Lingu ti wango so ayeke nzoni ahon atanga ni kue

TI DUTI na mbeni fini so ayeke nzoni ayeke biani mbeni pendere ye. Kelele ti dutingo na mara ti fini tongaso na yâ sese so zo ahinga li ti lo dä pëpe ayeke ti wara nzoni wango nga nzara ti sala ye alingbi na ni. Ye oko, azo ayeke lakue pëpe na nzara ti bi bê na ndo anzoni wango. Azo mingi atene so zo alingbi ti duti na fini tongana ti so bê ti lo mveni aye. Biani, Bible afa so Satan, ngbele wato ti yanga-ti-komande ti Nzapa, azia lani na gbele kozo koli na kozo wali bibe ti dutingo yamba. Genèse 3:5 afa peko ti tënë so lo tene na Eve: “Nzapa ahinga na lâ ni so i te lê ni [ti keke ti hinga nzoni na ti hinga sioni], fade lê ti i alungula, na i ga tongana Nzapa, i hinga nzoni na sioni.”

Na peko ti so Adam na Eve azia si bê ti ala mveni afa lege na ala, ala wara biani lege ti duti na fini so ayeke nzoni, sân ti wara aye ti sioni na pekoni? Oko pëpe. Gi fade fade na peko ti salango ye ti ala na tenengo so ala hinga nzoni na sioni, vundu agbu bê ti ala. Nzapa ake ala na ala to nda ti bâ pasi na yâ siokpari; na nda ni ye so ague na ala na kui (Genèse 3:16-19, 23). Na kui asi na e kue. Bible atene: “Legeoko tongana siokpari aga na sese so na lege ti zo oko [Adam], na kui aga na lege ti siokpari, tongaso kui asi na azo kue, teti azo kue asala siokpari.”​—aRomain 5:12.

Atâa asioni ye so aga na peko ti lege so Adam na Eve asoro ti mû, azo mingi angbâ ti ke ti tene ala sala ye alingbi na awango ti ndara so alondo na mbage ti Wasalango zo. Ye oko, Bible mveni atene so ni londo “na yanga ti Nzapa” na ni lingbi ti mû maboko na e ti duti azo so “alingbi kue,” so ‘awara ye kue alingbi teti nzo kusala kue.’ (2 Timothée 3:16, 17). E lingbi biani ti kono ande ngia ti e tongana e mû peko ti awango so ayeke na yâ ti Bible. Sewa ayeke tâ ndo so a lingbi a sala kusala na wango so na yâ ni.

Dutingo be-ta-zo na yâ ti mariage

A lingbi na ye so Bible atene, Nzapa aleke mariage ti tene a ngbâ teti lakue lakue (Genèse 2:22-24; Matthieu 19:6). Nga, Mbeti ti Nzapa atene so “a lingbi tange ti mariage aga sioni pëpe,” so aye ti tene so a lingbi a buba mariage pëpe na lege ti bungbingo koli na wali na gigi ti mariage (aHébreu 13:4). Ye oko, mo hinga peut-être so laso mingi ti ambeni zo so asala mariage awe asala ye alingbi na ndia so pëpe. Ambeni zo lakue na place ti kua ti ala ayeke sala angia ti koli na wali na azo so ayeke koli wala wali ti ala pëpe. Ambeni nde ayeke tene mvene na sewa ti ala ti wara lege ti gue ti sala ngia na mbeni koli wala wali ahon wali wala koli ti ala ti mariage. Ambeni zo même ake koli wala wali ti ala ti gue na peko ti mbeni maseka. Ala tene so ye ni asala si ala mveni abâ tele ti ala so ala ngbâ maseka mingi, legeoko tongana ti so asi na Verónica so e sala tënë ti lo na tongo nda ti kozo article ni.

Ye oko, ti leke na bê ti kaï nzara ti tele ti mo mveni atâa aye ti pekoni alingbi ti duti tongana nyen ayeke ga na zo ngia so aninga pëpe. Ronald alingbi ti yeda na tënë so. Lo tene lani na bê ti lo so ye ni ayeke sala si fini ti lo aga nzoni mingi. Lo ke wali ti lo na lo gue ti leke mbeni fini sewa na wali so ayeke ndeko ti lo ngbele ye ngu omene, so lo dü na lo amolenge use kozoni awe. Ye oko, na peko ti so lo buba mariage ti lo, ndeko ti lo ni ake lo. Na ndani, Ronald akiri na ndo ti babâ na mama ti lo. Lo fa peko ti ye so asi na lo tongana mbeni ye so “akiri na nengo ti lo na peko.” Me, so ayeke gi mbeni tapande oko. Mara ti salango ye tongaso, so gi bibe ti kion si afa lege na ni, ayeke na gunda ti adivorce mingi nga na ti bubango ti asewa; na ye so asala si azo mingi, akota zo na akete molenge, ayeke bâ pasi.

Nde na so, salango ye alingbi na awango ti Bible ayeke ga na zo tâ ngia. E yeke na tapande ti Roberto, so atene: “Ndali ti wango ti Bible mbi sala pëpe mbeni ye so alingbi ti pusu wali ti mbi ti ke mbi. E yeke wara tâ ngia pëpe tongana e yeda ti bungbi na mbeni koli wala wali nde na ti e, atâa zo ni ayeke pendere tongana nyen. Fango ye ti Bible amû maboko na mbi ti ne wali ti mbi, so ayeke na tele ti mbi a sala angu mingi awe.” Wango ti Bible so atene “i zia zo oko asala na lege ti handa ti ke wali ti lâ ti pendere ti lo pëpe” asala ngangu mingi na yâ fini ti Roberto (Malachie 2:15). Na yâ ambeni lege wa wango ti Nzapa alingbi ti ga na ye ti nzoni na e?

Kode ti fango lege na amolenge ti e

A sala ngu bale-osio tongaso awe so bibe so atene a lingbi ababâ na mama azia katikati mingi pëpe na yâ fango lege na amolenge ti ala amû ndo kue. Na a bâ so a yeke na lege ni ti tene a zia lege na amolenge ti mû ala mveni adesizion na ndo atënë ti bê nga na tambela ti ala. A sala tongaso ti tene a kanga lege na maïngo ti ala pëpe. Na ambeni ndo, a leke nzoni pëpe kapa ti mandango mbeti, ti tene a zia lege na a-élève ni mveni ti soro ti bê ti ala ti gue na klase wala pëpe, ti soro ngoi oke ala ye ti mû ti sala na ngia wala ti tene a fa na ala mbeti. Kode so mbeni mara da-mbeti tongaso azia ni na sese ayeke ti tene “a mû lege na amolenge ni ti soro ye so bê ti ala aye sân ti tene mbeni biazo akasa ala wala amû maboko na ala.” Laso, ambeni zo so kua ti ala ayeke ti mû wango na ndo salango ye ti zo angbâ lakue ti dë kite ti aye ti nzoni so alingbi ti ga na peko ti mungo na molenge ambeni sengo ndo, tongana pika, atâa so na yâ ti ambeni ye ababâ na mama abâ ti ala so a hunda ti se ala na ndoye.

Ye nyen asi na pekoni? Mingi ti azo abâ ti ala so kode ti zi lege yamba na amolenge so a bata ala amû lege na amolenge ni ti wara liberté ahon ndo ni, na ala bâ ti ala so a yeke kode so si ayeke na gunda ti kota guengo na li ni ti kengo-ndia nga na ti nyongo mbangi. Mbeni gingo nda ti ye so a sala ni na kodoro ti Amerika afa na gigi so na popo ti azo 100 so a hunda ala, 70 atene ti ala so amaseka awara pëpe tâ sengo ndo so ala yeke na bezoin ni. Tongana a yeke tara ti gi lege ti hinga aye so ayeke na gunda ti apikango zo na ngombe na da-mbeti nga na ti ambeni kota kengo-ndia so amaseka ayeke sala ni, mingi ti azo ayeke bi tënë ni na ndo ti “ababâ na mama so ayeke bi lê na ndo ti amolenge ti ala nzoni pëpe.” Atâa tongana aye ti peko ti asalango ye so ayeke sioni mingi tongaso pëpe, ababâ na mama nga na amolenge ayeke ko sioni lengo so ayeke ga na peko ti fango lege nzoni pëpe na amolenge ti ala.

Bible atene ti lo nyen na ndo tënë so? Wango ti Mbeti ti Nzapa atene so a lingbi babâ na mama asala kusala na ngangu ti ala ti komande gi pëpe na lege ti ndoye, me nga ti luti na ndo ndia so ala lu ni. Bible atene: “Ye ti buba ayeke na bê ti molenge, me keke ti se lo atomba ye ti buba so yongoro.” (aProverbe 22:15). Biani, a yeke nzoni asengo ndo kue so ababâ na mama ayeke mû ni alingbi na aye so asi. Salango ye na ngangu pëpe, ngangu ti kanga nzara ti tele nga na bingo bê na ndo zo alingbi ti duti na gunda ti asengo ndo kue so a yeke mû ni. Ti sala tongaso ayeke mbeni fä ti ndoye. Na salango kusala na ngangu ti ala ti komande na lege ti ndoye, me na ngangu pëpe, ababâ na mama ayeke mû lege na ye kue ti ga nzoni.

Aye ti nzoni ayeke ga na peko ti salango ye legeoko na wango so. Arturo, mbeni koli ti ngu 30 so ayeke na Mexique na so asala mariage ade ti ninga pëpe, atene: “Babâ ti mbi afa polele na mbi nga na aita ti mbi ti koli so a yeke lo na mama ti mbi si ayeke na ngangu ti komande na yâ ti sewa ni. Ala yeke ndulu ti mû na e sengo ndo. Ye oko, lakue ala yeke na ngoi ti sala lisoro na e. Na fadeso mbi ga biazo awe, mbi bâ nene ti fini ti mbi so a leke gunda ni nzoni, na mbi hinga so mingi ni a yeke nzoni fango lege so mbi wara na ngoi so mbi de kete si ayeke na gunda ti nzoni duti ti mbi.”

Wara ye ti nzoni na lege ti wango so ayeke nzoni ahon atanga ni kue

A yeke wara na yâ ti Tënë ti Nzapa, Bible, awango so ayeke nzoni ahon atanga ni kue so azo alingbi ti wara ni. Fango lege so Bible ayeke mû abâ gi akpale ti sewa pëpe. A yeke leke e na yâ alege mingi, teti so a yeke fa na e tongana nyen e lingbi ti sala ye na yâ sese so; sese so na yâ ni mingi ti azo aye ti yeda pëpe so mbeni Lingu ti ndara so ayeke kota ahon atanga ni kue ayeke dä ti fa lege na fini ti e ndali ti nzoni ti e mveni.

Jéhovah Nzapa, Wasalango zo amû beku so na e na lege ti wasungo psaume David: “Fade Mbi wa mo, na Mbi fa na mo lege so a lingbi mo tambela dä; fade Mbi wa mo, na lê ti Mbi angbâ na ndo mo.” (Psaume 32:8). Bi bê ti mo kete na ndo ye so: Wasalango e ayeke bi lê ti lo na ndo e ti bata e si e tï pëpe na yâ ye ti sioni! Ye oko, hundango tënë ni teti zo oko oko ayeke so: ‘Na tâ be-ti-molenge, mbi yeke yeda na fango lege ti Jéhovah so ayeke bata zo?’ Tënë ti lo atene na e na ndoye: “Zia bê ti mo kue na L’Eternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sala si lege ti mo aga mbilimbili.”​—aProverbe 3:5, 6.

Ti manda ti hinga Jéhovah ahunda ti sala ngangu nga ti mû tele ti mo kue dä; ye oko, na lege ti Bible, azo kue alingbi ti sala ni. “Zendo ayeke dä teti fini ti fadeso na teti fini so ayeke ga” tongana e duti na fini tongana ti so Nzapa ahunda na e. A yeke biani lege ti wara ye mingi tongana a bâ aye ti nzoni so dutingo so ayeke ga na ni.​—1 Timothée 4:8; 6:6.

Tongana ndara so ayeke na yâ ti Bible nga na adeba nzoni so ayeke ga na peko ti salango ye alingbi na ni anzere na mo, sala si dikongo Tënë ti Nzapa nga gbungo li na ndo ni aduti aye so mo yeke zia na kozo ndo na yâ fini ti mo. Salango tongaso ayeke mû ande maboko na mo ti luti nzoni na gbele akpale so mo yeke wara ni laso nga na ngoi so ayeke ga. Nga, mo yeke wara beku ti duti na yâ fini sese ti Nzapa, so na yâ ni Jéhovah ayeke fa ye na azo kue, na siriri ti ala ayeke wu mingi.​—Esaïe 54:13.

[Foto na lembeti 5]

Wango ti Bible alingbi ti kpengba kamba ti mariage

[Afoto na lembeti 6]

Wango ti Bible: gunda ti nzoni fango lege me akanga lege pëpe na zo ti sala ngia

[Afoto na lembeti 7]

Azo kue so asala ye so ague legeoko na wango ti Bible ayeke duti na mbeni fini so ayeke nzoni