Sara ye na mabe tongana ti ala
1. Ti to nda ni na yenga ti lango 19 ti octobre e yeke manda ande buku wa na ngoi ti Mandango BiBle ti Congrégation?
1 Ti to nda ni na yenga ti lango 19 ti octobre 2015, e yeke manda ande buku Sara ye na mabe tongana ti ala na Mandango Bible ti Congrégation. Mbeti so asara tënë ti mbaï ti akoli na awali 14 so asara ye na mabe na so Bible asara tënë ti ala. A sara buku so na mbeni lege so alingbi ti mû maboko na e ti bâ azo ni na yâ ti li ti e, nga a mû maboko na e ti bâ ala tongana atâ zo so atingbi lani na akpale na ngoi so ala yeke sara na Jéhovah. Buku ni afa na e ye so e lingbi ti manda na lege ti ambaï ni nga amû maboko na e ti sara ye alingbi na ambaï so na yâ ti fini ti e laso.—aHéb. 6:12.
2. Fa lege so a leke na buku Sara ye na mabe tongana ti ala.
2 Lege so a leke na buku so: Na yâ ti buku ni, e yeke wara adate nga na carte so alingbi ti mû maboko na e ti hinga ngoi nga na ndo so azo ni aduti lani na fini dä. Nga, na hunzingo ti chapitre oko oko, a yeke wara mbage so li ni ayeke “Gbu li na ndo ti atënë so:”, so ayeke mû maboko na e ti gbu li na ndo ti mbaï ni nga na ye so e manda na yâ ni. Apendere foto ayeke na yâ ti buku ni, a gi nda ti afoto ni nzoni, nga na yâ ni e yeke wara anzene nzene tënë so ayeke mû maboko na e ti imaginé ambaï ni na yâ ti li ti e.
3. Nyen la e lingbi ti sara ti wara ye ti nzoni na lege ti mandango buku so?
3 Lege so mo lingbi ti wara ye ti nzoni dä: Na yâ ti lettre ti Bebungbi so ayeke na yâ ti buku ni awa e na atënë so: “Bâ aye ni na yâ ti li ti mo na zia tere ti mo na yâ ni. Aye so asi na azo ti yâ ti mbaï ni, tara ti zia tere ti mo na place ti ala ti hinga ye so asi na ala. Bâ ye so ala sara na gbele ti mbeni ye, na bâ tongana mo la fade, ka mo yeke sara ti mo tongana nyen?” Biani, ti imaginé ye aye pëpe ti tene e bâ ye ni na yâ ti li ti e gi tongaso, me ti bâ mbilimbili ye so mbaï ni aye ti tene nga na sarango ye ti azo ni. Ti sara tongaso a hunda ngoi nga gbungo li (Néh. 8:8). Tongana mandango ye ti yenga ni ato nda ni na milieu ti chapitre ni, ita so ayeke mû li ni ayeke mû penze-ngbonga oko ti dabe na ye so ala manda lani. Tongana mbage “Gbu li na ndo ti atënë so:” ayeke na yâ ti mbage so a yeke manda ni so ape, a lingbi ti hunda tënë oko wala use tongana hundango tënë ti dango bê.
4. Ngbanga ti nyen la e yeke na bezoin ti manda buku Sara ye na mabe tongana ti ala?
4 E yeke na yâ ti mbeni dunia so ayeke gi lakue ti woko mabe ti e na alege nde nde. Ni la, buku so ayeke mbeni cadeau so Jéhovah amû ni na e ti kpengba mabe ti e. A sara buku so na lege ti mbeni molongo ti a-article ti Tour ti Ba Ndo so angbâ lakue ti sigigi (Jacq. 1:17). Zia e sara kue ti ga lakue na Mandango Bible ti Congrégation so nga tongana lege ti ayeke dä e mû mbage na acommentaire na ngoi so e yeke manda buku so.