Atënë so azo ahunda
Ye wa asi na yâ ye so a sala tënë ni na Exode 4:24-26, na fini ti zo wa ayeke lani na yâ kpale?
Moïse ayeke lani na lege ti gue na Egypte, lo na wali ti lo Séphora nga na amolenge ti lo ti koli Guersom na Eliézer tongana ye so asi: “Tongana Moïse ayeke na lege, na ndo ti lango, L’Eternel atê lo na agi lege ti fâ lo. Tongaso Séphora akamata tênë so aza, lo fâ poro ti pito ti molenge ti lo ti koli, lo bi poro ti pito ni na sese na gbe gere ti [lo], na lo tene, Biani mo yeke fini-koli ti sango mênë. Tongaso [lo] zia lo. Teti tënë ti fango ganza, Séphora atene, Mo yeke fini-koli ti sango mênë.” (Exode 4:20, 24-26). Biani, tënë so asigigi polele pëpe na a lingbi nga ti gbu nda ni mbilimbili pëpe; ye oko, mbeti ti Nzapa azi ambeni nda ti aversê so.
Tondo ni afa mbilimbili pëpe fini ti zo wa si ayeke lani na yâ kpale. Ye oko, e lingbi ti tene tâ na lege ni so ayeke pëpe fini ti Moïse si ayeke lani na yâ kpale, teti lo londo ti wara mbeni tokua so Nzapa amû na lo ti zi amolenge ti Israël na Egypte (Exode 3:10). A bâ so alingbi ti duti na lege ni pëpe so, na guengo ti sala ye so Nzapa ahunda na lo, fini ti Moïse ayeke na yâ kpale na gbele ange ti Nzapa. Tongaso, a lingbi fade ti duti fini ti oko ti amolenge ti Moïse si ayeke na yâ kpale. Ndia so andu fango ganza, so a mû giriri na Abraham, atene: “Koli so a fâ lo na ganza pëpe, lo so a fâ poro ti pito ti lo na ganza pëpe, fade a lungula zo so na popo ti azo; lo ke tënë ti mbele ti Mbi awe.” (Genese17:14). A lingbi ti tene so Moïse abi bê ti lo lani pëpe ti fâ molenge ni na ganza, nda ni la si fini ti molenge ni ayeke na yâ kpale na gbele ange ti Jéhovah.
Na ngoi so Séphora afâ molenge ni na ganza ti kiri ye na lege ni, poro ti pito ti molenge ni so lo fâ andu gere ti zo wa? A yeke lani ange ti Jéhovah si ayeke na ngangu ti futi fini ti molenge ni so ade a fâ lo na ganza pëpe. Tongaso, a yeke na lege ni ti tene so Séphora asala si poro ti pito ti molenge ni andu gere ti ange ni ti fa na lo so lo sala ye alingbi na tënë ti mbele ni awe.
Tënë so Séphora atene “mo yeke fini-koli ti sango mênë” ayeke mbeni mara ti tënë so a yeke tene ni ka lakue pëpe. Tënë so lo tene afa ye wa na ndo lo? Na salango ye alingbi na aye so mbele ti fango ganza ahunda, Séphora ayeda na mbeni songo ti mbele na Jéhovah. Na pekoni, mbele ti Ndia, so a te lani na amolenge ti Israël, afa so na yâ ti songo ti mbele ni, a lingbi ti bâ Jéhovah tongana koli ni na mbeni mbage ti mbele ni tongana wali ni (Jérémie 31:32). Tongaso, na salango tënë na Jéhovah (na lege ti ange so aga na iri ti lo) tongana “mbeni fini-koli ti sango mênë”, a bâ so Séphora afa na gigi so lo mveni lo yeda na atënë ti yâ ti mbele ni so. A yeke tongana ti so lo yeda ti duti na yâ mbage ti mbele ti fango ganza so a bâ ni tongana wali ni, si Jéhovah ayeke tongana koli ni. Atâa ye ni ayeke so wa, kpengba ye so lo sala ti fa so lo yeda na ye so Nzapa ahunda asala si fini ti molenge ti lo alingbi ti duti na yâ kpale mbeni pëpe.