Atënë so azo ahunda
Batême teti awakinda aye ti tene nyen?
Na sungo mbeti na ndo zingongo ti akuâ ti gue na yayu, bazengele Paul asû mbeni tënë so adö bê. Lo tene: “Wala azo so akamata batême teti awakinda, fade ala sala nyen? Tongana A yä awakinda oko pëpe, teti nyen ala kamata batême teti ala?” Nga, Fini Mbuki, 2001 akiri pekoni tongaso: ‘Tongana ye ni ayeke tongaso pëpe, nyen si azo so ayeke wara batême ndali ti akuâ so ayeke gi? Tongana akuâ ayeke zingo pëpe, ngbanga ti nyen si azo ni so ayeke hunda ti tene awara batême ndali ti akuâ ni so?’—1 aCorinthien 15:29.
Ge Paul aye ti tene so a yeke batize azo so angbâ na fini ndali ti ala so akui lani sân ti kamata batême? Na lege ti aBible so nga na ti ambeni, a lingbi ti tene biani so a yeke tongaso. Ye oko, tongana e bâ nzoni Mbeti ti Nzapa nga na yanga ti Grec so Paul asala kusala na ni, e yeke si na mbeni nda ti tënë nde. Paul aye ti tene so a yeke batize wala a yeke yôro aChrétien so a sa yingo na ndo ti ala na yâ ti mbeni fini so fade ayeke gue na ala ti duti be-biani juska na kuâ legeoko tongana Christ. Na pekoni, a lingbi ti zingo ala ti duti na fini ti yingo tongana ti so Christ ayeke lani na ni.
Bible ayeda na fango nda ti tënë so. Na yâ mbeti so lo sû na aRomain, Paul atene: “I hinga pëpe? e kue so a batize e na yâ Christ Jésus, a batize e na yâ kui ti Lo.” (aRomain 6:3). Na yâ mbeti ti lo na aPhilippien, Paul asala tënë ti lo mveni, lo tene: ‘Mbi ye nga ti bâ pasi legeoko na [Christ] si mbi ga tongana lo na ndembe ti kuâ ti lo. Tongaso mbi yeke zia bê ti mbi na ndo ti ye so: mbi nga mbi yeke zingo ande na kuâ.’ (aPhilippien 3:10, 11, FM 01). Paul afa lani so fini ti mbeni disciple ti Christ so a sa yingo na ndo ti lo andu mbeni fini ti batango be-biani na gbe ti tara, lutingo lâ oko oko na gbele kui, nga na nda ni, dutingo be-biani juska na kui, na pekoni ti londo na popo ti akuâ ti gue na yayu.
A lingbi e hinga so aversê so a fa ni na nduzu ge nga na ambeni so asala tënë ti kui legeoko na azo so awara batême, andu azo so angbâ na fini, so ala mû lani batême awe, pëpe ala so akui awe. Paul atene nga na amba ti lo Chrétien so a sa yingo na ndo ti ala: “A lu i legeoko na Lo na batême, tongaso a yä i na nduzu legeoko na Lo nga, na lege ti mä na bê na kusala ti Nzapa, Lo so ayä Lo na popo ti awakinda.”—aColossien 2:12.
Tënë ti Grec hy·perʹ, so a kiri pekoni na “teti” wala “ndali ti” na yâ versê ti 1 aCorinthien 15:29 ti ambeni Bible nde nde alingbi nga ti tene “ti duti”. Tongaso, ti gue legeoko na ambeni versê ti Bible so, Les Saintes Écritures—Traduction du monde nouveau akiri peko ti versê so na lege ni: “Wala, fade ala sala nyen, ala so a yeke mû na ala batême ti duti awakinda? Tongana a yeke yä awakinda oko pëpe, ngbanga ti nyen a yeke mû na ala nga batême ti duti awakinda?”