaso ayeke peut-être na akungba mingi pëpe, mingi ni ala yeke wara aye so ala yeke na bezoin ni. Bê ti ala ayeke nga na ngia ti hinga so kobe so ala te, ala mveni si avo na nginza ti kua so ala wara.​—2 aThessalonicien 3:11, 12.

Mabe amû maboko ti kanga bê na yâ vundu

¹³ Tënë ti Nzapa afa nzoni so tongana mbeni zo so e ye lo akui, a yeke na lege ni ti sala vundu. Be-ta-zo Abraham atoto mingi kuâ ti wali ti lo, Sara, so lo ye lo ahon ndo ni (Genèse 23:2). Tongana lo mä tënë ti kuâ ti molenge ti lo Absalom, David atoto lani ngangu mingi (2 Samuel 18:33). Même Jésus, so ayeke mbilimbili-kue, atoto na ndo ti kuâ ti kamarade ti lo, Lazare (Jean 11:35, 36). Tongana mbeni zo so e ye lo akui, vundu alingbi ti hon ndo ti e, me mabe na yâ azendo so ayeke na yâ Tënë ti Nzapa alingbi ti mû maboko na e ti kanga bê ti e na yâ mara ti avundu tongaso.

¹⁴ Paul atene: “Bê ti mbi ayeke ku ye na lege ti Nzapa, ye so ala mveni ayeke ku nga, mbi ku londongo ti awakinda kue, azo ti mbilimbili, na azo ti kirikiri.” (Kusala 24:15). A lingbi e mä na bê na ye so Nzapa aleke ti zingo gbâ ti azo na kuâ (Jean 5:28, 29). Na popo ti azo ni so ayeke zingo ande na kuâ, Abraham na Sara, Isaac na Rebecca, nga Jacob na Léa ayeke dä. Ala kue ayeke lango fadeso na yâ kuâ, na ala yeke ku ti tene a zingo ala na kuâ na yâ fini sese ti Nzapa (Genèse 49:29-32). Na ngoi so a yeke zingo ande na kuâ azo so e ye tënë ti ala ti duti na ndo sese ge, so ngia si e yeke duti ande na ni! (Apocalypse 20:11-15). Ti ku na ngoi ni so, mabe ayeke zi ande vundu kue pëpe, me a yeke bata e ndulu na Nzapa, lo so amû maboko na e ti kanga bê tongana mbeni zo ti e akui.​—Psaume 121:1-3; 2 aCorinthien 1:3.

Mabe amû ngangu na ala so bê ti ala anze

¹⁵ Même ala so amä na bê na Nzapa, Bible afa so bê ti ala alingbi mbeni lâ ti nze. Ândö so Job awara ngangu tara, lo tene ti lo so Nzapa ake lo awe (Job 29:2-5). Sioni dutingo ti Jérusalem nga na gbagba ti lo azia lani vundu na bê ti Néhémie (Néhémie 2:1-3). Na peko ti so Pierre abele Jésus, bê ti lo aso lo mingi na lo “toto na vundu na ngule.” (Luc 22:62). Paul nga ahunda lani mingi na afon lo awamabe ti kongregation ti Thessalonique ti “lungula vundu ti ala so bê ti ala anze”. (1 aThessalonicien 5:14). Ni la, azo so amä na bê na Nzapa laso, tongana bê ti ala anze, a yeke mbeni fini ye pëpe. Tongaso, e lingbi ti sala nyen ti hon ndo ti bê so anze?

¹⁶ Bê ti e alingbi ti nze ngbanga ti so e wara gbâ ti akota kpale. A hon ti tene e gi ti leke ala kue legeoko, a yeke nzoni e gi ti leke ala oko na oko na salango ye alingbi na akpengba-ndia ti Bible. Salango tongaso alingbi ti sala si bê ti e anze tongana ti kozo mbeni pëpe. A yeke nga nzoni ti sala ye so alingbi na ngangu ti e, na ti hu tele nzoni. Me hinga mbeni ye: Mango na bê na Nzapa nga na Tënë ti lo ayeke sala si zo aduti nzoni na lege ti yingo. Senge pëpe, ngbanga ti so a yeke sala si e hinga so lo yeke bâ ndo biani na ndo ti e.

¹⁷ Pierre atene mbeni tënë so adë bê ti e, lo tene: “I sala i mveni kete na gbe ti tïtî ngangu ti Nzapa, tongaso Lo lingbi yä iri ti i na ngoi so alingbi; na ye kue so i gi bê ti i dä, i zia na tïtî Lo, teti Lo yeke bata i.” (1 Pierre 5:6, 7). Wasungo psaume ahe bia tongaso: “L’Eternel abata azo so ayeke tï, na Lo yä na nduzu ala kue so tele ti ala aba.” (Psaume 145:14). A yeke nzoni e yeda na atënë so, teti ala yeke na yâ Tënë ti Nzapa. Teti so bê ti e alingbi ti nze lakue, a yeke ye ti kpengba mabe mingi ti hinga so e lingbi ti bi agingo bê ti e kue na ndo Babâ ti e ti yayu so aye tënë ti e!

Mabe nga na ambeni tara nde

¹⁸ Tongana tele ti e wala ti mbeni zo ti e aso ngangu, mabe ti e alingbi ti wara kota tara. Atâa so Bible atene pëpe so a kaï kobela ti aChrétien tongana Epaphrodite, Timothée, na Trophime, na lege ti ye ti kpene, ti tâ tënë ni Jéhovah amû maboko na ala ti kanga bê na yâ songo tele ti ala ni (aPhilippien 2:25-30; 1 Timothée 5:23; 2 Timothée 4:20). Nga, na ndo “zo so abi bê ti lo na awanzinga,” wasungo psaume atene: “L’Eternel abata lo na ndo tange ti kobela; fade Mo leke tange ti lo na lâ ti kobela ti lo.” (Psaume 41:2-4). Tongana nyen atënë ti wasungo psaume ni alingbi ti mû maboko na e ti dë bê ti afon e awamabe so ayeke na kobela?

¹⁹ Mbeni lege ti mû maboko na ala na lege ti yingo ayeke ti sambela legeoko na ala so ayeke na kobela, nga ndali ti ala. E yeke hunda na Nzapa pëpe ti sala mbeni ye ti kpene laso, me e lingbi ti hunda na lo ti mû na ala ngangu ti bibe, si kobela ti ala ahon ndo ti ala pëpe. E lingbi ti hunda nga na Nzapa ti mû na ala ngangu na lege ti yingo, ti kanga bê na yâ mara ti angoi ti wokongo bê tongaso. Jéhovah ayeke mû ande maboko na ala. Mabe ti ala ayeke kpengba ande tongana ala bi bê ti ala na ngoi so “wakodoro atene pëpe, Mbi yeke na kobela.” (Esaïe 33:24). A yeke ye ti dengo bê mingi ti hinga so na lege ti Jésus Christ, lo so a zingo lo na kuâ awe, nga na lege ti Royaume ti Nzapa, fade a yeke zi azo so amä yanga na gbe ti siokpari, ti kobela, na ti kui teti lakue lakue! Ndali ti apendere ye so ayeke ku e, e mû merci na Jéhovah, ‘lo so ayeke sala ande si kobela ti e kue aga nzoni’.​—Psaume 103:1-3; Apocalypse 21:1-5.

²⁰ Mabe alingbi nga ti mû maboko na e ti kanga bê na yâ “lâ ti sioni” ti dutingo mbakoro, ngoi so ngangu ti zo ni ayeke gue ti hunzi, nga so seni ti lo ayeke nzoni mbeni pëpe (Zo-ti-fa-tene 12:3-9). Tongaso, legeoko tongana wasungo psaume so aga mbakoro ahe na bia, ambakoro alingbi nga ti tene: “O Seigneur L’Eternel, Mo yeke Lo so mbi zia bê ti mbi na Mo! . . . Mo ke mbi pëpe tongana mbi ga mbakoro; zia mbi pëpe tongana ngangu ti mbi awe.” (Psaume 71:5, 9). Wasungo psaume ni abâ lani so a lingbi Jéhovah amû maboko na lo. A yeke nga oko tongaso teti mingi ti afon e aChrétien so asala angu mingi na yâ kusala ti Nzapa, na ala ga mbakoro awe. Ndali ti mabe ti ala, ala lingbi ti hinga biani so Jéhovah ayeke zia ande ala lâ oko pëpe, lo yeke mû maboko na ala lakue lakue.​—Deutéronome 33:27.

Ngbâ ti mä na bê na Tënë ti Nzapa

²¹ Mango na bê na nzo tënë nga na Tënë kue ti Nzapa ayeke mû maboko na e ti ga lakue ndulu na Jéhovah (Jacques 4:8). Biani, lo yeke Seigneur na Gbia ti e, me lo yeke nga Lo so asala e nga Babâ ti e (Esaïe 64:8; Matthieu 6:9; Kusala 4:24). Wasungo psaume ahe bia tongaso: “Mo yeke Babâ ti mbi, Nzapa ti mbi, na Tênë Ti Salut ti mbi.” (Psaume 89:27). Tongana e mä na bê na Jéhovah nga na Tënë ti lo so a sû ni na gbe ti yingo ti lo, e nga kue e lingbi ti bâ lo tongana ‘Tênë Ti Salut ti e.’ So tâ pendere matabisi pëpe!

²² Jéhovah ayeke Babâ ti aChrétien so a dü ala na lege ti yingo, nga ti afon ala so ayeke na beku ti ngbâ na sese ge (aRomain 8:15). Nga, mango na bê na Babâ ti e ti yayu ayeke zia vundu na bê ti e lâ oko pëpe. David atene: “Tongana babâ na mama ti mbi azia mbi, fade L’Eternel akamata mbi.” (Psaume 27:10). E yeke nga na tënë so adë bê ti e: “Ngbanga ti kota iri ti Lo, fade L’Eternel azia azo ti Lo pëpe.”​—1 Samuel 12:22.

²³ Biani, ti tene songo ti e na Jéhovah aninga lakue, a lingbi e mä na bê na nzo tënë, nga e yeda so Mbeti ti Nzapa ayeke biani Tënë ti lo (1 aThessalonicien 2:13). A lingbi e mä na bê kue na Jéhovah na e zia Tënë ti lo afa lege na e (Psaume 119:105; aProverbe 3:5, 6). Tongana e sambela lo, na hingango so lo yeke fa ande nzobe nga na be-nzoni na e, na so lo yeke mû ande maboko na e, mabe ti e ayeke kono.

²⁴ Mabe apusu lani e ti mû tele ti e na Nzapa teti lakue lakue. Tongana e yeke na kpengba mabe, même tongana a lingbi e kui, e yeke awakua ti lo so ayeke na beku ti zingo mbeni lâ na kuâ. Tâ tënë, “tongana e duti na fini wala tongana e kui, e yeke ti Seigneur.” (aRomain 14:8). Zia e bata tënë ti dengo bê so na li ti e na ngoi so e yeke zia bê ti e lakue na Tënë ti Nzapa, na e ngbâ lakue ti mä na bê na nzo tënë.

Mo yeke kiri tënë tongana nyen?

• Mabe ayeke nyen, na ngbanga ti nyen a lingbi e duti na ni?

• Ngbanga ti nyen a yeke kota ye ti mä na bê na nzo tënë nga na Tënë kue ti Nzapa?

• Mabe amû maboko na e ti luti na gbele atara nde nde tongana nyen?

• Ye nyen ayeke mû ande maboko na e ti bata mabe?

[Ahundango tënë ti manda na ye]

1, 2. Mo yeke fa nda ti Marc 1:14, 15 tongana nyen?

3. Na salango ye wa azo afa so ala mä na bê na nzo tënë?

4. Mabe ayeke nyen?

5. Ngbanga ti nyen mabe ayeke kota ye mingi?

6, 7. Ngbanga ti nyen a yeke na lege ni ti sambela ti wara mabe?

8. Tongana nyen mango na bê na Tënë ti Nzapa alingbi ti mû maboko na e?

9, 10. Tënë so atene na ndo mabe na Jacques 1:5-8, mo yeke fa nda ni tongana nyen?

11. Tongana e mä na bê na Tënë ti Nzapa, beku wa e lingbi ti duti na ni na ndo aye so atia e lâ oko oko?

12. Tongana nyen mabe ayeke mû ande maboko na e ti wara mbeni ye ti tengo ni?

13, 14. Tongana nyen mabe ayeke mû maboko na e ti kanga bê na yâ vundu?

15, 16. (a) Ngbanga ti nyen e lingbi ti tene so bê so anze ayeke mbeni fini ye pëpe ndali ti azo so amä na bê? (b) A lingbi ti sala nyen ti hon ndo ti bê so anze?

17. Tongana nyen e hinga so Jéhovah ayeke bâ ndo na ndo ti e?

18, 19. Tongana nyen mabe ayeke mû maboko na e ti hon ndo ti kobela na ti dë bê ti afon e awamabe so ayeke na ni?

20. Ngbanga ti nyen e lingbi ti tene so mabe alingbi ti mû maboko na e ti kanga bê na yâ “lâ ti sioni” ti dutingo mbakoro?

21, 22. Tongana e yeke na mabe, a ndu songo ti e na Nzapa tongana nyen?

23. Ti tene songo ti e na Jéhovah aninga lakue, a hunda nyen?

24. Tënë wa so adë bê ayeke na aRomain 14:8?

[Afoto na lembeti 12]

Jéhovah abata lani Jérémie nga na Elie ndali ti mabe ti ala

[Afoto na lembeti 13]

Job, Pierre, na Néhémie ayeke lani na kpengba mabe

[Afoto na lembeti 15]

Ti tene songo ti e na Jéhovah aninga lakue, a lingbi e mä na bê na nzo tënë