‘Ye ti bata mbi alondo na Jéhovah’

Tongana lâ ti mbakoro aga “couronne ti gloire”

MURIEL, mbeni mbakoro so ayeke na ngu 101 atene: “So ayeke pendere gigi ahon tanga ni kue.” Theodoros so ayeke na ngu 70 atene ti lo na ndulu tënë: “A yeke tâ mbeni pendere matabisi.” Maria, na ngu 73 atene: “Mbi lingbi fade pëpe ti sala kusala na gigi ti mbi na mbeni lege so ayeke tâ nzoni ahon ti so mbi sala.” Ala kue amû fini ti ala na kusala ti Jéhovah Nzapa.

Ambakoro tongaso ayeke tapande ti mingi ti awavorongo Jéhovah so ayeke sala kusala na ndo sese kue. Atâa so ngu ti ala ague na li ni mingi, akpale ti seni nga na ambeni ye ti sioni so ayeke si na ala, ala ngbâ ti sala na Nzapa na âme ti ala kue. Na yâ kongregation ti aChrétien, ambakoro be-ta-zo tongaso ayeke atapande ti dutingo ndulu na Nzapa so azo ane ala mingi. Jéhovah ayeke bâ kusala ti ambakoro na nene ni mingi, atâa so dutingo ti ala azia katikati na aye so ala lingbi fade ti sala.a​—2 aCorinthien 8:12.

Buku ti Psaume asala tënë na ndo mbeni salango ye so ayeke tâ na lege ni na so ambakoro so ayeke be-ta-zo alingbi ti ku ti wara ni. Ala lingbi ti duti tongana mbeni kota keke so aninga, me so angbâ ti lë. Na ndo ambakoro so ayeke be-ta-zo, wasungo psaume ahe bia so: “Na lâ ti mbakoro ti ala, fade ala lë lengo, [ala maï, NW ] na kugbe ti ala asi singo.”​—Psaume 92:15.

Ambeni alingbi ti duti na mbito so fade a ke ala nga a bi bê na ala mbeni pëpe na ngoi so gango mbakoro asala si ngangu ti ala akiri na peko. David atoto lani na Nzapa: “Mo ke mbi pëpe tongana mbi ga mbakoro; zia mbi pëpe tongana ngangu ti mbi awe.” (Psaume 71:9). Ye nyen ayeke sala si na lâ ti mbakoro ti e, e woko pëpe me e ngbâ ti maï? A yeke salango aye ti mbilimbili so Nzapa afa na e. Wasungo psaume ahe bia so: “Fade zo ti mbilimbili amaï tongana keke ti mburu.”​—Psaume 92:13.

Ala so amû fini ti ala kue ti sala kusala be-ta-zo na Nzapa, mingi ni ala yeke ngbâ ti lë anzoni lengo tongana ala ga mbakoro. Biani, mingi ti aye so ala sala ti mû maboko na ala mveni wala na ambeni zo ayeke ga na aye ti nzoni, legeoko tongana ale-kobe so asigigi na abe ti tene a ko ni gbâ ni (aGalate 6:7-10; aColossien 1:10). Tâ tënë, azo so abuba fini ti ala na gingo aye ti bê ti ala mveni na bingo bê oko pëpe na aye so Nzapa ahunda, mingi ni, ala yeke na tâ ye ti nzoni ti fa pëpe tongana ala ga mbakoro.

Na yâ ti Bible, buku ti aProverbe agboto nga lê na ndo salango ye ti mbilimbili tongana mbeni ye ti pendere teti lâ ti mbakoro. E diko: “Kuali so avulu ayeke couronne ti gloire, [tongana, NW ] zo awara so na lege ti mbilimbili.” (aProverbe 16:31). Biani, salango ye ti mbilimbili afa na gigi gloire wala pendere ti zo ti yâ ni ti mbeni zo. Ti gi lakue ti sala ye ti mbilimbili na yâ ti fini ti mo kue ayeke sala si azo ane mo (Lévitique 19:32). Tongana kuali ti mbeni zo avulu ndali ti so lo ga mbakoro nga lo yeke na ndara na nzoni salango ye, azo ayeke gonda lo mingi.​—Job 12:12.

Ti Jéhovah, zo so amû fini ti lo ti sala ye ti mbilimbili na yâ kusala ti lo ayeke ye ti pendere mingi. Mbeti ti Nzapa atene: “Même juska i ga mbakoro, Mbi [Jéhovah, Mbi] yeke Lo, na fade Mbi yô i juska kuali ti i avulu; Mbi sala i, na fade Mbi yô i; biani, fade Mbi yô i na Mbi sö i.” (Esaïe 46:4). So tâ dengo bê si e yeke na ni ti hinga so Babâ ti e ti yayu so asi singo na ndoye amû zendo ti bata na ti mû maboko na abe-ta-zo ti lo na lâ ti mbakoro ti ala!​—Psaume 48:15.

Teti so na lê ti Jéhovah ti mû fini ti mo ti sala na lo na dutingo be-ta-zo ayeke pendere mingi, a lingbi ambeni zo nga ane mo pëpe? Ti fa mara bango ndo ti Nzapa, e yeke yekia mingi amba ti e wamabe so aga ambakoro awe (1 Timothée 5:1, 2). Tongaso, zia e gi anzoni lege ti fa na ala ndoye ti e ti aChrétien na bingo bê na aye so atia ala.

Mungo lege ti mbilimbili na lâ ti mbakoro

Salomon amû na e beku so: “Fini ayeke na lege ti mbilimbili.” (aProverbe 12:28). Gango mbakoro ayeke kanga lege pëpe na mbeni zo ti tambela na ndo lege ti fini na yâ tanga ti ngoi so angbâ na lo. Na tapande, na Moldavie, mbeni koli so ayeke na ngu 99 amû lâ ti maseka ti lo ti maï abibe ti aCommuniste. Lo yeke sala baba lani ndali ti so lo mveni lo sala lisoro na amokonzi ti aCommuniste so a hinga ala mingi, tongana Vladimir I. Lénine. Ye oko, tongana kama-poroso ti aCommuniste adengi na a tï, kangba-koli so ahinga pëpe ye so lo yeke sala nga ye so ayeke fa lege na gigi ti lo. Me, tongana aTémoin ti Jéhovah afa na lo so gi Royaume ti Nzapa oko si ayeke tâ yorö ti kpale ti azo, lo yeda na tâ tënë ti Bible na lo ga mbeni wamandango Mbeti ti Nzapa na bê kue. Mawa ni ayeke so lo kui kozoni si lo ga mbeni wakua ti Jéhovah so awara batême awe.

Tongana lo manda andia ti Nzapa na ndo nzoni tambela, mbeni mbakoro-wali na Hongrie so ngu ti lo ayeke 81 ahinga so a lingbi lo sala mariage na koli so lo na lo aduti a sala ngu mingi awe. Wali so akanga bê ti lo na lo fa na koli ni bango ndo ti lo so aluti na ndo Bible. Ye ti dongo bê nga na ti ngia teti lo ayeke so koli ni ayeda ti sala mariage na lo. Na peko ti mariage ti ala, lo gue na li ni hio mingi na lege ti yingo. Na yâ ti nze miombe na peko ti so lo to nda ti manda Bible, lo ga wafango tënë so ade ti wara batême pëpe, nga ngoi kete na pekoni lo wara batême. Bâ tongana nyen a yeke tâ tënë so salango ye ti mbilimbili alingbi ti sala si ambakoro awara tâ couronne ti pendere!

Ni la, ambakoro Chrétien so ayeke be-ta-zo alingbi ti duti na beku biani so Nzapa ayeke bi bê na ala. Jéhovah ayeke zia ande pëpe ala so angbâ be-ta-zo na lo. Nde na so, lo mû zendo ti fa lege na ala, ti mû maboko na ala nga ti bata ala même na lâ ti mbakoro ti ala. Nga ala lingbi ti yeda biani so tënë ti wasungo psaume so ayeke tâ tënë: “Ye ti bata mbi alondo na L’Eternel” wala Jéhovah.​—Psaume 121:2.

[Kete tënë na gbe ni]

[Kete tënë na gbe ni]

“Kuali so avulu ayeke couronne ti gloire, [tongana, NW ] zo awara so na lege ti mbilimbili.”​—APROVERBE 16:31

[Kete tënë na lembeti 8]

JÉHOVAH ABI BÊ NA AWAKUA TI LO SO AGA MBAKORO

“A lingbi mo londo, mo luti na gbele zo so kuali ti lo avulu, na mo yekia lê ti mbakoro zo.”​—Lévitique 19:32.

“Même juska i ga mbakoro, Mbi yeke Lo, na fade Mbi yô i juska kuali ti i avulu.”​—Esaïe 46:4.