Aye so a fa kozoni na ndo Royaume ti Nzapa aga tâ ye awe

“I sala nzoni tongana i zia bê ti i na Tënë so [tënë ti prophétie], legeoko tongana zo azia bê ti lo na lampe so aza na bingo.”​—2 PIERRE 1:19.

TËNË ti akpale so ayeke ga gi na peko ti tele ayeke mbeni ye so amû ndo kue na yâ sese ti laso. Ti londo na bubango ti aye so angoro e ti si na ye so aterroriste ayeke sala na ndo sese kue, akpale ti azo ahon ngangu ti ala. Même abungbi ti vorongo Nzapa alingbi nga ti sala mbeni ye pëpe. Nde na so, fani mingi a yeke abungbi ti vorongo si ayeke tingo wâ na gbe ti asioni bango ndo, kengo tele nga na vorongo kodoro so ayeke ga na kangbi na popo ti azo. Biani, tongana ti so a fa kozoni, “bingo so avuko pitipiti aga na ndo azo”. (Esaïe 60:2). Me, na oko ngoi ni, azo kutu mingi ayeke na beku so gigi ti kekereke ayeke ga ande nzoni. Ngbanga ti nyen? Ngbanga ti so ala yeke dengi mê ti ala na tënë ti prophétie ti Nzapa “legeoko tongana zo azia bê ti lo na lampe so aza na bingo”. Ala zia lege na “tënë” wala na tokua ti Nzapa, so a yeke wara ni laso na yâ Bible, ti fa lege na gere ti ala.​—2 Pierre 1:19.

² Na ndo “lâ ti nda ni”, prophète Daniel asû na mbeti: “Fade azo mingi akpe na ndo nde nde, na ndara awu mingi. Fade azo mingi asukula ala mveni, ala sala si ala mveni avulu, na a lungula sioye ti ala; na azo ti sioni asala sioni; na oko ti azo ti sioni ahinga nda ti ye ni pëpe; me ala so ayeke na ndara, fade ala hinga nda ti ye ni.” (Daniel 12:4, 10). Hingango nda ti ye na lege ti yingo ayeke gi teti azo so, na bê kue, “akpe na ndo nde nde”, so ti tene ala yeke manda Tënë ti Nzapa na bê ti ala kue, ala yeke yeda na akpengba-ndia ti lo na ndo nzoni salango ye nga ala yeke sala ngangu ti sala ye so bê ti Nzapa aye.​—Matthieu 13:11-15; 1 Jean 5:20.

³ Gi hio na peko ti ngu 1870, kozoni si “lâ ti nda ni” akomanse, Jéhovah Nzapa ato nda ti za mbeni lumière na ndo “tënë ti ndagigi ti royaume ti yayu”. (2 Timothée 3:1-5; Matthieu 13:11). Na ngoi ni kâ, nde na bango ndo so azo mingi ayeke na ni, mbeni groupe ti awamandango Bible ahinga so kiringo ti Christ ayeke duti lani na mbeni lege so lê abâ pëpe. Na peko ti so a zia lo na ndo mbata ti gbia na yayu, Jésus ayeke kiri na lege so lo yeke bi bê ti lo na ndo sese tongana gbia ni. Mbeni fä so aye mingi ayeke na yâ ni na so zo alingbi ti bâ ni ayeke fa lani na adisciple ti lo so singo ti lo so lê alingbi ti bâ pëpe ato nda ni awe.​—Matthieu 24:3-14.

Tongana aye so a fa kozoni aga tâ ye

⁴ Suma ti gbiango tele ti Christ ayeke lani mbeni kpengba fä ti gloire ti lo na yâ Royaume (Matthieu 17:1-9). Suma so akpengba mabe ti Pierre, Jacques na Jean na mbeni ngoi so azo mingi azia ti mû peko ti Jésus ndali ti so lo sala lani pëpe aye so ala ku ti tene lo sala na so ague nde na Tënë ti Nzapa. Legeoko nga, na ngoi ti nda ni so, Jéhovah akpengba mabe ti awakua ti lo ti laso na zango lumière yeke na yeke na ndo gango tâ tënë ti kpengba suma so nga na aprophétie mingi so ague oko na ni. Zia e bâ fadeso ambeni tâ ye ti yingo so ayeke mû ngangu na mabe ti e.

⁵ Tongana lo yeke sala tënë ti gbiango tele ti Christ, bazengele Pierre asû na mbeti: “Tongaso e hinga tënë so a fa na iri ti Nzapa ayeke tâ tënë. I sala nzoni tongana i zia bê ti i na Tënë so, legeoko tongana zo azia bê ti lo na lampe so aza na bingo, juska nda ade na Tongoro Ti Ndapelele asi na bê ti i.” (2 Pierre 1:19). “Tongoro Ti Ndapelele so aza” aduti fä ti Jésus Christ so awara gloire awe (Apocalypse 22:16). Lo ‘si’ wala lo londo na ngu 1914 tongana a dü Royaume ti Nzapa na yayu, ti fa tongo nda ti mbeni fini ngoi (Apocalypse 11:15). Na yâ suma ti gbiango tele ti Christ so, Moïse na Elie asigigi na tele ti lo na ala yeke sala lisoro na lo. Moïse na Elie aduti fä ti azo wa?

⁶ Teti so Moïse na Elie awara mbage ti gloire ti Christ, awakua be-ta-zo so alingbi ti duti fä ti ala so ayeke komande legeoko na Jésus na yâ Royaume ti lo. Gbungo nda ti ye ni tongaso ague oko na suma ti Messie so aduti na ndo mbata ti gbia so prophète Daniel awara. Daniel abâ “Zo oko tongana Molenge Ti Zo” so awara ‘ngangu ti komande so ayeke ti lakue lakue’ na maboko ti “Lo Ti Giriri”, Jéhovah Nzapa. Me bâ ye so a fa na Daniel kete na pekoni. Lo sû na mbeti: “A mû na azo ni so ayeke ti azo ti be-vulu ti Lo Ti Nduzu Ahon Kue royaume ni, ngangu ti komande, na kota ndo ti royaume nde nde na gbe ti yayu kue.” (Daniel 7:13, 14, 27). Biani, ngu 500 kozoni na gbiango tele ti Christ, Nzapa afa so ambeni zo “ti be-vulu” ayeke wara mbage ti kota ndo ti komande ti Jésus tongana gbia.

⁷ Azo wa ayeke azo ti be-vulu na yâ suma ti Daniel? A yeke ala so bazengele Paul ayeke sala tënë ti ala, tongana lo tene: “Yingo mveni asala tënë ti témoin na yingo ti e, Lo tene e yeke amolenge ti Nzapa. Na tongana e yeke amolenge, e yeke ahéritier, ahéritier ti Nzapa, na afon Christ na yâ ye ti héritier; tongana e hu pono legeoko na Lo, tongaso fade A mû gloire na e legeoko na Lo nga.” (aRomain 8:16, 17). Azo ti be-vulu so ayeke adisciple ti Jésus so a sa yingo na ndo ti ala. Na yâ buku ti Apocalypse, Jésus atene: “Zo so ahon na ngangu, fade Mbi mû na lo lege ti duti na Mbi na trône ti Mbi, legeoko tongana Mbi hon na ngangu giriri, si Mbi duti na Babâ ti Mbi na trône ti Lo.” Azo 144 000 so “ahon na ngangu” si a zingo ala na kuâ, fade ala yeke komande legeoko na Jésus na ndo sese kue.​—Apocalypse 3:21; 5:9, 10; 14:1, 3, 4; 1 aCorinthien 15:53.

⁸ Ye oko, nda ni nyen a mû Moïse na Elie ti duti fä ti aChrétien so a sa yingo na ndo ti ala? Nda ni ayeke so, na ngoi so ala ngbâ na yâ mitele, aChrétien so a sa yingo na ndo ti ala ayeke sala mara ti kusala so Moïse na Elie asala lani. Na tapande, ala yeke sala na Jéhovah tongana atémoin ti lo atâa na gbele salango ngangu (Esaïe 43:10; Kusala 8:1-8; Apocalypse 11:2-12). Legeoko tongana Moïse na Elie, na mbito pëpe, ala sigigi na nda ti abungbi ti vorongo ti wataka na ngoi so ala yeke wa azo ti voro gi Nzapa oko (Exode 32:19, 20; Deutéronome 4:22-24; 1 aGbia 18:18-40). Kusala ti ala alë lengo? Biani! Na ndo ti so ala mû maboko si a bungbi ala kue so a sa yingo na ndo ti ala, ala yeke mû nga maboko na “ambeni ngasangbaga” kutu mingi ti mä yanga ti Jésus Christ na bê ti ala kue.​—Jean 10:16; Apocalypse 7:4.

Christ ahunzi hongo na ngangu ti lo biaku

⁹ Jésus ayeke mbeni pëpe senge zo so ako na ndo molenge ti lele, me lo yeke fadeso Gbia ti ngangu. A fa lo na ndo ti mbeni mbarata, so na yâ ti Bible aduti fä ti bira (aProverbe 21:31). Mbeti ti Apocalypse 6:2 atene: “Mbi bâ mbeni vulu mbarata, na lo so aduti na ndo ni ayeke na ngindi; na a mû couronne na lo; lo sigigi, lo hon na ngangu, na lo gue ti hon na ngangu” biaku. Nga, na ndo Jésus, wasungo psaume David atene: “Na Sion, fade L’Eternel ayâ sceptre ti ngangu ti Mo na gigi. Komande na popo ti awato ti Mo.”​—Psaume 110:2.

¹⁰ Kozo songo benda ti Jésus ayeke lani na ndo akota wato ti lo so ayeke ngangu mingi: Satan na adémon. Lo tomba ala na yayu, na lo bi ala na ngangu na sese. Teti so ala hinga so ngoi ti ala angbâ gi kete, asioni yingo so ayeke tuku ngangu ngonzo ti ala na ndo ti azo, ye so ayeke ga na kota vundu. Na yâ buku ti Apocalypse, a mû loro ti awakpengo na mbarata ota ti duti fä ti vundu so (Apocalypse 6:3-8; 12:7-12). Ti gue oko na aprophétie ti Jésus na ndo “fä ti singo ti [Lo], na ti nda ti ngoi so,” loro ti awakpengo na mbarata so aga na bira, kota nzara nga na kobela ti futi kodoro (Matthieu 24:3, 7; Luc 21:7-11). Kite ayeke dä pëpe so “gua” ni wala aye ti vundu ni ayeke ngbâ ti ga ngangu ahon ti kozo juska Christ ‘ahon na ngangu’ biaku, na futingo tanga ti bungbi ti aye ti Satan kue so lê abâ.a​—Matthieu 24:8.

¹¹ Ngangu ti komande ti Jésus tongana gbia asigigi nga polele na lege so lo bata kongregation ti aChrétien si a lingbi ti sala kusala ti lo ti fango tokua ti Royaume na ndo sese kue. Atâa kengo ndo ti ngangu so alondo na Babylone ti Kota (bungbi ti alege ti vorongo ti wataka ti sese kue) nga na angorogbia so ayeke na bibe ti kengo ndo, kusala ti fango tënë angbâ gi pëpe ti gue na li ni, me a mû ndo na mbeni lege so mara ni ade ti si lâ oko pëpe na yâ mbaï ti sese (Apocalypse 17:5, 6). Ye so afa tâ biani so Christ ayeke gbia!​—Psaume 110:3.

¹² Ye oko, mawa ni ayeke so mingi ti azo, so a yeke wara na popo ni ala kutu mingi so atene ala yeke aChrétien, ahinga oko pëpe so atâ ye so lê alingbi ti bâ pëpe si ayeke na peko ti akpengba ye so ayeke si na ndo sese laso. Ala yeke he même azo so ayeke fa tënë ti Royaume ti Nzapa (2 Pierre 3:3, 4). Ngbanga ti nyen? Ngbanga ti so Satan asala si bibe ti ala aga ziba (2 aCorinthien 4:3, 4). Biani, a sala ngu ngbangbo mingi awe, lo to nda ti kanga lê ti aChrétien ti yanga na lege ti yingo tongana ti so a yeke kanga lê ti zo na bongo, na même lo sala si ala zia kpengba beku ti Royaume.

Ala zia beku ti Royaume

¹³ Jésus atene kozoni so, na tapande ti sioni blé ti ngonda, a-apostat ayeke lï na yâ kongregation ti aChrétien na ala yeke handa azo mingi (Matthieu 13:24-30, 36-43; Kusala 20:29-31; Jude 4). Tongana ngoi ayeke hon, aChrétien ti yanga so ayeda na amatanga, asalango ye nga na afango ye ti apaïen, même ala hiri ni “aye ti aChrétien”. Na tapande, Noël alondo na amatanga ti vorongo ti anzapa ti apaïen tongana Mithra na Saturnale. Me ye wa apusu aChrétien ti yanga so ti yeda na amatanga so ayeke ti aChrétien pëpe? Mbeni kota bakari (The New Encyclopædia Britannica [1974]) atene: “Ziango na sese Noël, matanga ti dungo Jésus Christ, ague oko na ngoi so azo ni anze na kungo kiringo ti Christ fade fade.”

¹⁴ Bâ nga tongana nyen a ba yâ ti nda ti tënë “royaume”. Buku Fango nda ti Royaume ti Nzapa na siècle 20 ni (Angl.) atene: “Origène [wandara ti abungbi ti vorongo Nzapa na yâ ti ngu 300 ti si na ngu 399] asala kota ye mingi na yâ gbiango lege so aChrétien ayeke sala kusala na nda ti tënë ‘royaume’ ti tene a ga komandema ti Nzapa na yâ bê ti zo.” Gunda ti fango ye ti Origène aluti na ndo ye wa? Gunda ni aluti pëpe na ndo Mbeti ti Nzapa, me na ndo “akota tënë ti ndara ti azo nga na abango ndo ti sese so ayeke tâ nde mingi na abibe ti Jésus nga na ti kozo église.” Na yâ buku ti lo Gbata ti Nzapa (na Latin), Augustin ti Hippone (so aduti na fini na ngu 354-430) atene église mveni si ayeke Royaume ti Nzapa. Mara ti bibe so ague nde na Mbeti ti Nzapa, me a mû lege na aÉglise so atene ala yeke Chrétien ti wara ambeni tënë ti mabe so ala luti na ndo ni ti ga azo ti komande na sese so. Na ala komande tongaso teti ngu ngbangbo mingi, nga fani mingi ala komande gi na ngangu.​—Apocalypse 17:5, 18.

¹⁵ Ye oko, laso, a-église ayeke ko ye so ala lu (aGalate 6:7). A bâ so mingi ti a-église agirisa azo ti ala nga na ngangu ti komande ti ala. A yeke bâ mara ti aye ni so mingi na Poto. Mbeti-sango Christianity Today atene: “Fadeso a yeke [sala kusala] pëpe na akota da-nzapa so ayeke na Poto ti voro na Nzapa, me ala ga ada ti batango na angbele ye ti giriri, so gi atouriste si ayeke gue dä.” A yeke bâ mara ti aye ni so nga na ambeni kodoro nde ti sese. Ye so afa nyen na ndo kekereke ti abungbi ti vorongo ti wataka? Ala yeke tï ande gi ngbanga ti so nginza nga na azo ti mungo maboko na ala ayeke dä pëpe? Na tongana nyen ye so ayeke ndu ande tâ vorongo?

Leke tele teti kota lâ ti Nzapa

¹⁶ Mbeni hoto so ayeke sungba sungbango alingbi ti duti kpô teti ambeni ngoi. Me tongana guru na mburu ti wâ ayeke sigigi na li ni, a ye ti fa so hoto so ayeke ndulu ti sungba. Legeoko nga, akete kete tënë ti kengo ndo so ayeke wu na ndo abungbi ti vorongo ti wataka na yâ ti mingi ti akodoro ayeke mbeni ye so afa so nda ti ala aga ndulu awe. Na yâ ngoi kete, Jéhovah ayeke pusu bungbi ti aye ti poroso ti sese so ti bungbi oko ti sigigi na tënë ti pitan na lege ti yingo ti Babylone ti Kota na ti futi lo biani biani (Apocalypse 17:15-17; 18:21). A lingbi atâ Chrétien asala mbito ti ye so ayeke si nga na ambeni mbage ti aye ti “kota ye ti vundu” so ayeke ga ande na pekoni? (Matthieu 24:21). Oko pëpe! Fade ala yeke duti na anda ti tënë kue ti sala ngia na ngoi so Nzapa ayeke londo na tele ti azo ti sioni (Apocalypse 18:20; 19:1, 2). Bâ tapande ti ye so asi na Jérusalem ti giriri nga na aChrétien so alango lani kâ.

¹⁷ Tongana aturugu ti Rome angoro Jérusalem na ngu 66, bê ti aChrétien so lê ti ala akpengba na lege ti yingo adö pëpe nga mbito asala ala pëpe. Teti so ala yeke anzoni wamandango Bible, ala hinga so “lâ ti futingo Jérusalem aga awe.” (Luc 21:20). Ala hinga nga so Nzapa ayeke zi lege na ala ti kpe ti bata tele ti ala. Tongana Nzapa asala ni, aChrétien akpe (Daniel 9:26; Matthieu 24:15-19; Luc 21:21). Legeoko nga laso, ala so ahinga Nzapa na amä yanga ti Molenge ti lo alingbi ti ku hunzingo ti aye ti ngoi ti laso na mbito oko pëpe (2 aThessalonicien 1:6-9). Biani, tongana kota ye ti vundu asi, na ngia fade ala ‘yâ lê ti ala na li ti ala na nduzu, teti lâ ti zingo ala aga ndulu’ awe.​—Luc 21:28.

¹⁸ Na peko ti futingo Babylone ti Kota, na yâ kusala ti lo ti Gog ti Magog, fade Satan ayeke londo na kota bira na tele ti aTémoin ti Jéhovah so ayeke na siriri. Na londongo “tongana mbinda so akanga lê ti sese”, fade gbâ ti azo ti Gog ayeke duti na beku ti sö gi benda awe. Andâ, kota ye ti ngangu si ayeke ku ala! (Ezéchiel 38:14-16, 18-23). Bazengele Jean asû na mbeti: “Mbi bâ yayu a lungula; na mbi bâ vulu mbarata, na iri ti Lo so aduti na ndo lo ayeke Be-Ta-Zo na [Zo ti tenengo tâ tënë, Fini Mbuki, 2001] . . . épée so aza mingi ayeke na yanga ti Lo, si Lo lingbi pika amara na ni.” “Gbia ti agbia” so a lingbi ti hon lo na ngangu pëpe ayeke gbu ande koko ti awavorongo Jéhovah so ayeke be-ta-zo na lo yeke futi awato ti ala kue (Apocalypse 19:11-21). So pendere kongo nda ti ye si gango tâ tënë ti prophétie ti gbiango tele ti Christ ayeke duti ande!

¹⁹ Jésus ayeke duti ande “ye ti kpene na lê ti azo kue so amä na bê”. (2 aThessalonicien 1:10). Mo ye ti duti na popo ti azo so fade bê ti ala ayeke pika na ngia teti songo benda ti Molenge ti Nzapa? Tongaso, ngbâ ti kpengba mabe ti mo na ngbâ ti ‘bata, teti na l’heure ni so mo yeke ku pëpe, fade Molenge Ti Zo aga.’​—Matthieu 24:43, 44.

Ngbâ ti sala ye na hange

²⁰ “Ngbâa be-ta-zo na ti ndara” ayeke wa lakue azo ti Nzapa ti ngbâ ti duti na lê so akpengba na lege ti yingo na ti ngbâ ti sala ye na hange (Matthieu 24:45, 46, NW; 1 aThessalonicien 5:6). Mo yeke bâ na nene ni adango bê so a yeke mû na tâ ngoi ni? Mo yeke sala kusala na ni ti zia na aye na kozo ndo na yâ fini ti mo? Ngbanga ti nyen ti hunda tele ti mo pëpe na atënë so: ‘Mbi yeke na mbilimbili bango ndo na lege ti yingo so amû lege na mbi ti bâ so Molenge ti Nzapa ayeke komande fadeso na yayu? Mbi hinga so lo yeke ndulu ti ga na ngbanga ti Nzapa na ndo Babylone ti Kota nga na tanga ti bungbi ti aye ti sese ti Satan?’

²¹ Ambeni zo so abungbi na azo ti Jéhovah awe azia si bango ndo ti ala na lege ti yingo akiri na peko. Be-nze-pepe wala gbungo ngangu si atia ala tongana ti so atia ambeni kozo disciple ti Jésus? Agingo bê na ndo aye ti fini, nzara ti warango akungba ti mitele wala salango ngangu si ahon ndo ti ala? (Matthieu 13:3-8, 18-23; Luc 21:34-36). Peut-être a yeke ngangu na ambeni ti gbu nda ti ambeni tënë so “ngbâa be-ta-zo na ti ndara” asigigi na ni. Tongana mbeni oko ti aye so asi na mo, e wa mo mingi ti manda Tënë ti Nzapa na wâ ahon ti kozo nga ti toto na Jéhovah si mo kiri mo wara ngangu ti mo nga na songo so mo yeke na ni na lo kozo.​—2 Pierre 3:11-15.

²² A fa suma ti gbiango tele ti Christ na adisciple ti lo na ngoi so a hunda ti tene a kpengba ala. Laso, e yeke na mbeni ye so ayeke tâ kota mingi ti kpengba e: gango tâ tënë ti suma ti gbiango tele ti Christ nga na aprophétie mingi so ague oko na ni. Tongana e yeke bâ apendere gango tâ tënë ti aye so nga na aye so ayeke ga ande na pekoni, zia e nga e tene na bê ti e kue mara ti tënë ti bazengele Jean so: “Amen! Ga, Seigneur Jésus!”​—Apocalypse 22:20.

[Kete tënë na gbe ni]

Mo dabe mo na ni?

• Na peko ti ngu 1870, ye wa mbeni kete groupe ti awamandango Bible aga ti gbu nda ni na ndo kiringo ti Christ?

• Tongana nyen suma ti gbiango tele ti Christ aga tâ tënë?

• Guengo ti Jésus ti hon na ngangu asala nyen na ndo sese nga na kongregation ti aChrétien?

• Ye wa a lingbi e sala ti duti na popo ti ala so ayeke sö ande kuâ tongana Jésus ahon na ngangu biaku?

[Ahundango tënë ti manda na ye]

1. Na yâ sese ti laso, abango ndo nde nde wa azo ayeke na ni?

2. Na lege ti prophétie ti Daniel na ndo “lâ ti nda ni”, a mû lege gi na azo wa ti hinga nda ti ye na lege ti yingo?

3. Na peko ti ngu 1870, kpengba tâ tënë wa akozo wamandango Bible ahinga ni?

4. Tongana nyen Jéhovah akpengba mabe ti awakua ti lo ti laso?

5. Zo wa afa tele ti lo tongana Tongoro Ti Ndapelele? Lawa na tongana nyen lo londo?

6, 7. Na yâ suma ti gbiango tele ti Christ, Moïse na Elie aduti fä ti azo wa? Na ambeni kpengba nzene nzene tënë wa Mbeti ti Nzapa afa na ndo azo so?

8. Mara ti kusala wa adisciple ti Jésus so a sa yingo na ndo ti ala ayeke sala legeoko tongana Moïse na Elie? Ye ti pekoni ayeke nyen?

9. Apocalypse 6:2 afa so Jésus ayeke tongana nyen laso?

10. (a) Na lege wa sigingo ti Jésus ti gue ti hon na ngangu ato nda ni nzoni mingi? (b) Tongana nyen kozo songo benda ti Christ andu sese kue?

11. Tongana nyen mbaï ti kongregation ti aChrétien afa biani ngangu ti komande ti Christ tongana gbia?

12. Ngbanga ti nyen mingi ti azo ahinga pëpe singo ti Christ so lê alingbi ti bâ pëpe?

13. Bingo na lege ti yingo aga na aye wa na popo ti aChrétien ti yanga?

14. Tongana nyen afango ye ti Origène na ti Augustin afa tâ Royaume ni mbilimbili pëpe?

15. Tongana nyen aGalate 6:7 aga tâ tënë na ndo mingi ti aÉglise so atene ala yeke Chrétien?

16. Ngbanga ti nyen tënë ti ke so ayeke wu na ndo Babylone ti Kota aye ti fa mbeni ye?

17. Ngbanga ti nyen awakua be-ta-zo ti Jéhovah alingbi ti ku hunzingo ti aye ti ngoi ti laso na mbito oko pëpe?

18. Ye nyen ayeke si ande na peko ti kota bira ti Gog na tele ti awakua ti Jéhovah?

19. Tongana nyen songo benda ti Christ biaku ayeke ndu ande adisciple be-ta-zo ti lo? Na ye wa a lingbi ala sala ngangu ti sala ni fadeso?

20. (a) Tongana nyen e lingbi fa so e yeke bâ tâ na nene ni aye so Nzapa amû na lege ti “ngbâa be-ta-zo na ti ndara”? (b) Atënë wa a lingbi e hunda na tele ti e mveni?

21. Ngbanga ti nyen ambeni alingbi ti zia si bango ndo ti ala na lege ti yingo akiri na peko? Na ye wa a lingbi ala sala ni fade fadeso?

22. Gingo nda ti suma ti gbiango tele ti Christ nga aprophétie so ague oko na ni andu mo tongana nyen?

[Afoto na lembeti 16, 17]

Ye so ayeke gi fä lani aga tâ ye

[Afoto na lembeti 18]

Mo hinga aye so asi tongana Christ ato nda ti hongo na ngangu ti lo?