Deba nzoni na ndo ala so amû gloire na Nzapa

“Fade ala ga ti sambela na gbele Mo, O Seigneur [“Jéhovah”, NW ], na fade ala mû gloire na iri ti Mo.”​—PSAUME 86:9.

JÉHOVAH alingbi na gonda so alondo na aye kue so lo leke. Na ngoi so aye so lo leke na so ayeke na fini pëpe ayeke mû gloire na lo sân ti sala tënë, e azo, e yeke na ngangu ti fa nda ti tënë, ti gbu nda ti ye, ti fa bê ti kiri singila na ti voro. Tongaso, a yeke na e si wasungo psaume atene: “Sese kue, mo dekongo na ngia na Nzapa, sala bia na gloire ti iri ti Lo. Mû gloire na Lo na lege ti sepela Lo.”​—Psaume 66:1, 2.

² Azo mingi ake ti yeda so Nzapa ayeke dä wala ti mû gloire na lo. Ye oko, na yâ ti akodoro 235, aTémoin ti Jéhovah ahon kutu omene ayeke fa so ala hinga “ye ti Lo so lê abâ pëpe” na lege ti aye so lo leke, na ala “mä” tënë ti témoin so alondo na aye so lo leke, so asala tënë pëpe (aRomain 1:20; Psaume 19:3, 4). Na mandango Bible, ala ga nga ti hinga Jéhovah na ti ndoye lo. Psaume 86:9, 10 afa kozoni: “Amara kue so Mo sala, fade ala ga ti sambela na gbele Mo, O Seigneur [“Jéhovah”, NW ], na fade ala mû gloire na iri ti Mo. Teti Mo yeke kota, na Mo sala ye ti kpene, gi Mo oko ayeke Nzapa.”

³ Apocalypse 7:9, 15 ayeke sala nga tënë ti awavorongo, “azo mingi so asi singo,” so ayeke ‘sala na [Nzapa] na yâ temple ti Lo bï na lâ’. A yeke pëpe so Nzapa ahunda na awakua ti lo ti sepela lo sân ti hu tele, me awavorongo lo ni ayeke na yâ ti mbeni bungbi so ayeke na ndo ti sese kue. Ni la, tongana ndo avuko na yâ ti ambeni kodoro, awakua ti Nzapa angbâ ti fa tënë na yâ ti ambeni kodoro nde. Na lege so, a lingbi ti tene so lâ ayeke kui lâ oko pëpe na ndo azo so ayeke mû gloire na Jéhovah. Na yâ ngoi kete, “ye kue so ayeke na mbö” ayeke yä go ti lo ande ti sepela Jéhovah (Psaume 150:6). Ye oko, ti ku na ngoi ni so, ye wa e oko oko e lingbi ti sala ti mû gloire na Nzapa? Akpale wa e lingbi ti tiri na ni? Adeba nzoni wa ayeke ku ala so amû gloire na Nzapa? Ti wara kiringo tënë ni, zia e bâ tondo ti Bible na ndo Gad, kete mara ti Israël.

Mbeni kpale so a hunda ti hon ndo ni lani

⁴ Kozo ti lï na Sese ti Zendo, azo ti Gad, mbeni oko ti akete mara ti Israël, ahunda ti duti na sese so ayeke nzoni ti bata na anyama, so ayeke na tö ti ngu ti Jourdain (Nombre 32:1-5). Dutingo na ndo so ayeke hunda ti hon ndo ti akota kpale. Akete mara so ayeke na mbage ti do ayeke na popo-hoto ti Jourdain so ayeke tongana mbeni ndo ti batango tele yongoro na aturugu ti mungo kodoro na ngangu (Josué 3:13-17). Me, ti akodoro so ayeke na tö ti ngu ti Jourdain, na yâ buku ti lo Mbaï ti ndo so Kodoro ti Nzoni-kue ayeke dä (Angl.), George Adam Smith atene: “Mbeni mbilimbili ye ti kangango lege ti bata [akodoro] kue ti kota sese ti Arabie so ayeke kpangbala na so akono mingi ayeke dä pëpe. Tongaso, na ngoi kue, gbâ ti awabatango anyama so ayeke fono na nduzu ayeke mû ndo ni ngu oko oko ti bata na anyama ti ala.”

⁵ Tongana nyen kete mara ti Gad ahon lani ndo ti kpale so ye ti kanga lege na ni ayeke dä pëpe? Angu ngbangbo mingi kozoni, na ngoi so lo yeke fa prophétie na ndo gbogbo ti lo ti kuâ, kotara ti ala Jacob atene: “Gad, fade azo abungbi ti gbu lo ti pika lo; me fade lo gbu ala ti pika ndagere ti ala.” (Genèse 49:19). Na bango ni hio tongaso, atënë so alingbi ti duti ye ti mungo vundu na zo. Ye oko, ti tâ tënë ni, a yeke mbeni yanga so ahunda na azo ti Gad ti futa kula. Jacob adë lani bê ti ala so tongana ala sala tongaso, azo so aga ti gbu ala ayeke gboto tele ti ala na kamene na lê ti ala, nga azo ti Gad ayeke tomba ala, même ala so ayeke bata ndo na mbage ti peko.

Akpale so vorongo ti e atingbi na ni laso

⁶ Na tapande ti kete mara ti Gad, aChrétien ayeke na gbe ti akpale nga na anengo kungba ti bungbi ti aye ti Satan; na mbeni ye ti kpene ti bata e nde na tiringo na aye so ayeke dä pëpe (Job 1:10-12). Mingi na popo ti e ayeke tiri na akpale so andu guengo na ekole, warango kobe ti yanga nga na batango amolenge. Nga, ambeni kpale ni ayeke dä so andu gi e mveni. Ambeni alingbi ti duti na mbeni ‘kî na tele ti ala’, tongana akota kpale ti seni wala ti mbeni mbage ti tele so abuba (2 aCorinthien 12:7-10). Bibe ti bango tele na nene ni pëpe ayeke sala sana na ambeni nde. “Lâ ti sioni” so gango mbakoro aga na ni alingbi ti kanga lege na ambakoro Chrétien ti sala na Jéhovah na oko ngangu so ala yeke na ni lani.​—Zo-ti-fa-tene 12:3.

⁷ Nga, bazengele Paul adabe ti e so “e [yeke] tiri . . . na ayingo sioni ti yayu.” (aEphésien 6:12). Lakue, e yeke na gbele “yingo ti sese so”, bibe ti kpengba-li nga na ti bubango ti nzoni salango ye, so Satan na ayingo sioni ti lo ayeke huru wâ na gbe ni (1 aCorinthien 2:12; aEphésien 2:2, 3). Na tapande ti Lot so akpe mbito ti Nzapa, bê ti e alingbi ti so teti aye ti kirikiri so azo so angoro e ayeke tene na ayeke sala (2 Pierre 2:7). Satan ayeke sala ngangu na e nga. Lo yeke tiri bira na tanga ti ala so a sa yingo na ndo ti ala, “ala so abata komandema ti Nzapa, na ala bata tënë ti témoin ti Jésus.” (Apocalypse 12:17). Lo yeke tiri nga na “ambeni ngasangbaga” ti Jésus na lege ti salango ngangu nga na kangango lege.​—Jean 10:16.

Ti yeda na songo benda ti wato wala ti ngbâ ti tiri?

⁸ A lingbi e sala ye tongana nyen na gbele bira ti Satan? Na tapande ti kete mara ti Gad, a lingbi e luti ngangu na lege ti yingo na e tiri a lingbi na fango lege ti Nzapa. Mawa ni ayeke so, ambeni ato nda ti zia si akpale ti gigi ahon ndo ti ala, na ala bi bê pëpe na akungba ti ala ti yingo (Matthieu 13:20-22). Mbeni Témoin asala tënë so na ndo nda ni so kongregation ti lo akiri lani na peko na lege ti guengo na abungbi: “Aita ato nda ti woko mingi. Aye mingi ayeke sala ngangu na ndo ala kue.” Biani, laso, azo ayeke na anda ti tënë mingi ti woko. Ni la, a yeke ngangu pëpe ti bâ vorongo Nzapa tongana mbeni kpale, mbeni kungba so ane. Me, bango ndo so ayeke nzoni nga na lege ni?

⁹ Zia e bâ ye so Jésus atene na azo mingi ti ngoi ti lo so awoko teti akpale ti gigi: “I ga na Mbi, i kue so i sala kusala na i yeke na kungba so ane, na fade Mbi mû na i lege ti hu tele.” Jésus aye ti tene so hungo tele so ayeke ga na lege ti mungo mbage gi kete na kua ti Nzapa? Nde na so, lo tene: “I yô joug ti Mbi, i manda tënë ti Mbi; teti Mbi yeke na tâ be-ti-molenge na bê ti Mbi ayeke kota pëpe; na fade i wara lege ti hu âme ti i.” Joug ayeke mbeni ye so a leke ni na keke wala wen, na amû lege na mbeni zo wala nyama ti yô mbeni kungba so ane. Tongaso, ngbanga ti nyen mbeni zo aye ti yô mara ti joug so? E yeke na “kungba so ane” awe pëpe? A yeke tongaso biani, me na yanga ti Grec, a lingbi nga ti tene: “Ga na gbe ti joug ti mbi legeoko na mbi.” Gbu li kete: Jésus ayeke mû maboko na e ti gboto kungba ti e! A lingbi e sala ni na ngangu ti e mveni pëpe.​—Matthieu 9:36; 11:28, 29; 2 aCorinthien 4:7.

¹⁰ Na ngoi so e yeda ti yô joug ti Jésus tongana adisciple ti lo, e yeke tiri na Satan. Jacques 4:7 amû zendo so: “I ke zabolo, na fade lo kpe i.” Tënë so aye pëpe ti tene so kengo Zabolo ayeke ngangu pëpe. Ti sala na Nzapa, a hunda kota ngangu (Luc 13:24). Me na Psaume 126:5, Bible amû zendo so: “Azo so alu le-kobe na ngule, fade ala fâ le-kobe na ngia.” Biani, e yeke voro mbeni Nzapa so ayeke mû singila. Lo yeke “Zo ti futa ye na ala so agi Lo”, na lo yeke deba nzoni ala so amû gloire na lo.​—aHébreu 11:6.

E mû gloire na Nzapa tongana awafango tënë ti Royaume

¹¹ Jésus amû yanga: “I gue, i fa tënë na amara kue si ala ga adisciple.” Kua ti fango tënë ayeke kozo lege ti mû “sacrifice ti merci” na Nzapa (Matthieu 28:19; aHébreu 13:15). Mbeni kota mbage ti ‘ye ti bira kue’ so ayeke mû lege na e ti tiri na Satan ayeke yungo “Tene-nzoni ti siriri tongana poro na gere” ti e (aEphésien 6:11-15). Mbeni nzoni lege ti kpengba mabe ti e ayeke ti gonda Nzapa na lege ti fango tënë (2 aCorinthien 4:13). A yeke mû maboko na e ti tomba asioni bibe na li ti e (aPhilippien 4:8). Mungo mbage na fango tënë ayeke mû lege na e ti wara atënë so amû ngangu na zo na lege ti amba ti e awavorongo.

¹² A lingbi kua ti fango tënë aduti nga mbeni pendere kua teti sewa. Biani, amolenge ayeke na bezoin ti hungo tele so ayeke na lege ni. Ye oko, a lingbi ngoi so mbeni sewa amû ti fa na tënë aduti pëpe mbeni ye so ane zo. Ababâ na mama alingbi ti sala si fango tënë aduti mbeni ye so aga na ngia mingi, na fango na amolenge ti ala lege ti fa tënë nzoni. Amolenge ayeke wara ngia na lege ti aye so ala sala ni nzoni, ni la pëpe? Ababâ na mama alingbi ti mû maboko na amolenge ti wara ngia na yâ kua ti fango tënë, na hundango ye ahon ndo ni pëpe na ala.​—Genèse 33:13, 14.

¹³ Na ndo ni, songo ti azo ti sewa so ayeke sepela Nzapa legeoko ayeke kpengba. Zia e bâ tapande ti mbeni ita-wali so koli ti lo, so ayeke Chrétien pëpe, adö lo na amolenge oku azia. Tongaso, lo yeke na gbele kpale ti warango kua ti nginza nga mungo aye ti mitele na amolenge ti lo. Ye ni ahon ngangu ti lo si lo zia na peko mungo na ala aye ti yingo? Lo dabe ti lo: “Mbi yeke manda Bible nga na ambeti so aluti na ndo ni na bê kue, nga mbi yeke sala ngangu ti sala ye alingbi na aye so mbi diko. Mbi yeke gue na amolenge na abungbi nga na fango tënë da na da lakue. Aye ti pekoni ayeke so wa? Amolenge ni kue awara batême awe.” Mungo mbage kue na fango tënë alingbi nga ti mû maboko na mo na yâ ngangu so mo yeke sala ti bata amolenge ti mo “na yâ wango-tene nga na fango lege ti bibe ti Jéhovah.”​—aEphésien 6:4, NW.

¹⁴ Amaseka, tongana i yeke na yâ ti mbeni kodoro so ndia azi lege ti sala ni, i yeke mû gloire na Nzapa na fango tënë na ekole, wala i yeke zia si mbito ti zo akanga lege na i? (aProverbe 29:25). Mbeni Témoin ti Porto Rico so ayeke na ngu 13 asû na mbeti: “Mbi yeke sala kamene lâ oko pëpe ti fa tënë na ekole ngbanga ti so mbi hinga so ye so mbi fa ayeke tâ tënë. Na klase, mbi yeke yôro maboko lakue ti fa ye so mbi manda na lege ti Bible. Na ngoi ti hungo tele, mbi yeke gue na da ti batango ambeti ti diko buku Les jeunes s’interrogent.”a Jéhovah adeba nzoni angangu ti lo? Lo fa tondo so: “Ngoi na ngoi, akamarade ti mbi ti klase ayeke hunda na mbi atënë, na même ala yeke hunda ti wara mbeni buku ni.” Tongana mo yeke na kamene ti sala ni, peut-être mo yeke na bezoin ti gi ti hinga “ye so Nzapa aye, ye so ayeke nzoni, ye so alingbi na lê ti Lo, na ye so alingbi kue” na mandango ye mo mveni na bê kue (aRomain 12:2). Na ngoi so mo hinga biani so ye so mo manda ayeke tâ tënë, ‘kamene ti nzo tënë’ ayeke sala ande mo lâ oko pëpe.​—aRomain 1:16.

Mbeni “kota lege” so azi teti kusala

¹⁵ Bazengele Paul asû na mbeti so mbeni “kota lege” teti kusala azi na gbele lo (1 aCorinthien 16:9). Dutingo ti mo amû lege na mo ti to nda ti ambeni kusala nde? Na tapande, ti bi tele na yâ kua ti pionnier permanent wala auxiliaire andu mungo ngbonga 70 wala 50 nze oko oko teti kua ti fango tënë. A yeke tâ na lege ni so aChrétien ayekia mingi kua so apionnier ayeke sala na be-biani. Me mungo ngoi mingi teti kua ti fango tënë asala pëpe si ala yeke bâ tele ti ala kota ahon tanga ti aita ti ala. Nde na so, ala yeke gi ti wara bibe so Jésus awa azo ti duti na ni: “E yeke aboi senge, e sala gi ye so a yeke ngbanga ti e ti sala.”​—Luc 17:10.

¹⁶ Kua ti pionnier ahunda sengo tele, nzoni lekengo tele nga bibe ti gbanzi ye na tele. Ye oko, aye ti nzoni ti pekoni alingbi biani na ngangu so a sala ndali ni. Mbeni maseka pionnier so iri ti lo ayeke Tamika atene: “Ti hinga ti fa nda ti Tënë ti Nzapa so ayeke tâ tënë na lege ni, a yeke biani mbeni deba nzoni. Tongana mo mû kusala ti pionnier, mo yeke sala kua lakue na Bible. Fadeso, tongana mbi yeke gue da na da, mbi lingbi ti bi bê na aversê so alingbi biani na azo ni.” (2 Timothée 2:15). Mbeni pionnier so iri ti lo ayeke Mica atene: “Ti bâ tongana nyen tâ tënë andu fini ti azo ayeke mbeni ye ti nzoni so amû ngia mingi na bê.” Mbeni maseka so iri ti lo ayeke Matthew atene oko tënë so na ndo ngia so ayeke ti “bâ mbeni zo ayeda na tâ tënë ni. Mbeni ngia ti lingbi na mara ti ngia so ayeke dä pëpe.”

¹⁷ Mo lingbi ti gi ti mû kua ti pionnier? Peut-être mo ye ti sala ni, me mo yeke tene na bê ti mo so mo lingbi pëpe. Mbeni maseka-wali so iri ti lo ayeke Kenyatte atene: “Mbi yeke ândö na nzoni bibe pëpe na ndo kua ti pionnier. Mbi tene na bê ti mbi so mbi lingbi pëpe. Mbi hinga lani pëpe ti leke akozo tënë wala ti fa nda ti tënë na lege ti Mbeti ti Nzapa.” Ye oko, a-ancien amû mbeni ita-wali pionnier so ayeke biazo ti sala kua legeoko na lo. Kenyatte adabe ti lo: “A nzere na mbi mingi ti sala kua legeoko na lo. Ye so asala si mbi ye ti ga pionnier.” Na lege ti awango nga na fango lege ti mbeni zo, peut-être mo nga kue mo yeke ye ande ti ga pionnier.

¹⁸ Kua ti pionnier alingbi ti zi lege na ambeni matabisi ti kusala nde nde. Na tapande, akoli na wali so asala mariage awe alingbi ti wara fango lege ti ga missionnaire na ti fa tënë na kodoro wande. Amissionnaire alingbi ti leke dutingo ti ala ti lingbi na ti fini kodoro ni, peut-être ti manda mbeni fini yanga ti kodoro, ngobo ti salango ye nga na akobe nde. Me adeba nzoni ti pekoni ayeke sala si akpale so aga mbeni kete ye. Mildred, mbeni missionnaire na kodoro ti Mexique, so aninga na kua ni, atene: “Mbi wara vundu lâ oko pëpe ndali ti desizion ti mbi ti ga missionnaire. A yeke ye so mbi sala nzara ni ngbele ye so mbi ngbâ kete.” Aye ti nzoni wa lo wara? “Na kodoro ti mbi, a yeke ngangu ti wara mbeni zo ti manda Bible na lo. Ge na Mexique, na ambeni ngoi, azo osio so mbi manda Bible na ala ato nda ti fa tënë legeoko!”

¹⁹ Azo so ayeke sala kua tongana aBéthelite na yâ ti abiröo ti filiale ti aTémoin ti Jéhovah ayeke wara nga gbâ ti adeba nzoni. Sven, mbeni maseka ita-koli ti kodoro ti Zamani, asala tënë so na ndo kua ti lo na Béthel: “Mbi bâ so mbi yeke sala mbeni ye ti ngele ngangu so ayeke ninga. Mbi lingbi fade ti sala kua na akode ti mbi na yâ ti sese so. Me a yeke tongana batango nginza na yâ ti mbeni banque so ague ti tï.” Biani, ti sala kua tongana zo so amû tele ti lo na nzobe sân ti wara nginza na pekoni ahunda gbanzingo ye na tele. Me Sven atene: “Tongana mo kiri na da, mo hinga so ye kue so mo sala na yâ ti lango ni ayeke teti Jéhovah. Na ye so ayeke mû na mo mbeni ‘kota’ nzerengo tele.”

²⁰ Ambeni ita ayeke wara ye ti nzoni na salango kua tongana wakua ti lekengo ada teti kusala ti aChrétien na kodoro wande. Ala yeke mû mbage na lekengo afiliale. Mbeni koli na wali ti lo, so asala kua na yâ ti akodoro miombe, asû na mbeti: “Aita ti ndo ni ayeke zia ngia mingi na bê ti zo. A yeke duti ande ye ti vundu mingi ti zia ala, na so a yeke ti fani miombe ni si e yeke zia aita na kota vundu na bê. Me, so tâ pendere ye si e wara na tele ti ala!” Ekole ti Formation Ministérielle ayeke nga dä. A yeke mû fango lege na aita-koli kumbamba so alingbi. Mbeni ita so awara kota mbeti ni asû na mbeti: “A yeke ngangu na mbi ti wara atënë ti kiri singila na i ndali ti pendere ekole so. Bungbi nde wa ayeke sala ngangu ti mû mara fango lege so?”

²¹ Biani, alege mingi azi na gbele e teti kusala. Ti tâ tënë ni, mingi na popo ti e alingbi pëpe ti sala kua na Béthel wala na kodoro wande. Jésus ayeda so wungo ti alengo so Chrétien oko oko ayeke ‘lë’ ni ayeke duti ande legeoko pëpe, ndali ti so dutingo ti zo oko oko ayeke nde nde (Matthieu 13:23). Tongaso, kpale ti e aChrétien ayeke ti sala kua nzoni mingi alingbi na dutingo ti e: ti sala ye kue so dutingo ti e amû lege na e ti sala na yâ kua ti Jéhovah. Tongana e sala ni, e yeke mû gloire na Jéhovah na e lingbi ti hinga biani so a nzere na lo mingi. Bâ tapande ti Ethel, mbeni ita-wali so alango na dä ti batango ambakoro. Lo yeke fa tënë lakue na amba ti lo so ayeke na yâ ti da ni nga na lege ti téléphone. Atâa akatikati ti lo, lo sala kua ti lo na âme ti lo kue.​—Matthieu 22:37.

²² Ye oko, e dabe ti e so fango tënë ayeke gi mbeni oko ti alege so na yâ ni e yeke mû gloire na Jéhovah. Na dutingo na nzoni tapande na yâ tambela ti e nga na lekengo tele ti e tongana e yeke na place ti kua, na ekole nga na yanga-da, e yeke zia ngia na bê ti Jéhovah (aProverbe 27:11). A-Proverbe 28:20 amû zendo so: “Zo so ayeke be-ta-zo, fade nzoye ti lo awu.” Ni la, e lingbi ti ‘lu ye mingi’ na yâ kua ti Nzapa, na hingango so e yeke ko ande adeba nzoni mingi (2 aCorinthien 9:6). Na salango tongaso, a yeke duti ande matabisi teti e ti duti na fini na pendere ngoi so “ye kue so ayeke na mbö” ayeke mû na Jéhovah gloire so lo lingbi na ni biani!​—Psaume 150:6.

[Kete tënë na gbe ni]

Mo dabe mo na ni?

• Na lege wa azo ti Nzapa ayeke sala na lo ‘bï na lâ’?

• Kpale wa kete mara ti Gad atingbi na ni lani, na ye so afa nyen na aChrétien ti laso?

• Tongana nyen kua ti fango tënë ayeke ye ti batango zo na bira ti Satan?

• Ambeni zo alï na “kota lege” wa so azi na gbele ala, na adeba nzoni wa ala wara?

[Ahundango tënë ti manda na ye]

1. Ngbanga ti nyen e lingbi ti mû gloire na Nzapa na ambeni lege so ahon aye so ayeke na fini pëpe?

2. Azo wa ayeda na yanga so a hunda ti mû gloire na iri ti Nzapa, na ngbanga ti nyen?

3. Na lege wa “azo mingi so asi singo” ayeke sala na Nzapa ‘bï na lâ’?

4. Kpale wa kete mara ti Gad atingbi na ni lani?

5. Jacob awa lani ahale ti Gad ti sala ye tongana nyen na gbele azo so aga ti sala bira na ala?

6, 7. Na lege wa dutingo ti aChrétien laso akpa tongana ti kete mara ti Gad?

8. A lingbi e sala ye tongana nyen na gbele bira ti Satan, na ngbanga ti nyen?

9. Na lege wa yongo joug ti Jésus aga na hungo tele?

10. Aye wa e yeke wara na peko ti angangu so e sala ti mû gloire na Nzapa?

11. Tongana nyen kua ti fango tënë ayeke mbeni ye so amû lege na e ti tiri na Satan?

12, 13. Tongana nyen asewa alingbi ti wara nzoni na lege ti mungo mbage lakue na fango tënë? Mû mbeni tapande.

14. (a) Tongana nyen na ekole, amaseka alingbi ti mû gloire na Nzapa? (b) Ye wa alingbi ti mû maboko na amaseka ti sala kamene ti nzo tënë pëpe?

15, 16. Ambeni Chrétien alï na “kota lege” wa so azi na gbele ala teti kusala? Na adeba nzoni wa aga na pekoni?

17. Tongana nyen mbeni Chrétien ahon ndo ti asioni bibe so lo yeke na ni na ndo kua ti pionnier?

18. Adeba nzoni wa azo so amû kua ti missionnaire alingbi ti wara?

19, 20. Tongana nyen azo mingi awara adeba nzoni na lege ti kua ti Béthel, kua ti lekengo ada teti kusala ti aChrétien na kodoro wande nga na Ekole ti Formation Ministérielle?

21. Kpale wa aChrétien kue ayeke tingbi na ni na yâ kusala ti ala teti Nzapa?

22. (a) Na ambeni lege nde wa e lingbi ti mû gloire na Nzapa? (b) Pendere ngoi wa ayeke ku e?

[Foto na lembeti 15]

Tongana ti so azo ti Gad atiri lani na abungbi ti azo so aga ti gbu ala, a lingbi aChrétien atiri na Satan

[Foto na lembeti 17]

E yeke kpengba mba na angoi ti fango tënë

[Afoto na lembeti 18]

Kua ti pionnier alingbi ti zi lege na amatabisi ti kusala nde nde, so andu:

1. Kua ti lekengo ada teti kusala ti aChrétien na kodoro wande

2. Kua ti Béthel

3. Kua ti missionnaire