“Sala kusala ti mo kue”

“Sala kusala ti mo kue.”​—2 TIMOTHÉE 4:5.

MO YEKE mbeni wafango tënë ti Royaume? Tongana a yeke tongaso, kiri singila na Jéhovah Nzapa teti pendere matabisi so. Mo yeke ancien na yâ kongregation? So mbeni matabisi so mo wara na ndo ni na mbage ti Jéhovah la. Me a lingbi e girisa lâ oko pëpe so hingango ndo so e wara na da-mbeti wala matabisi ti e ti sala tënë nzoni ayeke pëpe aye so asala si e lingbi na kusala ti fango tënë wala na kungba ti ancien na yâ kongregation. A yeke Jéhovah si amû lege na e ti lingbi na kusala ni, na a yeke ngbanga ti so ambeni koli na popo ti e asala ye alingbi na aye so Mbeti ti Nzapa ahunda ti ga ancien si laso ala yeke na matabisi ti sala kusala tongana asurveillant.​—2 aCorinthien 3:5, 6; 1 Timothée 3:1-7.

² A-Chrétien kue so amû tele ti ala na Nzapa ayeke awafango nzo tënë. Ye oko, a yeke mbilimbili na asurveillant wala a-ancien ti zia mbeni nzoni tapande na yâ fango tënë. A-ancien so ‘amû tele ti ala kue na kua ti fango tënë ti Nzapa nga na fango ye na azo’ ayeke hon senge pëpe na lê ti Nzapa na ti Christ, nga na lê ti aita ti ala Témoin ti Jéhovah (1 Timothée 5:17, Fini Mbuki, 2001; aEphésien 5:23; aHébreu 6:10-12). Na yâ aye kue, a lingbi fango ye so mbeni ancien amû aduti teti nzoni ti azo na lege ti yingo, teti bazengele Paul atene na Timothée so ayeke nga mbeni surveillant: “Lâ ni ayeke ga so fade ala ye ti mä nzo tënë pëpe; me, teti mê ti ala asara ala, fade ala hiri amaître mingi na lege ti nzara ti ala mveni ti fa tënë na ala; na fade ala kanga mê ti ala si ala mä tene-biani pëpe, na ala zia mê ti ala ti mä tënë ti pande. Me mo duti na donzi na yâ ye kue, hu pono ti ye ti ngangu, sala kusala ti évangéliste [wafango nzo tënë], na mo sala kusala ti mo kue.”​—2 Timothée 4:3-5.

³ Ti hinga biani so afango ye ti wataka ayeke buba pëpe nzoni dutingo ti kongregation na lege ti yingo, a lingbi mbeni surveillant asala ye alingbi na wango ti Paul so: “Duti na donzi na yâ ye kue, . . . sala kusala ti mo kue.” (2 Timothée 4:5). Biani, a lingbi mbeni ancien ‘asala kusala ti lo kue.’ A lingbi lo sala ni juska lo hunzi ni kue, nga lo sala ni tâ nzoni. Mbeni ancien so asala kusala ti lo kue ayeke bi lê ti lo nzoni na ndo akungba ti lo kue na lo yeke sala mbeni kua gi tongaso pëpe wala gi mbage ti kua ni. Mara ti zo tongaso ayeke be-ta-zo même na yâ akete ye.​—Luc 12:48; 16:10.

⁴ Ti sala kusala ti e kue, a hunda lakue pëpe na e ti mû angoi na ndo ni, me a hunda na e biani ti sala kusala nzoni na ngoi so e yeke na ni. Ti leke ti sala ye na loro pëpe me lakue nzoni ayeke ye so alingbi ti mû maboko na aChrétien kue ti sala aye na yâ kusala ti fango tënë. Ti wara ngoi mingi ti fa na tënë, a lingbi mbeni ancien aleke nzoni akusala so lo yeke na ni si programme ti lo atambela mbilimbili. A yeke nzoni lo hinga nga kua so a lingbi lo mû na mbeni zo nde ti sala na place ti lo nga tongana nyen ti kangbi ni (aHébreu 13:17). Tâ na lege ni, mbeni ancien so aita ayekia lo mingi ayeke mû nga mbage ti lo na yâ kua ni, legeoko tongana Néhémie so asala nga kua na maboko ti lo mveni ti leke agbagba ti Jérusalem (Néhémie 5:16). Nga, a lingbi awakua ti Jéhovah kue amû mbage ti ala lakue na fango tënë ti Royaume.​—1 aCorinthien 9:16-18.

⁵ So tâ kusala ti mungo ngia na zo si e yeke na ni ti fa tënë ti Royaume ti Nzapa so a zia gere ni na yayu awe! Kite ayeke pëpe so e yekia mingi matabisi ti e ti fa nzo tënë na ndo sese kue kozoni si nda ni aga (Matthieu 24:14). Atâa so e yeke mbilimbili-kue pëpe, e lingbi ti wara ngangu na lege ti tënë ti Paul so: “E yeke na mosoro [ti kusala ti fango tënë] so na yâ ta ti sese si azo alingbi hinga kota ngangu alondo na Nzapa, a londo na e pëpe.” (2 aCorinthien 4:7). Biani, e lingbi ti sala kusala so Nzapa ayeda na ni me gi tongana lo mû ngangu nga na ndara na e.​—1 aCorinthien 1:26-31.

Fa gloire ti Nzapa na gigi

⁶ Tongana lo yeke sala tënë ti aChrétien so a sa yingo na ndo ti ala, Paul atene so Nzapa la “asala si e ga azo ti kusala ti fini mbele”. Bazengele ni azia kangbi na popo ti fini mbele so Nzapa ate na Israël ti yingo na lege ti Jésus Christ, na ngbele mbele ti Ndia so Nzapa ate na Israël ti mitele na lege ti Moïse. Paul atene nga so tongana Moïse azu na ndo Hoto ti Sinaï na atablette ti aKomandema Bale-oko, lê ti lo aza tâ ngangu si azo ti Israël alingbi lani pëpe ti luti ti bâ ni na lê ti ala. Ye oko, tongana ngoi ayeke hon, mbeni ye ti ngangu ahon ti so asi ngbanga ti so “lege ti hingango ndo ti ala akanga” (FM 01), na mbeni voile aduti na ndo bê ti ala. Me tongana zo akiri na Jéhovah na bê ti lo kue, a yeke lungula voile ni. Fadeso, na salango tënë ti kusala so a mû na ala so ayeke na yâ fini mbele, Paul atene: “E kue so voile ayeke na lê ti e pëpe, e [fa na gigi] gloire ti [Jéhovah] legeoko tongana . . . tatara”. (2 aCorinthien 3:6-8, 14-18; Exode 34:29-35). “Ambeni ngasangbaga” ti Jésus laso ayeke nga na matabisi ti fa na gigi gloire ti Jéhovah.​—Jean 10:16.

⁷ Teti so zo oko alingbi pëpe ti bâ Nzapa na lê na ti ngbâ na fini, tongana nyen azo ti siokpari alingbi ti fa gloire ti Nzapa na gigi? (Exode 33:20). A yeke nzoni e hinga so nde na gloire ti lo mveni, Jéhovah aleke nga na lege ti gloire ti fa na gigi mbilimbili ti kota yanga-ti-komande ti lo na lege ti Royaume ti lo. Atâ tënë na ndo Royaume so ayeke mbage ti ‘akota kusala ti Nzapa’ so ala so a sa yingo na ndo ti ala na Pentecôte ti ngu 33 ato nda ti fa ni (Kusala 2:11). Na lege ti fango lege ti yingo so, ala lingbi lani ti sala kusala kue so a mû na ala.​—Kusala 1:8.

⁸ Paul aleke lani na bê ti lo ti zia si ye oko akanga lege na lo pëpe ti sala kusala ti lo kue. Lo sû na mbeti: “Teti tënë so, e yeke na kusala so, na bê ti e anze pëpe, teti e wara be-nzoni awe. E ke ye ti kamene ti lingo awe, e tambela na lege ti handa pëpe, na e zia mbeni tënë na tele ti Tënë ti Nzapa pëpe; me na lege ti fa tene-biani na gigi, e sala tënë ti nzoni ti e mveni na gbele yingo-ti-hinga ti azo kue, na lê ti Nzapa.” (2 aCorinthien 4:1, 2). Na lege ti ye so Paul ahiri ni “kusala so”, a yeke fa tâ tënë na gigi, na a yeke kangbi lumière ti yingo na ando nde nde.

⁹ Na ndo tënë ti Lo so ayeke Lingu ti lumière so lê abâ nga na lumière na lege ti yingo, Paul asû na mbeti: “Nzapa so atene giriri, Fade lumière asu na bingo, Lo su na bê ti e ti mû lumière ti hingango gloire ti Nzapa so ayeke na lê ti Jésus Christ.” (2 aCorinthien 4:6; Genèse 1:2-5). Teti so a mû na e kpengba matabisi ti duti awakua ti Nzapa, zia e bata tele ti e na sioni oko pëpe tongaso si e wara lege ti fa gloire ti Jéhovah na gigi tongana atatara.

¹⁰ Azo so ayeke na yâ bingo na lege ti yingo alingbi pëpe ti bâ gloire ti Jéhovah wala fango ni na gigi na lege ti Jésus Christ, Kota Moïse. Me teti so e yeke awakua ti Jéhovah, e yeke wara lumière ti gloire ti Jéhovah so alondo na Mbeti ti Nzapa, na e kiri e tokua ni na ndo ti ambeni zo. Tongana ala so laso angbâ na yâ bingo na lege ti yingo aye ti wara futingo pëpe, a lingbi ala wara lumière ti Nzapa. Ni la, a yeke na kota ngia nga na wâ mingi si e yeke bata komandema ti Nzapa ti sala si lumière aza na yâ bingo teti gloire ti Jéhovah.

Zia lumière ti mo aza na ngoi so mo yeke manda Bible na azo

¹¹ Jésus atene lani na adisciple ti lo: “I yeke lumière ti sese so. A lingbi honde kodoro pëpe so ayeke na li ti hoto. Tongana azo asala wâ na lampe, ala zia na gbe ti sakpa pëpe, me ala zia lampe ni na ndo fotoforo, na lampe ni amû lumière na azo kue so ayeke na yâ da. Tongaso i zia lumière ti i aza na gbele azo, si ala lingbi bâ nzo kusala ti i, na ala mû gloire na Babâ ti i so ayeke na yayu.” (Matthieu 5:14-16). Nzoni tambela ti e alingbi ti pusu ambeni zo ti mû gloire na Nzapa (1 Pierre 2:12). Nga, ambage nde nde ti fango nzo tënë azi alege mingi na e ti sala si lumière ti e aza. Mbeni oko ti akpengba ye so e gi ti sala ayeke ti fa na gigi lumière ti yingo so alondo na Mbeti ti Nzapa na lege ti mandango Bible nzoni na azo. So ayeke mbeni kpengba lege ti sala kusala ti e kue. Awango wa alingbi ti mû maboko na e ti manda Bible na azo na mbeni lege so andu bê ti ala so ayeke gi tâ tënë?

¹² E yeke fa na gigi so e ye biani ti manda Bible na azo na sambelango Jéhovah na ndo tënë so. A fa nga so e yeke bâ nene ti mû maboko na ambeni zo ti wara hingango ye ti Nzapa (Ezéchiel 33:7-9). Kite ayeke pëpe so fade Jéhovah ayeke kiri tënë na asambela ti e na lo yeke hiri deba nzoni na ndo angangu so e yeke sala na bê kue na yâ kusala ti fango tënë (1 Jean 5:14, 15). Me e yeke sambela gi pëpe ti wara mbeni zo so e lingbi ti manda Bible na lo. Na pekoni so e to nda ti manda Bible awe na mbeni zo, e lingbi ti sambela na ndo aye so andu wamandango Bible ni mbilimbili nga ti bi bê na lo; salango tongaso ayeke mû ande maboko na e ti sala si ngoi oko oko kue ti mandango Bible ni atambela nzoni.​—aRomain 12:12.

¹³ Ti tene mandango Bible na azo atambela nzoni, a lingbi e leke tele ti e nzoni teti mandango ye ni oko oko. Tongana e bâ so e lingbi pëpe, a yeke duti peut-être nzoni ti bâ kode so surveillant ti Mandango Buku ayeke sala na ambage ti buku so e yeke manda yenga oko oko. E lingbi mbeni lâ ti gue na fango tënë na tele ti awafango tënë ti Royaume so awara aye ti nzoni mingi na mandango Bible na azo. Me a yeke bango ndo nga na akode ti fango ye ti Jésus Christ si e ye mbilimbili ti bi lê ti e dä.

¹⁴ Jésus awara ngia mingi ti sala ye so bê ti Babâ ti lo ti yayu aye nga ti fa na azo tënë na ndo Lo (Psaume 40:9). Lo yeke lani na tâ be-ti-molenge na lo wara lege ti ndu bê ti ala so amä tënë ti lo (Matthieu 11:28-30). Tongaso, zia e sala ngangu ti ndu bê ti ala so e yeke manda Bible na ala. Tongana e ye ti sala tongaso, a lingbi e leke tele ti e teti ngoi oko oko kue ti mandango Bible ni na ziango li ti e na ndo dutingo ti zo so e yeke gue ti manda Bible na lo. Na tapande, tongana lo kono na mbeni ndo so azo ni ahinga Bible pëpe, e lingbi peut-être ti gi lege ti ga na lo ti yeda so Bible ayeke tâ tënë. Tongaso, a lingbi e diko aversê mingi na lo na e fa nda ni.

Mû maboko na ala ti gbu nda ti atapande

¹⁵ Mbeni zo so ayeke manda Bible alingbi peut-être ti gbu nda ti mbeni tapande na yâ Bible nzoni pëpe. Na tapande, lo lingbi peut-être pëpe ti gbu nda ti ye so Jésus aye lani ti tene tongana lo sala tënë ti ziango lampe na ndo ti mbeni ye na nduzu (Marc 4:21, 22). Jésus ayeke sala lani tënë ti mbeni lampe so atambela na mafuta na mêche so ayeke za. Mara ti lampe tongaso, a yeke zia ni na nduzu si a lingbi ti za na yâ ti da ni kue. Ti gbu nda ti tapande ti Jésus so nzoni, a lingbi ti gi nda ni na yâ buku Étude perspicace des Écritures, na gbe ti tënë “Lampe”.a Me a yeke ye ti nzoni mingi ti ga na ndo ti zo ni na ambeni tënë so amû lege na lo ti gbu nda ti ye ni nzoni, na so lo wara ngia dä.

¹⁶ A lingbi ti wara na yâ mbeni mbeti ti e, mbeni tapande so a yeke ngangu na wamandango Bible ni ti gbu nda ni. Mû ngoi ti mo ti fa nda ni, wala sala kusala na mbeni tapande nde so afa gi oko tënë so. Peut-être mbeni mbeti ayeke fa so ti duti na mbeni zo so alingbi, na nga ti sala kusala maboko na maboko ayeke kota ye mingi na yâ mariage. Na ti fa ni, a lingbi ti mû tapande ti mbeni koli so alondo na ndo ti mbeni balançoire na nduzu ti tï na sese, na so mbeni mba ti lo nde agbu lo na lê ti nduzu. Ti fa ni na mbeni lege nde, a lingbi ti mû tapande so andu lege so ambeni zo ti kua ayeke luti na molongo ti yôro acarton na mba na peko ti tele, tongana ala yeke zi akungba na yâ ti mbeni kota kutukutu ti sigigi na ni.

¹⁷ Ti sala kusala na mbeni tapande nde so ague oko na ti kozoni ayeke hunda peut-être lekengo tele kozoni. Ye oko, a yeke mbeni lege ti fa so e yeke bi bê ti e na zo so e yeke manda Bible na lo. Jésus asala kusala lani na atapande so ayeke ngangu pëpe ti mû lege na azo ti gbu nda ti atënë so akpengba. Fango ye ti lo na ndo ti Hoto asigigi na atapande tongaso na Bible afa so fango ye ti lo asala lani nzoni mingi na ndo ala so amä lo (Matthieu 5:1–7:29). Jésus aduti na be-nze-pepe ti fa nda ti aye so ngbanga ti so lo yeke bi bê ti lo lani mingi na ndo amba ti lo.​—Matthieu 16:5-12.

¹⁸ Bingo bê ti e na ndo amba ti e ayeke pusu ande e ti ‘wa azo na lege ti Mbeti ti Nzapa’. (Kusala 17:2, 3). Ye so ahunda ti manda ye na sambela, nga ti sala kusala na ndara na ambeti so ‘wabatango ye be-ta-zo’ ayeke mû (Luc 12:42-44). Na tapande, na yâ buku Hingango Ye So Ague na Fini ti Lakue Lakue, a yeke wara gbâ ti aversê ti Bible.b Teti so place ayeke mingi pëpe, a zia gi ambeni versê ni tongaso me a fa tënë ti yâ ni pëpe. Na ngoi ti mandango Bible na mbeni zo, a yeke kota ye mingi ti diko na ti fa nda ti ambeni versê ni. Teti biani, fango ye ti e aluti na ndo Mbeti ti Nzapa so ayeke na ngangu mingi (aHébreu 4:12). Gboto lê mingi na ndo Bible na ngoi ti amandango ye ni oko oko, na salango kusala mingi na aversê so a wara na yâ aparagraphe. Mû maboko na wamandango Bible ni ti bâ ye so Bible atene na ndo mbeni tënë tongaso wala mbeni ye so lo yeke sala. Sala ngangu ti fa na lo tongana nyen lo yeke wara ye ti nzoni na lege ti mango yanga ti Nzapa.​—Esaïe 48:17, 18.

Hunda atënë so apusu zo ti gbu li

¹⁹ Lege so Jésus asala kusala na kode na ahundango tënë amû maboko lani na azo ti gbu li (Matthieu 17:24-27). Tongana e hunda ambeni tënë na wamandango Bible ni ti hinga abibe ti lo na ndo ambeni ye, na si ahundango tënë ni asala pëpe si lo wara kamene, fade akiringo tënë ti lo alingbi ti fa na gigi tâ bibe ti lo na ndo mbeni tënë tongaso. E lingbi ti bâ so lo ngbâ lakue na ambeni bango ndo so ague nde na ti Mbeti ti Nzapa. Na tapande, lo lingbi peut-être ti mä na bê na Nzapa ti li ota. Na chapitre ota, buku Hingango Ye afa so tënë ti ‘Nzapa ti li ota’ asigigi pëpe na yâ Bible. Buku ni afa aversê so amû lege ti bâ so kangbi ayeke na popo ti Jéhovah na Jésus, na so yingo vulu ayeke ngangu so Nzapa ayeke sala na kusala, me pëpe tâ zo. Ti diko na ti fa nda ti aversê ni alingbi peut-être awe ti tene lo gbu nda ni. Ka tongana a hunda ti fa ambeni ye na ndo ni? Tongana e ga ti peko si e manda ye na lo tongana ti so e yeke sala ka lakue, na hunzingo ni e lingbi ti mû mbeni ngoi na pekoni ti sala nzoni lisoro na ndo tënë ni na yâ mbeni mbeti nde ti aTémoin ti Jéhovah so afa tënë mingi na ndo ni, na tapande brochure Doit-on croire à la Trinité? Na pekoni, e lingbi ti kiri na buku Hingango Ye ti gue na tanga ti amandango ye ni.

²⁰ Ka tongana e ku tele ti e pëpe na mara ti kiringo tënë so wamandango Bible ni amû ti fa tënë ti bê ti lo, wala même tongana e wara vundu dä, e yeke sala tongana nyen? Tongana a ndu tënë ti nyongo manga wala mbeni ye nde so zo ni ayeke sala, e lingbi ti hunda ti tene e gue na li ni na yâ mandango ye ni na ti kiri na ndo tënë so mbeni lâ. Ti hinga so wamandango Bible ni angbâ lakue ti nyon manga ayeke mû lege na e ti gi ambeni tënë so a fa na mbeti awe, na so alingbi ti mû maboko na lo ti gue na li ni na lege ti yingo. Na ngoi so e yeke sala ngangu ti ndu bê ti wamandango Bible ni, e lingbi ti sambela ti tene Jéhovah amû maboko na lo ti gue na li ni na lege ti yingo.

²¹ Na lekengo tele ti e nzoni nga na lege ti mungo maboko ti Jéhovah, kite ayeke pëpe so fade e yeke wara lege ti leke akode ti fango ye ti e si a lingbi mbilimbili na wamandango Bible ni. Tongana ngoi ayeke hon, e lingbi ti wara lege ti mû maboko na lo ti lë tâ ndoye teti Nzapa. E lingbi nga ti sala si lo yekia na lo kiri singila teti bungbi ti Jéhovah. Nga, a yeke ye ti mungo ngia na zo tongana awamandango Bible ayeda so ‘Nzapa ayeke na popo ti e’. (1 aCorinthien 14:24, 25). Tongaso, zia e manda Bible nzoni na azo na e sala ye kue so e lingbi ti sala ti mû maboko na azo ti ga adisciple ti Jésus.

Mbeni mosoro so a lingbi e yekia ni

²² Ti sala kusala ti e kue, a lingbi e zia bê ti e kue na ngangu so Nzapa amû na e. Na salango tënë ti kusala ti fango tënë, Paul asû mbeti so na aita ti lo Chrétien so a sa yingo na ndo ti ala: “E yeke na mosoro so na yâ ta ti sese si azo alingbi hinga kota ngangu alondo na Nzapa, a londo na e pëpe.”​—2 aCorinthien 4:7.

²³ Atâa e yeke na popo ti ala so a sa yingo na ndo ti ala wala ti “ambeni ngasangbaga”, e yeke tongana ata ti sese so akpengba pëpe (Jean 10:16). Ye oko, Jéhovah ayeke mû na e ngangu so alingbi, ti yô akungba ti e atâa angangu so ayeke sala na ndo e (Jean 16:13; aPhilippien 4:13). Tongaso, a yeke nzoni e zia bê ti e kue na Jéhovah, e yekia matabisi ti e ti kusala nga e sala kusala ti e kue.

[Akete tënë na gbe ni]

Fade mo kiri tënë tongana nyen?

• Ye nyen a-ancien alingbi ti sala ti wara lege ti sala kusala ti ala kue?

• Tongana nyen e lingbi ti maï kode ti e tongana e yeke manda Bible na azo?

• Ye nyen mo lingbi ti sala tongana mbeni wamandango Bible agbu nda ti mbeni tapande pëpe wala lo ye ti wara ambeni tënë mingi na ndo mbeni ye oko?

[Ahundango tënë ti manda na ye]

1, 2. Atâa so aChrétien kue ayeke awafango nzo tënë, ye nyen a ku nga na mbage ti a-ancien na so a fa ni na yâ Mbeti ti Nzapa?

3. Ye nyen a lingbi a sala ti tene afango ye ti wataka asala sioni pëpe na lege ti yingo na kongregation?

4. Ye nyen alingbi ti mû maboko na e ti sala kusala ti e kue?

5. Tongana nyen a lingbi e bâ kusala ti e ti fango tënë?

6. Kangbi wa a bâ na popo ti Israël ti mitele na Israël ti yingo?

7. Tongana nyen azo alingbi ti fa gloire ti Nzapa na gigi?

8. Na ndo tënë ti kusala ti e, ye nyen Paul aleke lani na bê ti lo ti sala?

9, 10. Tongana nyen e lingbi ti wara lege ti fa gloire ti Jéhovah na gigi?

11. Ye nyen Jésus atene lani na ndo tënë ti salango si lumière ti e aza? Na mbeni lege ti salango ni na yâ fango tënë ayeke so wa?

12. Na lege wa sambela na kusala ti e ti mandango Bible na azo ague oko?

13. Ye nyen alingbi ti mû maboko na e ti manda Bible nzoni na azo?

14. Tongana nyen e lingbi ti ndu bê ti mbeni zo so e manda Bible na lo?

15, 16. (a) Tongana nyen e lingbi ti mû maboko na mbeni wamandango Bible so agbu nda ti mbeni tapande ti Bible pëpe? (b) Ye nyen e lingbi ti sala tongana mbeni oko na popo ti ambeti ti e afa mbeni tapande so a yeke ngangu na mbeni wamandango Bible ti gbu nda ni?

17. Ye nyen e lingbi ti manda na mbage ti Jésus na ndo tënë ti salango kusala na atapande?

18. Ye nyen a yeke nzoni ti sala na aversê so a zia na yâ ambeti ti e?

19, 20. (a) Ngbanga ti nyen a yeke nzoni ti hunda atënë so apusu wamandango Bible ti fa tënë ti bê ti lo? (b) Ye nyen e lingbi ti sala tongana e bâ so mbeni tënë ahunda ti tene e kiri e hasa yâ ni mingi?

21. Ye nyen alingbi ti si tongana e leke akode ti fango ye ti e ti lingbi mbilimbili na mbeni wamandango Bible?

22, 23. Ye nyen ahunda na e tongana e ye ti sala kusala ti e kue?

[Foto na lembeti 16]

A-ancien ayeke fa ye na kongregation nga ala yeke mû maboko na aita ti ala ti leke ala na yâ kusala ti fango tënë

[Foto na lembeti 18]

Mandango Bible nzoni na azo ayeke mbeni lege ti sala si lumière ti e aza