Fango Tene na Singa so Alë Lengo

¹ Ye so e, aTémoin ti Jéhovah, azia na gbele ala ayeke pepe gi ti bi tele na yâ fango nzo tene me nga ti ndu zo oko oko tongana lege ayeke dä na tokua ti Royaume. (Kus. 10:42; 20:24) Atä so kusala ti fango tene da na da angbâ ti duti lakue kota lege ti ndu azo, e ba so même na lege ti nzoni kode so e lingbi ti wara azo kue pepe. Tongaso, ti ‘sala kusala ti e kue,’ e yeke sala kusala na ambeni kode nde, so na popo ni awara fango tene na singa, ti wara azo so ayeke tongana angasangbaga.​—2 Tim. 4:5.

² Na yâ ti ando mingi, azo alango na yâ ti ada so a bata ni ngangu, akota da ti asewa mingi, wala abungbi ti ada mingi so gbagba angoro ni, ando so a yeke ngangu ti fa tene da na da ti ndu azo tongana ti so e yeke sala lakue. Même na yâ ti aterritoire so e lingbi ti sala kusala dä da na da, azo mingi ayeke na yanga-da ti ala pepe. Ye oko, awafango tene mingi ayeke lë anzoni lengo na ndungo azo so na lege ti pikango singa. Na mbeni ndapelele ti kusala ti fango tene da na da, mbeni ita-koli na wali ti lo awara pepe azo gumbaya na yanga-da. Na pekoni so ala kiri na Da ti Royaume, ala gi iri ti azo ni na yâ ti annuaire ti singa so a-adresse nga na molongo ti singa ti azo ayeke na yâ ni. Ala pika singa na ala wara miombe ti azo so na yanga-da ti ala!

³ Mo yeke ndulu pepe ti yôro fango tene na singa na yâ kusala ti mo? Mbeni ita-koli atene: “Mbi ye pepe ti tene mbeni zo apika singa na mbi na da ti kä ye na mbi, tongaso na li ti mbi, mbi ye pepe mara ti fango tene tongaso.” Ye oko, na pekoni so lo pika singa gi fani use, lo tene: “A nzere na mbi mingi! Mbi bi bê ti mbi lâ oko pepe so a lingbi ti si, me a nzere na mbi mingi! Azo asala tene na mbito pepe na yâ ti singa, na mo yeke na ye kue so alingbi ti mu maboko na mo na gbele mo. A tambela nzoni mingi!” Mbeni ita-wali atene nga tongaso: “Biani, fango tene na singa asala la ni ye oko na ndo ti mbi pepe. Ti tâ tene ni, mbi yeke la ni na nzala pepe ti sala ni. Me mbi tara ni na mbi ba so a lë lengo mingi. Mbi yeke na afini vizite 37 so aga na lege ti fango tene na singa nga na amandango Bible mingi so ahon ndo ti mbi!” Tongana mo ye biani ti tara ti fa tene na singa, mo nga mo lingbi ti wara nzoni dä.

⁴ Lekengo ye teti fango tene na singa: Kusala ti fango tene ti kongrégation aga na gbe ti fango lege ti surveillant ti yaka. A lingbi na bezoin ni, komite ti a-ancien alingbi ti soro ti hiri mbeni ancien wala mbeni serviteur ti mungo maboko so alingbi kue ti sala kusala maboko na maboko na komite ni na yâ lekengo ye teti fango tene na singa. A lingbi tene ni andu nga ita-koli so aba lege ti aterritoire, teti lo si ayeke mu ande na aita aterritoire na ayeke bata nzoni a-note so amu. Legeoko nga, fade surveillant ti circonscription ayeke bi bê ti lo na ndo maïngo ti programme ni.

⁵ Tongana ambeni ndo ayeke dä na yâ territoire ti i so a yeke ngangu ti fa tene da na da na yâ ni, a lingbi ti sala si aga aterritoire so a yeke fa ande tene dä na lege ti singa. Fade ita so ahiri lo ti ba lege ti kusala ni ayeke sala mbeni molongo ti a-adresse so ayeke gbian ande ti ga mara ti aterritoire tongaso, so a lingbi a bata si aduti kete si a lingbi ti sala kusala dä lakue. Fade a yeke zia mbeni marque na ndo ti a-carte ti territoire kue so ayeke na ando tongaso, na fango so a mu mbilimbili mbage so teti fango tene na singa.

⁶ Mo lingbi ti wara amolongo ti singa ni na ndo wa? Mo lingbi ti wara mbeni annuaire ti singa-me so afa amolongo ti singa ni na a-adresse ti azo na yâ mbeni da ti batango ambeti. Tongana mbeni kota da so a bata ni ngangu ayeke na annuaire ti lo mveni, peut-être mo lingbi ti wara amolongo ti singa ni na yâ ni. Tongaso pepe, lege alingbi ti duti dä ti ba iri ti azo so ayeke lango na ndo ni so na ndo bozo-mbeti so ayeke na yâ ti couloir ti da ni na ti gi na pekoni na yâ ti mbeni annuaire ti singa.

⁷ A-ancien alingbi ti bi bê ti ala mingi na ndo kusala so na lekengo ti tene aita so alë lengo mingi na yâ fango tene so amu maboko na ambeni, peut-être na lege ti programme Apionnier Amu Maboko na Azo. Ngoi na ngoi, a lingbi ti mu mbage “Aye so atia kongrégation” ti Bungbi ti Kusala ti sala si mbage ti fango tene so amaï nzoni ahon.

⁸ Na ngoi so a-ancien asala avizite pastoral na azo ti kobela wala azo so tele ti ala anze so alango gi na yâ ti da, ala lingbi ti duti ndulu ti mu maboko na aita so ti mu tele ti ala na yâ fango tene na singa. Peut-être mbeni ancien alingbi ti pika singa kete na azo na ngoi so wafango tene ni ayeke ba lo na salango ni. Na pekoni wafango tene ni alingbi ti wara ngia ti pika singa na mbeni zo. Mingi ti ala so ato nda ni tongaso amu lâ oko oko ambeni kete penze-ngbonga na yâ kusala so, na ala wara biani ngia dä.

⁹ Awango ti lë alengo: Tongana Jésus atokua adisciple ti lo ti fa tene, lo “to ala use use.” (Luc 10:1) Ngbanga ti nyen? Lo hinga so na salango kusala legeoko ala yeke manda ye na ala yeke mu maboko na popo ti ala. A yeke nga tâ tene na yâ fango tene na singa. Tongana mo sala kusala na mbeni mba ti mo, i lingbi ti fa ye na popo ti mba, ti sala lisoro na ndo aye so i wara, na ti mu awango teti lisoro ti peko. Même na ngoi ti pikango singa, i lingbi ti mu maboko na popo ti mba ti wara atene so alingbi.

¹⁰ Ti sala si mo bi bê na mo bata lê mbilimbili na ndo ye so mo tene, duti na ndo so mo lingbi ti tanda na gbele mo ambeti ti fa na tene: Bible, buku Comment raisonner, brochure Ahunda, apériodique na ambeni buku tongaso. Sû na mbeti ambeni kode ti fango ye, na zia ni ndulu na mo. Leke tele ti mo ti mu anzoni note so aye kue ayeke na yâ ni, so andu nga lango ni na ngbonga ti lango ni, si mo lingbi hinga ngoi wa ti ba peko ti nzala so a fa teti tene ni.

¹¹ Mingi ni azo ayeke sala hange tongana mbeni wande apika singa na ala. Tongaso, sala tene na wâ, na nzobe, nga na kode. Gi go ti mo si alingbi ti fa na zo ni wala mo yeke nzoni zo na mo yeke na bê ti mbilimbili. Gi bê ti mo pepe na zia si tene ni alondo na bê ti mo. Sala tene yeke nga polele na mbeni go so zo ni alingbi ti mä mo nzoni. Zia zo ni awara lege ti sala tene. Fa iri ti mo kue, na fa so mo lango na yâ ti vaka ni. E ye pepe ti tene azo abi bê so e yeke azo so ayeke kä ye kango na lege ti singa. Ahon ti tene na zo ni so mo yeke hiri azo kue so ayeke lango na yâ ti mbeni mbilimbili da, fa so mo gi lege ti sala tene na lo.

¹² Akode ti fa na tene na lege ti singa: A lingbi ti sala kusala na mingi ti afango ye so ayeke na lembeti 2-7 ti brochure Lege ti To Nda na ti Ngbâ ti Sala Alisoro na ndo Bible ti fa na tene na lege ti singa. Mo lingbi ti tene: “Mbi yeke pika singa na mo teti so mbi lingbi pepe ti ga na ti ba mo na da ti mo. Nda ti hiringo mo ayeke ti hunda bibe ti mo na ndo mbeni kota hundango tene.” Na pekoni hunda tene ni.

¹³ A lingbi ti sala kusala na kozo kode ti fango ye na gbe ti li ti tene “Bira/Siriri” tongaso: “Allo! Iri ti mbi ayeke _____. Mbi lango na yâ vaka ni. Mbi ye ti fa na mo so mbi yeke kä mbeni ye pepe wala mbi yeke hunda tene teti mbeni kapa ti gingo nda ti ye pepe. Mbi pika singa ngbanga ti so mbi bi bê ti mbi na ndo atene so andu nzoni duti ti azo. Kengo-ndia ayeke mingi na tele ti e, na a sala ngangu na ndo fini ti e. Mo bi bê ti mo so mbeni ngoi ayeke duti ande dä so azo kue alingbi ti tambela na bï na ndo ti lege na yâ ti siriri? [Zia zo ni akiri tene.] Zia mbi diko ye so Nzapa azê ti sala.”

¹⁴ Salango kusala na kode so ague na amandango Bible hio na lege ti singa alë anzoni lengo. Mo lingbi ti fa na zo ni na yâ ti akete penze-ngbonga tongana nyen a yeke manda Bible na azo. Hunda na zo ni ti kiri ti ba lo na yanga-da ti lo ti ngbâ ti manda Bible, wala tongana zo ni aye pepe, hunda na lo ti ngbâ ti sala ni na lege ti singa na mbeni lango nde.

¹⁵ Tongana mo yeke hunzi mbeni lisoro, glisa pepe ti hunda na zo ni mbeni tene so ayeke gue ande na mo ti sala fini vizite na da ti zo ni wala ti tokua na lege ti poste mbeni mbeti. Tongana zo ni ayeke ndulu pepe ti mu adresse ti lo na mo, hunda ti kiri ti pika singa na lo mbeni. Mo lingbi ti pika singa fani mingi kozoni si lo ba so lo lingbi awe ti tisa mo na da ti lo.

¹⁶ Mu li ni: Mbeni ita-wali ti ngu 15 ato nda ti kusala ti lo ti ndapelele na lege ti mbeni pikango singa. Lo sala tene na mbeni wali so ayeda ti wara buku Hingango Ye. Tongana ita-wali ni ague na buku ni na da ti lo, wali ni aye ti hinga tongana nyen maseka so ahinga molongo ti singa ti lo, teti a yeke na yâ ti annuaire pepe. Ita-wali ni asala molongo ti singa ni na lege ni pepe! Wali ni ayeda na mbeni mandango ye na lo yeke fadeso mbeni wafango tene so ade amu batême pepe.

¹⁷ Mbeni ita-wali awara mbeni territoire so afa tene dä na lege ti singa, me lo sala kusala dä pepe teti yenga ota teti so mbito asala lo. Ye nyen amu ngangu na lo ti to nda ni? Lo dabe lo na article ti Réveillez-vous! ti 22 janvier 1997 so li ti tene ni ayeke “Lorsque je suis faible, c’est alors que je suis puissant.” A sala tene na ndo ti mbeni ita-wali so afa tene na lege ti singa atä so tele ti lo anze. Ita-wali ni atene: “Mbi sambela Jéhovah na mbi hunda na lo ti wara ngangu. Mbi hunda lo ti mu na mbi atene so alingbi si mbi fa na zo ni ye so mbi leke ti tene.” Ye so asi na peko ti kozo lango ti lo ti fango tene na singa ayeke la ni nyen? Lo tene: “Jéhovah amä sambela ti mbi. Azo adengi mê ti ala ti mä mbi, na mbi leke ti sala mbeni fini vizite.” Na pekoni, fango tene ti lo na singa ague na mbeni mandango Bible. Lo hunzi tene ti lo tongaso: “Jéhovah akiri afa na mbi ti zia bê gi na lo na pepe na mbi mveni.”​—aProv. 3:5.

¹⁸ Fango tâ tene na lege ti singa aga mbeni kode ti fango nzo tene so alë lengo mingi. E leke tele ti e nzoni, na e mu mbage ti e na ni na bê kue. Zia si bê ti e anze pepe tongana akozo pikango singa ti e awara pepe anzoni kiringo tene. E sambela ti wara fango lege ti Jéhovah, na e sala tene na ambeni ita so ayeke fa tene na pendere lege so ti hinga akode so ala ba atambela nzoni. Na nzala ti manké zo oko pepe na yâ ti territoire ti e, zia e sala kusala ti e mbilimbili nga na bibe so e lingbi ti ku pepe.​—aRom. 10:13, 14.