Apendere: I yeke gue na li ni na lege ti yingo?
TONGANA lo yeke dabe lo na akozo ngu so lo sala na kota da-mbeti, Hideo atene: “Atâa so mbi yeke gue lani na abungbi ti aChrétien, mbi yeke tâ na kpengba nzara ti sala na Jéhovah pëpe. Fani mingi, mbi yeke bâ tele ti mbi so akamarade ti mbi ti ekole kue aye tënë ti mbi mingi, na so mbi yeke zu na ndo lege na baba, na tele ti mbeni kete wali ti mbi ti ekole. Mbi hinga tâ ye so mbi ye ti sala pëpe na yâ fini ti mbi, na mbi yeke nga na nzara oko pëpe ti gue na li ni na lege ti yingo.” Legeoko na Hideo, a bâ so apendere mingi ahinga mbilimbili ye so ala ye ti sala pëpe na yâ fini ti ala; ala yeke na nzara oko pëpe ti zia na gbele ala anzoni ye ti salango ni, wala ti gue na li ni na lege ti yingo.
Tongana mo yeke maseka, peut-être tele ti mo ayeke nzere mingi tongana mo bi tele ti mo na salango angia ti wanguru wala mbeni ye nde so mo ye mingi ti sala. Me, tongana a yeke tënë ti akusala ti yingo, peut-être tele ti mo ayeke nzere ti sala ni tongana ti aye so pëpe. Lege ayeke dä teti zo ti wara mara ti nzerengo tele tongaso teti aye ti yingo? Bâ atënë ti wasungo psaume so: “Tënë ti témoin [“adango bê”, NW] ti L’Eternel ayeke tâ tënë, a sala si zo so li ti lo ayeke dä pëpe aga zo ti ndara. . . . Komandema ti L’Eternel ayeke na sioni oko pëpe, a mû lumière na lê.” (Psaume 19:8, 9). Tënë ti Nzapa alingbi ti fa na “zo so li ti lo ayeke dä pëpe” ti sala ye na lege ti ndara, na ‘mungo lumière na lê ti lo’. Biani, aye ti yingo alingbi ti mû ngia nga na nzerengo tele mingi na mo. Me a hunda nyen na mbage ti mo ti wara mara ti nzerengo tele tongaso teti aye ti yingo? A lingbi mo to nda ni na ndo wa?
Zia si bê ti mo apusu mo ti sala na Nzapa
Kozoni kue, a lingbi bê ti mo apusu mo ti sala ye. Bâ tapande ti maseka Gbia Josias ti Juda. Tongana a wara lani mbeti ti Ndia ti Jéhovah na yâ temple, Josias ahunda ti tene a diko ni na mê ti lo; ye so lo mä andu bê ti lo ngangu. Tongaso, “Josias alungula ye ti sioni mingi na sese kue ti amolenge ti Israël”. (2 Chronique 34:14-21, 33). Dikongo Tënë ti Nzapa apusu Josias ti sala ye mingi ahon ti kozo ti maï vorongo so ayeke nzoni-kue.
Mo lingbi nga ti lë nzara ti sala na Jéhovah tongana mo diko Bible lakue na mo gbu li na ndo ye so mo diko. A yeke lani ye so si apusu Hideo ti gue na li ni na lege ti yingo. Lo to nda ti sala kamarade mingi na mbeni pionnier, wala wakua ti ngoi kue ti aTémoin ti Jéhovah, so ayeke kota zo ti lo. Pionnier ni ayeke lani mbeni ita so ayeke manda Bible mingi na so ayeke sala kue ti bata na yâ fini ti lo afango ye ti Mbeti ti Nzapa. Tapande ti pionnier so amû wâ mingi na Hideo si lo to nda ti sala nga tongana lo, na ti lë kpengba nzara ti sala na Nzapa nga na ambeni zo nde. Guengo na li ni ti lo na lege ti yingo asala si lo hinga fadeso ye so lo yeke sala na yâ fini ti lo.
Dikongo Bible lâ oko oko alingbi ti pusu apendere ti gue na li ni na lege ti yingo. Takahiro atene: “Lakue tongana mbi tï na gbogbo ti lango, na si mbi dabe mbi so mbi de ti sala dikongo Bible ti mbi ti lango ni pëpe, mbi yeke londo ti sala ni si mbi kiri na gbogbo. Ye ti pekoni ayeke so mbi bâ tongana nyen Jéhovah ayeke fa lege na mbi. Dikongo Bible lâ oko oko amû maboko ngangu na mbi ti gue na li ni na lege ti yingo. Teti so mbi ye ti mû mbage ti mbi mingi ahon ti kozo na yâ kusala ti Jéhovah, mbi mû kusala ti pionnier permanent ngoi kete na pekoni so mbi hunzi ti gue na kota da-mbeti, na mbi yeke wara ngia dä mingi.”
Nde na dikongo Bible so a lingbi mo sala, mbeni ye nde wa a lingbi mo zia na ndo ni, so alingbi ti pusu mo ngangu ti sepela Jéhovah? Tomohiro amanda tâ tënë ti Mbeti ti Nzapa na lege ti mama ti lo. Lo tene: “A yeke gi na ngoi so mbi to nda ti manda biani buku La vie a bien un but na ngoi so mbi yeke na ngu 19, si ndoye ti Jéhovah na sandaga ti kota ngele ti Jésus andu tâ bê ti mbi ngangu. Kiringo singila ti mbi teti ndoye ti Nzapa apusu mbi ti sala mingi ahon ti kozo na yâ kusala ti Jéhovah”. (2 aCorinthien 5:14, 15). Legeoko na Tomohiro, a wa amaseka mingi ti gue na li ni na lege ti yingo na mandango Bible na bê kue ala mveni.
Ka tongana mo sala aye so kue awe me mo bâ so nzara ti salango na Jéhovah na bê ti mo kue angbâ lakue ti tia mo, mo yeke sala tongana nyen? Mbeni zo ayeke dä so mo lingbi ti bâ ndo na mbage ti lo ti wara mungo maboko? Bazengele Paul asû na mbeti: “Teti a yeke Nzapa so asala na yâ i ti ye, na ti sala”. (aPhilippien 2:13). Tongana mo sambela Jéhovah ti wara mungo maboko, fade lo yeke mû yingo vulu ti lo na mo na bê kue, na ye so ayeke kpengba ande mo gi pëpe “ti sala”, me nga “ti ye”. So ti tene so yingo vulu ti Nzapa ayeke maï nzara so mo yeke na ni ti sala ye kue so mo lingbi sala teti kusala ti Jéhovah, na fade a yeke mû maboko na mo ti maï na lege ti yingo. Tongaso, zia bê ti mo kue na ngangu ti Jéhovah na sala si bê ti mo akpengba!
Leke mo mveni aye so mo ye ande ti sala
Tongana mo leke na bê ti mo awe ti sala na Jéhovah mingi ahon ti kozo, a lingbi mo leke mo mveni aye so mo ye ande ti sala ti gue na li ni na lege ti yingo. Mana, mbeni maseka-wali Chrétien atene: “Lekengo mbi mveni aye so mbi ye ande ti sala amû maboko na mbi mingi. Ahon ti kiri gi na peko kiringo, mbi wara lege lani ti gue na li ni na bê so agbu ngangu. Tongana mbi leke na li awe aye so mbi ye ti sala, mbi sambela na bê ti mbi kue na Jéhovah ti wara fango lege ti lo, na mbi wara lege ti gue na li ni na salango kue si mbeni ye nde agboto lê ti mbi yongoro pëpe.”
A lingbi ye so mo zia na gbele mo ti sala aduti na lege ni na mo lingbi biani ti si dä. Ti diko mbeni chapitre oko ti Bible lâ na lâ alingbi ti duti mbeni ye so mo lingbi ti sala na lege ni. Mo lingbi nga ti to nda ti gi nda ti ambeni ye na yâ Bible. Zia e mû tapande ti mbeni ye so mo lingbi ti wara ni na Français; na yâ buku Index des publications de la Société Watch Tower, mo lingbi ti manda alengo ti Jéhovah tongana mo gue na yâ buku so, na li ti tënë “Jéhovah”; na gbe ti li ti tënë so, mo lingbi ti bâ kete li ti tënë “Qualités”. Na ndo so, mo lingbi ti wara ali ti tënë mingi so mo lingbi ti manda ni; na biani mandango ye so ayeke sala ande si mo ga ndulu na Jéhovah mingi ahon ti kozo, na a yeke pusu mo ti sala mingi teti lo. Ambeni ye nde so mo lingbi ti zia na gbele mo ti sala ayeke ti tene na bungbi oko oko, mo gi ti kiri tënë kamême fani oko na ambage so a hunda kiringo tënë ti aita; ambeni ye ni nde ayeke ti gi ti hinga nzoni mingi ita oko tongaso ti kongregation na bungbi oko oko, na nga ti zia pëpe si lango oko ahon senge sân ti sambela Jéhovah na ti sala tënë ti lo na ambeni zo.
Tongana mo de ti zia iri ti mo pëpe na Ekole ti Kusala ti aChrétien, a yeke nzoni mo zia na gbele mo ti sala ni. Mo to nda ti mû mbage ti mo awe na kusala ti fango tënë? Tongana mo de ti sala ni pëpe, mo lingbi peut-être ti sala ngangu kue ti ga mbeni wafango tënë so ade ti wara batême pëpe. Ti bâ nzoni mingi songo ti mo na Jéhovah na nga ti mû tele ti mo na lo ayeke duti ande ye so mo yeke gi ti sala na pekoni. Apendere mingi asala ngangu ti sala ye alingbi na mungo tele ti ala na Nzapa na gingo ti mû kusala ti ngoi kue.
Atâa so a yeke nzoni ti zia aye na gbele mo ti si dä na yâ fini, sala hange si mo lë bibe ti mandako pëpe. Fade mo yeke wara ande ngia mingi ahon ti kozo na yâ ye so mo sala tongana mo haka tele ti mo pëpe na amba ti mo.—aGalate 5:26; 6:4.
Peut-être mo bâ so mo hinga ye mingi pëpe na yâ fini, na a yeke tâ ngangu na mo ti soro aye so alingbi na ngangu ti mo ti sala ni. Tongana a yeke tongaso, sala ye alingbi na wango ti Bible so: “Dengi mê ti mo ti mä tënë ti awandara”. (aProverbe 22:17). Gi mungo maboko ti ababâ na mama ti mo nga na ti ambeni Chrétien biazo nde. Biani, a yeke ku na mbage ti ababâ na mama nga na tanga ti azo kue ti sala ye na lege ni na ti mû wango so akpengba zo na ndo tënë so. Tongana a yeke ambeni zo nde si asoro aye ni ti tene apendere ni asala, na apusu ala na ngangu ti sala ni, ye so alingbi ti sala si apendere ni agirisa ngia ti ala, na même ti sala si ala bâ pëpe nene ti leke aye ti sala ande. A yeke ye so asi lani na mbeni molenge ti wali. Lo tene: “Ababâ na mama ti mbi ayeke zia na gbele mbi aye ti salango ni na peko ti tele; na tapande ala hunda na mbi ti zia iri ti mbi na Ekole ti Kusala ti aChrétien, ti fa tënë, ti wara batême, na ti ga pionnier. Mbi sala lani kue ti si na aye so oko na oko. Tongana mbi si na mbeni oko, ababâ na mama ti mbi ayeke gonda mbi pëpe, me nde na so, ala yeke gi mbeni ye nde ti zia na gbele mbi si mbi si dä. Ye ti pekoni ayeke so mbi yeke bâ lakue so a yeke gbu mbi na ngangu ti sala aye ni. Ye so asala si mbi nze na mbi wara oko pëpe nzerengo tele so zo ayeke wara tongana lo hunzi ti sala mbeni ye.” Ye nyen atambela lani nzoni pëpe? Aye kue so a hunda na Akiko ti sala ayeke nzoni, me a londo pëpe na bê ti lo mveni. Tongana mo ye ti wara nzoni, a lingbi bê ti mo si apusu mo ti mû li ni na sorongo aye so mo ye ande ti sala!
Dabe mo na tapande ti Jésus Christ. Tongana lo ga lani na sese, lo hinga ye so Babâ ti lo Jéhovah aku na mbage ti lo. Salango ye so bê ti Jéhovah aye ayeke gi pëpe mbeni ye so Jésus aleke ti sala, me a yeke nga mbeni kusala wala kungba so a yeke ti lo ti sala. Jésus abâ lani kusala so tongana nyen? Lo tene: “Kobe ti Mbi ayeke ti sala ye so Lo so ato Mbi aye, na ti sala kusala ti Lo kue.” (Jean 4:34). Jésus awara ngia mingi lani na salango ye so bê ti Jéhovah aye, nga lo sala ye so Babâ ti lo aku na mbage ti lo. A yeke lani tongana kobe ti tengo ni teti Jésus; lo wara ngia nga tele ti lo anzere mingi ti hunzi kusala so a ku na mbage ti lo ti sala (aHébreu 10:5-10). Mo nga kue mo lingbi ti wara ngia mingi tongana a yeke bê ti mo si apusu mo ti sala ye so ababâ na mama ti mo awa mo ti sala.
Mo nze pëpe na salango kusala ti nzoni
Tongana mo zia na li ti mo ti sala mbeni ye awe, sala ngangu kue ti si dä. Mbeti ti aGalate 6:9 atene: “A lingbi bê ti e anze pëpe na salango kusala ti nzoni; teti na ngoi so alingbi, fade e fâ lengo ni ti nzoni, tongana bê ti e anze pëpe.” Zia bê ti mo gi na ngangu wala na akode ti mo mveni pëpe. Mo lingbi ti kpe pëpe ti tingbi na akpale na même na ambeni ngoi mo yeke bâ so mo sala pëpe ye so mo ye fade ti sala. Me Bible adë bê ti e tongaso: “Mo bi bê ti mo na [Nzapa] na lege ti mo kue, na fade Lo sala si lege ti mo aga mbilimbili.” (aProverbe 3:6). Fade Jéhovah ayeke mû maboko na mo na ngoi so mo yeke sala ngangu kue ti sala aye ti yingo so mo leke ti si dä.
Biani, tongana mo lë nzara ti sala na Jéhovah na mo gi ti si na aye ti yingo so mo zia na gbele mo ti sala, fade ‘azo kue ayeke bâ so kua ti mo ayeke gue na nduzu’. (1 Timothée 4:15, Buku ti Nzapa, Fini Mbuki, 1995). Na pekoni, fade mo yeke duti na mbeni fini so amû ngia na mo mingi na yâ kusala ti Nzapa.
[Foto na lembeti 9]
Dikongo Bible na gbungo li na ndo ye so mo diko ayeke pusu ande mo ti sala na Jéhovah
[Foto na lembeti 10]
Jésus asala lani ye so Babâ ti lo aku na mbage ti lo