Atënë so azo ahunda

Ti duti na “fini na yâ Lo mveni” aye ti tene nyen?

Bible atene so Jésus Christ ayeke “na fini na yâ Lo mveni” nga adisciple ti lo ayeke ‘na fini na yâ ala mveni’ (Jean 5:26; 6:53). Ye oko, nda ti aversê use so ayeke legeoko pëpe.

Jésus atene ândö: “Legeoko tongana Babâ ayeke na fini na yâ Lo mveni, tongaso Lo sala si Molenge ni ayeke na fini na yâ Lo mveni nga.” Kozoni ti tene akpengba tënë so, Jésus atene: “Biani, biani, Mbi tene na i, zo so amä tënë ti Mbi na amä na bê na Lo so ato Mbi, zo so ayeke na fini ti lakue lakue . . . l’heure ni ayeke ga na asi awe fadeso, l’heure ni so fade awakinda amä yanga ti Molenge Ti Nzapa, na ala so amä, fade ala yeke na fini.” Ge, Jésus asala tënë ti ngangu so adö bê, so Babâ ti lo amû na lo, ngangu ti mû lege na azo ti luti na gbele Nzapa tongana azo so Nzapa ayeda na ala. Na ndo ni, Jésus ayeke na ngangu ti zingo azo so akui na ti mû na ala fini. Ti Jésus, ti duti na “fini na yâ Lo mveni” aye ti tene so lo yeke na angangu so. Legeoko tongana Babâ ni, Molenge ni nga ayeke na ‘matabisi ti fini na yâ lo mveni’, tongana ti so a lingbi ti kiri na peko ti tënë so tongaso (Jean 5:24-26). Ka ti adisciple ti lo ni ayeke tongana nyen?

Ngu oko tongaso na pekoni, Jésus asala tënë na awamango lo, lo tene: “Biani, biani, Mbi tene na i, tongana i te mitele ti Molenge Ti Zo pëpe na i nyon mênë ti Lo pëpe, i yeke na fini na yâ i [mveni] pëpe. Zo so ate mitele ti Mbi na lo nyon mênë ti Mbi, lo yeke na fini ti lakue lakue; na fade Mbi yä lo na lâ ti nda ni.” (Jean 6:53, 54). Ge, Jésus afa so dutingo na “fini na yâ i [mveni]” ague legeoko na warango “fini ti lakue lakue.” A wara atënë so ague legeoko na dutingo na “fini na yâ i mveni” na ambeni ndo nde na yâ mbage ti Bible so asû na yanga ti Grec. A yeke wara mbeni tapande oko: “I yeke na ingo na yâ i mveni.” (Marc 9:50). Na yâ tapande so, atënë ni aye pëpe ti tene ngangu ti mû ingo na ambeni zo. Nde na so, a ye ti sala tënë ti ye so alingbi kue na yâ zo. Tongaso, tënë “fini na yâ i [mveni]” so asala tënë ni na Jean 6:53 aye gi ti tene ti wara fini so alingbi kue.

Ti sala tënë ti adisciple ti lo so ayeke na fini na yâ ala mveni, Jésus asala tënë ti mitele na mênë ti lo. Na pekoni, na ngoi so lo yeke zia na sese Kobe ti Seigneur, Jésus akiri asala tënë na ndo mitele nga na mênë ti lo, na lo fa lege na adisciple ti lo, so alingbi ande ti lï na yâ fini mbele, ti te mapa so mama ni ayeke dä pëpe na ti nyon vin. So aye ti tene gi aChrétien so a sa yingo na ndo ti ala, so alï na yâ fini mbele na Jéhovah Nzapa si ayeke wara mara ti fini so alingbi kue tongaso? Oko pëpe. Ngu oko akangbi popo ti aye use so asi. Ala so amä ândö atënë ti Jésus so afa pekoni na Jean 6:53, 54 ahinga ye oko pëpe na ndo salango matanga fani oko na yâ ngu oko, so na yâ ni mapa na vin ni aduti fä ti mitele na ti mênë ti Christ.

Legeoko na Jean chapitre 6, Jésus ahaka kozoni mitele ti lo na manne, lo tene: “Akotara ti i ate manne na [yando] giriri, na ala kui awe. So ayeke Mapa so alondo na yayu na azu na sese, si zo alingbi te mbeni, na lo kui pëpe. Mbi yeke Mapa so amû fini, Mapa so alondo na yayu azu na sese. Tongana zo ate Mapa so, fade lo yeke na fini lakue lakue.” Mitele ti Jésus nga na mênë ti lo ayeke ândö kota ye mingi ahon manne. Na lege wa? Na lege so lo mû mitele ti lo ndali ti “fini ti sese”, na zingo lege ti wara fini ti lakue lakue.a Tongaso, tënë dutingo na “fini na yâ i [mveni]” so a wara ni na Jean 6:53 andu ala kue so ayeke wara fini ti lakue lakue na yayu wala na ndo sese.​—Jean 6:48-51.

Lawa adisciple ti Jésus ayeke wara fini na yâ ala mveni wala ti wara fini so alingbi kue? Ti ahéritier ti Royaume so a sa yingo na ndo ti ala, ye so ayeke si na ngoi ti zingongo ti ala na popo ti akuâ ti wara fini na yayu tongana acréature ti yingo so alingbi ti kui mbeni pëpe (1 aCorinthien 15:52, 53; 1 Jean 3:2). “Ambeni ngasangbaga” ti Jésus ayeke wara fini so alingbi kue na nda ti Komandema ti Ngu Saki Oko ti lo. Ti si na ngoi ni so, fade a tara ala, a bâ so ala yeke be-biani, na a diko ala awe azo ti mbilimbili ti wara fini ti lakue lakue na yâ Paradis na ndo sese.​—Jean 10:16; Apocalypse 20:5, 7-10.

[Kete tënë na gbe ni]

[Afoto na lembeti 31]

Atâ Chrétien kue alingbi ti wara ‘fini na yâ ala mveni’