“I ga ndulu na Nzapa, na fade lo ga ndulu na i”
Ândö nga laso: Ye ti kirikiri lani, pendere kekereke fadeso
“TËNË ti Nzapa ayeke na fini, na a yeke na ngangu ti sala ye, a za ahon épée kue ti yanga use, . . . na a fa nda ti bibe na a fa nda ti ye so bê aye.” (aHébreu 4:12). So ayeke tënë ti bazengele Paul na ndo ngangu so tokua ti Nzapa ayeke sala na ndo zo. A bâ mbilimbili ngangu ti tënë ni ti ndu bê ti zo na kozo siècle. Atâa asioni ye ti ngoi ni kâ, azo so aga aChrétien ayü fini zo ti yâ ni.—aRomain 1:28, 29; aColossien 3:8-10.
Laso nga, a yeke bâ ngangu ti tënë ti Nzapa ti changé zo, tongana ti so Bible asala tënë ni. Na tapande, bâ ye so asi na mbeni ngangu koli so ayo, so iri ti lo ayeke Richard. Teti so lo ninga lani ti sala ngonzo pëpe, tongana a gi yanga ti lo même kete, Richard ayeke tiri. Salango ngangu abuba gigi ti lo. Richard alï même na yâ mbeni bungbi ti azo ti kpongo gobo. Lo manda ti pika gobo ngangu, na tongaso lo ga walombe ti azo ti kpongo gobo, so nengo ti ala ahon kilo 80, ti Westphalia, Zamani. Richard anyon nga lani sämba mingi, na fani mingi, lo mû mbage ti lo na yâ ti atiri. Na yâ ti mbeni oko tiri ni, a fâ mbeni zo dä, na a ngbâ kete ti tene Richard ague na kanga.
Ka ti mariage ti Richard, a yeke tongana nyen? Richard adabe lo, lo tene: “Kozoni si mbi na Heike, e manda Bible, zo oko oko asala ye ti bê ti lo. Heike ayeke duti lani mingi na akamarade ti lo ti wali na ndembe so mbi yeke sala ti mbi aye so mbi ye tënë ni mingi, mbilimbili kpongo gobo, salango angia nde nde na lê ti ngu.”
Na ngoi so Richard na Heike ato nda ti manda Bible na aTémoin ti Jéhovah, Richard abâ so a yeke ngangu na lo ti changé, si fini ti lo alingbi na akota kpengba-ndia so ayeke na yâ Tënë ti Nzapa. Me tongana lo ga ti hinga Jéhovah Nzapa nzoni mingi, Richard alë kota nzara ti nzere na lê ti lo. Lo bâ so Nzapa aye pëpe tënë ti azo so aye salango ngangu, wala ala so amû ni ti ga ye ti salango na ngia ti wara nginza dä. Richard amanda so ‘Jéhovah ake zo so andoye sioye ti ngangu.’—Psaume 11:5.
Nga, beku ti duti lakue lakue na yâ paradis na ndo ti sese agbu bê ti Richard na ti Heike mingi. Ala ye si ala use kue aduti dä! (Esaïe 65:21-23). Tisango ndo so, “i ga ndulu na Nzapa, na fade Lo ga ndulu na i”, andu bê ti Richard mingi (Jacques 4:8). Lo bâ nene ni ti bata wango so a sû na gbe ti yingo: “A lingbi bê asala mo pëpe tënë ti zo so asala ngangu na zo, mo yeda na mbeni lege ti lo pëpe. Teti zo ti kirikiri ayeke ye ti sioni mingi na lê ti L’Eternel, me tënë ti lingo ti L’Eternel ayeke na azo ti mbilimbili.”—aProverbe 3:31, 32.
Atâa so lo yeke na kota nzara ti zia asalango ye ti lo, Richard abâ so lo lingbi ti sala ni na ngangu ti lo mveni pëpe. Lo bâ so a lingbi lo gi mungo maboko ti Nzapa na yâ sambela. Tongaso, lo sala ye alingbi na tënë so Jésus atene na abazengele ti Lo: “I bata, i sambela, si i tï na handa pëpe; teti yingo aye biani, me mitele ayeke na ngangu pëpe.”—Matthieu 26:41.
Na peko ti so lo manda bango ndo ti Nzapa na ndo salango ngangu nga na ngonzo, na yâ li ti Richard, kpongo gobo aga biani mbeni ye ti ngia ti wanguru so ayeke nzoni pëpe. Na lege ti maboko so Jéhovah amû nga na wango ti azo so amanda Bible na lo, Richard azia lege ti salango ngangu. Lo zia ti kpo gobo na ti tiri, na lo bâ so a lingbi lo sala si dutingo ti sewa ti lo aga nzoni. Fadeso, Richard ayeke mbeni ancien ti mbeni kongregation ti aTémoin ti Jéhovah, na lo yeke sala ye na ngangu mbeni pëpe. Lo tene: “Mandango tâ tënë na yâ Bible amû maboko na mbi ti luti na ti gbu li kozoni si mbi sala ye.” Lo kiri lo tene: “Akpengba-ndia so ahunda ti ye mba ti mo zo na ti ne lo afa lege fadeso na mbi na yâ songo ti mbi na wali ti mbi nga na amolenge ti mbi. Ye so asala si songo ti sewa ti e akpengba.”
Ambeni zo ayeke tene ngoi na ngoi so aTémoin ti Jéhovah ayeke buba yâ ti sewa. So kue gi ngbanga ti so a tene na ala tâ tënë pëpe. Me, tapande ti azo tongana Richard afa so tënë ti ala ni ayeke gi mvene. Biani, tâ tënë ti Bible alingbi ti sala si sewa ti zo aduti nzoni, nga azo so ândö asala aye ti kirikiri awara mbeni pendere kekereke.—Jérémie 29:11.
[Kete tënë na lembeti 9]
“Beku ti mbeni paradis na ndo sese apusu mbi ti changé”
[Ndulu tënë na lembeti 9]
Ngangu ti akpengba-ndia ti Bible
Bible alingbi ti sala ngangu mingi na ndo fini ti zo. Bâ ambeni ti akpengba-ndia ti Bible so amû maboko na azo ti salango ngangu ti changé:
“Zo so ngonzo asala lo fade pëpe, lo yeke nzoni ahon walombe, na zo so akomande yingo ti lo, lo yeke nzoni ahon zo so agbu kodoro.” (aProverbe 16:32). Ngonzo so a kanga ndo ni pëpe ayeke fä ti wokongo, me ti ngangu pëpe.
“Hingango nda ti ye asala si ngonzo agbu zo fade pëpe”. (aProverbe 19:11). Ti hinga ngbanga ti nyen ye tongaso asi ayeke mû maboko na zo ti bâ anda ti tënë so ayeke biani na gunda ti tiri, na ti kanga lege na ngonzo ti londo.
‘Mo ga ndeko ti zo ti ngonzo pëpe, wala peut-être fade mo manda lege ti lo’. (aProverbe 22:24, 25). Na ndara, aChrétien akpe ti tambela na azo so ayeke ndulu ti sala ngonzo.