Nyen la ayeke sala si gigi ti mo aga nzoni?

TONGANA a hunda Jesse, mbeni élève ti kota da-mbeti so ayeke na ngu 17, na ndo nda ni so zo abâ gigi, lo kiri tënë: “Na ngoi kue so mo ngbâ na fini, sala angia kue so mo lingbi ti sala.” Suzie ayeke na mbeni bango ndo nde. Lo tene: “Mbi mä na bê kue so nda ti fini ayeke ye so zo mveni ayeke sala ngangu ti tene fini ti lo aga ni.”

Mo hunda tele ti mo awe na ndo nda ni so zo abâ gigi? Ti azo kue ayeke gi oko? Wala atënë ti Suzie ayeke na lege ni? Fini ayeke tâ gi ye so e oko oko e yeke sala ngangu ti tene fini ti e aga ni? Atâa aye wa so azo awara na lege ti guengo na li ni ti senda-kode, a bâ so na yâ tele ti e, e ye mingi ti hinga ngbanga ti nyen e yeke na fini. Na mbeni ngoi ti fini ti e, azo mingi na popo ti e ayeke hunda tele ti ala: ‘Ngbanga ti nyen e yeke na fini?’

Senda-ye ti ngoi ti e ayeke sala ngangu ti kiri tënë na hundango tënë so. Kiringo tënë wa lo wara? David P. Barash, kota wamandango ye na ndo aye so andu bibe ti zo nga na fini ti anyama, atene: “Teti so fini so aga gi tongaso, tâ nda ti dutingo na fini ayeke dä pëpe.” Ti awandara so atene gigi aga gi tongaso, zo nga na nyama abâ gigi gi ti duti na fini na ti ngbâ ti dü. Ni la, Pakara Barash atene: “Na yâ ti mbeni dunia so akono mingi, so zo ahinga li ti lo na ni pëpe nga so ayeke bi bê pëpe na ndo azo, a yeke na azo ti sala si gigi ti ala aga nzoni na lege ti aye so ala mveni asoro ti sala.”

Ye so asala si gigi aga biani nzoni

Tongaso, e bâ gigi gi ti tene e oko oko e sala ye so bê ti e aye? Ahon ti tene a zia e si e tambela gi kirikiri tongaso na yâ ti mbeni dunia so e hinga li ti e na ni pëpe, Bible afa kozoni awe so nda ti dutingo ti e ge na ndo sese ayeke dä. E bâ gigi pëpe na lege ti mbeni ndao tongaso. Bible afa na e so Wasalango ye amû angu mingi ti leke sese kozoni si zo aga. Mbeni ye so aga gi tongaso ayeke dä pëpe. Lo sala kue ti tene ye kue aduti lani “nzoni mingi.” (Genèse 1:31; Esaïe 45:18). Ngbanga ti nyen? A yeke ngbanga ti so Nzapa ayeke na mbeni ye ti tene zo asala ni.

Ye oko, mbeni ye so agboto lê ayeke so, Nzapa adiko kozoni pëpe ye so ayeke si na yâ ti fini ti zo oko oko, lo mveni lo yôro tele ti lo pëpe na yâ ni wala lo zia ni kozoni pëpe na yâ ti tele ti zo ni. Atâa so aye so a dü e na ni ayeke sala ngangu na ndo e, mingi ni, a yeke e mveni si e yeke fa lege na akusala ti e. E yeke na liberté ti soro ye so e ye ti sala na gigi ti e.

Atâa so e oko oko e lingbi ti soro ye so e ye ti sala na gigi ti e, a yeke duti sioni teti e ti pusu Wasalango ye yamba na yâ ti aye so e ye ti sala. Biani, azo mingi abâ so tâ ye so asala si gigi ti e aga nzoni ague oko na songo so e yeke na ni na Nzapa. Kota kamba so ayeke na popo ti Nzapa nga na ye so asala si gigi ti e aga nzoni asigigi polele na yâ nda ti iri ti Nzapa mveni, Jéhovah, so aye ti tene, “Lo so asala si ye aga”. (Exode 6:3; Psaume 83:19; Genèse 22:14). So ti tene, yeke yeke lo yeke sala si ye kue so lo mû zendo ni ayeke ga tâ tënë, nga lo yeke hunzi lakue ye so lo leke ti sala (Esaïe 46:11; 55:10, 11). Gbu li na ndo nda ti tënë so. Iri, Jéhovah, amû beku na e kue so lo yeke kozo Lingu nga lo yeke ngbâ lakue tâ Lingu ti ye so asala si gigi ti e aga nzoni.

Ti yeda so Wasalango ye ayeke dä ayeke sala ngangu mingi na ndo bango ndo ti mbeni zo na ndo fini. Linet so ayeke na ngu 19 atene: “Bango apendere ye so Jéhovah aleke nga na nda ni so lo leke ni afa na mbi so nda ni so Nzapa aleke mbi ayeke nga dä.” Amber atene: “Tongana azo atene so ala yeke na kite so Nzapa ayeke dä wala pëpe, mbi yeke kiri singila ndali ti so mbi hinga so lo yeke dä. A hunda gi ti bâ aye so Jéhovah aleke ti hinga so lo yeke dä.” (aRomain 1:20). Biani, ti yeda so Wasalango ye ayeke dä ayeke mbeni ye oko, me ti duti na mbeni kpengba songo na lo ayeke nga mbeni ye nde.

Dutingo na songo ti kamarade na Nzapa

Ge nga, Bible alingbi ti mû maboko na e. Akozo chapitre ni amû na e afä so zo alingbi ti ke ni pëpe so Jéhovah Nzapa ayeke mbeni Babâ ti ndoye. Na tapande, na pekoni so lo leke Adam na Eve, lo zia ala gi tongaso pëpe sân ti fa tele ti lo na ala. Nde na so, lo yeke sala lani lisoro na ala lakue. Lo zia ala pëpe na yaka ti Eden ti tene ala mveni afa lege na tele ti ala na ngoi so lo yeke sala ambeni ye nde. Nde na so, lo mû lani na ala mbilimbili fango lege na ndo ti dutingo na fini so ayeke tâ nzoni mingi. Lo mû na ala mbeni nzoni kusala so ayeke ga na ngia, nga lo leke si ala wara fango ye so ayeke gue lakue na li ni (Genèse 1:26-30; 2:7-9). A yeke pëpe ye so mo yeke ku na mbage ti mbeni babâ so alingbi, nga so ayeke na ndoye? Gbu li fadeso na ndo nda ti aye so. Denielle atene: “So mbi hinga so Jéhovah aleke sese nga lo leke e na mbeni lege so e lingbi ti wara ngia na yâ ti aye so lo leke, a fa na mbi so lo ye si e duti na ngia.”

A ngbâ gi ge pëpe. Na tapande ti mbeni nzoni babâ, Jéhovah aye si amolenge ti lo oko oko kue aduti na songo na lo. Na ndo tënë so, Kusala 17:27 atene na e: “Lo yeke yongoro pëpe na e oko oko kue.” Ye so andu mo tongana nyen? Amber atene: “Hingango Jéhovah adë bê ti mbi so mbi yeke lâ oko pëpe gi mbi oko. Atâa ye wa asi, mbi yeke lakue na mbeni zo ti gue na mbage ti lo ti wara mungo maboko.” Na ndo ni, tongana mo yeke gi ti hinga Jéhovah, mo yeke bâ ande so lo yeke na nzobe, lo yeke mbilimbili nga nzoni. Mo lingbi ti zia bê kue na lo. Jeff atene: “Na ngoi so Jéhovah aga mbeni kamarade so ayeke ndulu na mbi, mbi hinga so mbeni zo nde na lo ayeke dä pëpe so ayeke duti ndulu ti mû maboko na mbi.”

Mawa ni ayeke so, a yeke diko asioni tënë mingi na li ti Jéhovah. A yeke bâ lo tongana zo so ayeke na gunda ti pasi ti azo nga na sioni salango ye ti azo so atene ala yeke voro lo. A yeke bi na li ti lo tënë ti asioni sana so asi na yâ mbaï ti azo. Me Deuteronome 32:4, 5 atene: “Lege ti Lo kue ayeke mbilimbili . . . Ala futi lege ti ala mveni, ala yeke amolenge ti Lo pëpe, ngbanga ti sioye ti ala; ala yeke awagame ti kirikiri na azo ti handa.” Tongaso, a yeke ngbanga ti e ti gi nda ti atënë ni e mveni.​—Deutéronome 30:19, 20.

Aye so Nzapa aleke ti sala aga tâ tënë

Ye oko, mbeni ye so e mveni e soro ti sala alingbi pëpe ti kanga lege na Nzapa ti sala si ye so lo leke ti sala teti sese nga na azo aga tâ tënë kue. Teti biani, lo la lo yeke Wasalango ye. Tongaso, ye wa lo leke ti sala? Jésus Christ asala tënë ni na yâ Fango ye na ndo ti Hoto tongana lo tene: “Ngia ayeke na azo so ayeke na tâ be-ti-molenge, teti fade sese so aga ye ti héritier ti ala.” Na pekoni, lo fa na bazengele Jean so Nzapa aleke biani na bê ti lo ti “futi ala so afuti sese.” (Matthieu 5:5; Apocalypse 11:18). Teti so Jésus ayeke na tele ti Nzapa na ngoi ti lekengo aye, lo hinga so, na tongo nda ni, ye so bê ti Nzapa aye ayeke ti tene mbeni bungbi ti azo so ayeke mbilimbili-kue aduti na ndo ti mbeni sese so ayeke paradis teti lakue lakue (Genèse 1:26, 27; Jean 1:1-3). Na Nzapa agbian pëpe (Malachie 3:6). Nzapa amû na e zendo so: “Biani, ye so Mbi bi bê ti Mbi dä, fade ye ni aga tâ ye; na ye so Mbi leke na bê ti Mbi awe, fade ye ni aga tongaso.”​—Esaïe 14:24.

Na ngoi ti e, Jéhovah akomanse ti leke awe gunda ti mbeni bungbi so ayeke beoko na so aluti pëpe na ndo kota bê ti wara ye nga na kion tongana ti so amû ndo na yâ sese ti e ti laso, me a luti na ndo ndoye teti Nzapa nga na amba ti e (Jean 13:35; aEphésien 4:15, 16; aPhilippien 2:1-4). A yeke mbeni bungbi ti azo so amû tele ti ala na bê ti ala mveni, nga ye so agbu bê ti ala ayeke guengo na li ni na yâ kusala so a mû na zo oko oko: ti fa nzo tënë ti gango ti Royaume ti Nzapa kozoni si aye ti sese so ahunzi (Matthieu 24:14; 28:19, 20). Tongana mbeni sewa ti aita so ayeke beoko na yâ ti akodoro ahon 230, aChrétien so wungo ti ala ahon kutu omene abungbi oko awe ti voro Nzapa na yâ ti ndoye.

Sala si gigi ti mo aga nzoni

Tongana mo yeke gi ti hinga ye so alingbi ti sala si gigi ti mo akiri aga nzoni, a lingbi mo hinga so Jéhovah ayeke tisa mo fadeso ti bungbi oko na azo ti lo so ayeke “mara ti mbilimbili”. (Esaïe 26:2). Ye oko mo lingbi ti hunda tele ti mo, ‘Dutingo ti azo na yâ bungbi ti aChrétien so ayeke tongana nyen? Mbi ye biani ti lï na yâ ni?’ Mä ye so ambeni maseka atene:

Quentin: “Kongregation ni ayeke ndo ti batango tele ti mbi yongoro na sese so. Hingango so Jéhovah ayeke mbage ti fini ti mbi amû maboko na mbi ti bâ so lo yeke dä na lo ye si mbi duti na ngia.”

Jeff: “Kongregation ni ayeke tâ nzoni ndo so mbi lingbi ti gue dä ti wara dengo bê. Aita ti mbi ti koli na ti wali ayeke na yâ ni, ala yeke mû maboko na mbi na ala gonda mbi. Ala yeke biani kota sewa ti mbi.”

Linet: “Tongana mbi bâ mbeni zo ayeda na tâ tënë ti Bible na amû desizion ti sala na Jéhovah, mbi yeke na ngia mingi, ngia so a lingbi ti haka ni na mbeni ye nde pëpe. Ye so ayeke ga na kota nzerengo tele na mbi.”

Cody: “Sân Jéhovah, fini ti mbi ayeke duti ye oko pëpe. Mbi yeke fono fade gi kirikiri tongaso tongana ambeni zo so ayeke tara ti wara tâ ngia, me ala wara ni pëpe. Nde na so, Jéhovah amû na mbi matabisi ti ngele ngangu so ayeke ti duti na songo na lo, na ye so asala si gigi ti mbi aga nzoni.”

Ngbanga ti nyen mo mveni mo gi pëpe ti hinga ye na ndo Jéhovah? Mo yeke bâ ande so na gango ndulu na Wasalango mo, Jéhovah Nzapa, gigi ti mo ayeke ga biani nzoni.

[Afoto na lembeti 31]

Dutingo na songo na Nzapa asala si gigi ti e aga nzoni

[Lingu ti foto ni na lembeti 29]

NASA photo