Fade a bâ gloire ti Nzapa na lê ti mo?

‘Azo ayeke bâ [gloire] ti Kota Gbia na ndo ti lê ti e tongana ti so zo ayeke bâ ye na yâ ti tatara.’​—2 ACORINTHIEN 3:18, Fini Mbuki, 2001.

MOÏSE ayeke lani gi lo oko na yâ Hoto ti Sinaï. Lo hunda ti bâ mbeni pendere ye so zo oko ade ti bâ pëpe. A mû na lo lege ti bâ gloire ti Jéhovah. Tâ tënë, Moïse abâ lani Jéhovah na tâ lê ti lo pëpe. Teti zango ti Nzapa ayeke ngangu mingi, zo oko alingbi pëpe ti bâ lo na ti ngbâ na fini. Ti tene ye tongaso asi pëpe, Jéhovah (na lege ti mbeni ange) azia maboko ti lo na ndo ti Moïse juska Lo hon kue si. Na pekoni, Jéhovah amû lege na Moïse ti bâ kete mbage ti gloire ti lo so. Nga, Jéhovah asala tënë na Moïse na lege ti mbeni ange. Bible afa ye so asi na pekoni: “Na tënë asi tongaso, tongana Moïse azu na Hoto ti Sinaï, . . . poro ti lê ti lo asu tongana lo sala tënë na Nzapa.”​—Exode 33:18–34:7, 29.

² Tara ti bâ mo na yâ ti hoto so na tele ti Moïse. Bâ tongana nyen a yeke ye ti pikango bê ti bâ kota zango ti Lo ti Ngangu Ahon Kue na ti mä tënë so asigigi na yanga ti lo! So matabisi ti zu na Hoto ti Sinaï na ti tambela na tele ti Moïse, wasalango-songo ti mbele ti Ndia ni! Me mo hinga so na ambeni lege lê ti atâ Chrétien aza na gloire ti Nzapa ahon ti Moïse? Kpengba ye so asigigi na yâ mbeni mbeti so bazengele Paul asû. Lo tene aChrétien so a sa yingo na ndo ti ala, ‘azo ayeke bâ [gloire] ti Kota Gbia na ndo ti lê ti ala tongana ti so zo ayeke bâ ye na yâ ti tatara.’ (2 aCorinthien 3:7, 8, 18, Fini Mbuki, 2001). Na mbeni lege, azo ayeke bâ nga sungo ti gloire ti Nzapa na lê ti aChrétien so beku ti ala ayeke ti duti na sese.

Lege so aChrétien afa na gigi gloire ti Nzapa

³ Tongana nyen lê ti e alingbi ti za na gloire ti Nzapa? E lingbi pëpe ti bâ wala ti mä go ti Jéhovah tongana ti Moïse ândö. Me ti e, e hinga Jéhovah na mbeni lege so Moïse ahinga na lo pëpe. Jésus aga na sese tongana Messie ndulu na ngu 1500 tongaso na peko ti kuâ ti Moïse. Tongaso, Moïse ahinga pëpe tongana nyen Ndia ni aga tâ tënë na yâ Jésus, so akui ti zi azo na gbe ti sioni ti siokpari na kui (aRomain 5:20, 21; aGalate 3:19). Na ndo ni, Moïse abâ lani gi kete mbage ti pendere ye so Jéhovah aleke ti sala, so aluti mingi na ndo Royaume ti Messie nga na Paradis so lo yeke ga na ni na ndo sese. Tongaso, e lingbi ti bâ gloire ti Jéhovah, pëpe na tâ lê ti e, me na lege ti mabe so aluti na ndo afango ye ti Bible. Nga, e mä go ti Jéhovah, na lege ti mbeni ange pëpe, me na lege ti Bible, mbilimbili aÉvangile, so afa pendere mingi aye so Jésus afa nga na kusala ti lo.

⁴ Lê ti aChrétien aza na gloire ti Nzapa tongana ti so lâ asu na ndo poro ti lê ti zo pëpe. Me lê ti ala aza tongana ala sala tënë ti apendere salango ye ti Jéhovah nga na aye so lo ye ti sala. Na ndo ngoi ti e, prophète Esaïe atene ândö so fade azo ti Nzapa ‘afa tënë ti gloire ti [Jéhovah] na popo ti amara.’ (Esaïe 66:19). Na ndo ni, e diko tënë so na 2 aCorinthien 4:1, 2: “E yeke na kusala so . . . E ke ye ti kamene ti lingo awe, e tambela na lege ti handa pëpe, na e zia mbeni tënë na tele ti Tënë ti Nzapa pëpe; me na lege ti fa tene-biani na gigi, e sala tënë ti nzoni ti e mveni na gbele yingo-ti-hinga ti azo kue, na lê ti Nzapa.” Paul ayeke sala tënë lani mbilimbili na aChrétien so a sa yingo vulu na ndo ti ala, so ayeke “azo ti kusala ti fini mbele”. (2 aCorinthien 3:6). Me kusala ti ala asala ngangu na ndo azo mingi mingi so awara beku ti fini ti lakue lakue na ndo sese. Kusala ti abungbi use so ayeke ti tene lê ti ala aza na gloire ti Jéhovah, gi pëpe na yâ ye so ala yeke fa na azo, me nga na yâ salango ye ti ala. A yeke kungba ti e nga matabisi ti e ti duti azo so lê ti ala aza na gloire ti Nzapa Ti Nduzu Ahon Kue.

⁵ Laso, tongana ti so Jésus atene ândö prophétie ni, a yeke fa pendere nzo tënë ti Royaume ti Nzapa na ndo lê sese kue (Matthieu 24:14). Azo na popo ti amara, ti akete mara, na ti yanga nde nde kue ayeda na ngia na nzo tënë ni na ala gbian fini ti ala ti sala ye so Nzapa aye (aRomain 12:2; Apocalypse 7:9). Tongana akozo Chrétien, ala kaï pëpe ti sala tënë ti ye so ala mä (Kusala 4:20). Laso, lê ti azo ahon kutu omene ayeke za na gloire ti Nzapa, ye so ade ti si na yâ mbaï ti azo pëpe. Mo yeke na popo ti ala? Maïngo ti aye ti yingo ti azo ti Nzapa afa na gigi deba nzoni ti Jéhovah nga lo bata ala. Maïngo so afa biani so e yeke na yingo ti Jéhovah, teti azo ti ngangu so ake e angoro na tele ti e. Zia e bâ ngbanga ti nyen a yeke tâ tënë so yingo ti Jéhovah ayeke na ndo ti e.

Ye oko alingbi ti kanga yanga ti e pëpe

⁶ Bâ si: A hiri mo ti sala tënë na yâ ngbanga ti mbeni sioni wakengo ndia. Mo hinga so sioni zo so ayeke na azo ti lo mingi, na lo yeke mû ngangu ti lo kue ti kanga lege na mo ti sala tënë ti ye so mo hinga na ndo ti lo. Ti tene mo sala tënë, a hunda ti tene mo sala mbito pëpe nga ti tene azo ti komande atene na mo so fade ala yeke bata mo na mbeni nzoni ndo. Dutingo ti e ayeke nga legeoko. Tongana e yeke fa tënë ti Jéhovah nga na ti ye so lo ye ti sala, e yeke sala tënë na tele ti Satan Zabolo, na e yeke fa lo tongana wafango zo nga wamvene so ahanda sese mobimba (Jean 8:44; Apocalypse 12:9). Ni la, ti sala tënë ti Jéhovah na ti ke Zabolo a hunda mabe nga na bê so asala mbito pëpe.

⁷ Tâ tënë, Jéhovah ayeke Lo Ti Nduzu Ahon Kue; ngangu ti lo ahon ti Satan mingi. E lingbi ti hinga na bê ti e so Jéhovah alingbi gi pëpe ti bata e, me lo yeke na nzara ti sala ni tongana e sala na lo bê-ta-zo (2 Chronique 16:9). Ye oko, Satan ayeke mokonzi ti ayingo sioni nga ti azo ti sese kue so ague yongoro na Nzapa (Matthieu 12:24, 26; Jean 14:30). So a bi lo ndulu na sese na bê ti lo asi na “ngonzo mingi,” Satan ayeke kanga lege ngangu na awakua ti Jéhovah na lo pusu sese so ayeke na gbe ti ngangu ti lo ti tara ti kanga yanga ti ala kue so ayeke fa nzo tënë (Apocalypse 12:7-9, 12, 17). Tongana nyen lo yeke sala ni? Lo yeke sala ni na alege ota tongaso.

⁸ Mbeni lege so Satan ayeke tara ti handa e ayeke na lege ti agingo bê ti gigi so. Na lâ ti nda ni so, azo andoye nginza, andoye tele ti ala mveni na ala ndoye ngia. Me, ala ndoye Nzapa pëpe (2 Timothée 3: 1-4). Teti ala bi tele ti ala na yâ akusala ti gigi so, azo mingi ‘ahinga tënë’ ti nzo tënë so e yeke gue na ni na ala pëpe. Nzara ti manda Bible asala ala même oko pëpe (Matthieu 24:37-39). Mara ti salango ye tongaso alingbi ti gbu e, ti gue na e ti sala sanka ti aye ti yingo. Tongana e lu ndoye ti akungba na ti angia ti gigi so na bê ti e, ndoye ti e teti Nzapa ayeke ga dê.​—Matthieu 24:12.

⁹ Nda ni lâ aChrétien ayeke soro akamarade ti ala nzoni. Gbia Salomon asû na mbeti: “Zo so atambela na awandara, fade lo ga wandara, me zo so aga ndeko ti awabuba, fade lo wara vundu dä.” (aProverbe 13:20). Zia e “tambela” na azo so lê ti ala aza na gloire ti Nzapa. A yeke pendere mingi ti sala ni! Tongana e bungbi na aita ti e na ngoi ti abungbi nga na ambeni ngoi nde, ndoye ti ala, mabe ti ala, ngia ti ala na ndara ti ala ayeke mû ngangu na e. Salango anzoni kamarade tongaso ayeke kpengba desizion ti e ti ngbâ ti fa tënë.

¹⁰ Ti use ni, Satan atara ti kanga lege na aChrétien kue si lê ti ala aza na gloire ti Nzapa pëpe na lege ti hengo ndo. Kode so ayeke fini ye pëpe. Na ngoi ti kusala ti lo, Jésus Christ aga ye ti ngia teti azo: azo ahe lo, akpe lo pëpe, atuku même ngu ti yanga na tele ti lo (Marc 5:40; Luc 16:14; 18:32). Akozo Chrétien nga kue aga ye ti he ti azo (Kusala 2:13; 17:32). Awakua ti Jéhovah ti ngoi ti e awara nga mara ti hengo ndo tongaso. Na yâ prophétie ti lo, Pierre atene so, biani, fade azo ayeke bâ ala tongana aprophète ti wataka. Lo tene: “Na lâ ti nda ni, fade azo ti hengo zo aga na tënë ti he, fade ala tambela na lege ti nzara nde nde ti tele ti ala mveni, na ala tene, Zendo ti singo ti Lo ayeke na ndo wa? teti, . . . ye kue angbâ legeoko tongana a yeke giriri, a komanse na lâ ni so A créé ye kue.” (2 Pierre 3:3, 4). Azo ahe awakua ti Nzapa teti ala bâ ala tongana azo so angbâ na peko na yâ aye ti gigi so. Azo abâ akpengba-ndia ti nzoni tambela ti Bible tongana ngbele ye. Azo mingi abâ tënë so e yeke fa tongana tënë ti buba (1 aCorinthien 1:18, 19). E aChrétien, e lingbi ti tingbi na hengo ndo na ekole, na place ti kua, na même ngoi na ngoi na mbage ti azo ti sewa ti e. Me atâa so kue, lê ti e angbâ ti za na gloire ti Nzapa na lege ti fango tënë ti e, teti e hinga tongana ti Jésus so Tënë ti Nzapa ayeke tâ tënë.​—Jean 17:17.

¹¹ Ota kode so Zabolo asala na kua ti tara ti kanga yanga ti e ayeke kangango lege wala salango ngangu. Jésus atene lani na adisciple ti lo: “Fade ala zia i na tïtî azo si ala sala ngangu na i, na ala fâ i; na fade amara kue ake i ngbanga ti iri ti Mbi.” (Matthieu 24:9). Biani, teti e yeke aTémoin ti Jéhovah, a sala aye ti ngangu mingi na e na ando mingi ti sese. E hinga so, Jéhovah atene ândö so kengo ndo ayeke londo na popo ti ala so asala na Nzapa na ala so asala na Satan (Genèse 3:15). E hinga nga so tongana e duti be-ta-zo na gbe ti tara, e yeke fa na gigi mbilimbili ti yanga-ti-komande ti Jéhovah na ndo dunia. Ti hinga ye so asala si e kpengba, même na gbe ti kota ye ti ngangu. Tongana e leke na bê ti e ti tene lê ti e aza lakue na gloire ti Jéhovah, mbeni salango ngangu alingbi ande lâ oko pëpe ti kanga yanga ti e biani biani.

¹² Mo yeke luti ngangu na gbele aye ti handango lê ti sese so na mo fa so mo yeke be-ta-zo atâa hengo ndo na kangango lege? Tongaso, mo yeke na raison ti duti na ngia. Jésus atene lani na ala so ayeke mû ande peko ti lo: “Ngia ayeke na i, tongana azo azonga i, na ala sala ngangu na i, na ala sala tënë ti mvene sioni nde nde na li ti i, ngbanga ti Mbi. I sala ngia, i duti na ngia mingi, teti futa ti i ayeke kota na yayu. Ala sala ngangu tongaso na aprophète so ayeke kozoni na i.” (Matthieu 5:11, 12). Tongana mo gbu ngangu, mo fa polele so yingo vulu ti Jéhovah, so ayeke kota ngangu ti lo, ayeke na ndo ti mo, akpengba mo si lê ti mo aza na gloire ti lo.​—2 aCorinthien 12:9.

Jéhovah amû maboko na e ti gbu ngangu

¹³ Mbeni kpengba tënë so ndali ni e ngbâ ti fa tënë ayeke so e ndoye Jéhovah na e ye si lê ti e aza na gloire ti lo. Azo ayeke lakue ndulu ti mû tapande ti ala so ala ye ala, na mbeni zo so a yeke nzoni ti mû tapande ti lo ahon Jéhovah ayeke dä oko pëpe. Ndali ti kota ndoye ti lo, lo tokua Molenge ti lo na sese ti fa tâ tënë na ti zi azo ti sese so amä yanga (Jean 3:16; 18:37). Tongana Nzapa, e ye si amara ti azo nde nde achangé bê ti ala na awara salut; a yeke nda ni la si e yeke fa tënë na ala (2 Pierre 3:9). Nzara so, legeoko na desizion ti e ti mû tapande ti Nzapa, apusu e ti ngbâ ti tene lê ti e aza na gloire ti lo na lege ti fango tënë ti e.

¹⁴ Ti tâ tënë ni, ngangu so amû lege na e ti ngbâ ti fa tënë alondo na Jéhovah. Lo kpengba e na lege ti yingo vulu ti lo, bungbi ti lo, nga na Tënë ti lo so ayeke Bible. Jéhovah ayeke mû “bê so azia pëpe” na ala so aye ti tene lê ti ala aza na gloire ti lo. Lo mä asambela ti e na lo mû na e ndara ti luti na lê ti atara (aRomain 15:5; Jacques 1:5). Nga, Jéhovah ayeke zia si mbeni ngangu tara ahon ndo ti e pëpe. Tongana e zia bê ti e na Jéhovah, fade lo yeke sala si e wara lege ti sigigi dä tongaso lê ti e angbâ lakue ti za na gloire ti lo.​—1 aCorinthien 10:13.

¹⁵ Tongana e gbu ngangu na yâ fango tënë, ye so ayeke fa polele so yingo ti Nzapa ayeke na ndo ti e. Na tapande: Mbeni zo ahunda na mo ti gue da na da ti kangbi mapa na azo, senge senge. Lo tene na mo ti mû nginza ti mo nga na ngoi ti mo mveni ti sala ni. Me mo ye ti bâ, gi mbeni kete wungo ti azo si aye ti mû mapa ti mo; ambeni même aye ti kanga lege na mo. Mo pensé so fade mo yeke ngbâ ti sala kua so nze na nze, ngu na ngu? A yeke ngangu. Me ti fango tënë, mo sala ngangu ti mû ngoi ti mo nga na nginza ti mo ti sala na ni teti angu mingi. Ngbanga ti nyen? A yeke ngbanga ti so mo ye Jéhovah nga na lege ti yingo ti lo, lo kpengba mo si mo gbu ngangu.

Mbeni kusala so a lingbi ti girisa ni pëpe

¹⁶ Kusala ti fini mbele ayeke mbeni matabisi so mara ni ayeke use pëpe (2 aCorinthien 4:7). Legeoko nga, fango tënë so ambeni ngasangbaga ayeke sala na ndo lê sese ayeke mbeni mosoro. Tongana mo gbu ngangu na yâ fango tënë, mo lingbi, tongana ti so Paul asû lani na Timothée, ti “sö mo mveni na ala so amä mo.” (1 Timothée 4:16). Pensé na ye kue so a ye ti tene. Nzo tënë so mo yeke fa amû na azo pasa ti wara fini ti lakue lakue. Mo lingbi ti sala mbeni kpengba songo na ala so mo mû maboko na ala na lege ti yingo. Tara ti bâ ngia so ayeke ti duti ande na fini ti lakue lakue na yâ Paradis na tele ti ala so mo mû maboko na ala ti hinga Nzapa! Biani, fade ala yeke girisa angangu so mo sala ti mû maboko na ala pëpe. So asala si tele ti zo anzere biani!

¹⁷ Ngoi so e yeke dä laso ayeke nde mingi na yâ mbaï ti azo. A yeke kiri ande mbeni pëpe ti fa nzo tënë na azo so ague yongoro na Nzapa. Noé ayeke ândö nga na popo ti mara ti azo tongaso, na lo bâ futingo ti azo ni. So ye ti ngia mingi teti lo ti hinga so lo sala tâ gi ye so Nzapa aye na lege so lo leke arche, so asö fini ti lo nga na ti sewa ti lo! (aHébreu 11:7). Mo kue mo lingbi ti wara mara ti ngia so. Pensé na duti ti mo ande na yâ fini sese tongana mo bi lê ti mo na peko ti bâ kusala ti mo na lâ ti nda ni so, na ti hinga so mo sala lani ye so mo lingbi ti sala ti maï aye ti Royaume.

¹⁸ Tongaso, zia si lê ti e angbâ ti za na gloire ti Jéhovah. Salango tongaso ayeke duti ande mbeni ye so e yeke dabe ti e na ni teti lakue lakue. Jéhovah nga ayeke dabe ti lo na kusala ti e. Mbeti ti Nzapa awa e tongaso: “Nzapa ayeke kirikiri pëpe si Lo lingbi girisa kusala ti i, ndoye so i fa giriri teti iri ti Lo, teti i sala kusala teti azo ti be-vulu, na i de ti sala tongaso. Na e ye azo oko oko kue na popo ti i ti fa na gigi nzara ti sala kusala so si i hinga tënë kue ti beku ti i juska na nda ni; teti so si, i sala goigoi pëpe, me i sala legeoko tongana ala so aga ahéritier ti zendo na lege ti mabe na be-nze-pepe.”​—aHébreu 6:10-12.

Mo lingbi ti fa nda ni?

• Tongana nyen lê ti aChrétien aza na gloire ti Nzapa?

• Ambeni kode so Satan asala na kusala ti tara ti kanga yanga ti azo ti Nzapa ayeke so wa?

• Nyen la afa atene yingo ti Nzapa ayeke na ndo ti e?

[Ahundango tënë ti manda na ye]

1. Nyen la Moïse abâ lani? Na ye wa asi na pekoni?

2. Bazengele Paul atene lani nyen na ndo gloire so ayeke na ndo lê ti aChrétien?

3. Tongana nyen e hinga Jéhovah na ambeni lege so Moïse ahinga na lo pëpe?

4. (a) Tongana nyen lê ti aChrétien so a sa yingo na ndo ti ala aza na gloire ti Nzapa? (b) Na alege wa lê ti ala so ayeke na beku ti wara fini na ndo sese aza na gloire ti Nzapa?

5. Maïngo ti aye ti e ti yingo afa na gigi nyen?

6. Ngbanga ti nyen a hunda ti duti na mabe nga na bê so asala mbito pëpe ti sala tënë ti Jéhovah?

7. Ngangu wa Satan ayeke na ni? Na ye wa lo tara ti sala?

8, 9. Tongana nyen Satan asala kusala na ndoye ti aye so ayeke na lege ni pëpe? Na ngbanga ti nyen alingbi e soro akamarade ti e nzoni?

10. Na alege wa Satan asala kusala na hengo ndo na tele ti ala so lê ti ala aza na gloire ti Nzapa?

11. Tongana nyen Satan asala kusala na salango ngangu ti tara ti kanga yanga ti aChrétien?

12. Tongana e ngbâ bê-ta-zo na gbele kangango lege ti Satan, ngbanga ti nyen a lingbi e duti na ngia?

13. Ndali ti kpengba tënë wa si e ngbâ ti fa tënë?

14. Tongana nyen Jéhovah akpengba e si e ngbâ lakue ti fa tënë?

15. Ye wa amû maboko na e ti gbu ngangu?

16. Ti gbu ngangu na yâ fango tënë aye ti tene nyen teti e nga teti ala so amä e?

17. Ngbanga ti nyen ngoi ti e ayeke nde mingi na yâ mbaï ti azo?

18. Zendo wa na wango wa Jéhovah amû na awakua ti lo?

[Foto na lembeti 15]

Lê ti Moïse aza na gloire

[Foto na lembeti 16]

Lê ti e aza na gloire ti Nzapa na yâ fango tënë ti e