Tondo ti awafango tënë ti Royaume

Fango tënë na azo na place ti kua ti ala

YE WA so ague oko bazengele Matthieu, Pierre, André, Jacques na Jean ayeke na ni na popo ti ala? Jésus ahiri ala kue na ngoi so ala yeke lani na place ti kua ti ala. Pierre, André, Jacques na Jean abi tele ti ala lani na yâ kua ti gingo susu na ngoi so Jésus atisa ala: “I ga na peko ti Mbi.” Matthieu ayeke lani na biröo ti futango lampo si a hiri lo ti ga disciple ti Jésus.​—Matthieu 4:18-21; 9:9.

Ti fa tënë na azo na place ti kua ti ala alingbi ti ga na aye ti nzoni. Na hingango ye so, ade ti ninga pëpe, aTémoin ti Jéhovah ti Japon abungbi ngangu ti ala kue ti bi tele ti ala na yâ mbage ti kusala ti fango tënë so. Aye ti pekoni ayeke so wa? Na yâ ti kete nze tongaso, a sala avizite saki mingi nga a to nda ti mandango Bible na azo 250. Zia e bâ aye so asi.

Mbeni wakua ti ngoi kue ti Tokyo atingbi na mbeni wayinda ti ndo ti tengo kobe so asala lani lisoro na mbeni Témoin a sala ngu 30 tongaso awe, na ngoi so lo ngbâ ti gue na ekole. Atâa so giriri wayinda ni agbu nda ti aye ni nzoni pëpe, tënë ti Bible agbu bê ti lo. Teti so a kiri a zingo fadeso nzara ni na bê ti lo, lo yeke ndulu ti yeda ti manda Bible na salango kusala na buku Hingango Ye So Ague na Fini ti Lakue Lakue.a Na ndo ni, lo to nda ti mbeni kapa ti dikongo Bible lo mveni na bï oko oko kozoni ti gue ti lango.

Na ngoi so lo yeke sala vizite na mbeni biröo, mbeni pionnier spécial ahunda ti bâ wayinda ni. Ye oko, wayinda ni ayeke na ngoi pëpe ti sala lisoro na ita ni. Maseka-wali so akiri tënë na singa ti wayinda ni atene: “Mo ye ti sala lisoro na mbi?” Na peko ti kete lisoro na téléphone, maseka-wali ni aga na ndo ti yambango zo na lo tene so nzara ti dikongo Bible asala lo. Pionnier spécial ni aleke ti kiri ti ga na lo mbeni Bible na ato nda ti manda Bible na lo na yâ mbeni ndo ti hungo tele so ayeke ndulu na place ti kua ti wali ni, hio na ndapelele, kozoni ti tene wali ni ague na kua.

Na mbeni biröo nde, mbeni koli abâ mbeni wali so asala kua oko na lo na mungo Tour ti Ba Ndo na Réveillez-vous! so mbeni Témoin amû na lo. Tongana Témoin ni ague awe, hio wali ni abi apériodique ni. Tongana koli ni ague na kodoro, lo fa ye so asi na wali ti lo so ayeke Témoin, na lo tene so tongana a yeke lo, ka lo lingbi kamême ti mä tënë ni kete. Molenge ti lo so amä tënë ni ague asala tënë ni na mbeni Témoin so ayeke fa tënë na yâ andokua ti dengo buze na yâ territoire so. Hio, Témoin ni ague abâ koli ti ita-wali ni na biröo ti lo na lo to nda ti manda Bible na lo. Ngoi kete na pekoni, koli ni ato nda ti gue lakue na abungbi ti dimanche.

Ti fa tënë na azo na place ti kua ti ala ayeke ga na ambeni deba nzoni. Mingi ti awafango tënë na Japon amaï kode ti ala ti sala avizite na yâ akota ndo ti kango ye, akota da ti lekengo ye nga na yâ ti abiröo. Nga, na lege ti fango tënë so, a yeke wara azo mingi so azia ti fa tënë na a to nda ti manda ye na ala. Aye so asi na pekoni ayeke nde mingi. Ade ti ninga pëpe, mbeni kongregation na bê ti Tokyo awara a-étude 108, so ti tene wungo ni ague na li ni fani use ahon ti so kongregation ni awara na yâ ti ngu so ahon.

[Kete tënë na gbe ni]