A ke e senge senge

“Ala ke Mbi senge senge.”​—JEAN 15:25.

A-TÉMOIN TI JÉHOVAH ayeke sala kue ti bata akpengba-ndia so ayeke na yâ Tënë ti Nzapa. Ye ti pekoni ayeke so, a yeke tene nzoni tënë ti ala na yâ ti akodoro mingi. Ye oko, na ambeni ngoi, a yeke buba iri ti ala. Na tapande, mbeni kota zo ti gbata ti St. Petersburg, na Russie, adabe ti lo: “A fa aTémoin ti Jéhovah na e tongana mbeni secte ti gbemingo so ayeke sala aye ti lo na hondengo ni, ala yeke fâ amolenge nga ala yeke fâ tele ti ala mveni.” Me na pekoni so lo sala kusala na tele ti aTémoin ti Jéhovah na ngoi ti mbeni kota bungbi, oko kota zo so atene: “Fadeso mbi bâ so ala yeke tongana tanga ti azo kue, ala ye ngia . . . Ala yeke na siriri, ala yeke kpô nga ala ye tele mingi.” Lo kiri lo tene: “Mbi hinga tâ ye so adö azo ti tene mara ti mvene so na ndo ti ala pëpe.”​—1 Pierre 3:16.

² A nzere pëpe na awakua ti Nzapa ti tene a buba iri ti ala na hiringo ala asioni zo; ye oko, a yeke ye ti dongo bê pëpe tongana azo adiko asioni tënë na tele ti ala. Jésus agboto lani mê ti adisciple ti lo: “Tongana sese so ake i, i hinga sese ni ake Mbi kozoni si a ke i. . . . Ye so aga si tënë ti mbeti ti Ndia ti ala alingbi ga tâ tënë, Ala ke Mbi senge senge.”a (Jean 15:18-20, 25; Psaume 35:19; 69:5). Kozoni na so, lo tene lani na ala: “Tongana ala di iri ti mveni ti da Béelzébul, fade ala di iri ti azo ti da ti lo sioni mingi ahon so pëpe?” (Matthieu 10:25). A-Chrétien agbu nda ni so yongo mara ti zonga so ayeke mbage ti “keke ti pasi” so ala yeda na ni tongana ala ga adisciple ti Christ.​—Matthieu 16:24, NW.

³ Salango ngangu na atâ wavorongo ayeke mbeni ye so abâ gigi a ninga awe, a to nda ni na “Abel zo ti mbilimbili”. (Matthieu 23:34, 35). A yeke pëpe mbeni ye so ayeke si gi ngoi na ngoi. Jésus atene lani so ‘azo kue ayeke ke’ adisciple ti lo ngbanga ti iri ti lo (Matthieu 10:22). Na ndo ni, bazengele Paul asû na mbeti so a lingbi awakua ti Nzapa kue (so a ndu nga zo oko oko na popo ti e) aku tele ti ala na salango ngangu (2 Timothée 3:12). Nda ti salango ngangu ni ayeke nyen?

Tâ gunda ti kengo e senge senge

⁴ Tënë ti Nzapa afa so ngbele ye na tongo nda ti mbaï ti azo, mbeni zo so lê abâ pëpe si ayeke na gunda ti ye ni. Bâ lege so a fâ Abel, kozo zo ti mbilimbili, na ngangu. Bible atene so ita ti lo Caïn, zo ti fango lo, “ayeke ti wato-sioni,” Satan Zabolo (1 Jean 3:12). Caïn amû mara bibe ti Satan; na Zabolo asala kusala na lo ti sala ye ti sioni so lo Zabolo ni lo leke ti sala. Bible afa nga kusala ti Satan na yâ ti aye ti sioni so asi na Job nga na Jésus Christ (Job 1:12; 2:6, 7; Jean 8:37, 44; 13:27). Buku ti Apocalypse afa polele zo so ayeke na gunda ti salango ngangu na adisciple ti Jésus, na tenengo: ‘Fade zabolo abi ambeni oko oko ti i na da ti kanga, si a lingbi tara i.’ (Apocalypse 2:10). Biani, Satan si ayeke na gunda ti kengo ndo kue so a ke na azo ti Nzapa senge senge.

⁵ Nda ni so Satan ake atâ wavorongo Nzapa ayeke nyen? Ti fa tâ kota baba ti lo, na yâ ti mbeni lekengo ye na lingo, Satan alondo lani ti haka tele ti lo na “Gbia ti lakue lakue,” Jéhovah Nzapa (1 Timothée 1:17; 3:6). Lo tene so Nzapa akanga lege ngangu na azo so lo komande ala, nga a yeke pëpe anzoni bibe si apusu azo ti sala na Jéhovah, me ala yeke voro lo gi ti wara ye na pekoni. Satan atene so tongana a zia lege na lo ti tara azo, lo lingbi ti gboto ala kue na tïtî Nzapa (Genèse 3:1-6; Job 1:6-12; 2:1-7). Na yâ ti mvene so lo yeke tene ti fa Jéhovah tongana zo ti salango ngangu, zo ti mvene nga zo so aye ti lo atï na ngu awe, Satan ayeke gi ti ga mbeni kota gbia ti dunia kue tongana Jéhovah. Tongaso, ye so apusu lo ti duti na kota ngonzo na tele ti awakua ti Nzapa ayeke kota nzara ti lo ti tene a voro lo.​—Matthieu 4:8, 9.

⁶ Mo bâ tongana nyen tënë so andu fini ti mo? Mo so mo yeke wakua ti Jéhovah, mo lingbi ti bâ so a hunda salango ngangu na bê kue ti sala ye so bê ti Nzapa aye, me aye ti nzoni so aga na pekoni ayeke mingi ahon ngangu so mo sala. Ye oko, ka tongana dutingo ti mo asala si a yeke ngangu, même a yeke ye ti pasi mingi teti mo ti ngbâ ti bata andia nga na akpengba-ndia ti Jéhovah? Ka tongana mo bâ peut-être so mo yeke wara ye ti nzoni na pekoni pëpe? Mo yeke tene na nda ni so ti ngbâ ti sala na Jéhovah ayeke gi senge senge? Wala kota ndoye teti Jéhovah na bê ti kiri singila teti apendere lengo ti lo ayeke pusu mo ti ngbâ ti tambela na alege ti lo kue? (Deutéronome 10:12, 13). Na ziango lege na Satan ti ga na ambeni ye ti ngangu na ndo e, Jéhovah ayeke mû lege na zo oko oko ti kiri tënë na tënë so Satan asigigi na ni.​—aProverbe 27:11.

“Tongana azo azonga i”

⁷ Na yâ ngangu so lo yeke sala ti fa tâ tënë ti atënë so lo bi na li ti Jéhovah na awakua ti lo, Satan ayeke mû akusala ti mayele nde nde nde. Mbeni oko ayeke asioni tënë ti mvene. Zia e bâ ni. Jésus ahiri Satan “babâ ti mvene.” (Jean 8:44). Iri, Zabolo, so aye ti tene “Zo ti dikongo sioni tënë na ndo zo”, afa lo tongana kota zo ti tenengo mvene na ndo Nzapa, na ndo tënë ti lo so ayeke nzoni nga na ndo iri ti lo so ayeke nzoni-kue. Zabolo ayeke sala kusala na atënë so yâ ni aba, atënë ti wataka nga na angbongboro mvene ti dë kite na kota yanga-ti-komande ti Jéhovah, nga lo yeke sala kusala na a-oko kode so ti buba iri ti awakua be-ta-zo ti Nzapa. Na tenengo gbâ ti amvene so na ndo ti aTémoin, lo lingbi ti sala si mbeni kota tara akiri aga ngangu mingi si ala bâ so a yeke ngangu ti kanga bê dä.

⁸ Bâ ye so asi na Job, so nda ti iri ti lo aye ti tene “Ye ti ke”. Job agirisa aye so na lege ni lo yeke wara kobe ti yanga ti lo, amolenge ti lo akui nga lo bâ pasi na kobela. Na ndo ti aye so kue, Satan asala si azo abâ Job tongana mbeni wasiokpari so Nzapa ase lo. Atâa so ândö azo ayekia lo mingi, Job aga fadeso mbeni ye ti ke, même na lê ti asongo nga na atâ kamarade ti lo (Job 19:13-19; 29:1, 2, 7-11). Na ndo ni, na lege ti azo ti dengo bê ti wataka, Satan agi ti ‘fâ Job ndulu ndulu na atënë ti yanga’: kozoni, na ngorongo tënë ni ti fa so lo sala mbeni kota siokpari, na pekoni na tenengo na lo polele so lo yeke mbeni zo so asala sioni (Job 4:6-9; 19:2; 22:5-10). Bâ tongana nyen aye so asala si bê ti Job anze!

⁹ Teti so lo yeke kota zo so amû mbage ti kota yanga-ti-komande ti Jéhovah, Molenge ti Nzapa aga tâ mbilimbili zo so Satan ake lo. Tongana Jésus aga lani na sese, Satan agi ti buba dutingo ti lo na lege ti yingo, legeoko tongana ti so lo sala na Job, na salango si azo abâ Jésus tongana mbeni wasiokpari (Esaïe 53:2-4; Jean 9:24). Azo ahiri lo zo ti nyongo ye nga zo ti tengo ye, na ala tene so lo “yeke na yingo sioni.” (Matthieu 11:18, 19; Jean 7:20; 8:48; 10:20). A bi tënë ti wataka na li ti lo, a tene lo zonga Nzapa (Matthieu 9:2, 3; 26:63-66; Jean 10:33-36). Ye so azia vundu na bê ti Jésus, teti lo hinga so ye ni abi zonga senge senge na ndo iri ti Babâ ti lo (Luc 22:41-44). Na nda ni, a fâ Jésus na ndo keke tongana mbeni sioni zo so zonga ayeke na li ti lo (Matthieu 27:38-44). Na batango be-biani so alingbi kue, Jésus agbu ngangu na “yâ kengo-tene ti awasiokpari”.​—aHébreu 12:2, 3.

¹⁰ Na ngoi ti e, tanga ti adisciple ti Christ so a sa yingo na ndo ti ala aga nga ye ti ke na lê ti Zabolo. A fa Satan tongana “zo so aklame aita ti [Christ] . . ., lo so aklame ala na gbele Nzapa lâ na bï.” (Apocalypse 12:9, 10). Ngbele ye so a tomba lo na yayu na a bi lo na mbage ti sese, Satan ayeke sala kue ti sala si aita ti Christ aga ye so azo ake ni na bê ti ala kue (1 aCorinthien 4:13). Na yâ ti ambeni kodoro, a bi atënë ti wataka na li ti ala na a hiri ala mbeni secte ti sioni, legeoko tongana ti akozo Chrétien (Kusala 24:5, 14; 28:22). Tongana ti so e bâ na tongo nda ni, a yeke buba iri ti ala na lege ti asioni sango ti wataka. Ye oko, “na lege ti ye so azo asala ti mû gloire wala kamene na [ala], na lege ti tënë nzoni wala tënë sioni”, na tâ be-ti-molenge, aita ti Christ so a sa yingo na ndo ti ala, so “ambeni ngasangbaga” ayeke mû maboko na ala, ayeke sala ngangu ti ‘bata komandema ti Nzapa, na tënë ti témoin ti Jésus.’​—2 aCorinthien 6:8; Jean 10:16; Apocalypse 12:17.

¹¹ Biani, azonga kue so wakua oko oko ti Nzapa ayeke wara ni ayeke pëpe ndali ti “kusala ti mbilimbili”. (Matthieu 5:10). Ambeni kpale ni ayeke ga ndali ti awokongo ti e mveni. ‘Tongana e wara ye ti ngangu ngbanga ti siokpari ti e, na e gbu ngangu dä,’ mbeni futa so ayeke nde ayeke ti lo dä pëpe. Ye oko, tongana “a sala ngangu na [mbeni Chrétien] senge senge, na lo gbu ngangu na yâ pono so teti lo zia bê ti lo na Nzapa, so ayeke nzoni” na lê ti Jéhovah (1 Pierre 2:19, 20). Na yâ ti aye wa mara ti ye so alingbi ti si na mbeni Chrétien?

¹² A yeke sala ngangu na ambeni Chrétien ngbanga ti so ala ke ti mû mbage ti ala na asalango ye ti place ti kuâ so ague nde na Bible (Deutéronome 14:1). A yeke diko atënë so akiri na nengo ti zo na peko na tele ti amaseka Témoin ngbanga ti so ala bata anzoni salango ye so Jéhovah ahunda (1 Pierre 4:4). A bi tënë senge senge na li ti ambeni babâ na mama so ayeke Chrétien tongana “azo so ayeke bâ lege ti amolenge ti ala pëpe” wala tongana “asioni zo” ngbanga ti so ala ke ti kaï kobela ti amolenge ni na lege ti mênë (Kusala 15:29). Asongo nga na azo so alango ndulu na ambeni Chrétien alingbi ti ke ala gi ngbanga ti so ala ga awakua ti Jéhovah (Matthieu 10:34-37). Azo so kue ayeke mû tapande ti aprophète nga na ti Jésus na hungo pono senge senge.​—Matthieu 5:11, 12; Jacques 5:10; 1 Pierre 2:21.

Lutingo ngangu na gbele atënë ti zonga

¹³ Tongana e yeke na gbele sioni tënë ti zonga ndali ti atënë ti mabe ti e, bê ti e alingbi ti woko, tongana ti prophète Jérémie, na e yeke bâ so e lingbi pëpe ti ngbâ ti sala na Nzapa (Jérémie 20:7-9). Ye wa alingbi ti mû maboko na e ti bata nzoni bango ndo na lege ti yingo? E gi ti bâ ye ni tongana ti so Jéhovah ayeke bâ. Lo yeke bâ ala so angbâ be-ta-zo na gbe ti tara tongana azo so ahon na ngangu, me pëpe tongana azo so a hon ala na ngangu (aRomain 8:37). Tara ti bâ na li ala so amû lani mbage ti kota yanga-ti-komande ti Jéhovah atâa aye ti kamene nde nde so Zabolo abi na ndo ti ala: akoli na awali tongana Abel, Job, Marie (mama ti Jésus), ambeni be-ta-zo ti ândö nga na amba ti e ti ngoi ti laso (aHébreu 11:35-37; 12:1). Gbu li na ndo dutingo be-ta-zo ti ala. A yeke tongana ti so gbâ ti abe-ta-zo so ayeke wa e ti ga nga azo so ahon na ngangu na so ayeke wara futa teti mabe ti ala.​—1 Jean 5:4.

¹⁴ Tongana ‘bibe ayeke mingi na bê ti e’ wala e yeke na agingo bê mingi, e lingbi ti sambela Jéhovah na bê kue, na fade lo dë bê ti e nga lo kpengba e (Psaume 50:15; 94:19). Lo yeke mû ande na e ndara so e yeke na bezoin ni ti hon ndo ti tara ni nga ti mû maboko na e ti bata lê na ndo kota tënë ni, tënë ti kota yanga-ti-komande ti Jéhovah, so ayeke na gunda ti kengo awakua ti lo senge senge (Jacques 1:5). Jéhovah alingbi nga ti mû na e “siriri ti [Lo] so ahon bibe kue”. (aPhilippien 4:6, 7). Siriri so ayeke mû lege na e ti duti kpô, ti duti na kite pëpe wala ti sala mbito pëpe na ti luti ngangu na gbele pono so ayeke ngangu mingi. Na lege ti yingo ti lo, Jéhovah alingbi ti mû maboko na e na yâ ti aye kue so lo zia lege na ni ti si na e.​—1 aCorinthien 10:13.

¹⁵ Ye wa alingbi ti mû maboko na e si ngonzo agbu e pëpe na tele ti ala so ake e senge senge? E dabe ti e so akota wato ti e ayeke Satan na ayingo sioni (aEphésien 6:12). Atâa so ambeni zo ayeke sala ngangu na e na mbana, mingi ti ala so ake azo ti Nzapa ayeke sala ni ndali ti so ala hinga pëpe, wala ambeni zo si apusu ala ti sala ni (Daniel 6:4-16; 1 Timothée 1:12, 13). Jéhovah aye si “azo kue awara salut” nga awara lege ti ‘hinga tene-biani mbilimbili.’ (1 Timothée 2:4). Biani, ambeni ngbele zo so ake e ayeke fadeso aita ti e teti so ala bâ nzoni tambela ti e (1 Pierre 2:12). Na ndo ni, e lingbi ti manda mbeni ye na lege ti tapande ti Joseph, molenge ti Jacob. Atâa so aita ti lo asala si lo bâ pasi mingi, Joseph abata ala na bê pëpe. Ngbanga ti nyen? Ngbanga ti so lo bâ so Jéhovah ayôro tele ti lo na yâ ti tënë ni, ti leke si ye so bê ti Lo aye aga tâ tënë (Genèse 45:4-8). Jéhovah alingbi nga ti sala si pasi so e bâ ni senge senge amû gloire na iri ti lo.​—1 Pierre 4:16.

¹⁶ A lingbi e gi bê ti e ahon ndo ni pëpe tongana, teti mbeni ngoi, ye ni akpa bâ mo tene ye so awato ti e asala ti kanga lege na guengo na li ni ti nzo tënë atambela nzoni. Fadeso, Jéhovah ayeke yengi amara na lege ti tënë ti témoin so a yeke fa ni na ndo sese kue, nga aye ti pendere ti ala ayeke lï (Aggée 2:7). Christ Jésus, Nzo Berger ni, atene: ‘Angasangbaga ti Mbi amä yanga ti Mbi, na Mbi hinga ala, na ala tambela na peko ti Mbi. Mbi mû na ala fini ti lakue lakue na zo oko alingbi kpala [ gboto] ala na tïtî Mbi pëpe.’ (Jean 10:27-29). A-ange ti nzoni-kue ayeke mû nga mbage na kota kusala ti kongo le-kobe na lege ti yingo so (Matthieu 13:39, 41; Apocalypse 14:6, 7). Tongaso, ye oko pëpe so awato atene wala asala alingbi ti buba yâ ti ye so Nzapa aleke ti sala.​—Esaïe 54:17; Kusala 5:38, 39.

¹⁷ Fani mingi, ye so asi na peko ti ngangu so awato ayeke sala ague nde na ye so ala yeke ku. Na yâ ti mbeni kete kodoro ti Afrika, a diko asioni mvene na ndo aTémoin ti Jéhovah, so na popo ni a tene ala yeke awavorongo Zabolo. Ndali ti tënë so, tongana aTémoin aga ti fa tënë, Grace ayeke kpe loro ti honde tele ti lo na peko ti da juska ala hon. Mbeni lâ, pasteur ti église ti lo afa mbeni oko ti ambeti ti e, na lo tene na azo kue so aga ti diko ni pëpe ngbanga ti so a yeke sala si ala girisa lege. Ye so asala si Grace aye ti hinga wala tënë so ayeke tâ tënë. Tongana aTémoin akiri aga, a hon ti honde tele ti lo, lo to nda ti sala lisoro na ala, na ala mû na lo mara ti mbeti ni. Lo to nda ti manda Bible, na lo wara batême na ngu 1996. Fadeso, Grace ayeke mû ngoi ti lo ti gi azo so peut-être a fa na ala asango ti wataka na ndo ti aTémoin ti Jéhovah.

Kpengba mabe ti mo fadeso

¹⁸ Teti so na ngoi kue Satan alingbi ti londo ti ke e senge senge, a yeke kota ye ti tene e kpengba mabe ti e fadeso. Tongana nyen e lingbi ti sala ni? Mbeni tondo so alondo na mbeni kodoro so asala ngangu na azo ti Jéhovah dä atene: “Mbeni ye ayeke dä so aga polele: Ala so ayeke sala aye ti yingo lakue, na ala yeke bâ tâ tënë ti Bible na nene ni mingi, awara kpale pëpe ti luti ngangu na gbele atara so asi. Me fani mingi, ala so na ‘ngoi ti nzoni’ ayeke manke abungbi, ayeke sigigi lakue pëpe na fango tënë na ayeke bele mabe na yâ ambeni kete kete ye, ala tï tongana ala yeke na gbele tara ti ‘ngangu’.” (2 Timothée 4:2). Tongana mo bâ so a hunda ti leke ambeni ye na yâ ti fini ti mo, sala kue ti leke ni fade fade.​—Psaume 119:60.

¹⁹ Be-biani ti atâ wavorongo na gbele sioni kengo ndo ti Satan afa na ngangu mbilimbili ti kota yanga-ti-komande ti Jéhovah nga na droit ti lo ti komande. Dutingo be-ta-zo ti ala azia ngia na bê ti Nzapa. Azo alingbi ti ga na gbâ ti atënë ti zonga na ndo ti ala, me lo so ayeke na nduzu ahon yayu na sese “ayeke na kamene pëpe tongana ala di iri ti Lo Nzapa ti ala”. Biani, na ndo abe-ta-zo so, a lingbi ti tene: “Sese so alingbi na azo tongaso pëpe.”​—aHébreu 11:16, 38.

[Kete tënë na gbe ni]

Mo lingbi ti fa nda ni?

• Ye wa ayeke na gunda ti kengo atâ wavorongo Nzapa senge senge?

• Tongana nyen Satan asala kusala na atënë ti zonga na yâ ngangu so lo sala ti kinda be-biani ti Job na Jésus?

• Tongana nyen Jéhovah ayeke kpengba e ti luti ngangu na gbele kengo ndo ti Satan?

[Ahundango tënë ti manda na ye]

1, 2. (a) Tongana a diko asioni tënë na tele ti aChrétien, ngbanga ti nyen ambeni ayeke gi li ti ala na ni gbä? Me ngbanga ti nyen a lingbi mara ti atënë so adö bê ti e pëpe? (b) Nda ti tënë “ke” ayeke mingi. So wa la e yeke bâ ni na yâ ti article so? (Bâ kete tënë na gbe ni.)

3. Salango ngangu na atâ wavorongo amû ndo tongana nyen?

4. Tongana nyen Bible afa zo so ayeke na gunda ti kengo ndo kue so a ke na e senge senge?

5. Ngbanga ti nyen Satan ake atâ wavorongo Nzapa?

6. (a) Tongana nyen tënë ti kota yanga-ti-komande ti Jéhovah andu e oko oko kue? (b) Na lege wa gbungo nda ti tënë so alingbi ti mû maboko na e ti bata be-biani ti e? (Bâ “Ala hinga tâ gunda ti aye so asi na ala”, lembeti 16.)

7. Mbeni oko ti akode so Zabolo ayeke sala kusala na ni ti tara ti gboto e yongoro na Jéhovah ayeke so wa?

8. Tongana nyen Satan aga na atënë ti zonga na li ti Job? Na ye ti pekoni ayeke so wa?

9. Ye wa asala si azo abâ lani Jésus tongana mbeni wasiokpari?

10. Tongana nyen tanga ti ala so a sa yingo na ndo ti ala aga ambilimbili zo so Satan ake ala na ngoi ti e?

11, 12. (a) Ndali ti aye wa a lingbi ti bi atënë ti wataka na li ti aChrétien? (b) Na yâ ti aye wa mbeni Chrétien alingbi ti bâ pasi senge senge ndali ti atënë ti mabe ti lo?

13. Ye nyen alingbi ti mû maboko na e ti bata nzoni bango ndo na lege ti yingo tongana e yeke na gbele sioni zonga?

14. Tongana nyen sambela so e sala na bê kue alingbi ti mû ngangu na e ti ngbâ be-ta-zo?

15. Tongana e yeke bâ pasi, ye wa alingbi ti mû maboko na e si ngonzo agbu e pëpe?

16, 17. Ngbanga ti nyen a lingbi e gi bê ti e ahon ndo ni pëpe tongana awato agi ti kanga lege na kusala ti fango tënë?

18. Ngbanga ti nyen a yeke kota ye ti kpengba mabe ti e kozoni na angangu tara? Na e lingbi ti sala ni tongana nyen?

19. Be-biani ti awakua ti Nzapa na gbele kengo ala senge senge afa nyen na gigi?

[Kete tënë/Foto na lembeti 16]

Ala hinga tâ gunda ti aye so asi na ala

Mbeni Témoin ti Jéhovah ti Ukraine, ndo so a kanga lani lege na fango tënë ti Royaume dä ahon ngu 50, atene: “A lingbi a bâ pëpe ye so asi na aTémoin ti Jéhovah tongana gi senge salango ye ti azo na mbage ti e. . . . Mingi ti akota zo ti kodoro ni asala gi kua ti ala. Tongana ngorogbia ni agbian, akota zo ni ayeke mû gi peko ti fini ni so, me ti e, e gbian pëpe. E hinga so Bible afa lani na gigi awe tâ gunda ti aye ti wusuwusu so asi na e.

“E bâ tele ti e pëpe gi tongana azo so a yeke sala ngangu na ala senge senge. Ye so amû lani maboko na e ti gbu ngangu ayeke nzoni gbungo nda ti tënë so alondo lani na yaka ti Eden: tënë ti droit so Nzapa ayeke na ni ti komande. . . . E mû mbage ti mbeni tënë so andu gi pëpe aye ti azo me nga aye ti Kota Gbia ti dunia kue. E yeke lani na mbeni kota gbungo nda ti tâ ye so atënë ni andu ni. Ye so amû na e ngangu nga amû lege na e ti bata be-biani ti e même na gbele aye so ayeke lani ngangu mingi.”

[Foto]

Victor Popovych, so a gbu lo na ngu 1970

[Foto na lembeti 13]

Zo wa ayeke na gunda ti atënë ti zonga so a diko na tele ti Jésus?

[Afoto na lembeti 15]

Job, Marie na awakua ti Nzapa ti laso, tongana Stanley Jones, amû mbage ti kota yanga-ti-komande ti Jéhovah