Atënë so azo ahunda

Na lege ti bango ndo so a fa ni kozo, a tene so batême so a mû giriri na aJuif na popo ti ngu 33 na 36 ahunda pëpe na mbage ti ala ti mû tele ti ala na Nzapa; me tongana a yeke tongaso, ngbanga ti nyen Tour ti Ba Ndo ti kozo lango ti nze ti avril, ngu 2002 atene na lembeti 11, na paragraphe 7 so batême ti aJuif so ato nda ti mä na bê na Pentecôte 33 ayeke fä so “ala mû awe tele ti ala na Nzapa na lege ti Christ”?

Na ngu 1513 kozoni na ngoi ti e, Jéhovah Nzapa amû lege na azo ti Israël ti ga mbeni mara ti nzoni-kue teti lo gi tongana ala ‘mä yanga ti lo biani na ala bata tënë ti mbele ti lo’. Ala kiri tënë, ala tene: “Fade e sala ye kue so L’Eternel atene.”​—Exode 19:3-8; 24:1-8.

Na yengo da ti bata tënë ti mbele ti Ndia ti Moïse, azo ti Israël amû tele ti ala lani na Nzapa. Awagame ti aJuif so a dü ala na pekoni abâ gigi na yâ mara ni so amû tele ti lo na Nzapa awe. Ye oko, batême ti aJuif so aga adisciple ti Jésus Christ ti londo na Pentecôte ti ngu 33 ti gue na ni, ahunda lani ye mingi ahon gi senge fango tele ti ala na Nzapa tongana azo ti mbeni mara so amû tele ti lo na Nzapa awe. A yeke lani fä ti mungo tele ti ala na Jéhovah Nzapa na yâ mbeni fini songo so abungbi ala na Lo na lege ti Jésus Christ. Ngbanga ti nyen e tene tongaso?

Na pekoni so a sa yingo vulu na ndo adisciple 120 tongaso, so abungbi na mbeni da-nduzu na Jérusalem na Pentecôte ngu 33, bazengele Pierre alondo na ato nda ti fa tënë na aJuif nga na aprosélyte mingi mingi so abungbi oko ti bâ ye so asi. Na peko ti mbeni nzoni fango tënë, lo tene na aJuif so yingo-ti-hinga ti ala apusu ala ti wara vundu: “I changé bê ti i, i azo oko oko kue, i kamata batême na iri ti Jésus Christ, tongaso Nzapa alingbi pardone siokpari ti i”. Ti sala ye alingbi na tënë so Pierre amû na pekoni, “ala so aye tënë ti lo, ala kamata batême. Na lâ ni so, azo so abungbi na ala ayeke ndulu na saki ota.”​—Kusala 2:1-41.

Me aJuif so awara batême na peko ti atënë ti Pierre, ala yeke pëpe na yâ mbeni mara so amû tele ti lo na Nzapa awe? Ala lë songo pëpe na Nzapa tongana azo so amû tele ti ala na lo? Oko pëpe. Bazengele Paul asû lani na mbeti so ‘Nzapa alungula Ndia ti Moïse na kangango ni na pointe na keke ti pasi.’ (aColossien 2:14). Na lege ti kui ti Christ na ngu 33, Jéhovah Nzapa alungula mbele ti Ndia so ayeke lani tâ ye so aga na azo ti Israël ti mû tele ti ala na Lo. Mara ni ake lani Molenge ti Nzapa; me fadeso, a yeke Nzapa mveni si ake mara ni so. ‘Azo ti Israël na lege ti mitele’ alingbi mbeni pëpe ti ngbâ ti bâ tele ti ala tongana mbeni mara so amû tele ti lo na Nzapa awe.​—1 aCorinthien 10:18; Matthieu 21:43.

A lungula mbele ti Ndia na ngu 33, me ngoi so Nzapa azia nde ti sala nzobe mbilimbili gi na aJuif ahunzi na ngoi ni so pëpe.a Ngoi so aninga juska na ngu 36, tongana Pierre afa tënë na Corneille, mbeni zo ti Rome so akpe mbito ti Nzapa, nga azo ti da ti lo na ambeni Gentil nde (Kusala 10:1-48). Ye nyen ayeke lani na gunda ti nzobe so a kono yâ ni tongaso?

Daniel 9:27 atene: “Fade [Messie ni a] te kpengba mbele na azo mingi teti semaine [wala yenga] oko”. Mbele ni so a te wala so a bata ni si a ngbâ na ngangu teti angu mbasambala, wala ‘yenga oko’, ti londo na batême ti Jésus na tongo nda ti kusala ti lo ti Messie na ngu 29 ayeke mbele so a te na Abraham. Ti lï na yâ mbele so, a hunda gi ti tene mbeni zo aduti hale ti Abraham na lege ti mitele. A yeke lani mbele so gi Nzapa oko si ayeke leke ni ti ga nzoni, me a mû lani pëpe na mbeni zo matabisi ti lë songo na Nzapa tongana zo so amû tele ti lo na Jéhovah. Ni la, aJuif so amä na bê na so awara batême na peko ti diskur ti Pierre na Pentecôte 33, atâa so a sala na mbage ti ala nzobe so ayeke nde mingi teti so ala yeke aJuif na lege ti mitele, ala yeke na anda ti tënë oko pëpe ti tene so ala ngbâ na songo na Nzapa na pekoni so a lungula mbele ti Ndia awe. A lingbi ala oko oko amû tele ti ala na Nzapa.

Me mbeni nda ti tënë nde ayeke nga dä so a hunda ti tene aJuif na aprosélyte so awara batême lani na lâ ti Pentecôte 33 amû tele ti ala na Nzapa. Bazengele Pierre awa ala so amä lo ti gbian bê ti ala na ti wara batême na iri ti Jésus. Salango tongaso ahunda ti tene ala ke salango ye ti sese na ala kamata Jésus tongana Seigneur na Messie, tongana Kota Prêtre, nga tongana lo so aduti na koti ti Nzapa na yayu. A lingbi ala di iri ti Jéhovah Nzapa ti wara salut na lege ti Jésus Christ, na ye so a hunda ti tene ala fa mabe ti ala na yâ Christ na ala bâ lo tongana Mokonzi ti ala. Ye so amû lege ti lë songo na Nzapa na ti wara pardon ti siokpari agbian fadeso kue awe. A lingbi aJuif oko oko so amä na bê ayeda na fini ye so a leke ni. Tongana nyen? Na mungo tele ti ala na Nzapa nga na fango ni na gigi na gbele azo na lege ti batême na yâ ngu na iri ti Jésus Christ. Batême ti ala na yâ ngu ayeke lani fä so ala mû tele ti ala na Nzapa, na ye so aga na ala ti lë fini songo na Lo na lege ti Jésus Christ.​—Kusala 2:21, 33-36; 3:19-23.

[Kete tënë na gbe ni]