Mû gloire na Wasalango mo na lege ti aye ti yingo so mo zia na gbele mo
“TONGANA mbeni zo ahinga pëpe tâ ndo so lo ye ti gue dä, atâa lege wa so lo mû, lo yeke si lâ oko pëpe.” Atënë so, ti mbeni wasenda-ndara ti Rome ti giriri, afa mbeni tâ tënë so ayeke polele: A yeke kota ye ti zia aye na gbele mo tongana mo ye ti fa lege na fini ti mo.
Bible afa tapande ti azo so abi bê ti ala lani ti zia aye na gbele ala. Noé asala lani kusala ngu 50 tongaso ti “leke arche ti sö azo ti da ti lo”. Prophète Moïse ‘azia bê ti lo na futa so ayeke ga.’ (aHébreu 11:7, 26). Nzapa azia na gbele Josué, so asala kua na peko ti Moïse, kusala ti mungo kodoro ti Canaan.—Deutéronome 3:21, 22, 28; Josué 12:7-24.
Na ngoi ti akozo Chrétien, kite ayeke dä pëpe so atënë ti Jésus, “fade a fa Tene-nzoni so ti royaume na sese so kue”, asala lani ngangu na ndo aye ti yingo so Paul azia na gbele lo (Matthieu 24:14). Atokua na asuma so alondo na Jésus na so Paul lo mveni lo bâ, nga kusala ti “yô iri ti [Jésus] na ti gue na ni na gbele aGentil” aga lani akota ye so apusu Paul ti sala si akongregation mingi abâ gigi na sese ti Asie Mineure nga na Poto.—Kusala 9:15; aColossien 1:23.
Biani, na yâ mbaï, awakua ti Jéhovah azia akota ye mingi na gbele ala, na ala sala ngangu ti wara ni teti gloire ti Nzapa. Laso, tongana nyen e lingbi ti zia aye ti yingo na gbele e? Aye wa e lingbi ti tara ti zia na gbele e ti si dä? Nga aye wa alingbi ti mû maboko na e ti si dä?
A hunda ti duti na anzoni bibe
Aye so zo ayeke zia na gbele lo ayeke ndu ambage kue ti fini ti lo. Na yâ sese so, a yeke wara lakue azo so ayeke zia aye na gbele ala. Ye oko, aye ti yingo so mbeni Chrétien ayeke zia na gbele lo ayeke nde na anzara ti azo ti sese so. Na yâ sese so, akozo ye so ayeke pusu azo ti zia aye na gbele ala ayeke nzara so akaï pëpe ti wara mosoro, kota ndo nga nzara ti duti na ngangu na ndo azo. A yeke tâ na lege ni pëpe ti gi ti wara mara dutingo so. Aye so e zia na gbele e ti sala teti gloire ti Jéhovah Nzapa ague biani oko na vorongo so e yeke mû na lo nga na aye so e yeke sala ti maï aye ti Royaume (Matthieu 6:33). Nda ti mara ti aye tongaso, so e zia na gbele e na so gunda ni aluti na ndo ndoye teti Nzapa nga na amba ti e, ayeke ti sala si e ga ndulu na Nzapa.—Matthieu 22:37-39; 1 Timothée 4:7.
Atâa tongana aye ti yingo so e zia na gbele e na e yeke tomba pekoni andu konongo amatabisi ti kusala wala guengo na li ni na lege ti yingo, a lingbi e duti na anzoni bibe. Ye oko, ngoi na ngoi atâa so e yeke na anzoni bibe na ndo aye so e zia na gbele e, e yeke si dä pëpe. E lingbi ti sala nyen ti tene a duti ngangu mingi pëpe na e ti si na aye so e zia na gbele e?
A lingbi e duti tâ na kota nzara na bê ti e ti si dä
Bâ lege so Jéhovah asala ti hunzi kusala ti lekengo ndagigi. Atënë, “lakui ayeke na ndapelele ayeke,” afa so Jéhovah akangbi yâ ti ngoi oko oko ti lekengo ye so aga na peko ti tele (Genèse 1:5, 8, 13, 19, 23, 31). Na tongo nda ti ngoi oko oko ti lekengo ye, lo hinga nzoni aye so lo zia na gbele lo ti sala na yâ ti lango ni. Na lo hunzi aye kue so lo leke na bê ti lo ti sala (Apocalypse 4:11). Job, babâ ti sewa ti giriri atene: “Lo [Jéhovah, Lo] sala ye so bê ti Lo aye” wala ye so lo yeke na kota nzara ti sala ni (Job 23:13). So nzerengo tele si Jéhovah awara lani ti bâ “ye kue so Lo sala” na ti tene so “a yeke nzoni mingi”!—Genèse 1:31.
Ti tene aye so e zia na gbele e aga tâ ye, a lingbi e duti nga tâ na kota nzara na bê ti e ti si dä. Ye nyen ayeke mû ande maboko na e ti duti na mara kota nzara so? Même na ngoi so sese ayeke lani senge na ye oko ayeke dä pëpe, Jéhovah alingbi ti bâ kozoni awe ye so sese ayeke ga ni ande: Mbeni pendere ye ti ngele ngangu so ayeke na yâ ndagigi, mbeni ye so ayeke ga na gloire na yango-iri na Lo. Legeoko nga, e yeke kono nzara ti e ti sala si ye so e leke biani na bê ti e ti sala aga tâ ye tongana e gbu li na ndo aye so ayeke ga na pekoni nga na aye ti nzoni so e yeke wara tongana e si dä. A yeke ye so asi na Tony, so ayeke na ngu 19. Lo girisa lâ oko pëpe aye so apika bê ti lo na ngoi ti kozo vizite ti lo na mbeni biröo ti aTémoin ti Jéhovah na Poto ti do. A to nda ni na ngoi ni so, hundango tënë so ayeke ga lakue na li ti Tony ayeke so: ‘Ti lango na mara ti ndo tongaso nga ti sala kusala kâ alingbi ti duti ande tongana nyen?’ Tony abi bê ti lo lakue na ndo ye so alingbi ti zi lege na lo ti sala kusala kâ, nga lo ngbâ lani ti sala ngangu ti si dä. So tâ kota ngia si lo wara lani tongana angu mingi na pekoni a yeda na lo ti sala kusala na biröo so!
Dutingo ndulu na azo so awara awe mbeni ye so ala zia na gbele ala alingbi nga ti dü na yâ e nzara ti wara aye so e zia na gbele e. Tongana lo de lani maseka, Jayson, so fadeso lo yeke na ngu 30, aye pëpe ti mû mbage na kusala ti fango tënë. Me na peko ti so lo hunzi mandango mbeti ti lo na kota da-mbeti, lo bi tele ti lo na wâ na yâ kusala ti pionnier, na tongaso lo ga wafango tënë ti Royaume ti ngoi kue. Ye nyen amû maboko na Jayson ti duti na nzara ti kusala ti pionnier? Lo kiri tënë: “Salango lisoro na azo so ayeke pionnier nga salango kusala legeoko na ala na yâ fango tënë asala ngangu mingi na ndo ti mbi.”
Sungo ni na mbeti alingbi ti mû maboko na e
Tongana zo ayeke na mbeni ye na li ti lo si lo sû ni na mbeti, ye ni ayeke ga polele na lê ti lo na lo yeke hinga biani ye so lo ye ti sala. Salomon atene so anzoni tënë alingbi ti duti na ngangu nga ti fa lege na fini ti e tongana keke so ayeke fa lege na anyama (Zo-ti-fa-tene 12:13). Tongana e sû atënë ni so na mbeti, a yeke ngbâ na li ti e nga ayeke gbu bê ti e. A yeke ngbanga ni la si Jéhovah ahunda lani na agbia ti Israël ti sala mbeni mbeti ti Ndia ni teti ala mveni (Deutéronome 17:18). Ni la, e lingbi ti sû na mbeti aye so e zia na gbele e nga aye so e yeke sala ti si dä. E lingbi ti sû na mbeti molongo ti akpale so e yeke ku tele ti e na ni nga alege so e yeke hon ndo ni. A yeke nzoni ti gi ti hinga atënë wa a lingbi e kono hingango ye ti e na ndo ni, akode so a hunda na e ti wara ni nga azo so alingbi ti mû maboko na e.
So Geoffrey, mbeni pionnier spécial so aninga na kua ni, azia aye ti yingo na gbele lo, a sala si lo luti ngangu na yâ ti mbeni territoire ti sese ti Asie so kongregation ayeke dä pëpe. Wali ti lo akui sân ti tene lo ku tele ti lo na ni. Na yâ ti angoi so lo yeke manda ti sala ye alingbi na fini dutingo ti lo, Geoffrey amû desizion ti bi tele ti lo kue na yâ kusala ti lo ti pionnier na ziango aye na gbele lo. Na peko ti so lo sû na mbeti aye so lo leke, lo sambela na lo zia na gbele lo ti komanse afini étude ota na hunzingo ti nze ni. Lâ oko oko, lo yeke kiri ti bâ kusala ti lo, nga lakue tongana lango bale-oko ahon, lo yeke gi ti bâ lege so lo gue na li ni. Lo wara aye so lo zia na gbele lo? Biani, lo yeke na ngia mingi ti wara afini étude osio.
Leke ti si na akete kete ye kozoni
Na tongo nda ni, ambeni ye so e zia na gbele e alingbi ti kpa aye so ayeke ngangu ti si dä. Ti Tony, so e sala tënë ti lo fade, ti sala kusala na mbeni oko ti abiröo ti aTémoin ti Jéhovah ayeke tongana bango li. A yeke ngbanga ti so salango ye ti lo ayeke lani kirikiri nga ade lo mû tele ti lo na Nzapa pëpe. Me lo mû desizion ti sala ye alingbi na andia ti Jéhovah nga lo zia na gbele lo ti ga zo so alingbi ti wara batême. Na peko ti so lo wara batême, lo zia na gbele lo ti sala kusala ti pionnier auxiliaire nga ti pionnier permanent. Na lo sû alango so lo ye ti komanse na ni na ndo kalendrier ti lo. Na pekoni so lo sala kusala ti pionnier teti mbeni ngoi, lo bâ so salango kusala na yâ ti mbeni filiale ayeke pëpe mbeni bango li.
A yeke nga lege ti ndara teti e ti kangbi yâ ti akota ye so e zia na gbele e ti ga akete kete ye so a hunda ti si dä kozoni. Salango tongaso alingbi ti fa na e ye so e lingbi ti sala na oko ngoi so e yeke gi lakue ti wara kota ye so e zia na gbele e teti ngoi so ayeke ga. Kiringo lakue ti bâ guengo na li ni ti e na yâ akete kete ye so e si dä awe alingbi ti mû maboko na e ti bata lê ti e na ndo kota ye ni. Ti sambela Jéhovah fani mingi na ndo aye so e leke ti sala ayeke mû ande maboko na e ti ngbâ na ndo lege ni. Bazengele Paul awa e ti “zia ti sambela pëpe.”—1 aThessalonicien 5:17.
A hunda lekengo ye na bê nga gbungo ngangu
Atâa so e leke ye nzoni nga tâ kota nzara ti bê ti e ayeke ti si dä, e si pëpe na ambeni ye so e zia na gbele e. So vundu si disciple Jean Marc awara lani tongana bazengele Paul ake ti mû lo na tele ti lo na ngoi ti use tambela ti lo ti missionnaire! (Kusala 15:37-40). Kite ayeke dä pëpe so Marc amanda ye lani na lege ti vundu so, nga lo leke yâ ti ye so lo zia na gbele lo ti kono yâ ti kusala ti lo. Na pekoni, Paul atene nzoni tënë ti lo, nga na Babylone, lo yeke na nzoni songo ti kamarade na bazengele Pierre (2 Timothée 4:11; 1 Pierre 5:13). Peut-être kota matabisi so ahon atanga ni kue so lo wara ayeke ti so lo sû na gbe ti yingo tondo na ndo fini ti Jésus nga na kusala ti Lo.
E nga kue, na yâ tombango peko ti aye ti yingo so e zia na gbele e, e lingbi ti wara mbeni kpale. A hon ti zia lege ni, a lingbi e kiri e bâ lege so e gue na li ni awe, e gi ti bâ wala ye so e zia na gbele e ayeke na lege ni nga e lingbi biani ti si dä, wala e lingbi ti gbian ni tongana e bâ so a hunda ti sala ni. Tongana akpale alondo, a yeke kota ye ti leke na bê ti e ti sala kue ti gue na li ni nga ti gbu ngangu dä. Gbia ti ndara Salomon adë bê ti e tongaso: “Zia kusala ti mo na tïtî L’Eternel, na fade ye so mo ye ti sala aga nzoni.”—aProverbe 16:3.
Ye oko, ngoi na ngoi aye so asi na e ayeke sala si aye so e zia na gbele e aga tongana bango li. Na tapande, kpale ti seni wala akungba ti sewa alingbi ti kanga lege na e ti si na ambeni ye so e zia na gbele e. Zia e girisa lâ oko pëpe so kota matabisi ni so ahon atanga ni kue ayeke fini ti lakue lakue na yayu wala na yâ Paradis na ndo sese (Luc 23:43; aPhilippien 3:13, 14). E yeke wara ni tongana nyen? Bazengele Jean asû na mbeti: “Zo so asala ye so Nzapa aye, lo duti lakue lakue.” (1 Jean 2:17). Atâa so dutingo ti e alingbi pëpe ti mû lege na e ti si na mbeni mbilimbili ye so e zia na gbele e, e lingbi ti ngbâ ti “kpe mbito ti Nzapa, na [ti] bata komandema ti Lo”. (Zo-ti-fa-tene 12:15). Aye ti yingo so e zia na gbele e ayeke mû maboko na e ti ngbâ ti bata lê na ndo salango ye so bê ti Nzapa aye. Tongaso, zia e sala kusala na ni ti mû gloire na Wasalango e.
[Kete tënë na lembeti 22]
Aye ti yingo so e lingbi ti zia na gbele e
○ Dikongo Bible lâ oko oko
○ Dikongo numéro oko oko ti Tour ti Ba Ndo na Réveillez-vous!
○ Lekengo si asambela ti e aga nzoni ahon ti kozo
○ Fango na gigi lengo ti yingo
○ Gingo ti kono yâ ti kusala ti e
○ Gango zo so ayeke fa tënë nga ayeke fa ye nzoni mingi ahon ti kozo
○ Gingo ti maï akode so: fango tënë na alege kue so azi, na téléphone nga na ando ti dengo buze