Atënë so azo ahunda

Na lege wa Samson so andu kuâ ti azo so lo fâ lani alingbi ti ngbâ mbeni Naziréen?

Na Israël ti giriri, mbeni zo na bê ti lo mveni alingbi ti mû zendo ti ga mbeni Naziréen teti mbeni wungo ti lango.a Mbeni oko ti aye so a gbanzi na zo so amû zendo ni ayeke so: “Lâ ni kue so lo bata tele ti lo nde teti L’Eternel, lo lingbi ga ndulu na kuâ pëpe. Tongana babâ ti lo, wala mama ti lo, wala ita ti lo ti koli, wala ita ti lo ti wali, akui, fade lo sala si lo mveni aga sioni teti ala pëpe.” Me ka tongana mbeni zo “akui fade fade ndulu na tele ti lo”? Ti ndu kuâ ti mbeni zo tongaso na mbana pëpe alingbi nga ti buba yâ ti dutingo ti lo tongana Naziréen. Ni la si a tene: “Lâ ti zendo ti lo kue ti kozoni aga senge senge.” Lo yeke lani na bezoin ti tene a sukula lo (alingbi na ye so Ndia ahunda) si lo to nda ti mbeni fini ngoi ti Naziréen ni.​—Nombre 6:6-12.

Ye oko, Samson ayeke lani mbeni Naziréen na mbeni lege so ayeke nde. Kozo ti tene a dü Samson, ange ti Jéhovah atene na mama ti lo: “Bâ, fade mo më ngo na mo dü molenge-koli; a lingbi rasoir andu li ti lo pëpe, teti molenge so ayeke Nazir teti Nzapa, même na yâ ti mama ti lo. Fade lo komanse ti zi azo ti Israël na tïtî aPhilistin.” (aJuge 13:5). Samson amû lani pëpe zendo ti duti Naziréen, teti a yeke Nzapa si azia lo tongana mbeni Naziréen na lo yeke ngbâ Naziréen teti lâ ti fini ti lo kue. Gbanzingo lege na ndungo mbeni ye so akui alingbi ti bâ lo pëpe. Tongana a bâ lo na a si so lo ndu mbeni ye so akui me na mbana pëpe, tongana nyen si lo lingbi ti kiri ti sala tongana Naziréen teti lâ ti fini ti lo kue so ato nda ni na ngoi so a dü na lo? Na bango ye ni na ngoi ni kâ, aye so a hunda na azo so ayeke aNaziréen teti lâ ti fini ti ala kue ayeke nde kete na aye so a hunda na ala so na bê ti ala mveni ala ga Naziréen teti mbeni ngoi.

E bâ akomandema ti Jéhovah na ndo azo ota so Bible atene ala duti aNaziréen teti lâ ti fini ti ala kue: Samson, Samuel nga na Jean Wabatizengo zo. Tongana ti so a fa fade kozo awe, a hunda lani na Samson ti fâ pëpe kuä ti li ti lo. Na ndo Samuel, molenge so ade lo më ngo ti lo pëpe, Hanna amû lani zendo so: “Fade mbi mü lo na L’Eternel na lâ ti fini ti lo kue, na fade rasoir andu li ti lo lâ oko pëpe.” (1 Samuel 1:11). Ti Jean Wabatizengo zo, ange ti Jéhovah atene lani: “Fade lo nyon vin wala sämba pëpe.” (Luc 1:15). Na ndo ni, “Jean mveni ayü bongo ti kuä ti chameau, na lo kanga ceinture ti poro na ngbonda ti lo; kobe ti lo ayeke akih na ngu-lavu ti yando.” (Matthieu 3:4). A ke lani pëpe na zo oko na popo ti ala ota so ti ga ndulu na tele ti mbeni zo wala nyama so akui.

Atâa so lo yeke mbeni Naziréen, Samson ayeke na popo ti ajuge so Jéhovah asoro lani ti sö azo ti Israël na maboko ti azo so agbu ye ti ala (aJuge 2:16). Na salango kusala so, lo ndu akuâ. Mbeni lâ, Samson afâ aPhilistin 30 na lo zi bongo kue na tele ti ala. Na pekoni, lo pika awato ti lo, “lo fâ ala mingi”. Lo wara nga mbeni fini bio ngbangba ti lele na lo fâ azo saki oko na ni (aJuge 14:19; 15:8, 15). Samson asala aye so kue na lege ti yengo dä ti Jéhovah nga na mungo maboko ti lo. Mbeti ti Nzapa asala tënë ti lo tongana mbeni koli so azia tapande ti mabe.​—aHébreu 11:32; 12:1.

So a tene Samson asuru yâ ti mbeni bamara use “tongana zo asuru yâ ti molenge ti ngasa”, aye ti tene so surungo yâ ti akete ngasa ayeke mbeni ye so ayeke sala ni na ndo kue na ngoi ti lo?

Mbeni ye so afa atene azo na ngoi ti ajuge ti Israël ayeke suru ka yâ ti akete ngasa ayeke dä pëpe. A-Juge 14:6 atene: “Yingo ti L’Eternel aga na ndo lo, na Samson asuru yâ ti bamara ni [use, NW ] legeoko tongana zo asuru yâ ti molenge ti ngasa; na ye oko ayeke na maboko ti lo pëpe.” Tënë so aye ti kpa mbeni hakango ye.

Tënë ‘lo suru yâ ni use’, nda ni alingbi ti duti use. Peut-être Samson asuru yâ ti bio ngbangba ti bamara ni use wala lo fâ yâ ti lo ndulu ndulu. Tongana tënë ni aye ti tene so lo suru yâ ti bio ngbangba ti bamara ni use, a lingbi ti yeda so zo ayeke na ngangu ti sala tongaso nga na mbeni kete ngasa. Ge so, hakango ye ni aye ti fa so fango mbeni bamara maboko senge ayeke ngangu oko pëpe na Samson ti sala ni, mo bâ mo tene bamara ni ayeke lani mbeni senge kete ngasa. Me ka tongana Samson afâ lani bamara ni ndulu ndulu? Tongana a yeke tongaso, a lingbi amû tënë ni gi tongana mbeni senge hakango ye. Nda ti hakango ye ni ayeke so yingo ti Jéhovah amû ngangu na Samson ti sala mbeni ye so ahunda mbeni ngangu so ahon ti zo. Atâa atënë ni ayeke tongana nyen, hakango ye so a tene na aJuge 14:6 afa so na lege ti mungo maboko ti Jéhovah, mbeni bamara so ayeke ngangu mingi alingbi ti sala sioni na Samson pëpe legeoko tongana mbeni molenge ti ngasa alingbi ti sala sioni pëpe na mbeni senge zo.

[Kete tënë na gbe ni]