Atënë so azo ahunda

Na aHébreu 2:14, ngbanga ti nyen a hiri Satan “lo so ayeke na ngangu ti mû kui”?

Ti kiri tënë na ni gi ndulu, Paul aye lani ti tene so Satan alingbi, na lege ti ngangu ti lo mveni wala na lege ti azo ti lo, ti sala si azo awara kuâ. Ti gue oko na tënë so, Jésus ahiri Satan “wafango zo giriri kozoni”.​—Jean 8:44.

Lege so a sû peko ti aHébreu 2:14 na yâ ti ambeni Bible alingbi ti sala si zo agbu nda ni nzoni pëpe, teti aBible ni atene so Satan ayeke na “ngangu ti kuâ” wala “na ngangu na ndo ti kuâ”. (King James Version; Fini Mbuki, 2001). Alege so a sû na versê ni tongaso alingbi ti sala si zo apensé so Satan ayeke na ngangu ti fâ zo kue so lo ye ti fâ lo, na ye oko akanga lege pëpe na lo ti sala tongaso. Me ti bâ ni nzoni, ye ni ayeke tongaso pëpe. Teti tongana lo lingbi fade ti sala ye tongaso, ka peut-être lo fâ awavorongo Jéhovah kue na ndo sese ngbele ye aninga awe.​—Genèse 3:15.

Tënë ti Grec so a sû pekoni na “ngangu na ndo ti kuâ” na yâ ti ambeni Bible wala “ngangu ti mû kui” na yâ ti Bible ti Sango ayeke “kraʹtos tou tha·naʹtou.” Tou tha·naʹtou ayeke mbeni tënë so nda ni alondo na tënë “kuâ”. Kraʹtos aye mbilimbili ti tene “ngangu”. Mbeni bakari (Theological Dictionary of the New Testament) atene so tënë ni aye ti fa tënë ti “ngangu ni so ayeke dä, me pëpe lege so a yeke sala kusala na ngangu ni.” Ni la, na aHébreu 2:14, Paul aye ti tene pëpe so Satan ayeke na ngangu kue na ndo ti kuâ. Nde na so, Paul ayeke gboto lê na ndo ngangu so Satan ayeke na ni ti mû kui na zo wala ti sala si zo awara kuâ.

Tongana nyen Satan ayeke sala kusala na ‘ngangu ti lo ti mû kui’? Na yâ buku ti Job, e diko tënë ti mbeni ye so asi giriri; me mara ti ye tongaso ayeke si ka lakue lakue pëpe. Tondo ni atene so Satan asala kusala na mbeni ngangu pupu so asala si amolenge ti Job awara kuâ. Ye oko, bâ so Satan awara lege lani ti sala ye so gi na pekoni so Nzapa azi lege na lo; na Nzapa azi lege na lo ti sala ni ngbanga ti so mbeni kpengba tënë abâ gigi so a hunda ti leke ni (Job 1:12, 18, 19). Biani, Satan alingbi lani pëpe ti fâ Job lo mveni. A zi lege pëpe na lo ti sala so (Job 2:6). Ye so amû lege ti hinga so atâa so, na ambeni ngoi, Satan awara lege ti sala si ambeni be-ta-zo awara kuâ, a lingbi e duti na mbito pëpe ti pensé so lo lingbi ti hunzi fini ti e na ngoi kue so bê ti lo aye.

Satan asala nga si azo awara kuâ na lege ti azo ti lo ge na sese. Ni la, aChrétien mingi awara kuâ ndali ti mabe ti ala; ambeni awara kuâ na tïtî ambeni bungbi ti azo so ngonzo agbu ala ngangu; ti ambeni Chrétien ni, a yeke akota zo ti komande wala ajuge so asala ye na lege ni pëpe si amû yanga ti tene a fâ ala.​—Apocalypse 2:13.

Na ndo ni, ngoi na ngoi Satan ayeke sala si ambeni zo awara kuâ na salango kusala na ndo ti awokongo ti ala. Ngbele ye na ngoi ti Israël, prophète Balaam awa azo ti Moab ti handa azo ti Israël ‘ti sala siokpari so ake Jéhovah’. (Nombre 31:16). Ye so asala si azo ti Israël so wungo ti ala ahon 23 000 awara kuâ (Nombre 25:9; 1 aCorinthien 10:8). Legeoko nga laso, ambeni zo azia si “mayele” ti Satan ahanda ala, na ala tï na yâ pitan wala ambeni sioni salango ye nde so Nzapa ake ni (aEphésien 6:11). Tâ tënë, mingi ni tongana aye ni asi, azo ni ayeke girisa fini ti ala gi hio tongaso pëpe. Me ala lingbi biani ti girisa biaku fini ti lakue lakue; na lege so, a lingbi ti tene so Satan amû kui na ala wala asala si ala wara kuâ.

Atâa so e hinga so Satan ayeke na ngangu ti sala sioni na zo, a lingbi e sala mbito ti lo ahon ndo ni pëpe. Tongana Paul atene so Satan ayeke na ngangu ti mû kui, lo tene nga so Christ akui si “Lo lingbi futi [Satan] . . . na Lo lingbi zi ala kue so ayeke angbâa ti mbito ti kui na lâ ti fini ti ala kue.” (aHébreu 2:14, 15). Biani, Jésus amû fini ti lo tongana sandaga ti kota ngele na tongaso lo zi na gbe ti ngbâa ti siokpari na kui azo so amä na bê.​—2 Timothée 1:10.

Biani, ti hinga so Satan ayeke na ngangu ti mû kui ayeke pusu e ti gbu li; me e hinga biani na bê ti e so Jéhovah alingbi ti leke peko ti ye ti sioni kue so Satan na azo ti lo asala. Jéhovah adë bê ti e so Jésus, so a zingo na popo ti akuâ awe, ‘ayeke futi ande kusala ti zabolo.’ (1 Jean 3:8). Na lege ti ngangu ti Jéhovah, fade Jésus ayeke zingo akuâ na tongaso lo yeke lungula kuâ mveni (Jean 5:28). Na nda ni, fade Jésus ayeke fa tâ polele na gigi so ngangu ti Satan ayeke na akatikati, na ngoi so lo yeke bi lo na yâ ti gbukulugbu ti bingo. Na nda ni, a yeke futi Satan teti lakue lakue.​—Apocalypse 20:1-10.