“A lingbi i sambela na lege so”

MO HINGA atënë ti yâ ti sambela so atene “Babâ ti e so ayeke na yayu”? A yeke sambela so Jésus Christ afa ni lani tongana tapande. Na ngoi ti lisoro ti lo so lo sala ni lani na ndo hoto, lisoro so azo kue ahinga tënë ni nzoni, Jésus atene: “A lingbi i sambela na lege so.” (Matthieu 6:9). Ndali ti so a yeke Jésus lani si afa atënë ti sambela so, azo mingi ahiri ni Sambela ti “Babâ ti e so ayeke na yayu”.​—Latin, Paternoster.

Azo kutu mingi na ndo lê sese mobimba ahinga sambela so na li na ala yeke tene peko ni lakue peut-être na yâ ti alango oko oko kue. Ade ti ninga pëpe, azo mingi ayeke tene peko ti atënë oko oko ti sambela so na yâ ti ada-mbeti nga na ngoi ti ambeni matanga nde nde so a leke ni teti azo. Ngbanga ti nyen azo aye mingi tënë ti sambela so?

Cyprien, mbeni wandara ti atënë ti vorongo so ayeke na fini na popo ti ngu 200 na ngu 300, asû na mbeti: “Mbeni sambela wa abâ aye ti yingo na nene mingi ahon sambela so Christ afa ni na e . . .? Sambela wa so a tene ni na Babâ ti yayu so alingbi ti fa na gigi tâ tënë ahon ti so Molenge ti Nzapa si afa ni na e?”​—Jean 14:6.

Église Catholique ti Rome abâ sambela so tongana mbeni “kozo sambela so aChrétien alingbi ti tene ni” na a zia ni na yâ ti catéchisme ti lo. Mbeni kota bakari (The World Book Encyclopedia) atene so sambela so amû kozo ndo na yâ ti a-église kue so atene ala yeke mû peko ti Christ, na lo fa sambela so tongana mbeni oko ti “akota ye so gere ti mabe ti Chrétien aluti na ndo ni.”

Ye oko, azo alingbi ti yeda so mingi ti azo so ayeke tene gi peko ti atënë ti sambela so agbu nda ni pëpe. Mbeni mbeti-sango ti Canada so a hiri ni Ottawa Citizen atene: “Tongana mo kono na yâ ti mbeni sewa ti Chrétien na mo manda kozoni awe na li sambela so, mo lingbi peut-être ti diko peko ti atënë oko oko ti yâ ni gi na loro. Me a lingbi ti duti ngangu na mo ti tënë peko ni yeke yeke na ti gbu nda ni.”

A yeke biani kota ye ti tene e gbu nda ti asambela so e yeke sala ni na Nzapa? Ngbanga ti nyen Jésus afa na e Sambela ti “Babâ ti e so ayeke na yayu”? A ye ti tene nyen na mo? Zia e bâ mbilimbili nda ti ahundango tënë so.