Zia e pika kate teti so a hinga e tongana aChrétien!

“Lo so ayä iri ti lo mveni, zia lo yä iri ti lo na yâ Seigneur.”​—1 ACORINTHIEN 1:31.

FADE ti ninga mingi pëpe, mbeni zo so ayeke sala tënë na ndo aye so andu abungbi ti vorongo afa bibe so azo mingi ayeke na ni na ndo aye so ala mä na bê dä. Lo tene: “Na ndo tënë ti Nzapa, kota ye so amaï ayeke pëpe abungbi ti vorongo ni mveni, me lege so azo mingi ayeke bâ na atënë ti mabe ti ala.” Ti fa ambeni tënë na ndo ni, lo fa so “azo ayeke bi bê mingi pëpe na ndo atënë ti mabe ti ala.” Lo tene nga so azo mingi “amä na bê na Nzapa . . . me ala yeke bi bê na lo mingi pëpe.”

² Salango nzara ti ye ti yingo oko pëpe ayeke mbeni bibe so adö bê ti awamandango Bible pëpe (Luc 18:8). Na tongana a ndu mingi ti a-église, mara ti bibe so ayeke mbeni ye so azo alingbi ti ku tele ti ala na ni. A ninga awe so vorongo ti wataka ayeke handa azo na ala yeke zia ngonzo na bê ti ala (Apocalypse 17:15, 16). Ye oko, ti atâ Chrétien, bibe ti salango ye na bê use na ti salango ye na wâ pëpe so amû ndo ayeke ga na kpale. E lingbi pëpe ti dë dengo na mbage ti atënë ti mabe ti e na ti girisa wâ ti e teti kusala ti Nzapa nga teti tâ tënë ti Bible. Jésus agboto mê na ndo bibe so tongana lo yeke zingo na aChrétien ti Laodicée: “Mo yeke dê pëpe, wala wâ pëpe. Mbi ye si mo yeke dê wala wâ! . . . Teti mo yeke wâ gi kete kete.”​—Apocalypse 3:15-18.

Ti hinga dutingo ti e mbilimbili

³ Ti tiri na bibe ti salango nzara ti ye ti yingo oko pëpe, a lingbi aChrétien ahinga dutingo ti ala mbilimbili nga ala pika kate ndali ti dutingo ti ala ni. Teti so e yeke awakua ti Jéhovah nga adisciple ti Christ, e lingbi ti wara na yâ Bible aye so afa mara ti azo so e yeke. E yeke “atémoin” ti Jéhovah, nga na ngoi so e yeke fa ‘nzo tënë’ na wâ, e yeke “afon Nzapa na kusala.” (Esaïe 43:10; 1 aCorinthien 3:9; Matthieu 24:14). E yeke azo so ‘e ndoye tele na popo ti e’. (Jean 13:34). Atâ Chrétien ayeke azo so “akpengba na lege ti salango ye si ala hinga nzoni na sioni.” (aHébreu 5:14). E yeke tongana “asungo ye” na yâ sese so (aPhilippien 2:15). E yeke sala ngangu ti “tambela mbilimbili na popo ti aGentil”.​—1 Pierre 2:12; 2 Pierre 3:11, 14.

⁴ Atâ wavorongo Jéhovah ahinga nga ye so a lingbi ala duti ni pëpe. “Ala yeke ti sese so pëpe,” legeoko tongana Mokonzi ti ala, Jésus Christ, ayeke lani nde na sese so (Jean 17:16). Ala duti nde na “aGentil” wala azo ti sese so, so “bingo akanga bibe ti ala, na a kangbi ala na fini ti Nzapa”. (aEphésien 4:17, 18). Ni la, azo so amû peko ti Jésus ‘ake ye so ake Nzapa, na ala ke nzara ti ye ti sese, si ala bata tele ti ala, na ala sala mbilimbili, na ala bata tënë ti Nzapa na ngoi so’.​—Tite 2:12.

⁵ Hingango dutingo ti e mbilimbili nga songo ti e na Kota Gbia ti dunia kue ayeke pusu e ti “yä iri ti [e] na yâ Seigneur” Jéhovah (1 aCorinthien 1:31). A yeke mara ti yango-iri wa? Teti so e yeke atâ Chrétien, e pika kate ndali ti so Nzapa ti e ayeke Jéhovah. E yeke bata wango so: “Zia zo so ayä iri ti lo mveni ayä iri ti lo teti ye so, lo hinga nda ti tënë na lo hinga Mbi, so Mbi yeke L’Eternel so asala na lege ti nzobe, na fango ngbanga ti mbilimbili, na mbilimbili, na sese so.” (Jérémie 9:24). E yeke ‘yä iri’ ti e wala e yeke pika kate teti e yeke na matabisi ti hinga Nzapa nga ti duti azo so lo yeke sala kusala na ala ti mû maboko na ambeni zo nde.

Akpale ti batango nzoni bango ndo na ndo dutingo ti e

⁶ Ti tâ tënë ni, ti bata nzoni bango ndo na ndo dutingo ti e ti Chrétien so asala kangbi na popo ti e na tanga ti azo ayeke kete ye pëpe. Mbeni maseka-koli so babâ na mama ti lo ayeke aChrétien adabe ti lo na mbeni ngoi so lo woko na lege ti yingo: “Ngoi na ngoi, mbi mveni mbi bâ so mbi hinga pëpe nda ni so mbi yeke lani Témoin ti Jéhovah. A to nda ti fa tâ tënë na mbi ngbele ye so mbi de lani kete. Na mbeni ngoi mbi bâ ti mbi so tâ tënë ayeke gi mbeni ye so azo mingi ayeda na ni, mbeni bungbi ti vorongo so ayeke nga gi tongana atanga ni kue.” Ambeni zo alingbi ti zia si angia ti sese so, andokua ti asango nga na abango ndo so azo mingi ayeke na ni na so ague nde na ti Nzapa asala ngangu na ndo fini ti ala (aEphésien 2:2, 3). Ngoi na ngoi, ambeni Chrétien alingbi ti duti na kite na ndo ala mveni nga ala yeke gi ti bâ wala aye so ala yeke sala wala so ala zia na gbele ala ayeke biani kota ye.

⁷ A yeke sioni ti tene ngoi na ngoi mo bâ yâ ti asalango ye ti mo nzoni? Ên-ën. Dabe ti mo so bazengele Paul awa aChrétien ti ngbâ ti bâ tele ti ala mveni nzoni: “I gi bê ti i mveni ti bâ tongana i yeke na lege ti mabe biani; i tara bê ti i mveni.” (2 aCorinthien 13:5). Ge, bazengele ni ayeke wa aChrétien ti sala tâ ngangu ti hinga awokongo na lege ti yingo so ayeke maï na yâ tele ti ala, na ti sala aye kue so a hunda ti leke ni. Mbeni Chrétien so ayeke gi ti bâ wala lo yeke na yâ mabe alingbi ti hinga wala atënë ti yanga ti lo na asalango ye ti lo ague oko na atënë ti mabe ti lo. Ye oko, tongana e sala ni na lege ni pëpe, gingo ti bâ tele ti e mveni, so apusu e ti luti mingi gi na ndo “dutingo ti e mveni” nga ti bâ pëpe songo ti e na Jéhovah nga na kongregation ti aChrétien, ayeke duti ande senge senge na alingbi ti sala sioni na e na lege ti yingo.a E ye lâ oko pëpe ti tene ‘mabe ti e afuti legeoko tongana ngö so afuti na yâ ngu.’​—1 Timothée 1:19.

A bata e nde pëpe na akpale ni

⁸ A-Chrétien so ngoi na ngoi ayeke duti na kite na ndo ala mveni alingbi ti tene na bê ti ala so ala tï awe? Oko pëpe! Biani, bê ti ala ayeke dë ti hinga so mara ti abibe tongaso ayeke fini ye pëpe. Atémoin be-ta-zo ti Nzapa ti ngoi ti giriri awara mara ti aye ni so. Na tapande, bâ Moïse so afa na gigi mabe, dutingo be-ta-zo, mungo bê kue na Nzapa na mbeni lege so apika bê ngangu. Tongana a mû na lo mbeni kusala so na bango ni aye ti hon ndo ti lo, na mbito kete na bê, Moïse ahunda: “Mbi yeke zo nyen?” (Exode 3:11). A lingbi ti tene so kiringo tënë so ayeke lani na li ti lo ayeke so: ‘Mbi yeke ye oko pëpe!’ wala ‘mbi lingbi pëpe!’ Ambeni ye ayeke dä so asala si peut-être Moïse abâ so lo lingbi pëpe: Lo yeke ti mbeni mara so ayeke na ngbâa. Azo ti Israël ake lo. Lo yeke zo so yanga ti lo ane nengo (Exode 1:13, 14; 2:11-14; 4:10). Lo yeke berger, mbeni kua so azo ti Egypte ake ni na bê oko (Genèse 46:34). A yeke ye ti dongo bê pëpe so lo bâ tele ti lo so lo lingbi pëpe ti duti zo ti zingo azo ti Nzapa na gbe ti ngbâa.

⁹ Jéhovah adë bê ti Moïse na mungo na lo akpengba zendo use: “Biani, Mbi yeke na mo; na fade ye so ayeke fä si mo hinga Mbi mveni Mbi to mo; tongana mo sala si azo ni asigigi na Egypte awe, fade i sala na Nzapa na hoto so.” (Exode 3:12). Nzapa atene na wakua ti lo so asala mbito so ni Nzapa, ni yeke na lo lakue. Na ndo ni, Jéhovah atene so lo yeke zi azo ti lo biani. Ngbele ye na ngoi ni so juska laso, Nzapa amû mara ti azendo ti mungo maboko so. Na tapande, lo sala tënë so na mara ti Israël na lege ti Moïse tongana ala yeke ndulu ti lï na Sese ti Zendo: “Mo gbu ngangu, na bê ti mo akpengba dä, . . . teti L’Eternel Nzapa ti mo, Lo so ayeke gue na mo, fade Lo zia ti sala na mo pëpe, na Lo zia mo pëpe.” (Deutéronome 31:6). Jéhovah adë bê ti Josué nga: “Fade mbeni zo oko alingbi luti na gbele mo pëpe na lâ ti fini ti mo kue; fade Mbi yeke na mo . . . fade Mbi zia ti sala na mo pëpe, na Mbi zia mo pëpe.” (Josué 1:5). Nga, lo mû zendo so na aChrétien: “Fade Mbi zia ti sala na mo pëpe, na Mbi zia mo lâ oko pëpe.” (aHébreu 13:5). Dutingo na mara ti ngangu mungo maboko so asala si e pika kate ti e ti duti Chrétien.

¹⁰ Ngu 500 tongaso na peko ti Moïse, mbeni Lévite be-ta-zo so iri ti lo ayeke Asaph asû polele na mbeti kite so lo yeke na ni na ndo salango ye ti mbilimbili. Atâa so lo yeke sala kue ti sala na Nzapa na yâ ti atara so lo wara, Asaph abâ so ambeni zo so ayeke he Nzapa aga akota zo nga mosoro ti ala awu mingi. Ye so asala nyen na ndo Asaph? Lo tene: “Me mbi, gere ti mbi aye ti zene; a ngbâ kete, tambela ti mbi ague kirikiri. Teti bê asala mbi tënë ti azo ti fandara, tongana mbi bâ ye ti azo ti sioni awu mingi.” Lo to nda ti duti na kite na ndo nene ti dutingo wakua ti Jéhovah. Asaph awara bibe so: “Me mbi, mbi sala si bê ti mbi avulu senge senge, na mbi sukula maboko ti mbi si tënë ayeke na li ti mbi pëpe. Kamême ye asala mbi lakue.”​—Psaume 73:2, 3, 13, 14.

¹¹ Tongana nyen Asaph asala ye na gbele abibe so asala si li ti lo akpe kirikiri? Lo honde ndo ni? Oko pëpe. Tongana ti so e bâ na Psaume 73, lo fa ni na Nzapa na yâ sambela. Kota ye so agbian bibe ti Asaph ayeke guengo na Ndo ti Nzoni-kue ti temple. Na ngoi so lo yeke kâ, lo ga ti hinga so mungo tele kue na Nzapa ayeke nzoni ahon tanga ti aye kue. Na ngoi so lo kiri lo bâ aye ti yingo na nene ni, lo ga ti hinga so Jéhovah ake ye ti sioni nga na ngoi so alingbi Lo yeke se azo ti sioni (Psaume 73:17-19). Na oko ngoi ni, Asaph akiri akpengba lê ti lo na ndo matabisi ti dutingo wakua ti Jéhovah. Lo tene na Nzapa: “Mbi ngbâ na Mo lakue; Mo gbu maboko ti mbi ti koti. Fade Mo fa lege na mbi na tënë ti wango ti Mo, na nda ni, fade Mo kamata mbi na yâ gloire.” (Psaume 73:23, 24). Asaph akiri awara ngia na yâ Nzapa ti lo.​—Psaume 34:3.

Ala hinga dutingo ti ala nzoni mingi

¹² Mbeni lege ti hinga tâ nene ti dutingo ti e ti Chrétien ayeke ti bâ na ti mû tapande ti awavorongo Nzapa so aduti be-ta-zo, so atâa kengo ndo ala pika kate na ndo songo ti ala na lo. Bâ tapande ti Joseph, molenge ti Jacob. Na ngoi so lo de maseka, na lege ti handa, a kä lo tongana ngbâa na a gue na lo na Egypte, so ayô kilomètre ngbangbo mingi na babâ ti lo so ayeke wakua ti Nzapa, nga na mbeni dutingo so ayeke tâ nde mingi na pendere dutingo so ayeke na yâ sewa ti lo. Kâ na Egypte, Joseph ayeke pëpe na mbeni zo so alingbi ti mû wango ti Nzapa na lo, nga lo tingbi na akpale so azia nzoni salango ye nga na ziango bê kue so lo yeke na ni na Nzapa na gbele tara. Ye oko, lo sala tâ ngangu ti bata nzoni bango ndo na ndo dutingo ti lo ti wakua ti Nzapa, nga lo ngbâ be-ta-zo na ye so lo hinga lo tene ayeke na lege ni. Atâa na gbele kengo ndo, lo pika kate ti duti wavorongo Jéhovah, na lo sala kamene pëpe ti fa ye so ayeke na bê ti lo.​—Genèse 39:7-10.

¹³ Ngu 800 tongaso na pekoni, mbeni maseka-wali ti Israël, so a mû lo na ngbâa nga lo ga zo ti kua ti watongoro Naaman, zo ti Syrie, agirisa pëpe dutingo ti lo ti wavorongo Jéhovah. Tongana lo wara lege ni, na mbito pëpe, lo sala nzoni tënë ti Jéhovah na fango Elisée tongana prophète ti tâ Nzapa (2 aGbia 5:1-19). Ngu mingi na pekoni, atâa asioni salango ye so angoro lo, maseka Gbia Josias azia na sese mbeni kapa ti lekengo yâ ti aye so andu vorongo, lo leke peko ti temple ti Nzapa na lo fa lege na mara ni ti kiri na Jéhovah. Lo pika kate na ndo mabe nga na vorongo ti lo (2 Chronique, chapitre 34 na 35). Daniel na amba ti lo Hébreu ota so ayeke lani na Babylone agirisa lâ oko pëpe dutingo ti ala ti wakua ti Jéhovah, nga même na gbele salango ngangu nga na tara, ala bata be-biani ti ala. A yeke polele so ala pika kate ndali ti so ala yeke lani awakua ti Jéhovah.​—Daniel 1:8-20.

Pika kate ndali ti so a hinga mo tongana Chrétien

¹⁴ Awakua ti Nzapa so asala ye lani nzoni ngbanga ti so ala gi ti duti na nzoni bibe na ndo pendere dutingo ti ala na gbele Nzapa. Ti e, a yeke tongana nyen? Ti pika kate ndali ti so a hinga e tongana aChrétien andu aye wa?

¹⁵ Kozoni, a ndu dutingo na bê ti kiri singila teti so e yeke na popo ti azo so ayô iri ti Jéhovah, ayeke wara deba nzoni ti lo nga so lo yeda na ala. Nzapa ahinga biani azo so ayeke ti lo. Bazengele Paul, so aduti lani na fini na mbeni ngoi so aye ti wusuwusu ayeke mingi na ndo tënë ti vorongo, asû na mbeti: “Seigneur ahinga ala so ayeke ti Lo.” (2 Timothée 2:19; Nombre 16:5). Jéhovah ayeke pika kate na ndo ala so “ayeke ti Lo”. Lo tene: “Zo so andu mo, lo ndu lê ti [Mbi] mveni.” (Zacharie 2:8). Biani, Jéhovah andoye e. E nga, a lingbi songo so e yeke na ni na lo aluti na ndo kota ndoye ti e teti lo. Paul atene: “Tongana mbeni zo andoye Nzapa, Nzapa ahinga zo so.”​—1 aCorinthien 8:3.

¹⁶ A lingbi amaseka so a dü ala na yâ sewa ti aTémoin ti Jéhovah agi ti bâ wala dutingo ti ala ti Chrétien akpengba mingi ahon ti kozo na lege ti songo ti ala mveni na Nzapa. A lingbi ala zia bê ti ala gi na mabe ti ababâ na mama ti ala pëpe. Na ndo wakua oko oko ti Nzapa, Paul asû na mbeti: “Lo luti wala lo tï, a yeke ngbanga ti mveni ti lo” wala ye ni abâ gi mveni ti lo. Ni la, lo ngbâ ti tene: “Fade e oko oko kue akiri tënë ti e mveni na Nzapa.” (aRomain 14:4, 12). Biani, gi senge mungo peko ti babâ na mama ti mo alingbi pëpe ti bata mbeni kpengba songo so aninga na popo ti mo na Jéhovah.

¹⁷ Na yâ mbaï ti azo, a yeke wara mbeni molongo ti atémoin ti Jéhovah na yâ ti mbeni ngoi so a sala ndulu na ngu 6 000 tongaso. A to nda ni na be-ta-zo Abel ti si na aTémoin “mingi so asi singo” ti ngoi ti e nga na gbâ ti awavorongo Jéhovah so ayeke wara ande fini ti lakue lakue (Apocalypse 7:9; aHébreu 11:4). E yeke afini zo na yâ yongoro molongo ti awavorongo Nzapa be-ta-zo so. So tâ pendere ye ti héritier ti yingo si e yeke na ni!

¹⁸ Dutingo ti e ti Chrétien andu nga molongo ti anzoni salango ye so afa atene e yeke aChrétien. A yeke “Lege” ni, oko lege so asala si fini ti e aga nzoni nga anzere na bê ti Nzapa (Kusala 9:2; aEphésien 4:22-24). A-Chrétien, “i tara ye kue; i zia bê ti e na ye ti nzoni”! (1 aThessalonicien 5:21). E hinga nzoni awe kota kangbi so ayeke na popo ti tâ vorongo ti aChrétien na sese so ague yongoro na Nzapa. Jéhovah azia kota kangbi so ayeke polele na popo ti tâ vorongo na vorongo ti wataka. Na lege ti prophète ti lo Malachie, lo tene: “Na lâ ni kâ, fade i kiri i bâ zo ti mbilimbili nde na zo ti sioni nde, lo so asala kusala ti Nzapa nde na lo so asala kusala ti Lo pëpe nde.”​—Malachie 3:18.

¹⁹ Te ti so ti pika kate ti e na yâ Jéhovah ayeke tâ kota ye mingi na yâ sese so ayeke kirikiri, ye wa alingbi ti mû maboko na e ti ngbâ ti pika kate na ndo Nzapa ti e nga ti bata dutingo ti e ti Chrétien nzoni? E yeke wara anzoni wango so ayeke mû ande maboko na e na yâ article ti peko. Na ngoi so mo yeke bâ aye ni, mo lingbi ti hinga tënë so biani: Atâ Chrétien ayeke duti ande lâ oko pëpe azo so ayeke bi bê pëpe na aye ti yingo.

[Kete tënë na gbe ni]

Mo dabe mo na ni?

• Tongana nyen aChrétien alingbi ti ‘yä iri ti ala na yâ Jéhovah’?

• Ye wa mo manda na ndo tapande ti Moïse na Asaph?

• Azo wa so Bible asala tënë ti ala apika kate na yâ kusala ti ala teti Nzapa?

• Ti pika kate na ndo dutingo ti e ti Chrétien andu aye wa?

[Ahundango tënë ti manda na ye]

1. Bibe wa so ayeke polele azo ayeke na ni na mbage ti abungbi ti vorongo?

2. (a) Ngbanga ti nyen a yeke ye ti dongo bê pëpe so azo ayeke sala nzara ti aye ti yingo pëpe? (b) Kpale wa salango nzara ti ye oko pëpe alingbi ti ga na ni na atâ Chrétien?

3. Aye wa so ague oko na dutingo ti ala aChrétien alingbi ti pika kate ngbanga ni?

4. Tongana nyen si mbeni wavorongo Jéhovah alingbi ti hinga ye so a lingbi lo duti ni pëpe?

5. Wango so ahunda ti ‘yä iri ti e na yâ Jéhovah’ aye ti fa nyen?

6. Ngbanga ti nyen ti ambeni zo a yeke ngangu ti bata nzoni bango ndo na ndo dutingo ti ala ti Chrétien?

7. (a) Nzoni kode wa alingbi na awakua ti Nzapa tongana ala yeke gi ti bâ tele ti ala mveni? (b) Ye oko, kpale ni alingbi ti londo na mbage wa?

8, 9. (a) Tongana nyen Moïse afa kite so lo yeke na ni na ndo ti lo mveni? (b) Tongana nyen Jéhovah akiri tënë na Moïse na ndo kite so? (c) Atënë ti dengo bê so Jéhovah atene andu mo tongana nyen?

10, 11. Ye nyen amû maboko na Asaph ti leke bango ndo ti lo na ndo nene ti kusala ti lo teti Jéhovah?

12, 13. Fa tapande ti azo ti yâ ti Bible so apika kate ti ala ndali ti songo ti ala na Nzapa.

14, 15. Pikango kate ndali ti so a hinga e tongana aChrétien andu aye wa?

16, 17. Ngbanga ti nyen aChrétien kue, atâa amaseka wala ambakoro, alingbi ti pika kate teti ye ti héritier ti ala ti yingo?

18. Tongana nyen anzoni salango ye ti e akangbi e na sese so?

19. Ye wa atâ Chrétien ayeke tï ande na yâ ni lâ oko pëpe?

[Foto na lembeti 14]

Teti mbeni ngoi, Moïse ayeke na bibe ti kite na ndo lo mveni

[Afoto na lembeti 15]

Awakua ti Jéhovah mingi ti giriri apika kate teti dutingo ti ala so ayeke nde