“Lo kanga mbeni dû na yâ bê ti mbi”
“MBI KIRI singila na ala na bê ti mbi kue teti pendere matabisi so mbi wara ti buku Approchez-vous de Jéhovah (Ga ndulu na Jéhovah). Lo kanga mbeni dû na yâ bê ti mbi; dû ni so ayeke kota nzara ti mbi ti tene Jéhovah andoye mbi na ayekia mbi biani. Mbi bâ tele ti mbi fadeso so mbi yeke tâ ndulu mingi na Jéhovah nga na Molenge ti lo Jésus ahon ti kozo. Mbi ye ti sala tënë ti buku so na azo kue, na ti mû mbeni na ala so kue mbi ndoye ala.” Tënë so ayeke tënë ti bê ti mbeni Témoin ti Jéhovah na ndo fini buku ti alembeti 320 so a sigigi lani na ngoi ti kota bungbi ti district “Awakua ti Royaume so ayeke na wâ”, so a sala ni na ngu 2002 ti si na 2003. Zia e bâ ambeni tënë ti yâ ti fini buku so, nga ngbanga ti nyen a sigigi na ni.
Ambeni ye so a wara na yâ ti fini buku so
Atënë wa e yeke wara na yâ ti fini buku so? A yeke wara dä atënë kue so e bâ na yâ ti a-use article ti manda ti Tour ti Ba Ndo so, nga na ambeni tënë nde so ayeke mingi. A kangbi yâ ti buku ni na achapitre 31, na chapitre oko oko ayo alingbi na article ti manda oko ti Tour ti Ba Ndo. Na peko ti akozo tënë ni nga na akozo chapitre ota ni, a kangbi yâ ti buku ni na ambage osio, na mbage oko oko aluti na ndo oko ti akota lengo osio ti Jéhovah. Mbage oko oko ato nda ni kozoni kue ti sala tënë gi na ndo lengo ni. Na pekoni, achapitre so aga afa tongana nyen Jéhovah ayeke fa na gigi lengo ni so. Na yâ mbage oko oko ti buku ni, a yeke wara mbeni chapitre oko so asala gi tënë na ndo Jésus. Ngbanga ti nyen? Biani, Jésus atene: “Zo so abâ mbi, lo bâ Babâ awe”. (Jean 14:9). Teti so Jésus afa asalango ye ti Jéhovah na gigi na mbeni lege so ayeke mbilimbili-kue, lo mû na e atapande so alingbi na ni biani, so afa alengo ti Nzapa so ayeke sala kusala. Mbage oko oko ahunzi na ndo mbeni chapitre so afa na e tongana nyen ti mû tapande ti Jéhovah ti fa na gigi lengo so mbage ti buku ni ayeke sala tënë dä. Na salango lisoro na ndo alengo ti Jéhovah so, fini buku so asala kusala na abuku oko oko kue so a wara na yâ Bible.
A yeke wara nga na yâ ti buku Approchez-vous de Jéhovah ambeni ye so asala si lo yeke nde. Ti londo na chapitre 2, a yeke wara na yâ chapitre oko oko mbeni kete li ti tënë so ayeke: “Atënë ti gbu li dä.” Aversê na ahundango tënë so a zia na yâ kete mbage so ayeke pëpe ti kiri ti bâ atënë ti yâ ti chapitre ni. Nde na so, nda ni ayeke ti mû maboko na mo ti sala kusala na Bible ti gbu li ngangu na ndo tënë ni. Ye so ahunda na mbage ti mo ayeke ti tene mo diko aversê ni oko oko kue nzoni, na pekoni, mo gbu li na ndo hundango tënë ni na mo sala ngangu ti sala kusala na atënë ni na yâ fini ti mo mveni. Mara ti gbungo li tongaso alingbi ti ndu bê ti mo na ti pusu mo ti ga ndulu na Jéhovah mingi ahon ti kozo.—Psaume 19:15.
Afoto so a zia na yâ ti buku ni ayeke aye so a gi ni na a leke ni nzoni ti tene a fa ye na zo na a pusu zo ni ti sala ye. A yeke wara achapitre bale-oko na ndo ni mbasambala na yâ ti buku ni so ayeke na afoto so afa peko ti aye so Bible asala tënë dä.
Ngbanga ti nyen a sigigi na ni?
Ngbanga ti nyen a sigigi na buku Approchez-vous de Jéhovah? A sala fini buku so kozoni kue ti mû maboko na e ti hinga Jéhovah tâ nzoni mingi si e lingbi kpengba mingi ahon ti kozo songo ti e na Nzapa ti e.
Peut-être bê ti mo atï awe na ndo mbeni zo so dikongo buku ni alingbi ti sala nzoni na lo. A lingbi ti duti mbeni zo so mo manda Bible na lo wala même mbeni ita-koli wala ita-wali Chrétien so azia ti fa tënë awe. Ka mo, mo to nda ti diko fini buku so awe? Tongana a de, ngbanga ti nyen pëpe ti leke ngoi ti mo fadeso ti to nda ni hio? Mû ngoi ti gbu li na ndo ye so mo yeke diko. Zia si fini buku so amû maboko na mo ti ga tâ ndulu biani na Jéhovah Nzapa, tongaso si mo lingbi ande ti fa nzo tënë ti Royaume ti lo na ngia nga na wâ mingi!