Tondo so alondo na awafango tënë ti Royaume

Ala yeke “mä” tënë ti Royaume na Brésil

TETI so ala ye ti fa nzo tënë ti Royaume na azo so mê ti ala akanga, mingi ti aTémoin ti Jéhovah na Brésil ayeda ti manda yanga ti azo so mê ti ala akanga ti Brésil. Ti manda ni ayeke kete ye pëpe. Me angangu so ala sala ayeke lë anzoni lengo, tongana ti so atapande so ge ayeke fa ni.

Eva,a mbeni wali so mê ti lo akanga, alango na São Paulo. Na peko ti so lo na amolenge ti lo ota ague na da ti koli ti lo, so amä nga ndo pëpe, lo to nda ti manda yanga ti azo so mê ti ala akanga. Mbeni lâ, tongana ala yeke fono na yâ ti mbeni kota ndo ti kango ye, Eva na koli ti lo ni atingbi na mbeni bungbi ti aTémoin so mê ti ala akanga. A-Témoin ni ahunda na ala ti gue na mbeni bungbi na Da ti Royaume. Ala yeda ti gue, teti so ala tene ti ala so a yeke gi mbeni kete ngoi ti sala lisoro na ti hinga tele.

Teti so lo hinga yanga ti azo so mê ti ala akanga so nzoni pëpe, ye so a tene na abungbi ni, Eva amä yâ ni kue pëpe. Na pekoni, ambeni Témoin ahiri ala na da ti ala ti te kete ye. Na lege ti afoto na yâ brochure Ouarango Ngia na Ndo Sesse Teti La Koue!, aTémoin ni afa na ala so Nzapa amû zendo ti leke sese si aga paradis. Ye so Eva amä anzere na lo mingi si lo to nda ti gue na abungbi lakue.

Ngoi kete na pekoni, Eva alondo na da ti koli ti lo, ngbanga ti so lo ye ti sala ye alingbi na aye so Bible ahunda. Atâa so sewa ti lo asala ngangu mingi na lo, lo ngbâ lakue ti gue na li ni na lege ti yingo si lo wara batême na ngu 1995. Anze omene na pekoni, Eva amû kusala ti pionnier, wala wafango tënë ti Royaume ti ngoi kue. Ngbele ye na ngoi ni so, lo mû maboko na azo osio so mê ti ala akanga ti mû tele ti ala na Nzapa na ti wara batême.

A dü Carlos na kangango mê. Gi so lo de kete, lo to nda ti nyon mbangi, ti sala pitan, nga ti nzi ye. Teti so ambeni bungbi ti azo ti salango sioni agi lege ti fâ lo, lo kpe lo gue na São Paulo, na lo gue lo lango na da ti João teti mbeni ngoi. Ala use kue ayeke azo so mê ti ala akanga, nga dutingo ti ala ayeke kirikiri.

Angu kete na pekoni, Carlos amä tënë ti Royaume. Tënë ni so lo mä apusu lo ti leke dutingo ti lo na ti sala mariage na wali so lo duti na lo. Tongana lo sala ye alingbi na aye so Mbeti ti Nzapa ahunda awe, Carlos awara batême tongana fä ti mungo tele ti lo na Jéhovah. Me na oko ngoi ni, sân ti tene Carlos ahinga, João ayeke manda nga lani nzo tënë, na lo kue lo changé aye mingi na yâ gigi ti lo. Na hingango so Jéhovah ake salango kusala na a-image, João abi a-image ti “asaint” kue so lo yeke na ni. Lo zia lege ti ngbele dutingo ti lo na lo wara nga batême.

Mbeni lâ, tongana Carlos na João atingbi tele na mbeni Da ti Royaume si ala bâ tongana nyen ala use kue achangé, so ngia si ala duti na ni pëpe! Ala use kue ayeke fadeso anzoni mokonzi ti sewa, ala yeke fa tënë ti Royaume na wâ.

A yeke wara fadeso na Brésil akongregation 30 nga na agroupe 154 ti azo so mê ti ala akanga. Nga awafango tënë ni ayeke 2 500, so na popo ni a wara azo 1 500 so mê ti ala akanga. Na kota bungbi ti district ti ngu 2001, “Awafango Tënë ti Nzapa”, so a sala ndali ti azo so mê ti ala akanga na Brésil, azo ahon 3 000 ague dä na azo 36 awara batême. Na lege ti deba nzoni ti Jéhovah, e yeke na beku so azo mingi so mê ti ala akanga ayeke yeda ande na tënë ti Royaume.

[Kete tënë na gbe ni]