Alege ti fa ndoye ti e teti Nzapa

TI LË ndoye teti Nzapa andu gi pëpe ti manda ye na ndo Lo. Awakua ti Nzapa na ndo sese alingbi ti yeda so tâ ndoye teti Nzapa ayeke maï na yâ mbeni zo na ngoi so hingango ye ti lo na ndo asalango ye ti Nzapa ayeke gue na li ni. Nga tâ ndoye so ayeke kpengba même ahon ti kozo tongana lo yeke gi ti hinga nzoni mingi aye so Nzapa andoye, aye so lo ke, aye so agbu bê ti lo kozo nga aye wa lo yeke ku na mbage ti e ti sala.

A yeke na lege ti ndoye si Jéhovah amû na e Tënë ti lo, Bible, so na yâ ni lo fa na e mara ti zo wa lo yeke. Na lege ti Bible, e manda tongana nyen Jéhovah asala ye lani na yâ aye nde nde so asi. Legeoko tongana ti so mbeni mbeti so e wara na mbage ti mbeni zo so e ndoye mingi ayeke mû ngia na e ngangu, legeoko nga Bible ayeke mû ngia na e na ngoi so e yeke bâ afini lege ti salango ye so Jéhovah ayeke fa.

Ye oko, tongana ti so e yeke bâ ni ka ngoi na ngoi na yâ kusala ti e ti fango tënë, ti manda ye na ndo Nzapa ayeke pusu zo lakue pëpe ti ndoye lo. Jésus atene na ambeni Juif ti ngoi ti lo so ayeke na yekiango ndo pëpe: “I gi na yâ Mbeti ti Nzapa, teti bê ti i atene fini ti lakue lakue ayeke na yâ ni . . . Me Mbi hinga i, na Mbi hinga ndoye ti Nzapa ayeke na yâ i pëpe.” (Jean 5:39, 42). Ambeni zo ayeke mû angu mingi mingi ti manda ye na ndo asalango ye ti Jéhovah so ayeke na lege ti ndoye; ye oko, ndoye ti ala teti Jéhovah ayeke gi kete. Ngbanga ti nyen? Ngbanga ti so ala gbu li ti ala pëpe na ndo ye so mandango ye ti ala ni aye ti tene mbilimbili. Me nde na ala, azo ti bê ti mbilimbili kutu mingi so e manda Bible na ala abâ na yâ fini ti ala so ndoye ti ala teti Nzapa angbâ ti kono. Ngbanga ti nyen? Ngbanga ti so, ala mû tapande ti Asaph, tongana ti so e mveni e sala lani. Na lege wa?

Gbu li na yekiango ndo

Asaph aleke lani ti lë na yâ bê ti lo ndoye teti Jéhovah. Lo sû na mbeti: “Mbi sala tënë na bê ti mbi, . . . Fade mbi dabe mbi na kusala ti L’Eternel; biani, mbi dabe mbi na ye ti kpene ti Mo ti giriri. Fade mbi gi bê ti mbi na kusala ti Mo kue, na mbi bi bê ti mbi tënë ti ye so Mo sala.” (Psaume 77:7, 12, 13). Ndoye teti Nzapa ayeke kono ande na bê ti zo so agi bê wala agbu li na ndo alege ti Jéhovah, tongana ti wasungo psaume so.

Na ndo ni, ti dabe na aye ti nzoni so asi na e na angoi so e yeke sala na Jéhovah ayeke kpengba songo ti e na lo. Bazengele Paul atene so e yeke ‘sala kua oko’ na Nzapa, na songo so alingbi ti maï na popo ti azo so ayeke sala kua oko ayeke tâ ngangu mingi (1 aCorinthien 3:9, Fini Mbuki, 2001). Tongana e fa ndoye ti e teti Jéhovah na lege ti atënë ti yanga ti e nga na asalango ye ti e, a nzere na bê ti lo mingi, na a mû ngia na lo (aProverbe 27:11). Na pekoni, tongana e hunda mungo maboko ti Jéhovah, na si lo fa lege na e na yâ mbeni ye ti ngangu, e hinga so lo yeke na e, na ndoye ti e teti lo ayeke kpengba ngangu.

Songo na popo ti azo use ayeke maï tongana ala yeke fa atënë ti bê ti ala na mba. Legeoko nga, tongana e fa na Jéhovah ngbanga ti nyen e mû tele ti e na lo, e yeke kpengba na yâ ndoye ti e teti lo. Fade tënë ti Jésus so ayeke ga na yâ li ti e: “A lingbi mo ndoye Seigneur Nzapa ti mo na bê ti mo kue, na âme ti mo kue, na bibe ti mo kue, na ngangu ti mo kue.” (Marc 12:30). Ye nyen e lingbi ti sala ti hinga biani so fade e yeke ngbâ ti ndoye Jéhovah na bê ti e kue, na âme ti e kue, na bibe ti e kue nga na ngangu ti e kue?

Ti ndoye Jéhovah na bê ti e kue

Mbeti ti Nzapa asala tënë ti bê na lege ti fä, so andu zo ti yâ ni ti e: anzara ti bê ti e na abango ndo ti e. Ni la, ti ndoye Jéhovah na bê ti e kue aye ti tene so e ye ti nzere na Nzapa ahon tanga ti aye kue (Psaume 86:11). E yeke fa so e yeke na mara ti ndoye tongaso na maïngo alengo so apusu Nzapa ti yeda na e. E yeke tiri ti mû tapande ti Nzapa na ‘kengo ye ti sioni nga na kangango bê ti e na ye ti nzoni.’​—aRomain 12:9.

Ndoye ti e teti Nzapa ayeke sala ngangu na ndo lege so e yeke bâ aye kue. Na tapande, e lingbi ti bâ so kua ti nginza ti e anzere na e mingi wala so li ti e ayeke mingi na ndo ni; ye oko, bê ti e kue ayeke gi na ndo ni? Oko pëpe. Teti so e ndoye Jéhovah na bê ti e kue, e yeke kozoni kue awakua ti Nzapa. Legeoko nga, e ye ti nzere na lê ti ababâ na mama ti e, na lê ti koli wala wali ti e wala na lê ti patron ti e; ye oko, e yeke fa so e ndoye Jéhovah na bê ti e kue na gingo kozoni kue ti nzere na lo. Teti biani, lo si lo lingbi na kozo ndo na yâ bê ti e.​—Matthieu 6:24; 10:37.

Ti ndoye Jéhovah na âme ti e kue

Na yâ Bible, tënë “âme” andu mbilimbili tele ti e kue nga na fini so e yeke na ni. Tongaso, ti ndoye Jéhovah na âme ti e kue aye ti tene ti sala kusala na fini ti e ti sepela lo na ti fa ndoye ti e teti lo.

Tâ tënë, ambeni ye nde alingbi ti gbu bê ti e na yâ fini, na tapande mandango mbeni kua ti nginza, mbeni kusala ti dengo buze wala tënë ti batango sewa ti e. Me na oko ngoi, e yeke fa so e ndoye Jéhovah na âme ti e kue na salango aye tongana ti so lo ye, nga na batango ambeni ye nde na place ti ala na yâ fini ti e; na salango tongaso e yeke “gi royaume ti Nzapa na mbilimbili ti Lo kozoni”. (Matthieu 6:33). Ti voro Nzapa na âme ti e kue aye nga ti tene ti duti na wâ na yâ kusala. E yeke fa na Jéhovah so e ndoye lo na fango tënë ti Royaume na wâ, na mungo akiringo tënë so akpengba zo na abungbi wala na mungo maboko na aita ti e Chrétien ti koli na ti wali. Na yâ ye kue, e yeke ngbâ ti “sala ye so Nzapa aye [‘na âme ti e mveni’, NW ]”.​—aEphésien 6:6.

Jésus afa so lo ndoye Nzapa na âme ti lo kue na kengo tele ti lo mveni. Lo zia salango ye so bê ti Nzapa aye na kozo ndo, me aye so lo ye, lo zia ni na peko. Jésus atisa e ti mû tapande ti lo. Lo tene: ‘Tongana mbeni zo aye ti ga na peko ti Mbi, a lingbi lo ke tele ti lo mveni, lo yô keke ti pasi ti lo, na lo ga na peko ti Mbi.’ (Matthieu 16:24, 25). Ti ke tele ti e mveni aye ti tene ti mû tele ti e na Nzapa. A ye ti tene so ndoye ti e teti Nzapa akono mingi a sala si e zia lo ti ga maître ti tele ti e, tongana ti mbeni zo ti Israël ti giriri so andoye maître ti lo tâ mingi a sala si lo soro ti ngbâ gi na gbe ti lo tongana ngbâa teti alâ ti fini ti lo kue (Deutéronome 15:16, 17). Ti mû fini ti e kue na Jéhovah afa na gigi biani so e ndoye lo.

Ti ndoye Jéhovah na bibe ti e kue

Ti ndoye Jéhovah na bibe ti e kue aye ti tene so e yeke sala ngangu kue ti hinga lo nzoni na asalango ye ti lo, aye so lo leke ti sala nga na aye so lo hunda na mbage ti e (Jean 17:3; Kusala 17:11). E yeke fa ndoye ti e na Jéhovah na salango kusala na angangu ti gbungo li ti e kue ti mû maboko na amba ti e ti tene ala nga kue andoye Jéhovah, na nga ti kono kode ti e ti fango ye. Bazengele Pierre atene na wâ: “I kpengba na lege ti bibe ti i.” (1 Pierre 1:13). Nga, e yeke sala ngangu kue ti bi bê ti e na ambeni zo, mbilimbili na aita ti e so ayeke voro Nzapa oko na e. E hinga aye so ayeke si na ala, na e yeke bâ ngoi wa a yeke nzoni ti gonda ala wala a lingbi e dë bê ti ala.

E yeke fa na Jéhovah so e ndoye lo na bibe ti e kue tongana na yâ li ti e nga, e sala ye alingbi na atënë ti lo. E yeke tara ti bâ aye tongana ti so lo yeke bâ, e yeke bâ ndo na mbage ti lo tongana e yeke mû adesizion, na nga e hinga na bê kue so lege ti lo ayeke nzoni ahon atanga ni kue (aProverbe 3:5, 6; Esaïe 55:9; aPhilippien 2:3-7). Me na ngoi so e ngbâ ti fa ndoye ti e teti Nzapa, tongana nyen e lingbi ti sala kusala na ngangu ti e?

Ti ndoye Jéhovah na ngangu ti e kue

Amaseka mingi na yâ kongregation ti aChrétien asala kusala na ngangu ti ala ti sepela Jéhovah (aProverbe 20:29; Zo-ti-fa-tene 12:3). Mbeni lege so amaseka Chrétien mingi afa so ala ndoye Jéhovah na ngangu ti ala kue ayeke so ala mû kusala ti ngoi kue tongana pionnier. Amama mingi ayeke mû mbage na kusala so tongana amolenge ti ala ade na ekole. A-ancien be-ta-zo so ayeke na sewa ti bata, me so na ndo ni ayeke sala avizite ti kpengba aita ti ala, ayeke fa so ala ndoye Jéhovah na ngangu ti ala kue (2 aCorinthien 12:15). Jéhovah ayeke mû ngangu na ala so azia beku ti ala na lo, tongaso si ala lingbi ti fa na gigi ndoye ti ala na sepelango lo na lege ti angangu kue so ala yeke na ni.​—Esaïe 40:29; aHébreu 6:11, 12.

Ndoye ayeke maï tongana a lë ni nzoni. Ni la, e ngbâ ti mû ngoi ti gbu li nzoni. E yeke dabe na ye so Jéhovah asala teti e nga ngbanga ti nyen lo lingbi na vorongo so e mû na lo. Teti so e yeke ahale ti Adam, na e yeke mbilimbili-kue pëpe, e lingbi ande lâ oko pëpe na ‘aye so Nzapa aleke teti ala so andoye Lo’, me e lingbi ti fa so e ndoye Jéhovah na âme ti e kue. Zia e ngbâ lakue ti sala tongaso!​—1 aCorinthien 2:9.

[Foto na lembeti 20]

E yeke fa ndoye na mbage ti Nzapa na lege ti akusala ti e