Mo yeke ku Jéhovah na nzoni bibe?

AZO mingi na yâ sese ti laso aninga ti nze pëpe na kungo mbeni zo wala mbeni ye. Ye oko, Mbeti ti Nzapa awa azo ti Nzapa ti hinga ti “ku”. Nde na azo so lo yeke lani na popo ti ala, prophète Michée atene: “Mbi ku Nzapa ti salut ti mbi.”​—Michée 7:7; Toto ti Jérémie 3:26.

Ye oko, ti ku Jéhovah aye ti tene nyen? Na lege wa a lingbi mbeni Chrétien aku Nzapa? Na kungo Nzapa, zo alingbi ti duti na nzoni nga na sioni bibe? E lingbi ti manda ye ti nzoni na ndo ye so asi lani na prophète Jonas so ayeke lani na fini giriri.

Bâ mbeni tapande ti kungo Jéhovah na nzoni bibe pëpe

Jéhovah Nzapa atokua Jonas ti gue ti fa tënë na azo ti kodoro ti Ninive, so ayeke li-kodoro ti kodoro-togbia ti Assyrie. A hinga Ninive na iri ti “kodoro ti mênë” ngbanga ti so azo ti kodoro ni ayeke na kamene pëpe ti sala ngangu nga na sana na ambeni zo. Awasungo tënë ti mbaï nga na awasenda-mbeso ayeda so azo ti Ninive ayeke sala lani ye ti sioni mingi (Nahum 3:1). Kozoni, Jonas atara ti kpe ti sala ye so a mû na lo, me Jéhovah asala kue si na nda ni prophète ni ague na kodoro ti Ninive.​—Jonas 1:3–3:2.

“Jonas alï na kodoro so, lo tambela na yâ ni lâ oko, na lo to mbera, lo tene, A de lâ bale-osio, na fade A kinda Ninive.” (Jonas 3:4). Angangu so Jonas asala alë lengo: “Azo ti Ninive amä na bê na Nzapa. Ala to mbera ti zia kobe na ti yü bongo ti mua, a komanse na akota zo ti ala juska na akete zo ti ala.” (Jonas 3:5). Teti so ala sala tongaso, Jéhovah, so ayeke mbeni Nzapa so ‘aye mbeni zo oko akui pëpe, me Lo ye azo kue achangé bê ti ala’, azia lege ti futingo kodoro ni.​—2 Pierre 3:9.

Kiringo tënë ti Jonas lani ayeke nyen? Tondo ni atene: “Me ye so ayeke sioni mingi na lê ti Jonas, na ngonzo agbu lo.” (Jonas 4:1). Ngbanga ti nyen? A yeke peut-être ngbanga ti so Jonas abâ so teti a futi kodoro ni pëpe tongana ti so lo fa, fade a yeke ne lo mbeni pëpe tongana prophète. Lo bi bê ti lo mingi gi ti wara nzo iri teti lo mveni ahon tënë ti salango be-nzoni na ambeni zo ti tene ala wara salut.

Biani, Jonas ague juska ti ke kusala ti lo ti prophète pëpe. Me, lo yeke ku lani ti “bâ ye so fade asala kodoro ni.” Biani, bê ti lo aso si lo kaï ti sala kusala ti lo ti ku ti bâ gi ye so ague ti si. Tongana lo bâ so ye ni ayeke si ande pëpe tongana ti so lo ku ni, Jonas asala mbeni kpangba na lo duti na gbe ni na ngonzo na bê ti lo ti bâ ye so ayeke si ande. Ye oko, Jéhovah ayeda pëpe na bibe ti Jonas; tongaso, na lege ti ndoye lo leke bango ndo ti prophète ni so ayeke na lege ni pëpe.​—Jonas 4:5, 9-11.

Ngbanga ti nyen Jéhovah ayeke na be-nze-pepe?

Azo ti Ninive agbian bê ti ala na a futi gbata ti ala pëpe; ye oko, ala kiri atï na yâ asioni salango ye. Na lege ti prophète Nahum na prophète Sophonie, Jéhovah afa so lo yeke futi kodoro ni. Na salango tënë ti kodoro ni tongana “kodoro ti mênë”, Jéhovah atene so lo yeke futi Assyrie na lo yeke sala si Ninive aga mbeni ndo so ayeke yangbato tongana yando (Nahum 3:1; Sophonie 2:13). Na ngu 632 kozoni na ngoi ti e, a futi Ninive na a kiri a leke gbata ni mbeni pëpe.

Legeoko nga, sese ti laso ayeke na asioni tënë ti tukungo mênë na li ti lo, ye so lo sala ni ahon ti azo ti kodoro ti Ninive giriri. Teti nda ti atënë so nga na ambeni nde, Jéhovah amû yanga so aye ti sese ti laso, so ayeke sioni, ayeke hunzi ande na “kota ye ti vundu” so mbeni mara ni ade ti si lâ oko pëpe.​—Matthieu 24:21, 22.

Ye oko, Jéhovah angbâ ti ku kete ti ga na futingo so lo mû zendo ni ti tene azo ti mbilimbili ti laso alingbi ti gbian bê ti ala si a futi ala pëpe, legeoko tongana azo ti Ninive so agbian lani bê ti ala. Bazengele Pierre asala tënë na ndo ti be-nze-pepe ti Nzapa na lege ti atënë so: “Seigneur ayeke na nda ni pëpe tënë ti zendo ti Lo, na lege so ambeni zo abâ ye ayeke na nda ni; me bê ti Lo anze na i pëpe, Lo ye mbeni zo oko akui pëpe, me Lo ye azo kue achangé bê ti ala.”​—2 Pierre 3:9, 10, 13.

Kungo Jéhovah na nzoni bibe

Pierre akiri atene: “Teti fade ye so kue afuti tongaso, a lingbi i ga azo so ayeke nzoni-kue, na azo so abata tënë ti Nzapa! I ku singo ti lâ ti Nzapa! I ku singo ti lâ ti Nzapa na i sala ye si lâ ni aga fade.” (2 Pierre 3:11, 12). Bâ mbilimbili so, na ngoi ti kungo lâ ti Jéhovah, a lingbi e fa na gigi so e yeke “azo so ayeke nzoni-kue, na azo so abata tënë ti Nzapa”. Ni la, a yeke nzoni e ngbâ ti sala kusala me e duti gi senge senge pëpe.

Biani, kungo Jéhovah na nzoni bibe afa na gigi so zo ni ahinga na bê ti lo kue so lâ ti Jéhovah ayeke si tâ gi na lango ni so Lo mveni adiko. Mara ti mabe tongaso ayeke pusu zo ni ti sala kusala so ayeke nzoni-kue na so afa dutingo ti lo ndulu na Nzapa; na kota kusala ni na popo ti akusala so ayeke kusala ti fango nzo tënë ti Royaume. Jésus azia lani mbeni pendere tapande ti salango kusala ti fango nzo tënë, na lo fa ni na adisciple ti lo so a sa yingo na ndo ti ala: “A lingbi i kanga ceinture na ngbonda ti i, i bata si lampe ti i aza; na i mveni, i duti tongana azo so aku seigneur ti ala ti londo na pumba ti mariage ti kiri na da, si tongana lo golo yanga ti da, ala lingbi lungula yanga ni na lo fade fade. Ngia ayeke na aboi so seigneur abâ ala tongana lo si.”​—Luc 12:35-37.

Angbâa ti ngoi ti abazengele ayeke “kanga ceinture na ngbonda” ti ala na lege so ala yeke gboto yanga ti yongoro bongo ti ala na popo ti kuni ti ala na ala kanga ni tongana kambusu ti tene ala wara lege hio ti sala mbeni kusala ti mitele na ngangu ti ala kue. Tongaso, a yeke nzoni mbeni Chrétien aduti na ngangu nga na wâ na yâ anzo kusala. A lingbi lo tiri na abibe kue so alingbi ti pusu lo ti zia ti sala kua na yâ kusala ti lo ti yingo, peut-être lo buba ngangu ti lo gi ngbanga ti salango ngia wala ndali ti tombango peko ti aye ti mitele. Nde na so, a lingbi lo “wu na kusala ti Seigneur” na oko ngoi ni so lo yeke ku kota lâ ti Jéhovah so amû mbito na zo.​—aRomain 12:11; 1 aCorinthien 15:58.

Ala yeke sala kusala mingi na oko ngoi so ala yeke ku Jéhovah

A-Témoin ti Jéhovah angbâ ti sala kusala na ngoi so ala yeke ku lâ ti Jéhovah. Na tapande, na yâ ti ngu ti kusala so ahon, na yâ ti lango oko oko ala mû angbonga 3 383 000 ti fa na tënë ti Jéhovah. Bâ kete, Témoin ti Jéhovah oko alingbi ti fa tënë lâ oko oko sân ti hu tele teti ngu 386 tongaso si lo lingbi ti wara mara ti ngbonga so, so a sala ni gi na yâ lango oko!

Ye oko, a yeke nzoni ti tene e hunda tele ti e mveni: Mbi yeke ku Jéhovah na mara ti bibe wa? Jésus amû lani mbeni parabole so afa tënë ti ngangu kusala so a ku na mbage ti aChrétien be-ta-zo so a sa yingo na ndo ti ala. Lo sala lani tënë ti aboi wala angbâa ota: “Lo [mveni ni a]mû talent oku na boi oko, na talent use na mbeni, na talent oko na mbeni, alingbi na mayele [“na ngangu”, Fini Mbuki, 2001] ti ala oko oko; na lo gue na mbeni sese nde. Fade fade zo so akamata talent oku ague, lo sala na nginza ni si lo wara mbeni talent oku. Tongaso zo so akamata talent use, lo wara mbeni talent use nga. Me zo so akamata talent oko ague, lo gë dû na sese, na lo honde nginza ti mveni ti lo. Na nda ni lango mingi mingi, mveni ti aboi so akiri, lo diko tënë ti nginza na ala.”​—Matthieu 25:15-19.

Aboi ota so kue aku kiringo ti maître ti ala ni. Tongana mveni ni asi, lo tene na aboi use so angbâ lani ti sala kua ti ku na lo: “[I] sala nzoni, [i] yeke be-ta-boi ti nzoni.” Ye oko, ti oko boi ni so aku mveni ti lo me lo sala kua oko pëpe, mveni ti lo ni atënë na lo mara ti nzoni tënë tongaso pëpe. Mveni ti lo ni atene: “I bi buba boi so na bingo ti gigi.”​—Matthieu 25:20-30.

Atâa so tënë ti parabole so andu aChrétien so a sa yingo na ndo ti ala, ye ti manda ayeke na yâ ni teti e kue même tongana beku ti e ayeke ti wara fini na ndo sese. Mveni ni, Jésus Christ, ayeke ku na mbage ti e oko oko kue ti sala kusala ti lo na wâ na oko ngoi ni so e yeke ku singo ti lo na kota lâ ti Jéhovah. Lo yeke bâ na nene ni mingi kusala so zo oko oko ayeke sala ni alingbi “na ngangu” ti lo nga na dutingo ti lo. So tâ kota ngia si ayeke duti ande ti mä Mveni ni na ngoi so lo si awe na lo tene: ‘I sala nzoni’!

Be-nze-pepe ti Seigneur ti e ayeke salut

Me ti e ayeke tongana nyen tongana aye ti ngoi ti fadeso angbâ a ninga ahon ti so e bi bê ti e na ni kozoni wala tongana ti so e ku ni? Tongana aye so angbâ a ninga, nda ni ayeke dä. Bazengele Pierre asû na mbeti: “A lingbi i bâ be-nze-pepe ti Seigneur ti e tongana salut.” (2 Pierre 3:15). Tongana e yeke na tâ hingango ye na ndo ye so Nzapa aleke na bê ti lo ti sala, na e bâ ni na nene ni ahon tënë ti salut ti e mveni, ye so ayeke mû lege na e ti duti na be-nze-pepe legeoko tongana ti so Jéhovah ayeke na ni na mbage ti aye ti ngoi ti fadeso so aninga mingi awe.

Ti wa aChrétien ti duti na be-nze-pepe, Jacques, wasungo mbeni buku ti yâ ti Bible, amû na e mbeni tapande. Lo sû na mbeti: “Bâ, zo ti fâ yaka aku nzo le-kobe ti yaka, lo ku na be-nze-pepe juska a wara kozo ngu-nduzu na ngu-nduzu ti nda ni. I nga, i duti na be-nze-pepe; i sala si bê ti i akpengba, teti singo ti Seigneur ayeke ndulu.”​—Jacques 5:7, 8.

Jéhovah Nzapa aye pëpe si e nze wala e zia lege ti sala kusala na ngoi so e yeke ku lo. Lo yeke na mbeni kusala so lo mû na e ti sala ni, na lo yeke na ngia ti bâ e na bingo tele ti e na wâ na yâ kusala so. Lo ye si e duti na popo ti ala so bazengele Paul asala tënë ti ala na yâ lettre so lo tokua ni na aChrétien Hébreu: “E ye azo oko oko kue na popo ti i ti fa na gigi nzara ti sala kusala so si i hinga tënë kue ti beku ti i juska na nda ni; teti so si, i sala goigoi pëpe, me i sala legeoko tongana ala so aga ahéritier ti zendo na lege ti mabe na be-nze-pepe.”​—aHébreu 6:11, 12.

Tongaso, zia si e woko pëpe. Nde na so, zia si songo ti e na Jéhovah Nzapa, mabe ti e na yâ sandaga ti kota ngele ti Jésus nga na pendere beku ti e ti kekereke na fini sese so ayeke ga aduti aye so amû ngangu na e. Legeoko tongana “be-ta-boi ti nzoni” so Jésus asala tënë ti lo na yâ parabole ti lo, zia e fa so e lingbi na gonda nga na futa ti nzoni na salango kusala na wâ ti sepela Nzapa ti e tongana ti so wasungo psaume asala giriri; lo tene: “Fade bê ti mbi angbâ na mo lakue, fade mbi sepela Mo mingi ahon, mingi ahon.”​—Psaume 71:14.

[Foto na lembeti 21]

Teti bê ti lo anze, Jonas ayeke ku lani ti bâ ye so ayeke si na kodoro ti Ninive

[Afoto na lembeti 22, 23]

Zia e fa so e yeke bata tënë ti Nzapa na ngoi so e yeke ku lâ ti Jéhovah