Atënë so azo ahunda

Fade adémon ayeke duti ande na ndo wa na ngoi ti Komandema ti Ngu Saki Oko ti Christ?

Bible afa pëpe anzene nzene tënë na ndo hundango tënë so. Ye oko, e lingbi biani ti hinga ndo so adémon ayeke duti ande dä na ngoi ti Komandema ti Ngu Saki Oko ti Christ.

Tongana lo yeke fa kozoni aye so ayeke si ande na tongo nda ti Ngu Saki Oko nga na hunzingo ni, bazengele Jean atene: “Mbi bâ mbeni ange alondo na yayu, a zu, na clé ti bukulugbu-ti-bingo na kota zingiri ayeke na maboko ti lo. Na lo gbu kota ngbo ni, ngbo ti giriri, so ayeke Zabolo na Satan, lo kanga lo ngu [saki, NW ] oko, lo bi lo na yâ bukulugbu-ti-bingo, na lo kanga yanga ni na ndo lo na lo zia sceau dä, si lo lingbi handa amara mbeni pëpe juska ngu [saki, NW ] oko so awe. Na peko ti ye so, a lingbi a zi lo teti lâ oko oko.” (Apocalypse 20:1-3). Aversê so asala gi tënë ti bingo Satan na yâ bukulugbu-ti-bingo nga na zingo lo teti mbeni kete ngoi. Atâa so a sala tënë ti adémon pëpe, a bâ so a yeke na lege ni so na ngoi ni, ange so ayeke na kelele ti bukulugbu-ti-bingo na maboko ti lo (so ti tene Jésus so awara gloire awe), ayeke gbu ande Zabolo na lo yeke bi lo legeoko na adémon na yâ bukulugbu-ti-bingo.​—Apocalypse 9:11.

Tongana lo ga gbia lani na ngu 1914, Jésus Christ asala mbeni kota ye na ndo Satan nga na adémon ti lo. Apocalypse 12:7-9 atene : “Bira alondo na yayu, Michel na a-ange ti lo atiri bira na kota ngbo so. Na kota ngbo na a-ange ti lo [ayingo sioni] atiri bira, me ala hon na ngangu pëpe, na a wara ndo na yayu teti ala mbeni pëpe. Ala to go kota ngbo, ngbo ti giriri so, lo so ala di iri ti lo Zabolo na Satan, wahanda ti azo ti sese so kue; ala bi lo na sese, na ala bi a-ange ti lo na sese legeoko na lo.” Ngbele ye na ngoi ni so, a bi Satan na adémon ti lo na mbage ti sese ge. E lingbi ti tene biani so na ngoi so Jésus Christ ayeke kanga Satan ti zi sese so na gbe ti ngangu ti lo, Lo yeke sala tongaso na adémon nga.

E lingbi nga ti bâ mbilimbili tâ kozo prophétie ti Bible so atene: “Fade Mbi [Nzapa, Mbi] zia tënë ti ke na popo ti mo [Satan] na wali so [bungbi ti Jéhovah ti yayu], . . . na popo ti hale ti mo [Satan] na hale ti lo [Jésus Christ]; fade lo mboko li ti mo, na fade mo mboko ndagere ti lo.” (Genèse 3:15). Mbokongo li ti ngbo ni andu bingo Satan na yâ bukulugbu-ti-bingo na ngoi ti Komandema ti Ngu Saki Oko ti Christ. Prophétie ni akiri atene so tënë ti ke ayeke duti na popo ti Zo so ayeke mboko li ti ngbo ni nga na hale ti Satan. Na yâ hale ti ngbo ni wala bungbi ti lo, a yeke wara mbage ti bungbi ti Satan so lê abâ pëpe so ayeke ayingo sioni wala adémon. Tongaso, a yeke na lege ni ti tene so tongana Jésus ayeke bi ande Satan na yâ bukulugbu-ti-bingo, lo yeke bi nga adémon na yâ ni legeoko na lo. Nga, teti so ayingo sioni ayeke na kota mbito ti bukulugbu-ti-bingo, ye so afa polele so ala hinga nzoni mingi tënë ti kangango ala so ayeke ga.​—Luc 8:31.

Ye oko, teti so Apocalypse 20:1-3 adi iri ti adémon pëpe, a ye ti tënë so a futi ala awe na Harmaguédon legeoko na mbage ti bungbi ti hale ti Satan ni so ayeke na ndo sese? Bible afa so tënë so alingbi ti duti tongaso pëpe. Na ndo tënë ti futingo ti Satan so ayeke ga, Bible atene: “A bi zabolo so ahanda ala na lac ti wâ na soufre, na ndo so nyama ni na prophète ti wataka ayeke nga; na fade a sala ala na sana lâ na bï lakue lakue.” (Apocalypse 20:10). Nyama ti ngonda ni nga na prophète ti wataka ni ayeke ambeni mbage ti bungbi ti Satan so lê abâ (Apocalypse 13:1, 2, 11-14; 16:13, 14). A yeke futi ala na ngoi ti bira ti Harmaguédon, ngoi so Royaume ti Nzapa ayeke fâ na ayeke neka yâ ti aroyaume ti sese so kue (Daniel 2:44). Na salango tënë na ndo ni Bible afa ni tongana ‘wâ ti lakue lakue, so A leke awe teti zabolo na a-ange ti lo.’ (Matthieu 25:41). A yeke bi ande Satan na adémon ti lo na yâ ti oko “lac ti wâ na soufre” so a bi nyama ti ngonda na prophète ti wataka dä, na fade a yeke futi ala teti lakue lakue. Tongana a futi fade adémon (so ayeke ngangu mbage ti bungbi ti Satan so lê abâ pëpe) na Harmaguédon, ka fade a sala tënë ti ala legeoko na nyama ti ngonda nga na prophète so a bi ala na yâ lac ti wâ na lege ti fä. Teti so a sala tënë ti ala pëpe na Apocalypse 20:10, a fa so adémon ayeke wara ande futingo pëpe na Harmaguédon.

Teti so a fa polele pëpe tënë na ndo ti bingo adémon na yâ bukulugbu-ti-bingo, a fa nga pëpe tënë ti zingo ala na yâ ni. Ye oko, gi oko ye so ayeke si ande na Zabolo ayeke si na ala nga. Na pekoni, a yeke zi ala legeoko na Zabolo, na ala yeke sala kusala maboko na maboko na lo ti ga na tara ti nda ni na ndo azo, me na hunzingo ti Komandema ti Ngu Saki Oko, a yeke bi adémon na yâ lac ti wâ legeoko na Zabolo na fade ala wara futingo ti lakue lakue.​—Apocalypse 20:7-9.

Tongaso, atâa so Apocalypse 20:1-3 asala gi tënë ti gbungo nga na bingo Satan na yâ bukulugbu-ti-bingo, e lingbi ti tene biani na nda ni so a yeke kanga na a yeke bi ande adémon ti lo na yâ ni nga. Fade a yeke mû lege pëpe na Satan wala na adémon ti lo ti buba yâ ti gango tâ tënë ti zendo ti Nzapa, ti lekengo sese ti tene aga mbeni paradis na ti sala si azo akiri aga mbilimbili-kue na ngoi ti Komandema ti Ngu Saki Oko ti Christ.