Atënë so azo ahunda

Jésus aye lani ti tene nyen tongana lo tene na adisciple ti lo: “Mbi bâ Satan alondo na yayu lo tï na sese tongana nyekpa”?

Gi na peko ti so lo soro adisciple ti lo 70 awe, Jésus ato “ala use use na gbele Lo, ti gue na akodoro na ti gue na ndo kue so Lo ye ti gue dä.” Tongana adisciple 70 so akiri, ala yeke na ngia ngbanga ti so kusala ti ala ni atambela nzoni. Ala tene na lo “Seigneur, même ayingo sioni amä yanga ti e teti iri ti Mo.” Na ngoi ni so Jésus akiri tënë: “Mbi bâ Satan alondo na yayu, lo tï tongana nyekpa.”​—Luc 10:1, 17, 18.

Na kozo bango ni, a lingbi ti tene Jésus ayeke sala lani tënë ni na ndo mbeni ye so asi awe. Ye oko, ngu 60 na pekoni so Jésus asala lani tënë so, bazengele Jean, so aga lani mbakoro awe, asala kusala na oko mara ti tënë so. Lo sû na mbeti: “Ala to go kota ngbo, ngbo ti giriri so, lo so ala di iri ti lo Zabolo na Satan, wahanda ti azo ti sese so kue; ala bi lo na sese, na ala bi a-ange ti lo na sese legeoko na lo.”​—Apocalypse 12:9.

Na ngoi so Jean asû lani atënë so na mbeti, Satan angbâ lani na yayu. E hinga ni tongana nyen? E hinga ni ngbanga ti so buku ti Apocalypse ayeke mbeni buku ti aprophétie me ti mbaï pëpe (Apocalypse 1:1). Tongaso, na ngoi ti bazengele ni, ade a bi Satan na ndo sese pëpe. Biani, aye afa polele so a bi nga lo hio na sese pëpe juska gi kete na peko ti so a zia Jésus tongana Gbia ti Royaume ti Nzapa na 1914.a​—Apocalypse 12:1-10.

Ngbanga ti nyen Jésus asala lani tënë ti tombango Satan na yayu mo bâ mo tene a yeke mbeni ye so asi kozoni awe? Ambeni wandara aye ti fa so Jésus ayeke zingo lani na adisciple ti lo teti so ala fa na gigi bibe ti fandara. Ala mä na bê biani so Jésus ayeke tene lani atënë so: ‘I hon ayingo sioni na ngangu, me i ga azo ti baba pëpe. Satan aga mbeni zo ti fandara lani na ye so ague na lo hio na tingo.’

E lingbi pëpe ti luti ngangu gi na ndo tënë ni so. Ye oko, a bâ so a yeke tâ na lege ni ti tene so, na salango tënë lani na ndo tombango Satan so ade ti si pëpe, Jésus ayeke kangbi ngia legeoko na adisciple ti lo. Jésus ahinga lani nzoni mingi ahon adisciple ti lo tënë na ndo sioni bê so Zabolo ayeke na ni. Tara ti bâ ngia so Jésus ayeke na ni lani ti mä so adisciple ti lo, so ayeke azo so ayeke mbilimbili-kue pëpe, ahon ayingo sioni na ngangu! So ayingo sioni akiri na gbe ti adisciple, a yeke biani gi lani fä ti mbeni ngoi so ayeke ga ande, ngoi so Jésus Christ tongana archange Michel ayeke sala bira na Satan na Lo yeke bi lo na sese.

Ni la, tongana Jésus atene lani so lo bâ Satan “lo tï”, lo ye ti gboto lê na ndo tingo ti Satan so ayeke ga tâ tënë biani. Ye so ague legeoko na ambeni prophétie ti Bible so asala tënë na ndo ti aye so ayeke si ande mo bâ mo tene aye ni asi kozoni awe. Na tapande, bâ lege so Esaïe 52:13–53:12 abungbi na oko ndo atënë so afa ye so mo bâ mo tene asi na Messie awe na ti aye so mo bâ mo tene ade ti si na lo pëpe. Ni la, e lingbi ti tene so Jésus ayeke fa ziango bê kue na gango tâ tënë ti ye so Nzapa aleke, so andu tombango Satan na yayu. Jésus ayeke lani nga na beku so na ngoi so Nzapa adiko, Satan na ayingo sioni ti lo ayeke gue na yâ ti bukulugbu ti bingo, nga na pekoni a yeke futi ala teti lakue lakue.​—aRomain 16:20; aHébreu 2:14; Apocalypse 20:1-3, 7-10.

[Kete tënë na gbe ni]