Lege ti kpengba mariage ti mo

TARA ti bâ na li mbeni da so abuba kue teti so a bata ni nzoni pëpe. Li ti da ni ayeke yuru, akamba ti tere amû yâ ni kue, yanga ti da ni afun. Biani, da so abuba na lege ti angangu kota pupu ti ngu so apika ni teti angu mingi, na a bata da ni nzoni pëpe. A lingbi a kungbi da ni? A yeke lakue tongaso pëpe. Tongana gunda ni akpengba, nga da ni aluti ngangu, a lingbi peut-être ti leke ni.

Dutingo ti da so adabe ti mo na mariage ti mo? Na yâ ti angu mingi, angangu kota pupu ti ngu, tongana a lingbi ti tene tongaso, asala ngangu mingi na ndo songo ti mariage ti mo. Mbeni oko na popo ti i wala i use kue, i bâ na nene ni pëpe mariage ti i. Mo lingbi peut-être ti duti na bibe ti Sandy. Na peko ti angu 15 ti mariage so lo sala, lo tene: “E yeke gi koli na wali awe.”

Même tongana mariage ti mo aga tongaso, tene hio pëpe so ye kue ahunzi awe. Peut-être a lingbi ti leke mariage ti mo. Mingi ti aye ni kue abâ gi kota ti zendo ti mariage so ayeke na popo ti mo na mbage ti tele ti mo. Zendo ti mariage alingbi ti sala si mbeni mariage aluti ngangu na ngoi ti kpale. Ye oko, zendo ti mariage ayeke nyen? Nga tongana nyen Bible alingbi ti mû maboko na mo ti kpengba ni?

Zendo ti mariage andu yongo kungba

Zendo ti mariage andu dutingo ndulu ti sala ye atâa kpale wa asi wala andu tënë ti bibe so apusu zo. Ngoi na ngoi, tënë ni andu aye tongana mango tele na ndo dengo buze. Na tapande, mbeni zo ti lekengo da alingbi ti bâ so a yeke nzoni lo sala ye alingbi na mbeni mbeti so lo sû ti mä tele ti leke mbeni da. Lo mveni lo lingbi peut-être ti hinga pëpe zo so amû yanga ti sala kusala ni. Ye oko, lo bâ so a lingbi lo sala ye legeoko na zendo so lo sû na ndo mbeti ti mango tele ni.

Atâa so mariage ayeke pëpe mango tele ti dengo buze so adê dengo, zendo ti mariage andu yongo kungba. A lingbi ti tene so mo na mbage ti tele ti mo amû ândö yanga na gbele Nzapa nga na gbele azo ti ngbâ place oko atâa ye nyen asi. Jésus atene ândö: “Lo so asala ala giriri kozoni, Lo sala ala koli na wali, na Lo tene, Teti tënë so, fade zo azia babâ na mama ti lo, na lo duti na wali ti lo.” Jésus akiri atene: “Ye so Nzapa abungbi awe, zia zo akangbi pëpe.” (Matthieu 19:4-6). Tongaso tongana akpale asi, a yeke nzoni mo na mbage ti tele ti mo aleke na bê ti ala ngangu ti sala ye alingbi na zendo ti mariage so ala mû.a Mbeni wali atene: “A yeke gi na peko ti so e ke ti bâ fango yâ ti mariage tongana ndangba ye ti soro si aye ato nda ni lani ti ga nzoni.”

Ye oko, zendo ti mariage andu pëpe gi yongo kungba. Andu mbeni ye nde wa?

Salango kua oko ayeke kpengba zendo ti mariage

Zendo ti mariage aye pëpe ti tene so fade koli na wali ni ayeke mä tele lakue. Tongana mbeni kpale asi, a yeke na bê kue si a lingbi a leke kpale ni, pëpe gi ngbanga ti so a lingbi a sala tongaso teti zendo so mbeni zo amû, me a yeke ngbanga ti songo ti ndoye so abungbi azo ni. Jésus atene na ndo koli na wali: “Ala yeke use mbeni pëpe, me ala yeke mitele oko.”

Ti duti “mitele oko” na mbage ti tele ti mo aye ti tene nyen? Bazengele Paul asû ândö na mbeti so “a lingbi akoli andoye awali ti ala legeoko tongana tele ti ala mveni.” (aEphésien 5:28, 29). Tongaso, ti duti “mitele oko” aye ti tene so ti bi bê na ndo nzoni duti ti mbage ti tele ti mo tongana ti so mo yeke bi bê na ndo nzoni duti ti mo mveni. A yeke nzoni koli na wali so asala mariage awe agbian bango ndo ti ala. Ahon ti tene “mbi” wala “ye ti mbi”, a yeke nzoni ala tene “e” wala “ye ti e”. Mbeni wamungo wango asû na mbeti: “A lingbi koli na wali ni use kue azia ti bâ tele ti ala tongana kumbamba, me a lingbi ala bâ tele ti ala tongana azo so asala mariage awe.”

Mo na mbage ti tele ti mo “abâ tele ti ala tongana azo so asala mariage awe?” A lingbi ti si so mbeni koli na wali so asala mariage aduti ndo oko teti angu mingi, me so aduti pëpe “mitele oko”. Biani, ye so alingbi ti si. Ye oko, buku Mû pasa na ngoi (Angl.) atene: “Mariage aye ti tene ti sala ye kue legeoko, na salango tongaso, fade mariage ni ayeke ga nzoni.”

Ambeni koli na wali so awara ngia pëpe na yâ mariage ti ala ake ti kangbi tele teti amolenge wala teti anginza so mbeni ayeke na ni. Ambeni ahon ndo ni ngbanga ti so ala yeke na akpengba bango ndo nde nde na ndo fango yâ ti mariage wala ngbanga ti so ala yeke na mbito teti tënë so fade azo ayeke tene tongana ala kangbi tele wala ala fâ yâ ti mariage. Atâa so a yeke ye ti gonda ti tene amariage tongaso aninga, dabe i so ye so i yeke gi ayeke ti duti na mbeni songo ti ndoye, pëpe gi ti tene mariage ni aninga.

Salango ye na kion pëpe ayeke kpengba zendo ti mariage

Bible afa ândö kozoni so na “lâ ti nda ni”, azo ayeke duti ande “azo ti ndoye tele ti ala mveni”. (2 Timothée 3:1, 2). Tongana ti so prophétie so afa kozoni, a bâ so zo ayeke gboto lê mingi na ndo lo mveni laso. Na yâ amariage mingi, ti mû tele ti mo kue sân ti ku ti wara mbeni ye na pekoni, a yeke bâ ni tongana mbeni wokongo. Ye oko, na yâ mariage so atambela nzoni, koli na wali ni kue ayeke fa na gigi mbeni bibe ti gbanzingo ye na tele. Tongana nyen mo lingbi ti sala ni?

Ahon ti ngbâ gi ti hunda ‘Ye ti nzoni wa mbi yeke wara na lege ti songo so?’, hunda tele ti mo mveni, ‘Ye nyen mbi mveni mbi sala ti kpengba mariage ti mbi?’ Bible atene so a yeke nzoni aChrétien ‘agi ye teti ala mveni pëpe, me ala gi ye teti ambeni zo nga.’ (aPhilippien 2:4). Na ngoi so mo yeke gbu li ti mo na ndo kpengba-ndia ti Bible so, bâ yâ ti akusala so mo sala lani na yenga so ahon. Fani oke mo sala mbeni nzoni ye na mbage ti koli wala wali ti mo ti tene lo wara aye ti nzoni dä? Tongana lo ye ti sala tënë, mo yeke dengi mê ti mä lo, même atâa so mo duti ndulu ti sala ni pëpe? Akusala wa so lo ye tënë ni mingi ahon mo, mo sala ni?

Na bango nzoni yâ ti mara ti ahundango tënë tongaso, a lingbi mo gi bê ti mo pëpe so fade a yeke bâ wala a yeke futa pëpe nzoni salango ye ti mo. Mbeni buku atene: “Na yâ mingi ti salango songo, nzoni salango ye ayeke ga nga na nzoni salango ye. Tongaso, sala ngangu kue ti wa mbage ti tele ti mo ti duti na nzoni salango ye tongana ti so mo yeke sala ni.” Akusala ti gbanzingo ye na tele ayeke kpengba mariage ti mo ngbanga ti so ala yeke fa na gigi so mo bâ ni na nene ni na mo ye ti bata ni.

A yeke kota ye ti bâ ni tongana mbeni ye so aninga

Jéhovah Nzapa abâ na nene ni mingi dutingo be-ta-zo. Bible atene biani: “Na zo so ayeke be-ta-zo, fade mo [Jéhovah] sala ye na dutingo be-ta-zo.” (2 Samuel 22:26, NW ). Dutingo be-ta-zo na Nzapa andu nga dutingo be-ta-zo na aye so lo leke na ndo mariage.​—Genèse 2:24.

Tongana mo na mbage ti tele ti mo aduti be-biani na popo ti mba, fade i lingbi ti bâ so mariage ti i ayeke ninga. Tongana i yeke bi bê ti i na ndo kekereke, i yeke bâ so i yeke ngbâ ande lakue oko. A yeke ga na li ti i pëpe ti ke tele. Na bango ndo tongaso ayeke bata songo so ayeke na popo ti i. Mbeni wali atene: “Même tongana mbi sala ngonzo mingi na tele ti [koli ti mbi] na nga na ndo ye so ayeke si na e, mbi yeke na gingo bê pëpe so mariage ti e ayeke gue ti hunzi. Mbi yeke gi bê na ndo lege so e yeke gue ti leke songo ti e. Kite ayeke na bê ti mbi pëpe so mbeni lâ e yeke kiri ti duti oko; ye oko, na ngoi ti kpale ni mbi hinga pëpe lege so i yeke sala ni.”

Bango mariage tongana mbeni ye so aninga ayeke kota mbage ti zendo ti mariage so koli wala wali amû. Mawa ni ayeke so ye so atia azo mingi so asala mariage. Na ngoi ti mbeni ngangu papa, mbeni oko na popo ni alingbi ti bi mbeni tënë tongana “Mbi ke mo awe!” wala “Mbi gue ti gi mbeni nzoni zo!” Ti tâ tënë ni, fani mingi a yeke mû atënë tongaso tongana tâ ye pëpe. Ye oko, Bible afa so ‘sioni yorö ti fango zo asi singo na yâ’ menga ti mbeni zo (Jacques 3:8). Tongana i yeke zia mbito na bê ti mba na tenengo so i yeke sala ande mbeni sioni ye, bâ tënë so i ye ti tene la: ‘Mbi bâ ti mbi so mariage ti e ni ayeke ninga pëpe. Mbi lingbi ti zia ni na ngoi so bê ti mbi aye.’ Mara ti atënë tongaso alingbi ti buba mbeni mariage.

Tongana mo yeke bâ mariage tongana mbeni ye so aninga, mo yeke ku ti duti na mbage ti tele ti mo atâa so akpale alingbi ti si. Ye so ayeke ga nga na ambeni ye ti nzoni. A yeke sala si a yeke duti ande ngangu pëpe na i ti yeda na awokongo nga na agirisango lege ti mba, na ti ngbâ ti kanga bê na ti mû pardon na bê kue (aColossien 3:13). Mbeni buku atene: “Na yâ ti mbeni mariage so atambela nzoni, koli na wali ni kue ayeke na awokongo ti ala, na lege ayeke dä ti ngbâ lakue oko atâa awokongo ni.”

Na ngoi ti mariage ti mo, mo mû lani zendo, pëpe na mariage ni so a leke, me na mbeni zo so ayeke na fini, so ti tene mbage ti tele ti mo. Ye so ayeke sala ngangu na ndo lege so fadeso mo yeke bi bê ti mo na mo yeke sala ye tongana mbeni zo so asala mariage awe. Mo yeke ngbâ na tele ti koli wala wali ti mo, gi pëpe ngbanga ti so mo yeda na bê ti mo kue na nzoni-kue ti mariage, me ngbanga ti so mo ye nga zo so mo mû lo lani na mariage. Mo yeda na ni?

[Kete tënë na gbe ni]

[Encadré/Foto na lembeti 5]

Ye so mo lingbi ti sala fadeso

Tongana nyen mo leke ti kpengba zendo ti mariage ti mo? Mo yeke bâ peut-être so a lingbi ti sala si zendo ti mariage ni akiri aga nzoni ahon ti kozo. Ti kpengba zendo ti mariage ti mo, tara aye so ge:

● Bâ tele ti mo mveni nzoni. Hunda tele ti mo mveni: ‘Mbi bâ tele ti mbi tongana zo so asala mariage awe, wala mbi bâ tele ti mbi tongana mbeni kumbamba na mbi yeke sala ye tongaso?’ Gi ti bâ tongana nyen mbage ti tele ti mo ayeke bâ mo na ndo tënë so.

● I use kue i diko article so. Na pekoni, i sala lisoro, na ngangu pëpe, na ndo lege so i lingbi ti kpengba zendo ti mariage ti i.

● I mû mbage ti i na yâ akusala so ayeke kpengba zendo ti mariage ti i. Na tapande, bâ afoto ti mariage ti i nga ti ambeni ngoi so ayeke dabe i na ambeni ye so asi lani. Sala aye so i ye tënë ni mingi na ngoi so i yeke gue lani ti bâ tele wala na ngoi ti akozo ngu ti mariage ti i. I manda legeoko a-article ti Tour ti Ba Ndo na ti Réveillez-vous! so aluti na ndo Bible, so asala tënë na ndo mariage.

[Encadré/Foto na lembeti 6]

Zendo ti mariage andu . . .

● Kungba “Mo sala ye so mo zê ti sala. Tongana mo mû zendo pëpe, so ayeke nzoni ahon zendo so mo zê na mo sala ye ni pëpe.”​—Zo-ti-fa-tene 5:3, 4.

● Salango kua oko “Azo use ayeke nzoni ahon zo oko . . . Teti tongana oko atï, fade mbeni ayä ita ti lo na nduzu.”​—Zo-ti-fa-tene 4:9, 10.

● Gbanzingo ye na tele “Ngia ayeke na zo so amû ye, ahon ngia ti lo so akamata ye.”​—Kusala 20:35.

● Bango ni tongana mbeni ye so aninga “Ndoye . . . [akanga bê ti lo na yâ aye] kue.”​—1 aCorinthien 13:4, 7.

[Afoto na lembeti 7]

Tongana mbeni aye ti sala tënë, mo yeke dengi mê ti mä lo?