Atënë so azo ahunda

Mbeti ti Nzapa ayeda na mbeni Chrétien ti zia maboko na ndo Bible na ti deba yanga ti lo so lo yeke tene gi tâ tënë na gbele ngbanga?

A lingbi zo oko oko amû desizion ti lo na ndo tënë so (aGalate 6:5). Ye oko, Bible ake pëpe na zo ti deba yanga na gbele ngbanga ti fa so lo yeke tene gi tâ tënë.

Salango ye ti azo, ti deba yanga ti ala, ayeke mbeni ye so ato nda ni ngbele ye giriri na so amû ndo mingi. Na tapande, na ngoi ti giriri, aGrec ayeke yâ maboko oko na nduzu wala ala yeke ndu mbeni balaga na ngoi so ala yeke deba yanga ti ala. Tongana mbeni zo ti Rome adeba yanga ti lo, lo yeke gbu mbeni tênë na maboko ti lo na lo yeke tene: “Tongana, na bê ti mbi kue, mbi sala mbeni ye ti handa na ngoi so lo [Jupiter a] yeke bata gbata ni na gbada ni, zia [nzapa] Jupiter abi mbi yongoro na aye ti nzoni kue na yâ fini ti mbi, tongana ti so mbi yeke bi na tênë so.”​—Bakari Cyclopedia of Biblical, Theological, and Ecclesiastical Literature, Volume 7 na lembeti 260, so John McClintock na James Strong asû.

Asalango ye tongaso afa so na yâ bê ti ala, azo ahinga so mbeni nzapa ti ngangu ayeke dä so alingbi ti bâ azo na so azo ayeke kiri tënë na lo. Ngbele ye na ngoi ti giriri, atâ wavorongo Jéhovah abâ so lo hinga lani aye so ala yeke tene na so ala yeke sala (aProverbe 5:21; 15:3). Ala deba yanga ti ala na gbele Nzapa tongana a lingbi ti tene tongaso, wala ala yeke sala ni na mungo Nzapa tongana témoin. Na tapande, Boaz, David, Salomon, na Sédécias asala lani tongaso (Ruth 3:13; 2 Samuel 3:35; 1 aGbia 2:23, 24; Jérémie 38:16). Awavorongo tâ Nzapa amû nga lege na ambeni zo ti hunda na ala ti deba yanga. A yeke lani ye so asi na Abraham nga na Jésus Christ.​—Genèse 21:22-24; Matthieu 26:63, 64.

Ngoi na ngoi, mbeni zo so adeba yanga na gbele Jéhovah ayeke sala ni legeoko na mbeni geste. Abram (Abraham) atene na gbia ti Sodome: “Mbi yä maboko ti mbi na L’Eternel, Nzapa Ti Nduzu Ahon Kue, Lo so asala yayu na sese”. (Genèse 14:22). Na ngoi so lo yeke sala tënë na prophète Daniel, mbeni ange “[a]yä maboko ti lo ti koti na ti gati na yayu, lo deba na iri ti Lo so aduti lakue lakue”. (Daniel 12:7). Même a sala tënë ti Nzapa na lege ti fä na tenengo so lo yä maboko ti lo na nduzu.​—Deutéronome 32:40; Esaïe 62:8.

Mbeti ti Nzapa ake na zo pëpe ti deba yanga. Ye oko, a yeke ti mbeni Chrétien pëpe ti deba yanga na ndo tënë oko oko kue so lo yeke tene. Jésus atene: “Me a lingbi i tene, Oui, oui, wala, Non, non”. (Matthieu 5:33-37). Disciple Jacques amû mara ti tënë tongaso. Tongana lo tene “i deba pëpe”, lo ye ti gboto mê na ndo dengo bâ gi senge (Jacques 5:12). Wala Jésus wala Jacques atene pëpe so a yeke sioni ti deba yanga na da-ngbanga ti fa so mo yeke tene gi tâ tënë.

Fadeso, tongana a hunda na mbeni Chrétien na gbele ngbanga ti deba yanga ti lo so atënë so lo yeke tene ayeke gi tâ tënë, lo yeke sala tongana nyen? Lo lingbi peut-être ti bâ so lo lingbi ti deba yanga ti lo na lege so. Me tongaso pëpe, a lingbi peut-être ti mû lege na lo ti tene mbeni tënë so afa so lo yeke tene mvene pëpe.​—aGalate 1:20.

Tongana a hunda na ngoi ti ngbanga ni ti tene zo ni ayä maboko ti lo na nduzu wala azia tïtî lo na ndo Bible tongana lo yeke deba yanga ti lo, mbeni Chrétien alingbi ti yeda ti sala ni. Peut-être lo lingbi ti dabe lo na atapande ti Mbeti ti Nzapa so azo so adeba yanga ti ala asala ni legeoko na mbeni geste. Ti mbeni Chrétien, mbeni ye ayeke kota ahon geste so lo lingbi ti sala na ngoi so lo yeke deba yanga ti lo; a yeke ti dabe lo so lo yeke deba yanga na gbele Nzapa ti tene gi tâ tënë. Ti deba yanga tongaso ayeke kota tënë mingi. Tongana mbeni Chrétien abâ so lo lingbi ti kiri tënë wala a lingbi lo kiri tënë na mbeni hundango tënë so a bi na lo na mara ti ngoi tongaso, a lingbi lo dabe lo so lo zia tele ti lo na gbele bä ti tene gi tâ tënë, na a yeke ye so biani mbeni Chrétien aye ti sala ni na ngoi kue.