Fini so anzere laso nga teti lakue lakue

MO LINGBI ti duti na fini so anzere même laso. Na lege wa? Na sarango ye alingbi na awango ti ndara so ayeke na yâ ti Bible, Mbeti ti Nzapa. Zia e bâ ambeni wango ni.

YE SO BIBLE AFA: Gbia Salomon atene: “Mbeni ye ti nzoni ahon teti zo ayeke pëpe, gi ti te na nyon, na ti sara si âme ti lo awara ngia na lege ti kusala ti lo.”​—ZO-TI-FA-TENE 2:24.

A sara e azo ti wara ngia na yâ ti nzoni kua so e yeke sara. Même na yâ ti aye so ayeke ngangu mingi, e lingbi ti duti na ngia kamême laso na yâ ti kua so e yeke sara na bê ti e kue nga so e yeke sara na lege ni.

YE SO BIBLE AFA: “Ngia ayeke mingi tongana zo amû ye na zo ahon ti wara ye na maboko ti zo.”​—KUSALA 20:35.

Azo mingi abâ so ti sara aye ndali ti amba ti ala aga na ala aye ti nzoni mingi nga a sara si fini ti ala anzere biani. Na tapande, ala yeke mû ngoi nga na ngangu ti ala ti mû maboko na amba ti ala so ayeke na akpale. Salomon atene: “Mo gbanzi nzoye pëpe na lo so alingbi na ni, tongana ye ni ayeke na tïtî mo ti sara na ni.”​—aProverbe 3:27.

Bâ tapande ti Ralph. Na pekoni so lo gue na retraite awe, lo mû peko ti wali ti lo na yâ ti kusala ti ngoi kue. Zo oko oko ayeke mû angbonga mingi nze na nze ti manda Bible na azo. Ralph atene: “Na ngoi so e kiri na da na lakui, e woko. A yeke gi pëpe ndali ti so e ga mbakoro, me a yeke ndali ti so e mû ngangu ti e kue ti sara na kusala ti Babâ ti e ti yayu. E woko ndali ti mbeni nzoni kusala.” Ralph na wali ti lo ayeke na ngia ndali ti so ala mû fini ti ala ti mû maboko na ambeni zo.

YE SO BIBLE AFA: “Tâ ndeko andoye lakue; na lâ ti ye ti vundu, lo yeke tongana tâ ita.”​—APROVERBE 17:17.

Tongana zo ayeke gi lo oko pëpe na yâ ti akpale, a yeke ngangu pëpe na lo ti gbu ngangu. Francis Bacon, wasenda-ndara ti Angleterre, atene so azo so ayeke na atâ kamarade pëpe, “dunia ayeke tongana mbeni yando.” Dutingo na atâ kamarade nga dutingo mbeni nzoni kamarade alingbi ti sara nzoni mingi na mo; a lingbi ti sara si mo duti nzoni nga na ngia.

YE SO BIBLE AFA: “Ngia ayeke na ala so ahinga so ala yeke na bezoin ti aye ti yingo.”​—MATTHIEU 5:3.

Na lege ti tënë so, Jésus afa tâ ye so a lingbi mo sara tongana mo ye ti bâ nzoni na lege ti gango tâ tënë ti aye so Nzapa amû zendo ni. A lingbi mo hinga so mo yeke na “bezoin ti aye ti yingo” na mo gi ti wara ni. Nde na anyama, a dü e azo na nzara ti hinga ndani so e yeke na fini. Gi Jéhovah Nzapa oko la alingbi ti kaï nzara so, na lo sara ni na lege ti Bible. Tongana ti so e bâ na yâ ti article so ahon, Bible afa ye so Nzapa aleke ti sara ndali ti sese. Bible afa na e ndani so a sara e azo, ngbanga ti nyen pasi ayeke mingi, nga nyen la Nzapa aye ti tene e sara. A yeke kota ye ti hinga atâ tënë so tongana e ye ti duti na fini so anzere. Azo so amû ngoi ti manda Bible nga ti sara ye alingbi na aye so ala manda ayeke na ngia. Ngbanga ti nyen? Ngbanga ti so ala yeke na mbeni kpengba songo na Wasarango e Jéhovah, “Nzapa so ayeke na ngia”.​—1 Timothée 1:11.

YE SO BIBLE AFA: “Fadeso, mo dabe mo na Lo so acréé mo, na lâ ti pendere ti mo, kozoni si lâ ti sioni aga, na ngu ni asi, so fade mo tene, Mbi wara ngia na yâ ala pëpe.”​—ZO-TI-FA-TENE 12:3.

A yeke wango so Gbia Salomon amû na amaseka so na mbeni ngoi ala lingbi ti bâ pëpe so akpale alingbi ti si na e na nda ti fini ti e. Zia Wasarango mo na kozo ndo na yâ ti fini ti mo. Ye so la ayeke sara si mo yeke hinga tâ ndani so mo yeke na fini. Ke bibe so atene: “Zia e te na e nyon ngbanga ti so kekereke e yeke kui kuingo.” (1 aCorinthien 15:32). Tongana mo zia Nzapa na kozo ndo, ‘fade aye ayeke ga nzoni’ na mo tongana ti so Zo-ti-fa-tene 8:12 atene.

Mbeni wali so iri ti lo Wendi abâ so tënë so ayeke tâ tënë. Na ngoi so lo de lani maseka, lo na ita ti lo ti wali amanda yanga ti Espagnole tongaso si ala lingbi ti gue na République Dominicaine, ndo so a yeke na bezoin ti awafango nzoni tënë dä mingi. Wendi atene: “E sara asacrifice mingi ti sara kusala na ndo so bezoin ayeke dä, na a yeke lani mbeni ngoi so anzere na e mingi na yâ ti fini ti e. Aye so mbi sara na yâ ti anze omene so ayeke nzoni mingi ahon tanga ti aye kue so mbi lingbi fade ti sara! Aye ti nzoni so e wara ahon asacrifice so e sara.”

Dutingo be-ta-zo na Nzapa asara si fini anzere

Dutingo na mbeni kpengba songo na Jéhovah alingbi ti sara si fini ti mo anzere na mbeni lege so ayeke tâ nde mingi. Na lege wa? Satan apusu Adam na Ève ti ke komandema ti Nzapa, lo tene nga so zo oko ayeke ngbâ be-ta-zo na Nzapa pëpe na yâ ti tara (Job 1:9-11; 2:4). Mo lingbi ti fa so Satan ayeke zo ti mvene. Na lege wa? Na ngbango be-ta-zo na Nzapa, na sarango ye lakue alingbi na afango ye ti lo, nga na fango so mo yeda so Jéhovah la ayeke na droit ti fa na e ye so ayeke nzoni na ye so ayeke sioni.​—Apocalypse 4:11.

E lingbi ti tingbi na akpale tongana e ye ti sara ye so ayeke na lege ni. Akpale ni so ayeke sara si fini ti e anzere pëpe? Bâ so mbeni sioni wato atene tënë ti mvene na ndo ti mbeni kamarade ti e so e ye lo mingi wala mbeni zo ti sewa ti e. Tongana na gbungo koko ti zo ti e ni si e wara kpale na mbage ti wato ti e ni, ye so ayeke sara si e girisa ngia ti e? Oko pëpe! E yeke duti na ngia ti gbu ngangu na yâ ti akpale ni ti zi tënë ti mvene so a bi na ndo ti zo ti e ni. Ngbango be-ta-zo na Nzapa ayeke nga legeoko tongaso. Dutingo be-ta-zo ti e na Nzapa na yâ ti aye ti sioni ayeke zia ngia biani na bê ti lo.​—aProverbe 27:11.

Fini so anzere teti lakue lakue

Tongaso, sara kue ti manda aye kue so mo lingbi ti hinga na ndo ti Nzapa nga na ndo ti ye so lo leke ti sara. Jésus Christ atene: “Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa, nga ti hinga lo so mo tokua lo, Jésus Christ.” (Jean 17:3). Na ngoi so Nzapa ayeke sara si ye so lo leke na tongo nda ni ti sara ndali ti sese aga tâ tënë, azo so ayeke be-ta-zo ayeke wara ande aye so Jéhovah aleke lani ti sara ndali ti ala; “fini ti lakue lakue” na yâ ti paradis na ndo ti sese. Na pekoni fini ti azo ayeke nzere biani nga ala yeke duti na ngia.​—Psaume 145:16.

Mo yeke wara hingango ye so Jésus asara tënë ni so na ndo wa? Na yâ ti Bible, Mbeti ti Nzapa. Tongana mo ye si mbeni zo amû maboko na mo, sû mbeti na azo so asigigi na mbeti so. A yeke nzere na ala ti leke ti tene mbeni zo aga amû maboko na mo ti hinga ye so Bible afa biani.